|bRevānī:_Ġazel_Bölümü_A|PELİF|p1
1. a. Mülk·i ġam içre göñül çün didiler şāh saña
b. Nevbet·i şāhī yeter āh·ı seḥer-gāh saña
2. a. Gice gelmeyecegin ṣoḥbete ey dil bilürüz
b. Hele var gör ki ne yüzden ṭoġar ol māh saña
3. a. Cevr ile ʿāşıḳuñun çünki tamām itdüñ işin
b. Nesne eksüklügini virmesün Allāh saña
4. a. Olmasañ ḥüsn ilinüñ sen güzelüm pādişehi
b. Mihr ü meh ḳurmaz idi ẖayme vü ẖar-gāh saña
5. a. Āh u vāh ile ʿaceb geçdi Revānī günümüz
b. Ne ̮idelüm ne ̮eyleyelüm āh baña vāh saña
|p2
1. a. Çatma ḳaftan gey virür zīnet benüm cānum saña
b. Yaraşur ḳaplan derisi taḳye arslānum saña
2. a. Pādişehsin ẖaṭṭ·ı ʿanber-bāruñı eyle tırāş
b. Bir ḳarınca dil uzatmasun Süleymānum saña
3. a. Zülf·i müşkīnüñ ḳulaġuña egildügi kim
b. Söylemek ister benüm ḥāl·i perīşānum saña
4. a. Pādişāhum ṣanma feryād eylerem kūyuñda ben
b. Salṭanat kūsın çalar bu āh u efġānum saña
5. a. Meclisüñde sūz·ı şevḳumdan beyān itmek diler
b. Aġız açduġı budur çāk·i girībānum saña
6. a. Ṣalınup gögsüñ gerersin çün Revānīyi görüp
b. Ol sebebden ben didüm serv·i ẖırāmānum saña
|p3
1. a. Ḳaşlaruñ görüp meh·i nev oldı ser-gerdān saña
b. Ḫūblar içre begüm yetmez mi bu ʿunvān saña
2. a. Degme bir meh-rūy ile daʿvā·yı ḥüsn itmek neden
b. Ṣaḳın ey āyīne bir gün görinür cānān saña
3. a. Peyk·i āhumla yarışmaḳ ister iseñ ey ṣabā
b. Ḳaç öñümden vireyin bir oḳ atım meydān saña
4. a. Oḳıyup bir gün şikeste ẖāṭırumı yazmaduñ
b. Ḥālümi bir bir dimişken defter ü dīvān saña
5. a. Mevsim·i güldür ḳo zühdi gül-sitānda ʿayş içün
b. Muntaẓır durur Revānī cümle·i yārān saña
|p4
1. a. Yalvarup kime ḳul olsam ol emīr olmaz baña
b. Ḳanḳı şeyẖe ben mürīd olsam o pīr olmaz baña
2. a. Ayaġum almaḳ diler sāḳī daẖi devrān gibi
b. Cām·ı meyden ġayrı kimse dest-gīr olmaz baña
3. a. Begligüm var cām·ı meyle gūşe·i ẖum-ẖānede
b. Andan özge sāḳıyā tāc u serīr olmaz baña
4. a. Medḥini ḳo nāfenüñ açma ḳutuyı ey ṣabā
b. Ḫāk·i pāyı gibi çün misk ü ʿabīr olmaz baña
5. a. İrdi naẓmum gerçi Selmāna Revānī āh kim
b. Terbiyetler eyleyüp kimse ẓahīr olmaz baña
|p5
1. a. Göz yaşıyle āhuma baḳmaz ne ̮içün ol bī-vefā
b. Ey göñül merġūb olur her yerde çün āb u hevā
2. a. Ey feraḥ şol ġam diyen yıḳdı benüm göñlüm evin
b. Ḳandasın biˀllāhi gel ehlen ve sehlen merḥabā
3. a. Cān ṣatup derdüñi alduḳ ʿışḳ bāzārında kim
b. Umaruz şekker lebüñden dōstum şerbet bahā
4. a. Utanur ben bī-nevā ile muṣāḥib olmaġa
b. Hey nice ʿār itmesün ol pādişeh ben bir gedā
5. a. Ol ṭabīb·i cān buyurmaz leblerinüñ şerbetin
b. Bir uñulmaz derde olmışdur Revānī mübtelā
|p6
1. a. Mey içmemek olur mı o ġonca-dehān ola
b. Meclisde hem-ḳadeḥ leb·i şekker-feşān ola
2. a. Altun piyāle ile gümiş tebsi ay u gün
b. Bezmümde sāḳī ki ̮ol meh·i nā-mihr-bān ola
3. a. Zāhid şarāba tevbe mi olur bu demde kim
b. Tāze bahār ola gül ola gül-sitān ola
4. a. Uṣlan göñül ṭolaşma görüp leylī zülfini
b. Mecnūn gibi cihānda yeter dāstān ola a
5. a. Ḥüsnüñ zamānıdur ne diyem şimdi ben saña
b. Ḳadrin Revānīnüñ bilesin bir zamān ola
|p7
1. a. Rind iseñ meyli ḳoma cām·ı muṣaffādan yaña
b. ʿĀrif iseñ götür ayaġı Ġalaṭadan yaña
2. a. Mülk·i Rūm içre fireng-istānı görmek isteyen
b. Seyre geçsün dāˀimā ol şehr·i raʿnādan yaña
3. a. Şol fireng oġlanların ṣōfī göreydüñ bir naẓar
b. Göz açup baḳmaz idüñ cennetde ḥavrādan yaña
4. a. Ṣanuram oldı muḳārin gökde Pervīne hilāl
b. Keştīye binüp güzeller gitse deryādan yaña
5. a. Dīn yaġmasın ider kāfir-beçe maḥbūblar
b. Ṣaḳınuñ varmañ müselmānlar kilīsādan yaña
6. a. Bu felek anuñ mücellā ḳaṣrıdur kim āfitāb
b. Seyr içün revzen açupdur aña dünyādan yaña
7. a. Ḥūr u ġılmān ile pür olmış Revānī her ṭaraf
b. Baḳmaz içine giren firdevs·i aʿlādan yaña
|p8
1. a. Leblerüñ şīrīn ruṭabdur kim didi ʿunnāb aña
b. Dadı yoḳ öykünür ise dōstum cüllāb aña
2. a. Gūşe·i mey-ẖāneyi dünyāya virmez gerçi dil
b. Ḳorḳarın ayaḳ ṭolar bir gün şarāb·ı nāb aña
3. a. Devr·i ḥüsnüñde ʿaceb mi ḳaşuñı ḳılsañ tırāş
b. Kaʿbedür ḳıblem yüzüñ ḥācet degül miḥrāb aña
4. a. Yiri gögi ayaġı altına aldı ey göñül
b. Görmedi bir beñzerin ẖūrşīd·i ʿālem-tāb aña
5. a. Kendü bildügin ider uyup Revānī ʿışḳa dil
b. Kimsenüñ sözin işitmez ne ̮eylesün aḥbāb aña
|p9
1. a. Āfet·i devr·i zamān olmaġa ol māh-liḳā
b. Geydi Pervīn mis̲āli beñek altunlu ḳabā
2. a. Fitne·i devr·i ḳamer ẖāl·i ruẖ·ı dil-berdür
b. Ḳad·i bālāsı ile zülfi belā üzre belā
3. a. Gün gibi cāme·i zerbeftüñe ẖıdmetre idi
b. Güzelüm māh·ı nev olmasa idi yengi yaḳa
4. a. Hīç güzellerde maḥabbetden es̲er görinmez
b. Ḳanı bir kimse ki vardur diye beglerde vefā
5. a. Zülf ü çeşmi ile ḳaddin göreli cānānuñ
b. Dil ü cān ile Revānī ideyin aña duʿā
|p10
1. a. ʿĀşıḳ olmışdur güneş ey ruẖları raʿnā saña
b. Ṭolanur dünyāyı her gün bulımaz hem-tā saña
2. a. Altun üsküfle ṭurup her meclise raʿnālanur
b. Gör ne yüzden öykünürmiş şemʿ·i bezm-ārā saña
3. a. Bezm içinde gördi sāḳīlıḳ idersin ey perī
b. Aġzın eydi ḳaldı ḥayrān sāġar u ṣahbā saña
4. a. ʿAyşdur gül yüzlülerle baña gül-şen gūşesi
b. Zāhidā ḥūrīler ile cennetüˀl-meˀvā saña
5. a. Başını ṭaşdan ṭaşa urur görüp aġladuġuñ
b. Acıduġından Revānī bu yedi deryā saña
|p11
1. a. Sebz ẖaṭ kim hem-dem olmışdur leb·i cānān aña
b. Ḫıẓrdur ki ̮olmış müyesser Çeşme·i Ḥayvān aña
2. a. Kūyuñuñ bāġını tāze ṭutmaġa ey serv·i nāz
b. Kirpügüm ebr·i siyeh eşküm durur bārān aña
3. a. Gördi dil-berden ṣurāḥī būseler alur ḳadeḥ
b. Bezm içinde ḳaldı aġzın açuban ḥayrān aña
4. a. Ṣaḥn·ı gül-şende biten ṣanma ḳızıl gül bergidür
b. Dāġ·ı bülbül penbesidür kim bulaşmış ḳan aña
5. a. Şemʿ·i bezmüñ ey kemān-ebrū raḳībüñ cānına
b. Gūyiyā bir ṭirdür kim şuʿlesi peykān aña
6. a. Misk diyü ẖāk·i pāyın hā ṣatar gül-şende bād
b. Yaraşur gülden Revānī keffe·i mīzān aña
|p12
1. a. Geh cefā geh cevr ü geh nāz oldı çünkim ẖū saña
b. Bī-vefā dil-dār imişsin dōstum yāhū saña
2. a. Ḳıble ḥaḳḳı ṭoġruyam yoluñda ben līkin raḳīb
b. Egri sözler söylemişdür ey kemān-ebrū saña
3. a. Gördi zülfin öpdügüm ẖışm eyleyüp dil-ber didi
b. Varasın ögünesin ḳalur ise ger bu saña
4. a. Göz ḳızardup ṭaġlara düşmiş yürür Mecnūn gibi
b. Ey ṣaçı Leylī meger ʿāşıḳ durur āhū saña
5. a. Ola cismümde benüm her üstüẖānum māh·ı nev
b. Ger olam ey māh-rū bir gice hem-pehlū saña
6. a. Devr·i ḥüsninde Revānī şād ü ẖandānsın bu gün
b. Luṭf yüzinden ṭoġupdur beñzer ol meh-rū saña
|p13
1. a. Ay u gün görüp cemālin oldı ser-gerdān aña
b. Kim aña ḥayrān degül ben olmışam ḥayrān aña
2. a. Yazalı yāruñ berāt·ı ḥüsnine ḳaşı nişān
b. Geldi dil-berler içinde ẖaylīce ʿunvān aña
3. a. Yüz çevürmez ey kemān-ebrū ḳılıcuñdan göñül
b. Oḳlaruñla sīne çün oldı çıbuḳ ḳalḳan aña
4. a. Ḥüsni artar her ḳaçan kim yār zülfin şāneler
b. Ḫaylī şān virmiş durur zülf·i ʿabīr-efşān aña
5. a. ʿĪd·i vaṣlum isteyenler terk·i cān itsün dimiş
b. Öleyin öñinde anuñ olayın ḳurbān aña
6. a. Ḥüsnüñ eyyāmında yād itdüñ Revānī bendeñi
b. Pādişāhum çoḳ degül mi bu ḳadar iḥsān aña
|p14
1. a. Güneşi ṣanma felek gösterür ey māh saña
b. ʿArẓ ider ʿāşıḳ olup mihrin her gāh saña
