ĠAZELLER

ELİF

-1-

feʿilātün feʿilātün feʿilātün feʿilün

1.	a.	Mülk·i ġam içre göñül çün didiler şāh saña
	b.	Nevbet·i şāhī yeter āh·ı seḥergāh saña

2.	a.	Gice gelmeyecegin ṣoḥbete ey dil bilürüz
	b.	Hele var gör ki ne yüzden ṭoġar ol māh saña

3.	a.	Cevr ile ʿāşıḳuñun çünki tamām itdüñ işin
	b.	Nesne eksüklügini virmesün Allāh saña

4.	a.	Olmasañ ḥüsn ilinüñ sen güzelüm pādişehi
	b.	Mihr ü meh ḳurmaz idi ẖayme vü ẖargāh saña*

5.	a.	Āh u vāh ile ʿaceb geçdi Revānī günümüz
	b.	Ne‿idelüm ne‿eyleyelüm āh baña vāh saña*

-2-

fāʿilātün fāʿilātün fāʿilātün fāʿilün

1.	a.	Çatma ḳaftan gey virür zīnet benüm cānum saña
	b.	Yaraşur ḳaplan derisi taḳye arslanum saña

2.	a.	Pādişehsin ẖaṭṭ·ı ʿanber-bāruñı eyle tırāş
	b.	Bir ḳarınca dil uzatmasun Süleymānum saña

3.	a.	Zülf·i müşkīnüñ ḳulaġuña egildügi bu kim
	b.	Söylemek ister benüm ḥāl·i perīşānum saña

4.	a.	Pādişāhum ṣanma feryād eylerem kūyuñda ben
	b.	Salṭanat kūsın çalar bu āh u efġānum saña* *

5.	a.	Meclisüñde sūz·ı şevḳumdan beyān itmek diler*
	b.	Aġız açduġı budur çāk·i girībānum saña*

6.	a.	Ṣalınup gögsüñ gerersin çün Revānīyi görüp
	b.	Ol sebebden ben didüm serv·i ẖırāmānum saña

-3-

fāʿilātün fāʿilātün fāʿilātün fāʿilün

1.	a.	Ḳaşlaruñ görüp meh·i nev oldı sergerdān saña*
	b.	Ḫūblar içre begüm yetmez mi bu ʿunvān saña*

2.	a.	Degme bir meh-rūy ile daʿvā·yı ḥüsn itmek neden
	b.	Ṣaḳın ey āyīne bir gün görinür cānān saña

3.	a.	Peyk·i āhumla yarışmaḳ ister iseñ ey ṣabā
	b.	Ḳaç öñümden vireyin bir oḳ atım meydān saña*

4.	a.	Oḳıyup bir gün şikeste ẖāṭırumı yazmaduñ
	b.	Ḥālümi bir bir dimişken defter ü dīvān saña*

5.	a.	Mevsim·i güldür ḳo zühdi gülsitānda ʿayş içün
	b.	Muntaẓır durur Revānī cümle·i yārān saña

-4-

fāʿilātün fāʿilātün fāʿilātün fāʿilün

1.	a.	Yalvarup kime ḳul olsam ol emīr olmaz baña
	b.	Ḳanḳı şeyẖe ben mürīd olsam o pīr olmaz baña

2.	a.	Ayaġum almaḳ diler sāḳī daẖi devrān gibi
	b.	Cām·ı meyden ġayrı kimse destgīr olmaz baña

3.	a.	Begligüm var cām·ı meyle gūşe·i ẖumẖānede*
	b.	Andan özge sāḳıyā tāc u serīr olmaz baña

4.	a.	Medḥini ḳo nāfenüñ açma ḳutuyı ey ṣabā*
	b.	Ḫāk·i pāyı gibi çün misk ü ʿabīr olmaz baña*

5.	a.	İrdi naẓmum gerçi Selmāna Revānī āh kim
	b.	Terbiyetler eyleyüp kimse ẓahīr olmaz baña

-5-

fāʿilātün fāʿilātün fāʿilātün fāʿilün

1.	a.	Göz yaşıyle āhuma baḳmaz ne‿içün ol bī-vefā
	b.	Ey göñül merġūb olur her yerde çün āb u havā*

2.	a.	Ey feraḥ şol ġam diyen yıḳdı benüm göñlüm evin
	b.	Ḳandasın bi'llāhi gel ehlen ve sehlen merḥabā

3.	a.	Cān ṣatup derdüñi alduḳ ʿışḳ bāzārında kim
	b.	Umaruz şekker lebüñden dostum şerbet bahā*

4.	a.	Utanur ben bī-nevā ile muṣāḥib olmaġa
	b.	Hey nice ʿār itmesün ol pādişeh ben bir gedā*

5.	a.	Ol ṭabīb·i cān buyurmaz leblerinüñ şerbetin
	b.	Bir uñulmaz derde olmışdur Revānī mübtelā

-6-

mefʿūlü fāʿilātü mefʿāīlü fāʿilün

1.	a.	Mey içmemek olur mı o ġonca-dehān ola
	b.	Meclisde hemḳadeḥ leb·i şekker-feşān ola

2.	a.	Altun piyāle ile gümiş tebsi ay u gün
	b.	Bezmümde sāḳi ki‿ol meh·i nāmihrbān ola

3.	a.	Zāhid şarāba tevbe mi olur bu demde kim
	b.	Tāze bahār ola gül ola gülsitān ola

4.	a.	Uṣlan göñül ṭolaşma görüp Leyli zülfini*
	b.	Mecnūn gibi cihānda yeter dāstān ola *

5.	a.	Ḥüsnüñ zamānıdur ne diyem şimdi ben saña
	b.	Ḳadrin Revāninüñ bilesin bir zamān ola

-7-

fāʿilātün fāʿilātün fāʿilātün fāʿilün

1.	a.	Rind iseñ meyli ḳoma cām·ı muṣaffādan yaña
	b.	ʿĀrif iseñ götür ayaġı Ġalaṭadan yaña

2.	a.	Mülk·i Rūm içre firengistānı görmek isteyen
	b.	Seyre geçsün dāyimā ol şehr·i raʿnādan yaña