2. a. Gice gelmeyecegin ṣoḥbete ey dil bilürin
b. Hele var gör ki ne yüzden ṭoġar ol māh saña
3. a. Göricek yāri göñül derd ile bir āh itdüñ
b. Ne ̮eylesün bunca belā ile bu bir āh sānā
4. a. Yoḳ durur ẕerrece göñlüñde teraḥḥum es̲eri
b. Ne ʿaceb ẖāṣṣa virmiş durur Allāh saña
5. a. Ḳaldı fürḳatde Revānī iremez vuṣlatuña
b. Niçe yol ṭutar ise bulmadı hīç rāh saña
|p15
1. a. Cān mürdelerin nuṭḳ·ı lebüñ ideli iḥyā
b. ʿĀlemde unudıldı ḳamu muʿciz·i ʿĪsā
2. a. Bir dem ki ola nāz ile o serv ẖırāmān
b. Ḥayretde ḳalur görse revān Sidre vü Ṭūbā
3. a. Bostān·ı cemāl içre boyuñ serv görelden
b. Baş açdı vü raḳṣ urdı olup vālih ü şeydā
4. a. Firdevs·i cināna heves itmez göñül ey dōst
b. Bir dem olalı cennet·i kūyuñ aña meˀvā
5. a. Dil ẓulmet·i zülfüñde ḳalup bulmaz idi rāh
b. Göstermese Mūsā gibi vechüñ Yed·i Beyẓā
6. a. İtüñ yerini alsa raḳībüñ ne ʿaceb kim
b. Bu ʿaks·i felekdür gelür aʿlā yerine ̮ednā
7. a. Çün cān u göñül virdi viṣālüñe Revānī
b. Hecr odına ṭap yaḳ anı liˀllāhi taʿālā
|p16
1. a. Ḫūblar ebrūların ʿarẓ itdügi budur saña
b. Dimek isterler ḳuluñuz alnı tamġalu şehā
2. a. Dāġlarla lāle-veş zeyn olsa sīnem ġam degül
b. Her biri bir lāle-ẖaddüñ yād-gārıdur baña
3. a. Ey ṣanem hecrüñ beni şol deñlü ḳılmışdur ẓaʿīf
b. Varamazdum kūyuña ger sāyem olmasa ʿaṣā
4. a. Ne ḳara gün idi kim gördüm yüziñde ẖālüñi
b. Ne belā idi bu kim ḳaddüñe oldum mübtelā
5. a. Cevrini yārun çekerdüm ẓulm·i aġyār olmasa
b. Ġam yimezdüm ben Revānī ger bir imişse belā
|pBĀˀ
|p17
1. a. Eyleme ḥüsnüñ ʿarūsı yüzine zülfüñ niḳāb
b. Bī-tekellüf olalum olmasun ortada ḥicāb
2. a. Varımaz başa senüñle ḥüsn daʿvāsın ḳosun
b. Aġrıdur ẖalḳuñ hem-ān yoḳ yire başın āfitāb
3. a. Dāġ·ı ʿışḳuñ sīnede bir ẖaymedür ġam şāhına
b. Kim aña her yañadan çekdüm eliflerden ṭınāb
4. a. Ṭāḳ·ı Kisrāyı ṣorarsañ yüri var ẖum-ẖāneye
b. Cām·ı Cem sırrını bilmek ister iseñ iç şarāb
5. a. Ḳorḳarın ölür Revānī ḳahr ile ey bī-vefā
b. Niçe bir cevr ü cefā vü niçe bir nāz u ʿitāb
|p18
1. a. Yollar üstinde düşüp yatmazdı her-giz āfitāb
b. Cām·ı mihrüñden senüñ ger olmasa mest·i ẖarāb
2. a. Ṣubḥ-dem gördüm maḥalleñde saña ṣunmaġ içün
b. Bir ḳızıl gül almış ey dil-ber eline āfitāb
3. a. Pādişāhum ḳaṣruñı eflāke beñzetsem ne ̮ola
b. Kim yüzüñdür anda māh u āteşīn āhum şihāb
4. a. Baña ḳan yutdurduġın meclisde inkār itmese
b. Sāḳī·i gül-çihrenüñ yüzine urmazdı şarāb
5. a. Yār gelmezse Revānī meclise olma melūl
b. Hem-ḳadeḥ olmaz gedāya ẖusrev·i ʿālī-cenāb
|p19
1. a. Zehri şitānuñ eylemedin cismüñüz ẖarāb
b. Elden ḳomañ şarābı kim tiryākdür şarāb
2. a. Ṣovuḳdan ol ṣanem ne ̮ola dāˀim görinmese
b. Ḳış günlerinde az görinür çünki āfitāb
3. a. Luṭf eyle yāri gey ṣaḳın üşütme ey ṣabā
b. Raḥm eyle ḳılma cānına ʿāşıḳlaruñ ʿaẕāb
4. a. Zāhid bu dem şarāba nice tevbe eyleyem
b. Ṣovuḳda eylemez kişi āteşden ictināb
5. a. Ṣarsa Revānī her gice pehlūsına seni
b. Sermādan aña gelmez idi hīç ıẓṭırāb
|p20
1. a. Rengīn lebüñden urmasa dem ey püser şarāb
b. Olur mı idi laʿl gibi muʿteber şarāb
2. a. Zindān·ı şīşe içre kim eylerdi anı ḥabs
b. Uġurlamasa reng lebüñden eger şarāb
3. a. Ṣırça sarāy içinde yatur ʿizz ü nāz ile
b. İḳlīm·i ʿayşa ẖusrev olupdur meger şarāb
4. a. Her rind ẖācedür ḳadeḥ·i sīmdür ṣadef
b. Deryā-dil ol ki ḳıldı abābı güher şarāb
5. a. Yād itdügince laʿlüñi dil kendüden gider
b. Eyler Revānī her kişiyi bī-ẖaber şarāb
|p21
1. a. Nev-bahāruñ ey ṣabā bizden elin ayaġın öp
b. Ṭobuġuna yüzüñi gözüñi sür başmaġın öp
2. a. Ġonca·i nesrīnleri dizmiş bir ince iplige
b. Boynına aṣmış temāşā eyleyüp boġmaġın öp
3. a. Güllerin başı bezin almaḳ dilerseñ ey ṣabā
b. Bāġ·ı ḥüsnin seyr ider gibi olup yaşmaġın öp
4. a. Ḳılmaḳ isterseñ cihānı misk ü ʿanberden ṭolu
b. Zülf·i müşkīnin ḳoẖulayup yüri ṣaç baġın öp
5. a. Cām·ı laʿli ger naṣīb ola Revānī nūş idüp
b. Şekkerin çıḳar dilin aġzuña al ṭudaġın öp
|p22
1. a. Āsitānında yaturdum üstüme geldi ḥabīb
b. Ḫasta ṣaġalmalu olsa ḳapuya gelür ṭabīb
2. a. Ben didüm cānā senüñ kendü ġarībüñdür göñül
b. Yüzüme baḳup gülüp dil-ber didi vaˀllāh ġarīb
3. a. Ol şeh·i ẖūbāna öykünmek diler her gün güneş
b. Geh geyer zerrīn külāhın geh geyer altunlu şīb
4. a. Dīnüm īmānum disem zülfüñ ṭolaşmasun dile
b. Kāfir·i ʿışḳ olana ḥācet degül her-giz ṣalīb
5. a. Ḳanı ol dem kim Revānī yüz sürem ayaġına
b. Degme bir üftādeye devlet naṣīb olmaz naṣīb
|p23
1. a. Ol ḳamer-ṭalʿat yüzinden açdı çün müşkīn niḳāb
b. Ṣanasın kim ebr içinden ẓāhir oldı āfitāb
2. a. Ẕerrece nūr u ẓıyā virmezdi her-giz ʿāleme
b. Pertev·i ḥüsnüñden ey meh irmese ẖūrşīde tāb
3. a. Yer yüzine luṭf idüp ol meh ḳadem baṣduġına
b. Reşk idüp dil çaġırur yā leytenī küntü türāb
4. a. Ol ṭabīb·i cāndan em ṣordum dil·i mecrūhuma
b. Aġzuma sögdi leb·i laʿli zihī şāfī cevāb
5. a. Gizlenüp gündüz giceyle ẓāhir olduġı bu kim
b. Gün yüzüñ envārına ṭāḳat getürmez āfitāb
6. a. Ṣoḥbet·i vaṣluña cānā irmedin bu ẖasta dil
b. Yandı firḳat odına döne döne hem-çün kebāb
7. a. Ḫāk idüp cānā ġam·ı ʿışḳuñ Revānī ẖastayı
b. Ḳodı āteş sīnede başda belā vü gözde āb
8. a. Sen Süleymān·ı zamāna ḥālümi ʿarẓ itmege
b. Benden öñ bu hüdhüd·i cān irmege eyler şitāb
|pTĀˀ
|p24
1. a. Her kime olsa sen güzelüm ḳılma iltifāt
b. Gül iki yüzlü olduġıçün oldı bī-s̲ebāt
2. a. Şahīn baḳışlu yār göñül murġın avladur
b. Şeh-bāzdur gözi aña ebrūları ḳanat
3. a. Devr·i ẖatuñda leblerüñi kim görürse dir
b. Ḳonur mürekkeb içine ʿādet durur nebāt
4. a. Bu naṭʿ·ı ʿışḳ içinde göñül beydaḳını sür
b. Ferzānalıḳlar eyle ṣaḳın olma şāh-māt
5. a. Ḫalḳ·ı cihān ölümlüsidür tāze sözlerüñ
b. Viren Revānī naẓmı durur anlara ḥayāt
|p25
1. a. Çünki mey içme naṣīb oldı bize rūz·ı Elest
b. Gele ey ṣōfī senüñle olalum bāde-perest
2. a. Seng·i ṭaʿn ile beni ṭaşlama ey zāhid·i ẖuşg
b. Yüri sen şīşe·i nāmūsumuza virme şikest
3. a. Yār ṣatmaz ne ̮idelüm vaṣlı metāʿını bize
b. Naḳd·i cānı virürüz gerçi aña dest-be-dest
4. a. Yine āvāze·i reftār ile ol ḳadd·i bülend
b. Serv·i bālāyı çemenlerde bu dem eyledi pest
5. a. Sāḳıyā cām·ı maḥabbetden olupdur ser-ẖōş
b. Sen Revānīyi
b. dem ṣanma mey·i nāb ile mest
|p26
1. a. Eyledi serv ü çınārı ḳāmet·i bālāsı pest
b. Rāst sözdür bu ki dirler dest-ber-bālā·yı dest
2. a. Şimdi ṭaʿn itmek neden ser-ẖōş görüp ʿāşıḳları
b. ʿIşḳ cāmı anları mest itdi çün rūz·ı elest
3. a. Başını kesseñ kesilmez ruẖlaruñdan dōstum
b. Görmedüm zülfüñ gibi bir hindū·yı āteş-perest
4. a. ʿĀşıḳ·ı şūrīdeler ḥālini ṣorma zāhidā
b. Bir bölük üftādelerdür kimi bengī kimi mest
5. a. Çün Revānī her güzel bir pāresin mirˀāt ider
b. Ḫāṭıruñ ẖōş ṭut eger dil şīşesi bulsa şikest
|p27
1. a. Ḳaşuñı çatma hilāle aña kim dir sitem it
b. Ḳuluñ eksüklügine ḳalma begüm sen kerem it
2. a. Ayaġı tozına biz nāfe·i müşki ṣatduḳ
b. Yüri ey bād·ı ṣabā var tüyince ḳadem it
3. a. Sāḳıyā ḳullaruñ unutma güzel başuñ içün
b. Bir ayaḳ cām ile her bendeñi Cemşīd ü Cem it
4. a. Müddeʿīnüñ güzelüm deftere ṣıġmaz adı
b. Başını kes iki dillü olanuñ hep ḳalem it