3.	a.	Şol fireng oġlanların ṣōfī göreydüñ bir naẓar
	b.	Göz açup baḳmaz idüñ cennetde ḥavrādan yaña

4.	a.	Ṣanuram oldı muḳārin gökde Pervīne hilāl
	b.	Keştīye binüp güzeller gitse deryādan yaña

5.	a.	Dīn yaġmasın ider kāfirbeçe maḥbūblar
	b.	Ṣaḳınuñ varmañ müselmānlar kilīsādan yaña

6.	a.	Bu felek anuñ mücellā ḳaṣrıdur kim āfitāb
	b.	Seyr içün revzen açupdur aña dünyādan yaña

7.	a.	Ḥūr u ġılmān ile pür olmış Revānī her ṭaraf
	b.	Baḳmaz içine giren firdevs·i aʿlādan yaña

-8-

fāʿilātün fāʿilātün fāʿilātün fāʿilün

1.	a.	Leblerüñ şīrīn ruṭabdur kim didi ʿunnāb aña
	b.	Dadı yoḳ öykünür ise dōstum cüllāb aña*

2.	a.	Gūşe·i meyẖāneyi dünyāya virmez gerçi dil
	b.	Ḳorḳarın ayaḳ ṭolar bir gün şarāb·ı nāb aña

3.	a.	Devr·i ḥüsnüñde ʿaceb mi ḳaşuñı ḳılsañ tırāş
	b.	Kaʿbedür ḳıblem yüzüñ ḥācet degül miḥrāb aña

4.	a.	Yiri gögi ayaġı altına aldı ey göñül
	b.	Görmedi bir beñzerin ẖurşīd·i ʿālemtāb aña

5.	a.	Kendü bildügin ider uyup Revānī ʿışḳa dil
	b.	Kimsenüñ sözin işitmez ne‿eylesün aḥbāb aña

-9-

feʿilātün feʿilātün feʿilātün feʿilün

1.	a.	Āfet·i devr·i zamān olmaġa ol māh-liḳā
	b.	Geydi Pervīn mis̲āli beñek altunlu ḳabā

2.	a.	Fitne·i devr·i ḳamer ẖāl·i ruẖ·ı dilberdür
	b.	Ḳad·i bālāsı ile zülfi belā üzre belā

3.	a.	Gün gibi cāme·i zer-beftüñe ẖıdmetde idi
	b.	Güzelüm māh·ı nev olmasa idi yeñi yaḳa

4.	a.	Hīç güzellerde maḥabbetden es̲er görinmez
	b.	Ḳanı bir kimse ki vardur diye beglerde vefā

5.	a.	Zülf ü çeşmi ile ḳaddin göreli cānānuñ
	b.	Dil ü cān ile Revānī ideyin aña duʿā

-10-

fāʿilātün fāʿilatün fāʿilātün fāʿilün

1.	a.	ʿĀşıḳ olmışdur güneş ey ruẖları raʿnā saña
	b.	Ṭolanur dünyāyı her gün bulımaz hemtā saña

2.	a.	Altun üsküfle ṭurup her meclise raʿnālanur
	b.	Gör ne yüzden öykünürmiş şemʿ·i bezm-ārā saña

3.	a.	Bezm içinde gördi sāḳīlıḳ idersin ey perī
	b.	Aġzın egdi ḳaldı ḥayrān sāġar u ṣahbā saña

4.	a.	ʿAyşdur gül yüzlülerle baña gülşen gūşesi
	b.	Zāhidā ḥūrīler ile cennetü'l-meˀvā saña

5.	a.	Başını ṭaşdan ṭaşa urur görüp aġladuġuñ
	b.	Acıduġından Revānī bu yedi deryā saña

-11-

fāʿilātün fāʿilātün fāʿilātün fāʿilün

1.	a.	Sebz ẖaṭ kim hemdem olmışdur leb·i cānān aña
	b.	Ḫıżrdur ki‿olmış müyesser Çeşme·i Ḥayvān aña*

2.	a.	Kūyuñuñ bāġını tāze ṭutmaġa ey serv·i nāz *
	b.	Kirpügüm ebr·i siyeh eşküm durur bārān aña* *

3.	a.	Gördi dilberden ṣurāḥī būseler alur ḳadeḥ
	b.	Bezm içinde ḳaldı aġzın açuban ḥayrān aña*

4.	a.	Ṣaḥn·ı gülşende biten ṣanma ḳızıl gül bergidür*
	b.	Dāġ·ı bülbül penbesidür kim bulaşmış ḳan aña*

5.	a.	Şemʿ·i bezmüñ ey kemān-ebrū raḳībüñ cānına
	b.	Gūyiyā bir ṭīrdür kim şuʿlesi peykān aña* *

6.	a.	Misk diyü ẖāk·i pāyın hā ṣatar gülşende bād*
	b.	Yaraşur gülden Revānī keffe·i mīzān aña*

-12-

fāʿilātün fāʿilātün fāʿilātün fāʿilün

1.	a.	Geh cefā geh cevr ü geh nāz oldı çünkim ẖū saña
	b.	Bī-vefā dildār imişsin dōstum yāhū saña *

2.	a.	Ḳıble ḥaḳḳı ṭoġruyam yoluñda ben līkin raḳīb
	b.	Egri sözler söylemişdür ey kemān-ebrū saña*

3.	a.	Gördi zülfin öpdügüm ẖışm eyleyüp dilber didi *
	b.	Varasın ögünesin ḳalur ise ger bu saña* *

4.	a.	Göz ḳızardup ṭaġlara düşmiş yürür Mecnūn gibi
	b.	Ey ṣaçı Leylā meger ʿāşıḳ durur āhū saña*

5.	a.	Ola cismümde benüm her üstüẖᾱnum māh·ı nev
	b.	Ger olam ey māh-rū bir gice hempehlū saña*

6.	a.	Devr·i ḥüsninde Revānī şād ü ẖandānsın bu gün *
	b.	Luṭf yüzinden ṭoġupdur beñzer ol meh-rū saña

-13-

fāʿilātün fāʿilātün fāʿilātün fāʿilün

1.	a.	Ay u gün görüp cemālin oldı sergerdān aña
	b.	Kim aña ḥayrān degül ben olmışam ḥayrān aña