5. a. Ṣōfiyā göñlüñ açılmaz ise ẖalvetde eger
b. Gel Revānī gibi mey-ẖānede var defʿ·i ġam it
|p28
1. a. ʿUşşāḳa işüñ cefādur ey dōst
b. Ḳaddüñ elif·i belādur ey dōst
2. a. Dāˀim beni bī-ḳarār iden
b. Bir ḳaşı gözi ḳaradur ey dōst
3. a. Gencīne·i ʿışḳdur bu göñlüm
b. Aḳan yaşum ejdehādur ey dōst
4. a. Serv boyuña duʿācı ḳumrī
b. Boynında siyeh ridādur ey dōst
5. a. Ṣaḳlarsa Revānī ne ̮ola tīrüñ
b. Cān ẖastasına ʿaṣādur ey dōst
|p29
1. a. Çekdürdi elif sīneme derd ü ġam u miḥnet
b. Böyle olur imiş güzelüm rāh·ı maḥabbet
2. a. ʿĀşıḳ geçürür göñlini her nesneden ammā
b. Zāhid mey ü maḥbūbda var var ise ṣoḥbet
3. a. Yıḳıldı göñül ẖānesi ġamdan yine sāḳī
b. Ancaḳ sen idersin anı luṭfuñla meremmet
4. a. Terk itme göñül işigini pīr·i muġānuñ
b. Sālik olana pīrden irişür yine ḥimmet
5. a. Her sāde-ruẖuñ vaṣfını yazmaḳda Revānī
b. Naḳḳāş durur kim virür āyīneye ṣūret
|p30
1. a. Saña kim dir ʿāşıḳuñ terk eyle aġyāruñ gözet
b. Degmeye yār olma sen yār·ı vefā-dāruñ gözet
2. a. Çün senüñle cān u dil oynar maḥabbet nerdini
b. Ṣaḳın aldanma benüm çoḳ sevdügüm zārın gözet
3. a. Ẕikrümüz maḥbūbdur tesbīḥümüz cām·ı şarāb
b. Ṭaʿnı ḳo zāhid bize sen vird ü eẕkāruñ gözet
4. a. Çārsū·yı ʿışḳ içinde būse cān bāzārıdur
b. Ġāfil olma ey göñül biˀllāhi bāzāruñ gözet
5. a. Kimseye yüz virme sen āh·ı Revānīden ṣaḳın
b. Gül gibi açılma her yerde hevā-dāruñ gözet
|p31
1. a. Bir dem ṣanemā ḳāmet·i servüñle ḳıyām et
b. Tā kim bize zāhir ola aḥvāl·i ḳıyāmet
2. a. Mescidde müˀeẕẕin ki göre ḳāmetüñi rāst
b. Ḳad ḳāmet oḳuyup ide tekbīr·i iḳāmet
3. a. Miḥrāba geçüp fitne gözüñ siḥr ile dāˀim
b. Eyler ol iki ṭurra·i cādūya imāmet
4. a. Noḳṭa dehenüñ bir ser·i mū gibidür ey dōst
b. Nuṭḳıyle yarar ḳılı zihī keşf ü kerāmet
5. a. Zülfüñ ʿacabā şeh midür iḳlīm·i cemāle
b. Kim ḥüsn ilini şöhret ile ṭutdı temāmet
6. a. Gel ḳana girüp cevr ile öldürme beni kim
b. Hīç fāˀide itmez kişiye ṣoñra nedāmet
7. a. Sen dil-bere dil virdi Revānī dile düşdi
b. ʿAşıḳdur olursa ne ̮ola rüsvā vü melāmet
|p32
1. a. Çekdi Çīnden Rūma leşker kākül·i müşkīn·i dōst
b. Aldı cān mülkin ser-ā-ser kākül·i müşkīn·i dōst
2. a. Baş ḳoyup secde ̮ itmez idi ol bütüñ ruẖ-sārına
b. Ger degülmişseydi kāfir kākül·i müşkīn·i dōst
3. a. Dāye-veş ẖāl·i siyāhını derāġūş eyleyüp
b. Ṣan ḥabeş ṭıflıyle oynar kākül·i müşkīn·i dōst
4. a. Nüsẖa·i ruẖ-sārı üzre ʿanberīn mısṭar çeküp
b. Siḥr ü efsūn yazmaḳ ister kākül·i müşkīn·i dōst
5. a. Bu ne şehdür kim yatur ḥüsnüñ ḥarīminde idüp
b. Mihri bālīn māhı pister kākül·i müşkīn·i dōst
6. a. Çıḳarup çāh·ı zenaẖdāndan meger dil düzdini
b. Şimdi ber-dār itmek ister kākül·i müşkīn·i dōst
7. a. Bezm·i ḥüsninde Revānī cām·ı laʿline ̮el urup
b. Gör nice ẖōş ʿālem eyler kākül·i müşkīn·i dōst
|pS̲Āˀ
|p33
1. a. Germ olup bu murġ·ı dil ḳılduḳca cānān ile baḥs̲
b. Gūyiyā hüdhüd durur ki ̮eyler Süleymān ile baḥs̲
2. a. Leblerüñçün ehl·i dillerle ne ̮ola ḳılsam cedel
b. Şimdi mi oldı şarāb üstinde yārān ile baḥs̲
3. a. Nüsẖa·i rūşen durur ḥüsnüñ kitābından güneş
b. Ḳanḳı gül yüzlü ḳılur sen māh·ı tābān ile baḥs̲
4. a. Ey ṭabīb·i cān ne ̮içün bīmārdur dāˀim gözüñ
b. Çün lebüñ eyler şifā bābında loḳmān ile baḥs̲
5. a. Gözlerine nükte·i laʿlin Revānī añma hīç
b. Bir kişi müşkildür itmek iki fettān ile baḥs̲
|pCİM
|p34
1. a. Şāh·ı ʿışḳam bir ḳadeḥ-meydür benüm başumda tāc
b. Gördi mestem didi sāḳī begligüñ var gözüñ aç
2. a. Sāḳıyā bīmār·ı ʿışḳa ṣun şarāb·ı nābdan
b. Ḫastaya şerbetle eyler çün ṭabīb olan ʿilāc
3. a. Hey begüm aġyār saña nice göñül virmesün
b. Pādişāh olan alur elbette kāfirden ẖarāc
4. a. Ḫōş durur şekker lebüñde ẖāl ile cānā ʿaraḳ
b. Kim be-ġāyet ẖūb olur misk ü gülāb ile gülaç
5. a. Aġladursın ẖaṭṭuñı añma Revānī bendeñe
b. Nem ḳapar zīrā bulutdan şāʿir·i nāzük-mizāc
|p35
1. a. Ṣararupdur yine beñzi baña beñzer nārenc
b. ʿĀşıḳuñdur meger ey şūẖ·ı sitem-ger nārenc
2. a. Bāġ içinde ṭutuşup gövdesi od gibi yanar
b. Ġabġabuñ ẖastası olmış yine beñzer nārenc
3. a. Yaşumuñ dāneleri derd ü belā bāġında
b. Oldı ʿaks·i ruẖ·ı zerdümle ser-ā-ser nārenc
4. a. Ḳāmetüñ üzre gören tügme·i zerrīnüñi dir
b. Kim görüpdür ʿaca
b. bitüre ʿar ʿar nārenc
5. a. Ne ̮ola bu şiʿr ile zeyn olsa Revānī meclis
b. Ṣoḥbete çünki virür zīnet ü zīver nārenc
|p36
1. a. Günde yüz biñ cān alur cānāneler gördüñ mi hīç
b. Āşinālıḳdan ḳaçar bīgāneler gördüñ mi hīç
2. a. Ey göñül bir nāz ile biñ cān u dil ṣayd idici
b. Bir bölük şehlā gözi mestāneler gördüñ mi hīç
3. a. Dil-rübālar ʿışḳına bāzār·ı ġamda dem-be-dem
b. Ḫānumān terk idici dīvāneler gördüñ mi hīç
4. a. Bezm·i ʿışḳ içinde şemʿ·i ḥüsne yüz biñ şevḳ ile
b. Bāl ü perler yaḳıcı pervāneler gördüñ mi hīç
5. a. Ey Revānī ʿışḳ meydānında ʿāşıḳlar gibi
b. Terk·i cān eyler yürür merdāneler gördüñ mi hīç
PḤĀˀ
|p37
1. a. Devr·i lebüñde bulmasa nām u nişān ḳadeḥ
b. Eller içinde olmaz idi kām-rān ḳadeḥ
2. a. Güller getürdi bāġ·ı cemāline dil-berüñ
b. Gül-zār·ı ḥüsne oldı meger bāġ-bān ḳadeḥ
3. a. Yaġmur gibi yaġar ṭolu bezmüñde sāḳıyā
b. Dil būstānını suvarur rāygān ḳadeḥ
4. a. Dil ẖānesin yıḳardı ġam u miḥnet ü elem
b. Ṭutmasa göz ḳulaḳ aña ger her zamān ḳadeḥ
5. a. Cānā lebüñ ẖayālini tuḥfe getürdi dil
b. Rindānedür olursa ne ̮ola armaġān ḳadeḥ
6. a. İşümüz altun eyledi irişdi nev-bahār
b. Gül-şende ġonca ṣundı baña zer-nişān ḳadeḥ
7. a. Bir al ṭūṭīdür mey·i gül-reng·i pür-ṣafā
b. Olmış durur Revānī aña āşiyān ḳadeḥ
8. a. Meclisde sāḳī ḥükm ile söylerse vechi var
b. Ki ̮olmış berāt sāʿidi anda nişān ḳadeḥ
|p38
1. a. Ṣōfī ider mi ʿārif olan tevbe·i nasūḥ
b. Maḥbūb ile şarāb durur çün ġıdā·yı rūḥ
2. a. Rūşen-dil olmaġ ister iseñ āfitāb-veş
b. Rindāne al seḥerden ele bāde·i ṣabūḥ
3. a. Bir Ḫusrevānī genc durur her ẖum·ı şarāb
b. Ki ̮andan gedā·yı ʿışḳa irişür niçe fütūḥ
4. a. Bezm·i ṣafāda sōfī gözüñ aç ki nūr·ı mey
b. ʿAn meşrıḳıˀz-zücāci ke-şemsuˀḍ-ḍuḥā yelūḥ
5. a. Her kim Revānī vaṣlın ider ise ārzū
b. Eyyūb ṣabrı ile gerek aña ʿömr·i Nūḥ
|pDĀL
|p39
1. a. Ṭaḳdı cān boynına kāküllerüñ ey dōst kemend
b. Geçdi bir fitne ile göñlüme zülfüñ niçe bend
2. a. Saña her-cāyī diyü kimsene ṭaʿn eylemesün
b. Baş ḳoşup her kişiye olma güneş gibi levend
3. a. Ey ṣabā ḳāmet·i cānān ile daʿvāyı ḳosun
b. Ṭutmasın kendüyi yüksekde iñen serv·i bülend
4. a. ʿĀşıḳ olmış lebüñe vaṣfını işitmek ile
b. Şimdi bezmüñde anuñçün ezilür göz göre ḳand
5. a. Şād olur şiʿr·i Revānī ile çün rūḥ·ı Kemāl
b. Faẖr idinse ne ̮ola naẓmıyle anuñ mülk·i Ḫocend
6. a. Dōstum ḳāmet·i bālāña ḳul olmaġa senüñ
b. Baġlamış biline ẖıdmet kemerini ney·i ḳand
|p40
1. a. Şevḳuñla atmaz idi ḳamer burcına kemend
b. Olmasa āhumuñ güzelüm himmeti bülend
2. a. ʿUşşāḳ müflis olmaz idi böyle ġālibā
b. Sīmīn-bedenler olmasa ʿālemde zelle-bend
3. a. Lāyıḳ mı kākülüñ gibi yanuñca ṣalına
b. Her aṣılası yüzi ḳara oñmaduḳ levend
4. a. Ḫaṭṭuñ selāmını getürür bāġ u rāġda
b. Eyler ṣabā benefşeye anuñla rīş-ẖand
5. a. Ol cān ṭabībine eli irmez revānīnüñ
b. Hīç çāre bulmadı aña bīçāre derd-mend
|p41
1. a. Şol ʿāşıḳuñ ki yāri boynına ṣala sāʿid