2.	a.	Yazalı yāruñ berāt·ı ḥüsnine ḳaşı nişān
	b.	Geldi dilberler içinde ẖaylīce ʿunvān aña*

3.	a.	Yüz çevürmez ey kemān-ebrū ḳılıcuñdan göñül
	b.	Oḳlaruñla sīne çün oldı çıbuḳ ḳalḳan aña

4.	a.	Ḥüsni artar her ḳaçan kim yār zülfin şāneler
	b.	Ḫaylī şān virmiş durur zülf·i ʿabīr-efşān aña

5.	a.	ʿĪd·i vaṣlum isteyenler terk·i cān itsün dimiş
	b.	Öleyin öñinde anuñ olayın ḳurbān aña*

6.	a.	Ḥüsnüñ eyyāmında yād itdüñ Revānī bendeñi
	b.	Pādişāhum çoḳ degül mi bu ḳadar iḥsān aña

-14-

feʿilātün feʿilātün feʿilātün feʿilün

1.	a.	Güneşi ṣanma felek gösterür ey māh saña
	b.	ʿArż ider ʿāşıḳ olup mihrini her gāh saña

2.	a.	Gice gelmeyecegin ṣoḥbete ey dil bilürin
	b.	Hele var gör ki ne yüzden ṭoġar ol māh saña*

3.	a.	Göricek yārı göñül derd ile bir āh itdüñ
	b.	Ne‿eylesün bunca belā ile bu bir āh saña*

4.	a.	Yoḳ durur ẕerrece göñlüñde teraḥḥum es̲eri
	b.	Ne ʿaceb ẖāṣṣa virmiş durur Allāh saña

5.	a.	Ḳaldı fürḳatde Revānī iremez vuṣlatuña
	b.	Niçe yol ṭutar ise bulmadı hīç rāh saña*

-15-

mefʿūlü mefāʿīlü mefāʿīlü feʿūlün

1.	a.	Cān mürdelerin nuṭḳ·ı lebüñ ideli iḥyā
	b.	ʿĀlemde unudıldı ḳamu muʿciz·i ʿĪsā*

2.	a.	Bir dem ki ola nāz ile o serv ẖırāmān
	b.	Ḥayretde ḳalur görse revān Sidre vü Ṭūbā*

3.	a.	Bostān·ı cemāl içre boyuñ serv görelden
	b.	Baş açdı vü raḳṣ urdı olup vālih ü şeydā*

4.	a.	Firdevs·i cināna heves itmez göñül ey dōst
	b.	Bir dem olalı cennet·i kūyuñ aña meˀvā*

5.	a.	Dil ẓulmet·i zülfüñde ḳalup bulmaz idi rāh
	b.	Göstermese Mūsā gibi vechüñ Yed·i Beyżā*

6.	a.	İtüñ yerini alsa raḳībüñ ne ʿaceb kim*
	b.	Bu ʿaks·i felekdür gelür aʿlā yerine‿ednā*

7.	a.	Çün cān u göñül virdi viṣālüñe Revānī
	b.	Hecr odına ṭap yaḳ anı li'llāhi Taʿālā

-16-

fāʿilātün fāʿilātün fāʿilātün fāʿilün

1.	a.	Ḫūblar ebrūların ʿarż itdügi budur saña
	b.	Dimek isterler ḳuluñuz alnı tamġalu şehā

2.	a.	Dāġlarla lāle-veş zeyn olsa sīnem ġam degül
	b.	Her biri bir lāle-ẖaddüñ yādigārıdur baña

3.	a.	Ey ṣanem hecrüñ beni şol deñlü ḳılmışdur żaʿīf
	b.	Varamazdum kūyuña ger sāyem olmasa ʿaṣā

4.	a.	Ne ḳara gün idi kim gördüm yüzüñde ẖālüñi
	b.	Ne belā idi bu kim ḳaddüñe oldum mübtelā

5.	a.	Cevrini yāruñ çekerdüm ẓulm·i aġyār olmasa
	b.	Ġam yimezdüm ben Revānī ger bir imişse belā

BĀ

-17-

fāʿilātün fāʿilātün fāʿilātün fāʿilün

1.	a.	Eyleme ḥüsnüñ ʿarūsı yüzine zülfüñ niḳāb
	b.	Bī-tekellüf olalum olmasun ortada ḥicāb*

2.	a.	Varımaz başa senüñle ḥüsn daʿvāsın ḳosun
	b.	Aġrıdur ẖalḳuñ hemān yoḳ yire başın āfitāb*

3.	a.	Dāġ·ı ʿışḳuñ sīnede bir ẖaymedür ġam şāhına
	b.	Kim aña her yañadan çekdüm eliflerden ṭınāb*

4.	a.	Ṭāḳ·ı Kisrāyı ṣorarsañ yüri var ẖumẖāne ye*
	b.	Cām·ı Cem sırrını bilmek ister iseñ iç şarāb *

5.	a.	Ḳorḳarın ölür Revānī ḳahr ile ey bī-vefā
	b.	Niçe bir cevr ü cefā vü niçe bir nāz u ʿitāb *

-18-

fāʿilātün fāʿilātün fāʿilātün fāʿilün

1.	a.	Yollar üstinde düşüp yatmazdı hergiz āfitāb
	b.	Cām·ı mihrüñden senüñ ger olmasa mest·i ẖarāb*

2.	a.	Ṣubḥ-dem gördüm maḥalleñde saña ṣunmaġ içün
	b.	Bir ḳızıl gül almış ey dilber eline āfitāb*

3.	a.	Pādişāhum ḳaṣruñı eflāke beñzetsem ne‿ola
	b.	Kim yüzüñdür anda māh u āteşīn āhum şihāb

4.	a.	Baña ḳan yutdurduġın meclisde inkār itmese
	b.	Sāḳi·i gül-çihrenüñ yüzine urmazdı şarāb*

5.	a.	Yār gelmezse Revānī meclise olma melūl
	b.	Hem-ḳadeḥ olmaz gedāya ẖusrev·i ʿālī-cenāb*

-19-

mefʿūlü fāʿilātü mefāʿīlü fāʿilün

1.	a.	Zehri şitānuñ eylemedin cismüñüz ẖarāb
	b.	Elden ḳomañ şarābı ki tiryākdür şarāb*

2.	a.	Ṣovuḳdan ol ṣanem ne‿ola dāyim görinmese
	b.	Ḳış günlerinde az görinür çünki āfitāb *

3.	a.	Luṭf eyle yārı gey ṣaḳın üşütme ey ṣabā
	b.	Raḥm eyle ḳılma cānına ʿāşıḳlaruñ ʿaẕāb

4.	a.	Zāhid bu dem şarāba nice tevbe eyleyem
	b.	Ṣovuḳda eylemez kişi āteşden ictināb

5.	a.	Ṣarsa Revāni her gice pehlūsına seni
	b.	Sermādan aña gelmez idi hīç ıżṭırāb

-20-

* *

mefʿūlü fāʿilātü mefāʿīlü fāʿilün

1.	a.	Rengīn lebüñden urmasa dem ey püser şarāb
	b.	Olur mı idi laʿl gibi muʿteber şarāb

2.	a.	Zındān·ı şīşe içre kim eylerdi anı ḥabs
	b.	Uġurlamasa reng lebüñden eger şarāb*

3.	a.	Ṣırça sarāy içinde yatur ʿizz ü nāz ile
	b.	İḳlīm·i ʿayşa ẖusrev olupdur meger şarāb

4.	a.	Her rind ẖᾱcedür ḳadeḥ·i sīmdür ṣadef
	b.	Deryā-dil ol ki ḳıldı ḥabābı güher şarāb *

5.	a.	Yād itdügince laʿlüñi dil kendüden gider
	b.	Eyler Revāni her kişiyi bī-ẖaber şarāb*

-21-

fāʿilātün fāʿilātün fāʿilātün fāʿilün

1.	a.	Nevbahāruñ ey ṣabā bizden elin ayaġın öp
	b.	Ṭopuġına yüzüñi gözüñi sür başmaġın öp*

2.	a.	Ġonca·i nesrīnleri dizmiş bir ince iplige
	b.	Boynına aṣmış temāşā eyleyüp boġmaġın öp

3.	a.	Güllerin başı bezin almaḳ dilerseñ ey ṣabā
	b.	Bāġ·ı ḥüsnin seyr ider gibi olup yaşmaġın öp

4.	a.	Ḳılmaḳ isterseñ cihānı misk ü ʿanberden ṭolu
	b.	Zülf·i müşkīnin ḳoẖulayup yüri ṣaç baġın öp*

5.	a.	Cām·ı laʿli ger naṣīb ola Revānī nūş idüp
	b.	Ṣekkerin çıḳar dilin aġzuña al ṭudaġın öp

-22-

fāʿilātün fāʿilātün fāʿilātün fāʿilün

1.	a.	Āsitānında yaturdum üstüme geldi ḥabīb
	b.	Ḫaste ṣaġalmalu olsa ḳapuya gelür ṭabīb *

2.	a.	Ben didüm cānā senüñ kendü ġarībüñdür göñül
	b.	Yüzüme baḳup gülüp dilber didi va'llāh ġarīb

3.	a.	Ol şeh·i ẖūbāna öykünmek diler her gün güneş
	b.	Geh geyer zerrīn külāhın geh geyer altunlu şīb

4.	a.	Dīnüm īmānum disem zülfüñ ṭolaşmasun dile*
	b.	Kāfir·i ʿışḳ olana ḥācet degül hergiz ṣalīb* *

5.	a.	Ḳanı ol dem kim Revānī yüz sürem ayaġına
	b.	Degme bir üftādeye devlet naṣīb olmaz naṣīb*

-23-

fāʿilātün fāʿilātün fāʿilātün fāʿilün

1.	a.	Ol ḳamer-ṭalʿat yüzinden açdı çün müşkīn niḳāb
	b.	Ṣanasın kim ebr içinden ẓāhir oldı āfitāb

2.	a.	Ẕerrece nūr u żıyā virmezdi hergiz ʿāleme
	b.	Pertev·i ḥüsnüñden ey meh irmese ẖurşīde tāb

3.	a.	Yer yüzine luṭf idüp ol meh ḳadem baṣduġına
	b.	Reşk idüp dil çaġırur yā leytenī küntü türāb*

4.	a.	Ol ṭabīb·i cāndan em ṣordum dil·i mecrūḥuma
	b.	Aġzuma sögdi leb·i laʿli zihī şāfī cevāb

5.	a.	Gizlenüp gündüz giceyle ẓāhir olduġı bu kim
	b.	Gün yüzüñ envārına ṭāḳat getürmez āfitāb*

6.	a.	Ṣoḥbet·i vaṣluña cānā irmedin bu ẖaste dil
	b.	Yandı fürḳat odına döne döne hemçün kebāb *

7.	a.	Ḫāk idüp cānā ġam·ı ʿışḳuñ Revānī ẖasteyı
	b.	Ḳodı āteş sīnede başda belā vü gözde āb*

8.	a.	Sen Süleymān·ı zamāna ḥālümi ʿarż itmege
	b.	Benden öñ bu hüdhüd·i cān irmege eyler şitāb*

TĀ

-24-

mefʿūlü fāʿilātü mefāʿīlü fāʿilün

1.	a.	Her kime olsa sen güzelüm ḳılma iltifāt
	b.	Gül iki yüzlü olduġıçün oldı bī-s̲ebāt

2.	a.	Ṣāhīn baḳışlu yār göñül murġın avladur*
	b.	Ṣehbāzdur gözi aña ebrūları ḳanat*

3.	a.	Devr·i ẖaṭuñda leblerüñi kim görürse dir *
	b.	Ḳonur mürekkeb içine ʿādet durur nebāt*

4.	a.	Bu naṭʿ·ı ʿışḳ içinde göñül beydaḳını sür
	b.	Ferzānalıḳlar eyle ṣaḳın olma şāh-māt *

5.	a.	Ḫalḳ·ı cihān ölümlüsidür tāze sözlerüñ*
	b.	Viren Revāni naẓmı durur anlara ḥayāt *

-25-

feʿilātün feʿilātün feʿilātün feʿilün

1.	a.	Çünki mey içme naṣīb oldı bize rūz·ı Elest
	b.	Gel e ey ṣōfi senüñle olalum bāde-perest*