b. İḳbāl bende dāˀim devlet aña müsāʿid
2. a. Ey müftī·i zamāne bu şerʿ·i ʿışḳ içinde
b. Daʿvā·yı ʿışḳ idene tīr·i nigārı şāhid
3. a. Şemʿ ile ḳıldı rūşen göñlüm evin ṣanasın
b. Dil-dārdan ki nāme irgürdi baña ḳāṣıd
4. a. Çün ẖūblarla bunda nūş itmedüñ şarābı
b. Cennetde kevs̲er ile ḥavrāyı umma zāhid
5. a. Meclisde ṣunsalar mey zehr ise daẖi nūş it
b. Ṣōfīlenüp Revānī olma ṣaḳın muʿānid
|p42
1. a. Şemʿi kimse saña teşbīh idemez ey lāle-ẖad
b. Gerçi yalıñ yüzlü bir sīmīn-bedendür serv-ḳad
2. a. Gün gibi altun beneklü cāmeye reşk eylemez
b. Bu felek dervīş·i ʿışḳa āsumānī bir nemed
3. a. Kār u bārın yile virdi ruẖlaruñ reşkiyle gül
b. Ḥaḳ budur kim kişiyi ʿālemde oñarmaz ḥased
4. a. Cānum aġzuma gelüpdür būse·i dil-dār içün
b. Dōstlar bir çāre eyleñ hey meded baña meded
5. a. Bu Revānī ẖōş çeker cevr ü cefāñı dōstum
b. Tañrı ḥaḳḳıçün buña rāẓī degüldür bir eḥad
|p43
1. a. Ṣōfiyā geymiş idük biz de ezel delḳ·ı kebūd
b. Burdı taḳvā elini ne ̮eyleyelüm pençe·i ʿūd
2. a. Ol güneş yüzlünüñ aġzı gelemez ṣūrete hīç
b. E göñül ẕerre daẖi virmez imiş aña vücūd
3. a. Dest·i sāḳīde meger ḳıble-nümā oldı ḳadeḥ
b. Her ṭarafdan ki ṣurāḥīler ider aña sücūd
4. a. Zülfinüñ bendine düşmiş yine sevdā ile dil
b. Nāṣıḥuñ pendi aña eylememiş her-giz sūd
5. a. Sen ḳamer-çihreye olmazdı Revānī ʿāşıḳ
b. Ṭāliʿi baẖtı anuñ olmasa idi mesʿūd
|p44
1. a. Yine rengīn cāmelerle donanup ẖūbān·ı ʿīd
b. Lāle vü güllerle zeyn olmış durur bustān·ı ʿīd
2. a. ʿİdde her ʿāşıḳuñ almaġa göñlin āl ile
b. Ellerin ḥınnā ile naḳş eylemiş ẖūbān·ı ʿīd
3. a. İncinüp bir merḥabādan ḳaçma ben üftādeden
b. Merḥabāsuz dōstum olmaz tamām erkān·ı ʿīd
4. a. Yıllar u aylar geçer ol māh añmaz ʿāşıḳın
b. Şimdi göz göre raḳīb ile ider seyrān·ı ʿīd
5. a. Devr·i ḥüsnüñde ne ̮ola devr eylese ʿāşıklaruñ
b. Pādişāh olan Revānī çün ider dīvān·ı ʿīd
|p45
1. a. Bir güzeldür sāḳī meclisde ṣurāḥī serv-ḳad
b. Ne ̮ola nergis gibi göz dikse aña her lāle-ẖad
2. a. Çeşmüñ ile iki zülfüñden fiġān itsem ne ̮ola
b. Hāy ʿömrüm ḥāṣılı cevr ü cefāña yoḳ ʿaded
3. a. Ġoncanuñ mecmūʿasından ḥüsnüñ ebyātın oḳur
b. Bülbül·i şūrīde dervīş oluban geymiş nemed
4. a. Mīm şeklidür ṣurāḥī aġzı dāl olmış ḳadeḥ
b. Sāḳıyā ġam ẖastasına ṣun anuñla ḳıl meded
5. a. Pādişāhum ḥasretüñle ḳanlar aġlarsa ne ̮ola
b. Çün Revānī bendeñi ḳaşuñla zülfüñ ḳıldı red
|p46
1. a. Elinden ol ḥabībüñ dād feryād
b. Beni yad idüp aġyārı ḳılur şād
2. a. Muʿaṭṭar ḳıldı āfāḳı ser-ā-ser
b. Meger kim irdi yāruñ zülfine bād
3. a. Yoluñda virmez isem cān·ı şīrīn
b. Degülven ẖusrevā ʿışḳuñda Ferhād
4. a. Çemende el ṭutup ḳaddüñe ḳarşu
b. Ṭurupdur bende gibi serv·i āzād
5. a. Tebessüm idicek luṭf ile laʿlüñ
b. İder ʿāşıḳlaruñuñ rūḥını şād
6. a. Beni terk eyle luṭf it bir dem ey ġam
b. Ḳuluñsam daẖi biˀllāh eyle āzād
7. a. Revānī ḥüsnüñi vaṣf eyleyicek
b. İşiden dir hezārān āferīn bād
|pRĀˀ
|p47
1. a. İzüñ tozını ʿanber·i sārāya ḳatdılar
b. Bu ad ile cihānda anı vāy ki ṣatdılar
2. a. Lāle lebüñ ẖayālile mey içdügi içün
b. Gül-şende kāsesini başında uşatdılar
3. a. Peykānlaruñla eglenür idük göñülde āh
b. Anlar da bilmezem ki ʿaceb ḳanda batdılar
4. a. Ḳaddüñ çemende sāye·i Ṭūbā ṣalalıdan
b. Servi yeri kökiyle yabanlara atdılar
5. a. Umma Revānī tīġini boynıñda bulasın
b. Ol gitdi ̮anuñ ipini güzeller uzatdılar
|p48
1. a. Ol büt·i tersā yine çünkim cefāya başlar
b. Ölürüz bu yolda biz yoldaşlar ḳardaşlar
2. a. Bezm içinde nāleme raḥm itdügiçün çengi gör
b. İki diz üzre gelüp ol dem fiġāna başlar
3. a. Laʿl ile yāḳūt öykünmiş leb·i rengīnüñe
b. Ol sebedendür ki ̮urur ẖātem başına ṭaşlar
4. a. Ḳurd ile ḳuzu bir araya gelüp seyr itseler
b. Bir niçe dil-berler ile bir bölük evbāşlar
5. a. Bezm içinde cām·ı mey gūyā nigīn·i laʿldür
b. Ḫāteme dönmiş Revānī ḥalḳa·i ʿayyāşlar
|p49
1. a. Sev göñül şol ṭıflı küççekdür dime çaḳ çaġıdur
b. Daẖi ol açılmaduḳ bir tāze gül yapraġıdur
2. a. Bilmezem ben ne ̮eyledüm şol ġamze·i ẖūn-rīzüñe
b. Kim bizümle dōstum ḳanlu bıçaḳlı yaġıdur
3. a. ʿIşḳ şāhınuñ feẓā·yı dil ki menzil-gāhıdur
b. Tāze dāġı sīnemüñ anuñ ḳızıl otaġıdur
4. a. Yıḳma göñlüm tekyesin ẓulmüñle ey sulṭān·ı ḥüsn
b. Ḫōr baḳma aña kim dervīşler ocaġıdur
5. a. Naʿl·i zerrīn·i hilāli yolda bulmışdur felek
b. Kim bu ṣaḥrā ol şehüñ dāˀim atı oynaġıdur
6. a. Ṭop olup yatur ʿiẕārında nigāruñ kāküli
b. Ṣu içinde gūyiyā ḳonmış benefşe baġıdur
7. a. Başına and içseler her dem ʿaceb mi ẖūblar
b. Çün Revānī bendeñ ey dil-ber ayaḳ ṭopraġıdur
|p50
1. a. Meh-rūlar ile çāder gūyā felek olmışdur
b. Her ẖayme güzellerle dārüˀl-melek olmışdur
2. a. Ordu·yı hümāyūnun bir zīneti vardur kim
b. Gün cāme·i dil-dāra altun benek olmışdur
3. a. Güzeller alayınuñ beglerbegisi sensin
b. Tīmārına ʿışḳuñuñ hep müşterek olmışdur
4. a. Sīmīn bedenlerle sīnem ḳızıl altundur
b. Ṣarrāfīdurur çeşmüm göñlüm miḥak olmışdur
5. a. Cānā lebüñ emmekde aġzına alur cānın
b. Elḥaḳ bu Revānīye ẖaylī emek olmışdur
|p51
1. a. Ṣarrāf·ı dīdede o püser çoḳ güher sezer
b. Yüzüme geldügi bu kim ol bende zer sezer
2. a. Meclisde sāġar almaġa laʿlüñ ẖaberlerin
b. Nāzüklük ile aġzumuz arar ẖaber sezer
3. a. Cān atdı gitdi dil leb·i şīrīnüñe yine
b. Ben ẖasta içün anda meger gül-şeker sezer
4. a. Düşmezdi rāh·ı ʿışḳa göñül görmese ruẖuñ
b. Gün ṭoġmayınca yolda müsāfir ẖaṭar sezer
5. a. Ben bülbülini görse yüzin gül gibi dürer
b. Beñzer Revānī sevdügüm ol ʿişveger sezer
|p52
1. a. Bülbülüñ çoḳ gül-şen·i ḥüsnüñde ẖaddüñ gül yeter
b. Dōstum ʿāşıḳlaruñ ḳan aġlasun sen gül yeter
2. a. Mübtelāsı olma her ẖūbuñ birin sev ey göñül
b. Bu mes̲el meşhūrdur kim ʿārife bir gül yeter
3. a. Şemselerden muṣḥaf·ı ḥüsnüñ ne ẖācet zeyn ola
b. ʿArıẓuñda ḥalḳa ḥalḳa görinen kākül yeter
4. a. Tāze gül-şendür ruẖuñ ʿaksiyle meclis sāḳıyā
b. Gül ḳadeḥ olsun ṣurāḥī arada bülbül yeter
5. a. Ruẖları mecmūʿası içre Revānī dāˀimā
b. Zīnet içün dil-berüñ müşkīn ṣaçı sünbül yeter
|p53
1. a. Bir māhdur yüzüñ ki ẖaṭuñ aña hāledür
b. Bāġ·ı ruẖuñda sünbül·i ter bu gülāledür
2. a. Kirpüklerümle ḳana boyanmış iki gözüm
b. Miḥnet çemenlerinde iki tāze lāledür
3. a. Ben bilürem ki sāḳī ne ḳan yutdurur baña
b. Ṣanmañ ki içdügüm ṭolu ṭolu piyāledür
4. a. Gūşuñda ey ṣanem görinen dāne·i güher
b. Gūyā gül üzre aṣılu bir ḳaṭra jāledür
5. a. Āẖir Revānī göñlüm evin ḳaşıdur yıḳan
b. Bir ṭāḳ·ı ḥüsndür kim aña ol ḥavāledür
|p54
1. a. Zülfüñi tezyīn içün miskīn göñül bir şānedür
b. Her ṭarafdan ġamzeñ oḳları aña dendānedür
2. a. Cānı ḳıldum pīş-keş sen ẖusrev·i ẖūbāna ben
b. Luṭf idüp maʿẕūr ṭut gerçi ki dervīşānedür
3. a. Miḥnet·i Yaʿḳūb derdümden benüm bir şemmedür
b. Ḳıṣṣa·i Yūsuf cemālüñden senüñ efsānedür
4. a. Ṣubḥ olınca giceler ey şemʿ·i bezm-ārā saña
b. Cān ile ẖıdmetler itmekde göñül pervānedür
5. a. Zāhidā ne ̮eyler Revānī cenneti dil-dārsuz
b. ʿĀşıḳa cānānesüz firdevs miḥnet-ẖānedür
|p55
1. a. Leb·i cānāneyi emdükce göñül ẖurrem olur
b. Kişi mey ṣoḥbetini eyleyicek bī-ġam olur
2. a. Yārdan kimse göñül ummasun insāniyyet