2.	a.	Seng·i ṭaʿn ile beni ṭaşlama ey zāhid·i ẖuşk
	b.	Yüri sen şīşe·i nāmūsumuza virme şikest

3.	a.	Yār ṣatmaz ne‿idelüm vaṣlı metāʿını bize
	b.	Naḳd·i cānı virürüz gerçi aña dest-be-dest

4.	a.	Yine āvāze·i reftār ile ol ḳadd·i bülend
	b.	Serv·i bālāyı çemenlerde bu dem eyledi pest*

5.	a.	Sāḳıyā cām·ı maḥabbetden olupdur serẖoş
	b.	Sen Revānīyi bu dem ṣanma mey·i nāb ile mest

-26-

fāʿilātün fāʿilātün fāʿilātün fāʿilün

1.	a.	Eyledi serv ü çınārı ḳāmet·i bālāsı pest
	b.	Rāst sözdür bu ki dirler dest-ber-bālā·yı dest

2.	a.	Şimdi ṭaʿn itmek neden serẖoş görüp ʿāşıḳları
	b.	ʿIşḳ cāmı anları mest itdi çün rūz·ı Elest*

3.	a.	Başını kesseñ kesilmez ruẖlaruñdan dōstum
	b.	Görmedüm zülfüñ gibi bir hindū·yı āteş-perest*

4.	a.	ʿĀşıḳ·ı şūrīdeler ḥālini ṣorma zāhidā
	b.	Bir bölük üftādelerdür kimi bengī kimi mest*

5.	a.	Çün Revānī her güzel bir pāresin mirˀāt ider
	b.	Ḫāṭıruñ ẖoş ṭut eger dil şīşesi bulsa şikest

-27-

feʿilātün feʿilātün feʿilātün feʿilün

1.	a.	Ḳaşuñı çatma hilāle aña kim dir sitem it
	b.	Ḳuluñ eksüklügine ḳalma begüm sen kerem it*

2.	a.	Ayaġı tozına biz nāfe·i müşki ṣatduḳ
	b.	Yüri ey bād·ı ṣabā var tüyince ḳadem it

3.	a.	Sāḳıyā ḳullaruñ unutma güzel başuñ içün
	b.	Bir ayaḳ cām ile her bendeñi Cemşīd ü Cem it

4.	a.	Müddeʿīnüñ güzelüm deftere ṣıġmaz adı
	b.	Başını kes iki dillü olanuñ hep ḳalem it*

5.	a.	Ṣōfiyā göñlüñ açılmaz ise ẖalvetde eger
	b.	Gel Revānī gibi meyẖāne de var defʿ·i ġam it

-28-

mefʿūlü mefāʿilün feʿūlün

1.	a.	ʿUşşāḳa işüñ cefādur ey dōst
	b.	Ḳaddüñ elif·i belādur ey dōst

2.	a.	Dāyim beni bī-ḳarār iden
	b.	Bir ḳaşı gözi ḳaradur ey dōst

3.	a.	Gencīne·i ʿışḳdur bu göñlüm
	b.	Aḳan yaşum ejdehādur ey dōst

4.	a.	Serv boyuña duʿācı ḳumrī
	b.	Boynında siyeh ridādur ey dōst

5.	a.	Ṣaḳlarsa Revāni ne‿ola tīrüñ
	b.	Cān ẖastesına ʿaṣādur ey dōst

-29-

mefʿūlü mefāʿīlü mefāʿīlü feʿūlün

1.	a.	Çekdürdi elif sīneme derd ü ġam u miḥnet
	b.	Böyle olur imiş güzelüm rāh·ı maḥabbet

2.	a.	ʿĀşıḳ geçürür göñlini her nesneden ammā
	b.	Zāhid mey ü maḥbūbda var var ise ṣoḥbet

3.	a.	Yıḳıldı göñül ẖānesi ġamdan yine sāḳī
	b.	Ancaḳ sen idersin anı luṭfuñla meremmet

4.	a.	Terk itme göñül işigini pīr·i muġānuñ
	b.	Sālik olana pīrden irişür yine ḥimmet

5.	a.	Her sāde-ruẖuñ vaṣfını yazmaḳda Revānī
	b.	Naḳḳāş durur kim virür āyīneye ṣūret

-30-

fāʿilātün fāʿilātün fāʿilātün fāʿilün

1.	a.	Saña kim dir ʿāşıḳuñ terk eyle aġyāruñ gözet
	b.	Degmeye yār olma sen yār·ı vefādāruñ gözet

2.	a.	Çün senüñle cān u dil oynar maḥabbet nerdini
	b.	Ṣaḳın aldanma benüm çoḳ sevdügüm zārın gözet

3.	a.	Ẕikrümüz maḥbūbdur tesbīḥümüz cām·ı şarāb
	b.	Ṭaʿnı ḳo zāhid bize sen vird ü eẕkāruñ gözet

4.	a.	Çārsū·yı ʿışḳ içinde būse cān bāzārıdur
	b.	Ġāfil olma ey göñül bi'llāhi bāzāruñ gözet*

5.	a.	Kimseye yüz virme sen āh·ı Revānīden ṣaḳın
	b.	Gül gibi açılma her yerde hevādāruñ gözet

-31-

mefʿūlü mefāʿīlü mefāʿīlü feʿūlün

1.	a.	Bir dem ṣanemā ḳāmet·i servüñle ḳıyām et
	b.	Tā kim bize zāhir ola aḥvāl·i ḳıyāmet

2.	a.	Mescidde müˀeẕẕin ki göre ḳāmetüñi rāst
	b.	Ḳad ḳāmet oḳuyup ide tekbīr·i iḳāmet*

3.	a.	Miḥrāba geçüp fitne gözüñ siḥr ile dāyim
	b.	Eyler ol iki ṭurra·i cādūya imāmet

4.	a.	Noḳṭa dehenüñ bir ser·i mū gibidür ey dōst
	b.	Nuṭḳıyle yarar ḳılı zihī keşf ü kerāmet*

5.	a.	Zülfüñ ʿacebā şeh midür iḳlīm·i cemāle
	b.	Kim ḥüsn ilini şöhret ile ṭutdı temāmet*