b. Ol perī yüzlü melek-çihre ḳaçan ādem olur
3. a. Virmezin iki cihāna mey ü ney ṣoḥbetini
b. Bu nice ẕevḳ u ṣafādur bu nice ʿālem olur
4. a. Beni öldürmege ḥınnāladı barmaḳlarını
b. Göz göre ḳana girerler bu güzeller dem olur
5. a. Şāhid·i naẓm·ı Revānīye ne ḥācet zīnet
b. Ki ẖaṭ·ı şiʿri aña kākül olur perçem olur
|p56
1. a. Maḥbūb·ı cihān ṭut ki göñül şiʿr ü ġazeldür
b. Şiʿrüm daẖi dil-ber gibi her-cāyī güzeldür
2. a. Dil-berlere ʿālemde bedel hīç bulınmaz
b. Bir tāze güzel götüri dünyāya bedeldür
3. a. Yāruñ gelicek baña göñül zülfin ögersin
b. Sevdāya düşürme beni kim ṭūl·i emeldür
4. a. Ḫaṭdur dime gül çevresini ṭutdı benefşe
b. Sen anı tırāş it ki hem-ān adı saḳaldur
5. a. Añmaz beni çün yār maḥallinde Revānī
b. Göñlüme güzeller ne iderlerse maḥaldür
|p57
1. a. Ḳanlu yaşum bezm·i hecrüñde mey·i gül-fām olur
b. Aña bu göñlüm ṣurāḥī çeşm·i pür-ẖūn cām olur
2. a. Göñlüme ġam ẖalvetinde gözlerüñ fikri yeter
b. Kim ġıdā eks̲er riyāẓāt ehline bādām olur
3. a. ʿĀşıḳuñ rüsvāyī olduġın ḳayırma ṣōfiyā
b. Rind·i şāhid-bāz olan oġlan sever bed-nām olur
4. a. Yoḳ dimezdi yārdan ḳılsam temennā būsesin
b. Ḳorḳaram nāzük durur dil-ber aña ibrām olur
5. a. Dil-berüñ aylar geçer kim irişilmez vaṣlına
b. ʿĀdet oldur kim Revānī yılda bir bayram olur
|p58
1. a. Ḳanlu yaşumuñ laʿlini cānāna disünler
b. ʿĀlemde ṣataşduḳ yine bir kāna disünler
2. a. Baḳmaġa gözüm āyinedür ḥüsnine çünkim
b. Kirpüklerüme zülfüñ içün şāne disünler
3. a. Çün her ṣanemüñ ṣūreti naḳşıyle ṭoludur
b. Şimden girü bu göñlüme büt-ẖāne disünler
4. a. Kūyuñda budur göz yaşın aḳıtduġum ey dōst
b. Zencīre çekilmiş yine dīvāne disünler
5. a. Her kişiye gül gibi güler yüzle baḳarmış
b. Açılmasun ol ġonca·i ẖandāna disünler
6. a. Şunlar ki bu gün ḳaş ile göz vaṣfın iderler
b. Her şiʿri Revānī gibi rindāne disünler
7. a. Cān virdügüm oldur görüp ol ġonca-dehānı
b. Cānlar virür ol gördügi oġlana disünler
|p59
1. a. Nāmuñ ey gül yüzlü bildüm kim vefā bustānıdur
b. Noḳṭalar anda benefşe ẖaṭ anuñ reyḥānıdur
2. a. Nāme bir sīmīn-beden gül yüzlü dil-berdür ki ̮anuñ
b. Beñleri olmış noḳaṭ ẖaṭ zülf·i müşk-efşānıdur
3. a. Ol kemān-ebrūdan iren baña ṣanmañ nāmedür
b. Tīr·i fürḳatdür ki ̮içinde her elif peykānıdur
4. a. Nāmenüñ görüp beyāẓın rūz·ı vuṣlatdur didüm
b. Ḫaṭṭına ḳıldum naẓar bildüm şeb·i hicrānīdür
5. a. Ben nice yazam duʿā-nāme Revānī dil-bere
b. Nāmesi ʿaḳlumı aldı cān u dil ḥayrānıdur
|p60
1. a. Ḳaldı işden māh·ı rūze ireli peymāneler
b. Ṣuyı ṣoġılmış degirmen gibidür mey-ẖāneler
2. a. Cām·ı mey rūşen ḳılur ʿāşıḳlaruñ göñlin ne ̮idem
b. Şuʿle·i ẖūrşīd ile rūşen olur vīrāneler
3. a. Bir güneşle germ olup gögsüñi germe ey felek
b. Ṭoludur gün yüzlülerle bunda mekteb-ẖāneler
4. a. Germ olup meclisde sen meh-rūya öykündügiçün
b. Üşdiler şemʿüñ nigārā başına pervāneler
5. a. Nāfe·i zülfin Revānī ṭaġıdup her dil-berüñ
b. ʿĀşıḳa barmaḳ ḥisābın gösterürler şāneler
|p61
1. a. Rūz·ı ʿīd oldı yine güm güm öter mey-ẖāneler
b. Göklere irdi ṣadā·yı naʿra·i mestāneler
2. a. Gūyiyā şerbet şarāb u mey-fürūş olmış ḥakīm
b. Ḫastalar maẖmūrlar dārüˀş-şifā ẖum-ẖāneler
3. a. Gül budaġında ḳızıl güller açıldı ṣanuram
b. Sāḳī·i meh-rūlar alduḳca ele peymāneler
4. a. Kes̲ret·i ʿuşşāḳdan incinme ḥüsnüñ çaġıdur
b. Nev-bahār olduḳca artar ey perī dīvāneler
5. a. Gözlerine mesken olmazdı Revānī cān u dil
b. Ger ḥarāmīler yataġı olmasa vīrāneler
|p62
1. a. Cāna göz açdurmayan şol nergis·i şehlāsıdur
b. Baña gün göstermeyen ol zülf·i müşk-āsāsıdur
2. a. Pādişehsin sancaġ·ı āha ʿalemdür māh·ı nev
b. Kim şafaḳ anuñ nigārā ḳırmızı vālāsıdur
3. a. Ġayrı dil-berler gibi cānā vefāsuz olma kim
b. ʿĀşıḳa luṭf eyleyen dil-berlerüñ raʿnāsıdur
4. a. Yıḳmaġa göñlüm evin ẖaṭṭı getürmişdür berāt
b. Kim beyāẓıdur cebīni ḳaşları ṭuġrāsıdur
5. a. Şiʿr·i şīrīnüñ Revānī oldı şekkerden leẕīẕ
b. Kim anuñ her ġonca-leb ṭūṭī·i şekker-ẖāsıdur
|p63
1. a. Būy·ı ṣaçuñla şāne şehā müşk·i nāb olur
b. Āyīne ʿaks·i rūyuñ ile āfitāb olur
2. a. Ḫaṭṭ·ı lebüñden irdi benüm cānuma ġubār
b. Her ḳanda ise fitneye bāʿis̲ şarāb olur
3. a. Mest olduġumca saña disem ḥālümi ne ̮ola
b. Merdüm ki mest ola ṣanemā bī-ḥicāb olur
4. a. Yaḳduñ bu göñlümi yine cevr ü cefā ile
b. Şāhuñ ki ẓulmi çoġ ola şehri ẖarāb olur
5. a. Diler Revānī kūyuña irişse vaṣluñı
b. Bilür ki Kaʿbe içre duʿā müstecāb olur
|p64
1. a. Dil alan ġamzesidür vāy ne dil-āvercük olur
b. Ḳılıc ile dirilür hey nice servercük olur
2. a. Ḥüsn ilin leşker·i nāz ile güzeller ṭutdı
b. Ey göñül Rumilinüñ dil-beri hep gençek olur
3. a. Sebz ẖaṭṭuñla görenler didi mey-gūn lebüñi
b. Lāciverd ile münaḳḳaşca ne sāġarcük olur
4. a. Egilüp gūşına söyler gibi ̮olur ẖaddin öper
b. Zülfi yāruñ nice çoḳ başluca kāfircük olur
5. a. Aġzı dadıyle Revānī nola ʿayş eyler ise
b. Sāḳī·i bezm çün ol lebleri şekkercük olur
|p65
1. a. Terk itdi kūyuñı yine aġyār idüp sefer
b. Her kim işitdi didi ki fiˀn-nāri fiˀs-saḳar
2. a. Dil-berler içre gün gibi çün bī-naẓīrsin
b. Göster cemālüñi görelüm biz de bir naẓar
3. a. Gül nisbet itdügi özini ẖaddüñe bu kim
b. Nāzüklük ile ẖalḳa ṭurup kendüyi ṣatar
4. a. Bezmüñde şevḳden ezilür dāˀimā saña
b. Ben bilmezem mi ne boġazı iplüdür şeker
5. a. Tīġ·i ʿitāb ile depelersin Revānīyi
b. Ölsün mi ne ̮eylesün seni ey bī-vefā sever
|p66
1. a. Zülfi dāˀim ẖaṭı yanında dile kīn eyler
b. Ṭolaşur ol aña āẖir beni miskīn eyler
2. a. Ḳanḳı ṣafḥa ki tamām ola ẖaṭuñ vaṣfı ile
b. Anı bu ḳanlu yaşum surẖ ile tezyīn eyler
3. a. Ḫaṭṭuñuñ fikri düşer göñlüme tenhā olıcaḳ
b. Yalıñuzluk güzelüm kişiyi ġam-gīn eyler
4. a. Ḫaṭ durur her güzelüñ nāme·i ḥüsnini bozan
b. Bu ne yüz ḳarasıdur ki ̮ol ẖaṭ·ı miskīn eyler
5. a. Ḫaṭ·ı dil-dāra Revānī nice taḥsīn dimeyem
b. Ḫaṭ·ı dil-keş göricek her kişi taḥsīn eyler
|p67
1. a. Ḳaçsa ne ʿaceb benden eger yār perī-vār
b. Çün zülf ü ẖaṭı gibi anuñ bāl ü peri var
2. a. Aġzuñı öper döne döne meclis içinde
b. Sāġar gibi kimüñ ki begüm sīm ü zeri var
3. a. İncinme göñül çeşmine ẖışm eylese her dem
b. Şād ol ki bilürsin saña anuñ naẓarı var
4. a. El üzre ṭutar ise ne ̮ola nāmeñi ʿuşşāḳ
b. Kim ġonca·i zanbaḳ gibi baş üzre yeri var
5. a. Her ẖūb ki ̮oḳur şiʿr·i Revānīyi gören dir
b. Bir ṭūṭīdür aġzında ṣanasın şekeri var
|p68
1. a. Güzel sevmek göñül çün saña ẖūdur
b. Cefāsın çek anuñ kim sāde-rūdur
2. a. Ḫaṭı irişmeden seyr eyle ḥüsnin
b. Tekāsül eyleme gün gicelidür
3. a. Göñül virmiş durur zülfüñe zāhid
b. Ḳara çullarda ḳoyan anı budur
4. a. Maḥabbet meclisinde ay ile gün
b. Nigāruñ ʿışḳına iki ṭoludur
5. a. Revānī būseye ʿahd itdügince
b. Ṭurup aġzında yāri öpmelüdür
|p69
1. a. Yāra ʿarẓ itdi yaşum sīmini çeşm·i eşk-bār
b. Baña göz yaşı gerekmez didi luṭfından nigār
2. a. Seyr iderler gözümüñ yaşın ṭurup gün yüzlüler
b. Gūyiyā bir çeşmedür ki ̮olmış kenārı lāle-zār
3. a. Ben nice yāruñ diyārın terk idem aġyār içün
b. Eylemez degme belā ile kişi terk·i diyār
4. a. Yād-gārı ʿālemüñ ʿāşıḳlara maḥbūbdur
b. Ey göñül merġūb olan elbette olur yād-gār