6.	a.	Gel ḳana girüp cevr ile öldürme beni kim
	b.	Hīç fāyide itmez kişiye ṣoñra nedāmet

7.	a.	Sen dilbere dil virdi Revānī dile düşdi
	b.	ʿĀşıḳdur olursa ne‿ola rüsvā vü melāmet

-32-

fāʿilātün fāʿilātün fāʿilātün fāʿilün

1.	a.	Çekdi Çīnden Rūma leşker kākül·i müşkīn·i dōst
	b.	Aldı cān mülkin serā-ser kākül·i müşkīn·i dōst

2.	a.	Baş ḳoyup secde‿itmez idi ol bütüñ ruẖsārına
	b.	Ger degülmişseydi kāfir kākül·i müşkīn·i dōst

3.	a.	Dāye-veş ẖāl·i siyāhını derāġūş eyleyüp
	b.	Ṣan ḥabeş ṭıflıyle oynar kākül·i müşkīn·i dōst

4.	a.	Nüsẖa·i ruẖsārı üzre ʿanberīn mısṭar çeküp
	b.	Siḥr ü efsūn yazmaḳ ister kākül·i müşkīn·i dōst

5.	a.	Bu ne şehdür kim yatur ḥüsnüñ ḥarīminde idüp
	b.	Mihri bālīn māhı pister kākül·i müşkīn·i dōst

6.	a.	Çıḳarup çāh·ı zenaẖdāndan meger dil düzdini
	b.	Şimdi berdār itmek ister kākül·i müşkīn·i dōst

7.	a.	Bezm·i ḥüsninde Revānī cām·ı laʿline‿el urup
	b.	Gör nice ẖoş ʿālem eyler kākül·i müşkīn·i dōst

S̲ˀ

-33-

fāʿilātün fāʿilātün fāʿilātün fāʿilün

1.	a.	Germ olup bu murġ·ı dil ḳılduḳca cānān ile baḥs̲
	b.	Gūyiyā hüdhüd durur ki‿eyler Süleymān ile baḥs̲

2.	a.	Leblerüñçün ehl·i dillerle ne‿ola ḳılsam cedel
	b.	Şimdi mi oldı şarāb üstinde yārān ile baḥs̲

3.	a.	Nüsẖa·i rūşen durur ḥüsnüñ kitābından güneş
	b.	Ḳanḳı gül yüzlü ḳılur sen māh·ı tābān ile baḥs̲

4.	a.	Ey ṭabīb·i cān ne‿içün bīmārdur dāyim gözüñ
	b.	Çün lebüñ eyler şifā bābında Loḳmān ile baḥs̲

5.	a.	Gözlerine nükte·i laʿlin Revānī añma hīç
	b.	Bir kişi müşkildür itmek iki fettān ile baḥs̲

CĪM

-34-

fāʿilātün fāʿilātün fāʿilātün fāʿilün

1.	a.	Ṣāh·ı ʿışḳam bir ḳadeḥ meydür benüm başumda tāc
	b.	Gördi mestem didi sāḳī begligüñ var gözüñ aç

2.	a.	Sāḳıyā bīmār·ı ʿışḳa ṣun şarāb·ı nābdan
	b.	Ḫasteya şerbetle eyler çün ṭabīb olan ʿilāc

3.	a.	Hey begüm aġyār saña nice göñül virmesün
	b.	Pādişāh olan alur elbette kāfirden ẖarāc

4.	a.	Ḫoş durur şekker lebüñde ẖāl ile cānā ʿaraḳ
	b.	Kim be-ġāyet ẖūb olur misk ü gülāb ile gülaç

5.	a.	Aġladursın ẖaṭṭuñı añma Revānī bendeñe
	b.	Nem ḳapar zīrā bulutdan şāʿir·i nāzük-mizāc

-35-

feʿilātün feʿilātün feʿilātün feʿilün

1.	a.	Ṣararupdur yine beñzi baña beñzer nārenc
	b.	ʿĀşıḳuñdur meger ey şūẖ·ı sitemger nārenc

2.	a.	Bāġ içinde ṭutuşup gövdesi od gibi yanar
	b.	Ġabġabuñ ẖastesı olmış yine beñzer nārenc

3.	a.	Yaşumuñ dāneleri derd ü belā bāġında
	b.	Oldı ʿaks·i ruẖ·ı zerdümle serā-ser nārenc*

4.	a.	Ḳāmetüñ üzre gören tügme·i zerrīnüñi dir
	b.	Kim görüpdür ʿacebā bitüre ʿarʿar nārenc*

5.	a.	Ne‿ola bu şiʿr ile zeyn olsa Revānī meclis
	b.	Ṣoḥbete çünki virür zīnet ü zīver nārenc

-36-

fāʿilātün fāʿilātün fāʿilātün fāʿilün

1.	a.	Günde yüz biñ cān alur cānāneler gördüñ mi hīç
	b.	Āşinālıḳdan ḳaçar bīgāneler gördüñ mi hīç

2.	a.	Ey göñül bir nāz ile biñ cān u dil ṣayd idici
	b.	Bir bölük şehlā gözi mestāneler gördüñ mi hīç

3.	a.	Dilrübālar ʿışḳına bāzār·ı ġamda dem-be-dem
	b.	Ḫānumān terk idici dīvāneler gördüñ mi hīç

4.	a.	Bezm·i ʿışḳ içinde şemʿ·i ḥüsne yüz biñ şevḳ ile
	b.	Bāl ü perler yaḳıcı pervāneler gördüñ mi hīç

5.	a.	Ey Revānī ʿışḳ meydānında ʿāşıḳlar gibi
	b.	Terk·i cān eyler yürür merdāneler gördüñ mi hīç

ḤĀ

-37-

mefʿūlü fāʿilātü mefāʿīlü fāʿilün

1.	a.	Devr·i lebüñde bulmasa nām u nişān ḳadeḥ*
	b.	Eller içinde olmaz idi kāmrān ḳadeḥ*

2.	a.	Güller getürdi bāġ·ı cemāline dilberüñ
	b.	Gülzār·ı ḥüsne oldı meger bāġbān ḳadeḥ*

3.	a.	Yaġmur gibi yaġar ṭolu bezmüñde sāḳıyā
	b.	Dil būstānını suvarur rāygān ḳadeḥ*

4.	a.	Dil ẖānesin yıḳardı ġam u miḥnet ü elem
	b.	Ṭutmasa göz ḳulaḳ aña ger her zamān ḳadeḥ*

5.	a.	Cānā lebüñ ẖayālini tuḥfe getürdi dil
	b.	Rindānedür olursa ne‿ola armaġān ḳadeḥ

6.	a.	İşümüz altun eyledi irişdi nevbahār*
	b.	Gülşende ġonca ṣundı baña zer-nişān ḳadeḥ* *

7.	a.	Bir al ṭūṭīdür mey·i gül-reng·i pür-ṣafā
	b.	Olmış durur Revāni aña āşiyān ḳadeḥ *

8	a.	Meclisde sāḳi ḥükm ile söylerse vechi var*
	b.	Ki‿olmış berāt sāʿidi anda nişān ḳadeḥ*

-38-

mefʿūlü fāʿilātü mefāʿīlü fāʿilün

1.	a.	Ṣōfī ider mi ʿārif olan tevbe·i nasūḥ
	b.	Maḥbūb ile şarāb durur çün ġıdā·yı rūḥ

2.	a.	Rūşen-dil olmaġ ister iseñ āfitāb-veş
	b.	Rindāne al seḥerden ele bāde·i ṣabūḥ

3.	a.	Bir Ḫusrevānī genc durur her ẖum·ı şarāb
	b.	Ki‿andan gedā·yı ʿışḳa irişür niçe fütūḥ*

4.	a.	Bezm·i ṣafāda ṣōfi gözüñ aç ki nūr·ı mey
	b.	ʿAn meşrıḳı'z-zücāci ke-şemsi'ḍ-ḍuḥā yelūḥ

5.	a.	Her kim Revāni vaṣlın ider ise ārzū
	b.	Eyyūb ṣabrı ile gerek aña ʿömr·i Nūḥ*

DĀL

-39-

feʿilātün feʿilātün feʿilātün feʿilün

1.	a.	Ṭaḳdı cān boynına kāküllerüñ ey dōst kemend
	b.	Geçdi bir fitne ile göñlüme zülfüñ niçe bend

2.	a.	Saña hercāyī diyü kimsene ṭaʿn eylemesün
	b.	Baş ḳoşup her kişiye olma güneş gibi levend

3.	a.	Ey ṣabā ḳāmet·i cānān ile daʿvāyı ḳosun
	b.	Ṭutmasın kendüyi yüksekde igen serv·i bülend

4.	a.	ʿĀşıḳ olmış lebüñe vaṣfını işitmek ile
	b.	Şimdi bezmüñde anuñçün ezilür göz göre ḳand*

5.	a.	Şād olur şiʿr·i Revānī ile çün rūḥ·ı Kemāl
	b.	Faẖr idinse ne‿ola naẓmıyle anuñ mülk·i Ḫocend*

6.	a.	Dōstum ḳāmet·i bālāña ḳul olmaġa senüñ
	b.	Baġlamış biline ẖıdmet kemerini ney·i ḳand

-40-

mefʿūlü fāʿilātü mefāʿīlü fāʿilün

1.	a.	Şevḳuñla atmaz idi ḳamer burcına kemend
	b.	Olmasa āhumuñ güzelüm himmeti bülend

2.	a.	ʿUşşāḳ müflis olmaz idi böyle ġālibā
	b.	Sīmīn-bedenler olmasa ʿālemde zelle-bend

3.	a.	Lāyıḳ mı kākülüñ gibi yanuñca ṣalına
	b.	Her aṣılası yüzi ḳara oñmaduḳ levend

4.	a.	Ḫaṭṭuñ selāmını getürür bāġ u rāġda
	b.	Eyler ṣabā benefşeye anuñla rīş-ẖand*

5.	a.	Ol cān ṭabībine eli irmez Revāninüñ
	b.	Hīç çāre bulmadı aña bī-çāre derdmend

-41-

mefʿūlü fāʿilātün mefʿūlü fāʿilātün

1.	a.	Şol ʿāşıḳuñ ki yārı boynına ṣala sāʿid
	b.	İḳbāl bende dāyim devlet aña müsāʿid

2.	a.	Ey müftī·i zamāne bu şerʿ·i ʿışḳ içinde
	b.	Daʿvā·yı ʿışḳ idene tīr·i nigārı şāhid

3.	a.	Şemʿ ile ḳıldı rūşen göñlüm evin ṣanasın
	b.	Dildārdan ki nāme irgürdi baña ḳāṣıd

4.	a.	Çün ẖūblarla bunda nūş itmedüñ şarābı
	b.	Cennetde Kevs̲er ile ḥavrāyı umma zāhid*

5.	a.	Meclisde ṣunsalar mey zehr ise daẖi nūş it
	b.	Ṣōfīlenüp Revānī olma ṣaḳın muʿānid

-42-

fāʿilātün fāʿilātün fāʿilātün fāʿilün

1.	a.	Şemʿi kimse saña teşbīh idemez ey lāle-ẖad
	b.	Gerçi yalıñ yüzlü bir sīmīn-bedendür serv-ḳad

2.	a.	Gün gibi altun beneklü cāmeye reşk eylemez
	b.	Bu felek dervīş·i ʿışḳa āsumānī bir nemed*

3.	a.	Kār u bārın yile virdi ruẖlaruñ reşkiyle gül
	b.	Ḥaḳ budur kim kişiyi ʿālemde oñarmaz ḥased*

4.	a.	Cānum aġzuma gelüpdür būse·i dildār içün
	b.	Dōstlar bir çāre eyleñ hey meded baña meded*

5.	a.	Bu Revānī ẖoş çeker cevr ü cefāñı dōstum
	b.	Tañrı ḥaḳḳıçün buña rāżī degüldür bir eḥad*

-43-

feʿilātün feʿilātün feʿilātün feʿilün

1.	a.	ṣōfiyā geymiş idük biz de ezel delḳ·ı kebūd
	b.	Burdı taḳvā elini ne‿eyleyelüm pençe·i ʿūd