5. a. Baḥr·i ġamdan ʿāşıḳı keştī·i ġam eyler ẖalāṣ
b. Āhı terk eyle Revānī böyle ḳalmaz rūz-gār
|p70
1. a. Leb. her meclise nāzüklük ile mül götürür
b. Ḫaṭı reyḥāncı durur deste·i sünbül götürür
2. a. Od yanar lāle ruḥun şevḳı ile başında
b. Ṣanma her dil-beri sen zīnet içün gül götürür
3. a. Leblerinde görinen ẖāl degüldür mey içüp
b. Defʿ·i būy itmege aġzında ḳaranfül götürür
4. a. Ḫāme gibi nice ḳan aġlamayam ġayrılara
b. Nāmeler yazmaġa ḳoynında teressül götürür
5. a. Seni sevdügi içün eyle Revānīye cefā
b. Her ne cevri ki gül eyler anı bülbül götürür
|p71
1. a. Gerçi ʿarūs·ı ḥüsnüñe zülfüñ niḳāb olur
b. Ḳorḳum budur ki arada dāˀim ḥicāb olur
2. a. Ḫaṭṭ·ı lebüñle irdi yine cānuma ġubār
b. Her ḳanda ise fitneye bāʿis̲ şarāb olur
3. a. Meh-pāreler durur ne ̮ola ṭıfl ise ẖūblar
b. Her birisi kemāle irer āfitāb olur
4. a. ʿUşşāḳ zerre gibi ẖaḳīr olduġı bu kim
b. Maḥbūblar güneş gibi ʿālī-cenāb olur
5. a. Diler Revānī kūyuña irişse vaṣluñı
b. Dirler ki Kaʿbe içre duʿā müstecāb olur
|p72
1. a. Bu cihān gül-şeninüñ gülleri ṭurmaz açılur
b. Ne ʿacebdür bu göñül ġoncası kim az açılur
2. a. Lebin emdürmede artursa ne ̮ola şīvesini
b. Būselikden ṣora varsañ yine şeh-nāz açılur
3. a. İster iseñ ki ̮olasın ẖūb-nefes leblerin em
b. Ey göñül ḳand·i nebāt ile çün āvāz açılur
4. a. Sırr·ı ʿışḳı ne ̮ola keşf eyler ise ḳanlu yaşum
b. Mey·i nāb ile göñül niçe niçe rāz açılur
5. a. Bāġ·ı cennet mi durur ṭabʿ·ı Revānī ʿacabā
b. Beñzemez bir güle hīç gülleri ṭurmaz açılur
6. a. Tāze eşʿār ile çün reng bulur dil-berler
b. Ey göñül her çiçegi görme misin yaz açılur
|p73
1. a. Leylī taṣvīrin ne ̮idersin ʿāşıḳ·ı maḥzūnı gör
b. Bu cihān mecmūʿasında ṣūret·i Mecnūnı gör
2. a. Ey göñül gün yüzlü sāḳīler elinden iç şarāb
b. Cünbüş·i ẖūrşīdi gözle gerdiş·i gerdūnı gör
3. a. Devlet·i ḥüsninde ay u gün aña ser-geştedür
b. Ol hümāyūn baẖt ile bu ṭāliʿ·i meymūnı gör
4. a. ʿĀḳil iseñ yiter it ey ẖāce dünyā fikrini
b. Māl cemʿinde nice olmış durur Ḳārūnı gör
5. a. Gül-bün·i şiʿri Revānīnüñ ne ̮ola olsa bülend
b. Şol ruẖ·ı zība ile ol ḳāmet·i mevzūnı gör
|p74
1. a. Nigāruñ gördi dil şekker lebi var
b. Anuñçün ḳande meyl eyler ṣabī-vār
2. a. Ṭonatsa cāmiʿ·i ḥüsnin ʿaceb mi
b. Gümiş ḳandīle beñzer ġabġabı var
3. a. Naʿalçeñdür meh·i nev başmaġuñda
b. Kevākib gibi zīrā kebkebi var
4. a. Elifden başlasa dil ʿışḳa ṭañ mı
b. Bu yañada güzeller mektebi var
5. a. Şarābı meşrebeyle nūş idermiş
b. Revānīnüñ ne ʿālī meşrebi var
|p75
1. a. Dōstum öpülmeyen laʿl·i şeker-ẖādan ne ̮olur
b. Boynıma ṣalınmayan zülf·i semen-sādan ne ̮olur
2. a. Ben seni gördükce ḳucmaġ istesem incinme kim
b. Hāy efendüm hāy begüm kuru temāşādan ne ̮olur
3. a. Luṭfı olmayan güzelden hīç ummañ fāˀide
b. Ḳoḳulanmayan çemende verd·i raʿnādan ne ̮olur
4. a. Ḫayr gelmez ʿāşıḳın terk eyleyen dil-dārdan
b. Ġayrlarla ṣalınan serv·i dil-ārādan ne ̮olur
5. a. Gerçi kim naẓmuñ Revānī oldı dürr·i şāhvār
b. Gūş·ı şāhā irmeyen naẓm·ı güher-zādan ne ̮olur
|p76
1. a. ʿAşıḳuñ çünkim güzel maḳbūlidür
b. Ölmez ol kim ġamzesi maḳṭūlidür
2. a. Dāġ ṣanmañ sīnem üzre görinen
b. Kim bu ʿışḳ abdālınuñ meftūlidür
3. a. Ġāfil olma ḥüsnüñ eyyāmı geçer
b. Dōstum bu sözlerüñ maʿḳūlidür
4. a. Dil mülāzımdur yine bir dil-bere
b. Ṣanasın beglerbegi maʿzūlidür
5. a. Pādişāhum bendeñ olalı senüñ
b. Dir Revānīyi gören beg ḳulıdur
|p77
1. a. Mirˀāt·ı ḥüsne çünki virürmiş cilā naẓar
b. ʿĀşıḳlar eylesün aña dāˀim ṣafā naẓar
2. a. Görürler idi ẖāki zer·i ẖāliṣ olduġın
b. Baḳmaz yüzüme ne ̮eyleyem ol kīmyā-naẓar
3. a. Ḥüsni kitābı içre dehānında şübhe var
b. Gūyā ki ẖaṭṭı ḥāşiye durur aña naẓar
4. a. Baḳmazsa dīde çihre·i aġyāra ne ̮ola kim
b. Ḳılmaz çü degme kimseye ehl·i ḥayā naẓar
5. a. Dāˀim duʿāsın almalusın Revānīnüñ
b. Zīrā ki pādişālara eyler gedā naẓar
|p78
1. a. Her ḳıyāmet görinen dime ẖaṭ u ẖālümdür
b. Ben güneh-kāruñam ol nāme·i aʿmālümdür
2. a. Sīnede tīr·i maḥabbetle görinen yaram
b. Devḥa·i devlet ü ser-çeşme·i aḥvālümdür
3. a. Ṣanma naḳḳāşı ki taṣvīr ider Mecnūnı
b. Benüm ey Leylī-ṣıfat ṣūret·i aḥvālümdür
4. a. Ruẖın öpmege lebin emmege dil-dār ḳomaz
b. Ne ̮idelüm ne ̮eyleyelüm özge gülüm balumdur
5. a. Bilürin zülfi elif ḳāmetümi dāl eyler
b. Ḳurʿa·i ʿışḳ Revānī çü benüm fālümdür
|p79
1. a. Şād ol ey dil kim bu gün irte yine bayram olur
b. Sāḳī·i gül-çihre yanuñda elüñde cām olur
2. a. Rāẓīyüz gerçi oruçdan içmişüz çoḳ şerbeti
b. Ḳanı ṣōfī ʿīd kim anda mey·i gül-fām olur
3. a. Nice ṭutmasun el üstinde şarābı ehl·i ʿayş
b. ʿĀşıḳ·ı ser-keş olan dil-ber anuñla rām olur
4. a. Her ḳaçan ḳan aġlasam çeşm ü lebüñ yād eylerem
b. Sāḳıyā mey ṣoḥbetinde çün şeker bādām olur
5. a. Ol cemālüñ çün dehānı mīmdür ḳaddi elif
b. İki zülfinüñ birisi cīm ü biri lām olur
6. a. Eyü adın söyler oldı ẖalḳ şimdi ṣōfīnüñ
b. Ḳorḳarın Revānī gibi oy bed-nām olur
|p80
1. a. Bāġa varduḳça kim ol serv·i gül-endām açılur
b. Nereye ḳılsa naẓar hep gül ü bādām açılur
2. a. Gül degüldür görinen ʿibret ile eyle naẓar
b. Yılda bir kerre göñül defter·i eyyām açılur
3. a. Zülf ü ḳaddüñle dehānuñı nice sevmeyeyin
b. Her ḳaçan Muṣḥafa el ursam Elif-lām açılur
4. a. Naḳd·i cānı ne ̮ola yoluña nis̲ār itse göñül
b. Ḫāce ser-mest olıcaḳ kīse·i inʿām açılur
5. a. Bülbül·i gül-şen·i ḳuds olsa göñül murġı ne var
b. Bāġ·ı ṭabʿumda Revānī gül·i ilhām açılur
|p81
1. a. Şol ẖaṭ·ı ʿanber-feşān kim ḥüsn·i cānān arturur
b. Ṣanasın reyḥāncıdur gelmiş gül-istān arturur
2. a. Meclise zīnet virür altun piyāle sāḳıyā
b. ʿĀlemüñ güzelligin ẖūrşīd·i raẖşān arturur
3. a. ʿIşḳ bāzārında ṣōfī cān virür her dil-bere
b. Ṣaḳalı aġarmış ammā daẖi oġlan arturur
4. a. Bezm içinde çihre·i aġyārdan ḳanum ḳurur
b. Ḳanı sāġar sāḳıyā dirler ki mey ḳan arturur
5. a. Cān virür görse Revānī şol leb·i rengīnüñe
b. Ḫusrevā ṣarrāf olan laʿl·i Bedaẖşān arturur
6. a. Ṣatmaġa Yūsuf gibi ḥüsni metāʿın ʿāleme
b. Gelmiş ol meh-pāre şehr içinde dükkān arturur
|p82
1. a. Dökseler ẖāke meyi ol dem gül·i ḥamrā olur
b. Bir ḳadeḥ içen kimesne bülbül·i gūyā olur
2. a. Mıṣr·ı ḥüsn içinde ẓāhir olsa bir Yūsuf-cemāl
b. Dil ʿaceb dīvānedür bundan aña şeydā olur
3. a. Cānum acıtdı lebüñ ṣabr ide ide būseñe
b. Ṣabr ile dirler egerçi kim ḳoruḳ ḥalvā olur
4. a. ʿAḳlın aldursa ne var göñlin virüp saña raḳīb
b. Şehr·i kāfir kim güc ile alına yaġma olur
5. a. Ne umar göñlüm Revānī genc·i ḥüsn·i yārdan
b. Zülfi gördükce anı biñ başlu ejderhā olur
|p83
1. a. Bahār oldı ne ̮ola seyrān idüp şād olsa cānānlar
b. Be-ġāyet şād olur seyrān deminde lācerem cānlar
2. a. Benek altunlular geymiş çemen bezminde dil-berler
b. Ḳızıl güllerle gūyā kim ṭonanmışdur gül-istānlar
3. a. Degül bu ġoncalar şevḳuñ eliyle ey gül·i raʿnā
b. Senüñçün yine çāk olmış gül-istānda girībānlar
4. a. Çemende bir büt·i sīmīn-beden sāḳīlik eylerken
b. Şarāba tevbe olur mı müselmānlar müselmānlar
5. a. Yüzu ṣuyı durur şīrüñ Revānī ehl·i bezmüñ kim
b. Bu naẓm·ı āb-dāruñdan bozuldı niçe dīvānlar
|p84
1. a. Āteş kenārı şimdi gül-istān kenārıdur
b. Ẓāhir budur ki ḳış güninüñ lāle zārıdur
2. a. ʿAyş eyle bende-ẖānede gel iç şarāb·ı nāb
b. Ey dōst oda ṣoḥbetinüñ rūz-gārıdur
3. a. Leşker çeküp gelürse ne var şeh-süvār·ı ġam
b. Bezm ehlinüñ ṣurāḥī çü muḥkem ḥiṣārıdur
4. a. El üzre nice ṭutmayayın cāmı zāhidā
b. Ol bir ʿazīzüñ ehl·i dile yād-gārıdur
5. a. Ol kebk·i ẖōş-ẖırām iñen yüksek uçmasun
b. Ṣayyāddur Revānī ol anuñ şikārıdur
|p85
1. a. Nāme·i pīçīdedür ṣan sāʿid·i sīmīn·i yār
b. Kim aña mühr urdı tāze dāġdan ol gül-ʿiẕār
2. a. Dāġ ṣanmañ sāʿidinde görinen cānānenüñ
b. Şāh·ı gülde bir ḳızıl güldür kim olmış āşikār
3. a. Yā maḥabbet cāmıdur ṭolu şarāb·ı nāb ile
b. Kim anı ʿāşıḳlara eyler tekellüf ol nigār
4. a. Yā meger şol çeşm·i ʿāşıḳdur ki ṭolmış ḳan ile
b. Aġlamaḳdan ḥasret·i cānān ile leyl ü nehār
5. a. İñle bülbül-veş Revānī ki ̮ol gül·i raʿnā yine
b. Lāle gibi āteş·i ʿışḳ ile olmış dāġ-dār
|p86
1. a. Gerçi her lāle-ruẖuñ ṣaçları sünbüller olur
b. Bizüm il dil-berinüñ beñleri fülfüller olur
2. a. Ġam degül kūyını terk itmese ʿuşşāḳ göñül
b. Çünki bir gül-şen içinde niçe bülbüller olur
3. a. Giceler ṣubḥa degin ʿayş·ı bahār eyle müdām
b. Ki felek gül-şen olup encüm aña güller olur
4. a. Ḳo beni sīnamüñ üstinde elifler çekeyin
b. ʿIşḳ ser-menziline irmek içün yollar olur
5. a. Ḳanlu yaşumla Revānī çemen·i kūyında
b. Tāze güller açılup ẖūb ḳaranfüller olur
|p87
1. a. Gözlerüm tīre olur ẖaṭṭuña ḳılduḳca naẓar
b. Ḫaṭ ġubār olsa bu rūşendür ider göze ẓarar
2. a. Ġam durur ʿışḳ yolında baña mūnis eks̲er
b. Şādī her-cāyī durur gāh gelür gāh gider
3. a. Gördiler sāġarı kim göñli açuḳ kīsesi pür
b. Rindler üşe gelüp her biri ṭolana çeker
4. a. Ḳorḳaram ḳāmetüñüñ ẖalḳa belāsın dimege
b. Şimdi söylenmez olupdur güzelüm ṭoġru ẖaber
5. a. Lebi aġzumda iken gitmege istedi didüm
b. a. begüm ne ̮olduñ iversin ṣuya mı düşdi şeker
6. a. Ḫūblar ṣūreti naḳşıyle Revānī bu göñül
b. Döndi şol āyineye kim ola naḳş anda ṣuver
|p88
1. a. Dil-berler içre niteki cānān göñüllüdür
b. Güller içinde ġonca·i ẖandān göñüllüdür
2. a. Ser-keşlenürse leşker·i ḥüsn içre vechi var
b. Dil almada çü zülf·i perīşān göñüllüdür
3. a. Cennetde Ṭūbīye daẖi baş egmeye gibi
b. Ḳaddüñ bu gün ki serv·i ẖırāmān göñüllüdür
4. a. Mescidde ehl·i ṣoḥbeti vāʿiẓ ṭonatmasun
b. Bilmez anı ki ẖaylīce yārān göñüllüdür
5. a. Pīr oldı gerçi daẖi güzel sevmesin ḳomaz
b. Miskīn Revānī ne ̮eylesün oġlan göñüllüdür
|p89
1. a. Ḳanḳı ʿāşıḳ kim senüñ zülfüñe göñlin baġlar
b. Ḳaralar geymiş bulutlar anuñ içün aġlar
2. a. Ey şeker-leb dir gören aġyārlar içre seni
b. Hem-dem olmış ṭūṭīye ḥayfā ki şimdi zāġlar
3. a. Gūyiyā bezm·i belāda def durur sīnem benüm
b. Kim aña her yañadan pullar olupdur dāġlar
4. a. Dāˀimā giryān ṣurāḥī dāˀimā ẖandān ḳadeḥ
b. Bu cihāndur kimisi güler kimisi aġlar
5. a. Ṭaġlar gibi cefāsın çekdügümçün aġlaram
b. Hey benüm çekdügümi çekmez Revānī ṭaġlar
|p90
1. a. Gün gibi sāġarı ne ̮içün ḳosun elden şāʿir
b. Kim anuñ altun adı vara ola mı baḳır
2. a. Yine dil şīşesini seng·i cefā ile ṣıduñ
b. Nice ̮olurdı ara yerde gözedilse ẖāṭır
3. a. Çünki ʿuşşāḳa cehennem gibidür firḳat·i yār
b. Bu müselmānlaruñ od itme yerin hey kāfir
4. a. Neyledüñ ġamze·i dil-dūzuña ey şūẖ·ı cihān
b. Ki beni şişlere ṣancar ṭuruban ikide bir
5. a. Nice rām olmaya naẓmuña perī-peykerler
b. Sözlerüñ siḥr Revānī ḳalemüñ bir sāḥir
|p91
1. a. Dil-rübālar içün ġazel didiler
b. Senüñ içün iñen güzel didiler
2. a. İtlerüñle görüp maḥalleñde
b. Beni her devlete maḥal didiler
3. a. Mey ü maḥbūb ile geçen ʿömre
b. Zāhidā ʿömr·i bī-bedel didiler
4. a. Dil cidāl eylemez dehānuñ içün
b. Yoḳ yere olmasun cedel didiler
5. a. Ṣōfīlerle Revānī eglenmez
b. Ḫūblar ṣoḥbetine gel didiler
|p92
1. a. Yüzüñe āfitābuñ nisbeti var
b. Saña yerden göge dek minneti var
2. a. Nigāruñ gitmeden öp zülfin ey dil
b. Ki ʿömr·i nāzenīnüñ sürʿati var
3. a. Ḳaşuñ miḥrābın añmış yine ṣōfī
b. Namāza durduġından niyyeti var
4. a. Müneccimdür ruẖuñ devrinde gerdūn
b. Ki ̮öñinde ay u günden sāʿati var
5. a. Güneş yüzlülere içdi ṭoluyı
b. Revānīnüñ yine germiyyeti var
|p93
1. a. Nāzenīnüñ nāzı çoḳ ammā vefāsı az olur
b. a. benüm çoḳ sevdügüm bu ne tükenmez nāz olur
2. a. Bu hevāyī göñlümi bir dil-ber içün ṣaḳlaram
b. Rind·i şāhid-bāz olan eks̲er kebūter-bāz olur
3. a. Uçsa bir Ṭūbā-ẖırāmuñ dil hevāsında ne ̮ola
b. Gördügüñ ṭāvūs·ı ḳudsīdür hümā-pervāz olur
4. a. Bildiler mest idügüm ʿışḳuñ şarābından beni
b. Sāḳıyā şol mey diyen kāfir ʿaceb ġammāz olur
5. a. Devr·i ḥüsnüñde Revānī leblerüñ terk idemez
b. Rūmdur bunda şarāb içmez kimesne az olur
|p94
1. a. Her bendenüñ başında saʿādet külāhı var
b. Devlet anuñ ki sencileyin pādişāhı var
2. a. Sulṭān·ı ʿışḳdur ne ̮ola ʿāşıḳ gedā ise
b. Ki ̮üstinde dūd·ı āh ile çetr·i siyāhı var
3. a. Geçse zamāne şeyẖi ne ̮ola pīr·i mey-fürūş
b. Mey-ẖāne gibi çünki anuñ ẖāne-ḳāhı var
4. a. Germ olma hāy u hūyuña iñende ṣōfiyā
b. ʿĀşıḳlaruñ da derd ile çoḳ āh u vāhı var
5. a. Ne ̮eyler Revānī Mekkede ey Kaʿbe·i niyāz
b. Mihrāb ḳaşlaruñ gibi çün secde-gāhı var
|p95
1. a. Baña pīr·i muġānuñ ʿizzeti var
b. O ṣāḥib-devletüñ ẖōş himmeti var
2. a. Lebüñ añıldı raḳs urdı ḳadeḥler
b. Şebüñ sāḳī ʿaceb germiyyeti var
3. a. Müneccimdar felek ḳapuñda şāhum
b. Ki ̮öñinde ay u günden sāʿati var
4. a. Begüm sen şāha bende ̮olmış Revānī
b. Saʿādetlü ḳul ancaḳ devleti var
|p96
1. a. Ḳanḳı ʿāşıḳ kim müdām ol dil-rübā yanındadur
b. Bir gedā·yı ẖōşdur kim pādişā yanındadur
2. a. Cānına derd ü belā ol kim ḳapuñdan ola dūr
b. Başına devlet anuñ kim sen hümā yanındadur
3. a. Dil lebüñ devrinde çünkim zülfüñ idindi maḳām
b. Her maraẓdan derdi yoḳ dārüˀş-şifā yanındadur
4. a. Ceng içün tatar dirler çeşmüñ ammā Ḥaḳ bilür
b. Türk·i tīr-endāzdur kim oḳ u ya yanındadur
5. a. bir dem ayrılmaz Revānī yārdan bed-ẖū raḳīb
b. Bu imiş didükleri devlet ḳaẓā yanındadur
|p97
1. a. Ṣaçuñ ʿāşıḳlara ʿālemde ʿömr·i cāvidānīdür
b. Lebüñ ʿayş itmege her dem şarāb·ı erġavānīdür
2. a. Şarāb içsem güzellerle beni ʿayb itme ey zāhid
b. Bahār eyyāmı gül vaḳti yigitlik ʿunfuvānıdur
3. a. Ne dirlik baña hey ʿömrüm ki hecrüñde ġıdādur ġam
b. Cihānda ölmeyecekce hem-ān zindegānīdür
4. a. Geyüp bir āsumānī cāme ẖalḳı öldürür ol meh
b. Ne çāre hey müselmānlar belā·yı āsumānīdür
5. a. Maḥalleñde güzeller çoḳ Revānī ġam yime her-giz
b. Şikār eksük degül zīrā ki şāhīn āşiyānıdur
|p98
1. a. Gözyaşın dil o laʿl·i nāba virür
b. Rind olan aḳçasın şarāba virür
2. a. Serv·i nāzum gözüm yaşı āẖir
b. Ḳorḳarın ʿālemi ẖarāba virür
3. a. Cebhesi şerm-sār ider māhı
b. Ruẖları nūrı āfitāba virür
4. a. Aġzına sög varaḳ varaḳ ẖāce
b. Şol ki bir cāmı biñ kitāba virür
5. a. Her ne girse Revānīnüñ eline
b. Yā şarāba yaẖōd kebāba virür
|p99
1. a. Būse nuḳliyle lebüñüñ çün şarāb·ı nābı var
b. Ṣoḥbetüñ çaḳ vaḳtidür gel cümle ʿayş esbābı var
2. a. Bir hilāl-ebrūyı gördüm ẖaṭṭı gelmiş tāzece
b. Mescidi yıḳılmış ammā bir güzel mihrābı var
3. a. Nice secde ḳılmasun ʿāşıḳ cemālüñ göricek
b. Kaʿbedür yüzüñ ki beñlerden anuñ iʿrābı var
4. a. Gice ol Yūsuf-cemāli ẖābda gördüm dimiş
b. Var ise çeşminde ṣōfīnüñ ẖayāl·i ẖābı var
5. a. Olımazsın ʿışḳ yolında Revānī gibi sen
b. Bu ṭarīḳuñ dürlü dürlü sōfiyā ādābı var
|p100
1. a. Dāˀimā meylüm benüm ol ḳāmet·i bālāyadur
b. Ḳadrüm alçaḳdur egerçi himmetüm aʿlāyadur
2. a. Ey ṣanem zülfüñ nice meyl itmesün laʿlüñe kim
b. Nisbeti ehl·i ṣalībüñ Ḥaẓret·i ʿĪsāyadur
3. a. Gerdiş·i gerdūn ile başından eksilmez zevāl
b. Her kimüñ kim meyli dāˀim gün gibi dünyāyadur
4. a. Ayaġuña yüzini süren saʿādet ehlidür
b. Āsitānuñ ʿizz ü devlet manṣıbına pāyedür
5. a. Çeşm ü ebrūsı durur alan Revānī göñlini
b. Ḳaş u göz ḥüsn ehline ġāyet eyü ser-māyedür
|p101
1. a. Nice oruç tutar gül yüzlü dil-ber
b. Ki dāˀim vardur aġzı içre şekker
2. a. Oruç bir aydur raḥmet göginde
b. Sebeb budur ṭutulduġına eks̲er
3. a. Oruç irişeli görinmez oldı
b. Meger kim ʿīde ḳarşu gitdi sāġar
4. a. Cemāl·i ʿīde ʿālem ẖalḳı müştāḳ
b. Ṣafā·yı ṣavm ile dil-ber münevver
5. a. Ḳıyāmetdür güzeller ʿīd cennet
b. Şarāb olmış Revānī anda Kevs̲er
|p102
1. a. Hilāl ebrūları ṣanmañ ki yāruñ şīveye başlar
b. Biri birisine ḳarşu çeker yayın kemān-keşler
2. a. Gice sehv ile meclisde ḳamer yüzüñe öykünmiş
b. Anuñçün şemʿün ey dil-ber yaġar aġzından āteşler
3. a. Peleng·i çarẖ ṣayduñdur şarāb iç cürʿa ṣaç bezme
b. Bu gün ẖum-ẖāne ṣadrında döşe naṭʿ·ı münaḳḳaşlar
4. a. Cemālüñ mescidi içre ne ṭururlar bu kāfirler
b. Ḳaşuñ miḥrābı altında nedür ol iki ser-ẖōşlar
5. a. Cemāl·i yāri ʿuşşāḳa ḳomaz seyr itmege bir dem
b. Cihānda ḳutlu gün görmez Revānī uñmaduḳ başlar
|p103
1. a. Ṣanmañ ki sāḳī ṭutduġı cām·ı şarābdur
b. Bir yerde beş hilāl ile bir āfitābdur
2. a. Ḳadd ü dehānı ṣıfr u elifdür ki ḥüsninüñ
b. Birini on eyledi ol da ḥisābdur
3. a. ʿAyş·ı müdām eyleyelüm gel ki bezmümüz
b. Çeng ü çeġāne ile şarāb u kebābdur
4. a. Ol şūẖ·ı bī-vefānuñ işi güci ʿāşıḳa
b. Geh nāz u gāh şīve durur geh ʿitābdur
5. a. Yazınsa ḥikmet ehli ʿaceb mi kelāmuñı
|p104
1. a. Yüzüñe ne ̮ola ger dirlerse güldür
b. Saña kim dir ki gül gibi yüzüñ dür
2. a. Ḳaçan nāz eyleyüp dişler lebin yār
b. Dizilür rişte·i al üstine dür
3. a. Tehī ṣanmañ görüp ʿuşşāḳ bezmin
b. Göñüller ṭolu ʿışḳ ile ḳadeḥ pür
4. a. Didüm dil ẖastañ olmış gözin açmaz
b. Gülüp dil-ber didi ol daẖi uyur
5. a. Semend·i ṭabʿuña ayaḳdaş olmaz
b. Revānī çünki meydān yügrügüñdür
6. a. ʿAceb bekrī degül mi cām·ı bāde
b. Ṣafāsından şarāb ile yüzin yur
7. a. Senüñ biñ biñ cefāña ṣabr ider dil
b. Anuñ bir kerre bārī ẖāṭırın ṣor
|p105
1. a. Şol şeh-süvār·ı nāz ki raʿnā sipāhīdür
b. Bilsek anı ne memleketüñ pādişāhıdur
2. a. Nār·ı ruẖında ẓāhir olan ẖaṭ degül durur
b. Kim bile ḳanḳı ʿāşıḳınuñ dūd·ı āhıdur
3. a. Ṣōfīye zühd içün ne ̮ola virilse ṣavmaʿa
b. Mey-ẖāne rind·i bāde-keşüñ ẖāne-ḳāhıdur
4. a. Dünyā evine ʿārif olan püşt·i pā urur
b. Kim sāḳ·ı ʿarş dāˀim anuñ tekye-gāhıdur
5. a. Ol şāha boynı baġlu ḳul iden Revānīyi
b. Şol gerden·i beyāẓıle zülf·i siyāhıdur
|p106
1. a. Şol bī-nevā ki bir güzelüñ mübtelāsıdur
b. ʿAyb itme zāhidā anı göñül belāsıdur
2. a. Yüksek ṭutarsa yār gibi kendüyi güneş
b. Ṭaʿn itmeñüz aña ki güzellik hevāsıdur
3. a. Fikr itme sīnesin ki yürek oynamasıdur
b. Ḫaṭṭ·ı lebini añma ṣaḳın cān taṣasıdur
4. a. Ol kebk·i ẖōş-ẖırāmı ne var ṣayd itmege
b. Göñlüm ḳuşıyle sīne ki şāhīn yuvasıdur
5. a. Cānā Revānī ölse lebüñçün ʿaceb degül
b. Zīrā sipāhīnüñ yidügi ḳan bahāsıdur
|p107
1. a. Dil ü cānuñ ḳapuñda ġulġulı var
b. Bu gül-zāruñ bir iki bülbüli var
2. a. Yaşum cūş itse ol ider ẖurūşı
b. Meger deryānuñ anuñla dili var
3. a. Gedā·yı ẖān·ı ḥüsnüñdür felek kim
b. Yanında māh·ı nevden keçküli var
4. a. Ruẖ·ı Gül-gūna ḳoş Şeb-dīz·i zülfi
b. Çü göñlüm gibi anuñ ögdüli var
5. a. Ne ẖōş reyḥāncıdur zülfi Revānī
b. Ki anuñ deste deste sünbüli var
|p108
1. a. Çevgān·ı zülfi yāra göñül mübtelālanur
b. Bir ṭop gibi öñine düşmiş yuvalanur
2. a. Ṣanmañ bizi ki şimdi bilişdük nigār ile
b. Dil çaḳ ezelden anuñ ile āşinālanur
3. a. Ol pādişāh·ı ḥüsne varup ḳul olalı dil
b. Ben bendesine gelmiş efendim aġalanur
4. a. Ol ḳaşı yayı görse göñül unıdur beni
b. Ol uñmayası varduġı yerde oyalanur
5. a. Yāruñ Revānī dāmenine el uralı ẖār
b. Gül-şende ġonca gibi yüregüm paralanur
|p109
1. a. Şol mübtelā ki çeşmi siyāhından ayrudur
b. Nergis gibi ṣarasa ʿaceb mi ki ṣayrudur
2. a. İki ḥarāmīdür güzelüm yol baṣar gözüñ
b. Diller metāʿın almada ġamzeñ bir uġrudur
3. a. Bu yazılu cerīde·i ḥüsn içre ẖaṭ degül
b. ʿĀşıḳlaruñ başında hem-ān ḳara yazudur
4. a. Āzādeler içinde irer ḳadr·i ʿālīye
b. Serv·i sehī gibi şu ki yolında ṭoġrudur
5. a. Çoḳ teşne-dillere meded ider bu şiʿr·i ter
b. Bu naẓm·ı āb-dār hem-ān bir içim ṣudur
6. a. Pīr oldı gerçi daẖi güzel sevmesin ḳomaz
b. Miskīn Revānī ne ̮eylesün oġlan göñüllüdür
|p110
1. a. Çemen ki şimdi gül ü bülbülüñ yataġıdur
b. Tamām ʿişretüñ eyyāmı ʿayş çaġıdur
2. a. ʿAceb mi ben gice gündüz duʿāsın eylersem
b. Saʿādetüm güneşi devletüm çerāġıdur
3. a. Nigār ẖaṭṭını ṣaḳlar müdām zülfi ile
b. Kimesne anı göremez ılan ayaġıdur
4. a. Göñül vilāyetini ḳorḳaram ẖarāb eyler
b. Bizümle ol gözi kāfir bu gün ki yaġıdur
5. a. Revānī buldı yine bir kemān-ebrūyı
b. Sipāhīnüñ işi dāˀim sefer yaraġıdur
|p111
1. a. Ḥüsn bāġın her nefes ġonca-dehenler tāzeler
b. Gül-şen·i cennet gibi anda bulınur tāzeler
2. a. Şerbetin añma ṭabībüñ baña mey ṣun sāḳıyā
b. Kim anuñ bir ḳaṭrası niçe cigerler tāzeler
3. a. Didüm ey dil-ber giderme ʿārıẓuñdan zülfüñi
b. Didi gül mecmūʿasında yoḳ durur şīrāzeler
4. a. Ṣīt·i naẓmum sen mehüñ vaṣfıyle çıḳdı göklere
b. Günbed·i eflāki ṭoldurdı bu gün āvāzeler
5. a. Şöyle vaṣf itdüm Revānī aġzı ile ḳaşını
b. Umaram kim her yüzük ḳaşına anı ḳazalar
|p112
1. a. Ḫūb-rūlar içre ey dil māh kim şehrī geçer
b. Ṣora varsañ ol güneş yüzlüyle hem-şehrī geçer
2. a. Baḥr urup mevc ursa ʿāşıḳ gözyaşından aġlamaz
b. ʿIşḳ deryāsı içinde gördügüñ baḥrī geçer
3. a. Yār·ı sengīn-dil raḳībüñ ḳaçsa ṭaʿnından ne ̮ola
b. Bir ʿaceb efʿīdür ol ṭaşa daẖi zehri geçer
4. a. Kirpügi ucına aṣmaz ḳaṭra deñlü gözlerüm
b. Bursanuñ ey dil Pınarbaşı ki bir nehrī geçer
5. a. Ṣaḳın incinme Revānī gerdiş·i gerdūna kim
b. Ṣabr ẖōşdur bu cihānuñ luṭfı vü ḳahrı geçer
|p113
1. a. Lebüñ içün baña neler dirler
b. Bal ṭutan barmaġın yalar dirler
2. a. Yüzüñ aḳ alnuñ açuḳ olduġıçün
b. Ehl·i diller saña ḳamer dirler
3. a. Ḫaṭṭuña ben benefşedür diyeli
b. Yeñile çıḳdı bu ẖaber dirler
4. a. Derd·i ʿışḳ ile ẖūb imiş ölmek
b. Yār ile ẖōş olur sefer dirler
5. a. Nāme·i şiʿrine Revānīnüñ
b. Lebi vaṣfıyle ney-şeker dirler
|p114
1. a. Oldı işigüñ ḳadr ile eflāke berāber
b. Dutduġı içün kendüzini ẖāke berāber
2. a. Şol ḥoḳḳa·i laʿlüñde ʿaceb ne ̮eyler ola zülf
b. Kim gördi ki mārı ola tiryāke berāber
3. a. Zülfüñ gibi bir zülf güzellerde olur mı
b. Ḥāşā ki benefşe ola ẖāşāke berāber
4. a. Bir māh-liḳānuñ yine ser-geştesi olmış
b. Gördüm felegi bu dil·i ġam-nāke berāber
5. a. Aḥsent güzel bilmede ṭabʿuña Revānī
b. Bir nesne olur mı ʿaceb idrāke berāber