2.	a.	Ol güneş yüzlünüñ aġzı gelemez ṣūrete hīç
	b.	E göñül ẕerre daẖi virmez imiş aña vücūd

3.	a.	Dest·i sāḳīde meger ḳıble-nümā oldı ḳadeḥ
	b.	Her ṭarafdan ki ṣurāḥīler ider aña sücūd

4.	a.	Zülfinüñ bendine düşmiş yine sevdā ile dil
	b.	Nāṣıḥuñ pendi aña eylememiş hergiz sūd

5.	a.	Sen ḳamer-çihreye olmazdı Revānī ʿāşıḳ
	b.	Ṭāliʿi baẖtı anuñ olmasa idi mesʿūd*

-44-

fāʿilātün fāʿilātün fāʿilātün fāʿilün

1.	a.	Yine rengīn cāmelerle donanup ẖūbān·ı ʿīd
	b.	Lāle vü güllerle zeyn olmış durur bostān·ı ʿīd

2.	a.	ʿĪdde her ʿāşıḳuñ almaġa göñlin āl ile
	b.	Ellerin ḥınnā ile naḳş eylemiş ẖūbān·ı ʿīd

3.	a.	İncinüp bir merḥabādan ḳaçma ben üftādeden
	b.	Merḥabāsuz dōstum olmaz tamām erkān·ı ʿīd

4.	a.	Yıllar u aylar geçer ol māh añmaz ʿāşıḳın
	b.	Şimdi göz göre raḳīb ile ider seyrān·ı ʿīd

5.	a.	Devr·i ḥüsnüñde ne‿ola devr eylese ʿāşıklaruñ
	b.	Pādişāh olan Revānī çün ider dīvān·ı ʿīd

-45-

fāʿilātün fāʿilātün fāʿilātün fāʿilün

1.	a.	Bir güzeldür sāḳi meclisde ṣurāḥī serv-ḳad
	b.	Ne‿ola nergis gibi göz dikse aña her lāle-ẖad*

2.	a.	Çeşmüñ ile iki zülfüñden fiġān itsem ne‿ola
	b.	Hāy ʿömrüm ḥāṣılı cevr ü cefāña yoḳ ʿaded

3.	a.	Ġoncanuñ mecmūʿasından ḥüsnüñ ebyātın oḳur*
	b.	Bülbül·i şūrīde dervīş oluban geymiş nemed*

4.	a.	Mīm şeklidür ṣurāḥī aġzı dāl olmış ḳadeḥ
	b.	Sāḳıyā ġam ẖastesına ṣun anuñla ḳıl meded

5.	a.	Pādişāhum ḥasretüñle ḳanlar aġlarsa ne‿ola
	b.	Çün Revānī bendeñi ḳaşuñla zülfüñ ḳıldı red*

-46-

mefāʿīlün mefāʿīlün feʿūlün

1.	a.	Elinden ol ḥabībüñ dād feryād
	b.	Beni yad idüp aġyārı ḳılur şād*

2.	a.	Muʿaṭṭar ḳıldı āfāḳı serā-ser
	b.	Meger kim irdi yāruñ zülfine bād

3.	a.	Yoluñda virmez isem cān·ı şīrīn
	b.	Degülven ẖusrevā ʿışḳuñda Ferhād

4.	a.	Çemende el ṭutup ḳaddüñe ḳarşu
	b.	Ṭurupdur bende gibi serv·i āzād*

5.	a.	Tebessüm idicek luṭf ile laʿlüñ
	b.	İder ʿāşıḳlaruñuñ rūḥını şād*

6.	a.	Beni terk eyle luṭf it bir dem ey ġam
	b.	Ḳuluñsam daẖi bi'llāh eyle āzād*

7.	a.	Revānī ḥüsnüñi vaṣf eyleyicek
	b.	İşiden dir hezārān āferīn bād*

RĀ

-47-

mefʿūlü fāʿilātü mefāʿīlü fāʿilün

1.	a.	İzüñ tozını ʿanber·i sārāya ḳatdılar
	b.	Bu ad ile cihānda anı vāy ki ṣatdılar

2.	a.	Lāle lebüñ ẖayālile mey içdügi içün
	b.	Gülşende kāsesini başında uşatdılar

3.	a.	Peykānlaruñla eglenür idük göñülde āh
	b.	Anlar da bilmezem ki ʿaceb ḳanda batdılar

4.	a.	Ḳaddüñ çemende sāye·i Ṭūbā ṣalalıdan
	b.	Servi yeri kökiyle yabanlara atdılar

5.	a.	Umma Revāni tīġini boynuñda bulasın
	b.	Ol giti‿anuñ ipini güzeller uzatdılar

-48-

fāʿilātün fāʿilātün fāʿilātün fāʿilün

1.	a.	Ol büt·i tersā yine çünkim cefāya başlar
	b.	Ölürüz bu yolda biz yoldaşlar ḳardaşlar

2.	a.	Bezm içinde nāleme raḥm itdügiçün çengi gör
	b.	İki diz üzre gelüp ol dem fiġāna başlar

3.	a.	Laʿl ile yāḳūt öykünmiş leb·i rengīnüñe*
	b.	Ol sebebdendür ki‿urur ẖātem başına ṭaşlar*

4.	a.	Ḳurd ile ḳuzu bir araya gelüp seyr itseler
	b.	Bir niçe dilberler ile bir bölük evbāşlar

5.	a.	Bezm içinde cām·ı mey gūyā nigīn·i laʿldür
	b.	Ḫāteme dönmiş Revānī ḥalḳa·i ʿayyāşlar*

-49-

fāʿilātün fāʿilātün fāʿilātün fāʿilün

1.	a.	Sev göñül şol ṭıflı küççekdür dime çaḳ çaġıdur
	b.	Daẖi ol açılmaduḳ bir tāze gül yapraġıdur

2.	a.	Bilmezem ben ne‿eyledüm şol ġamze·i ẖūnrīzüñe
	b.	Kim bizümle dōstum ḳanlu bıçaḳlı yaġıdur

3.	a.	ʿIşḳ şāhınuñ feżā·yı dil ki menzilgāhıdur
	b.	Tāze dāġı sīnemüñ anuñ ḳızıl otaġıdur

4.	a.	Yıḳma göñlüm tekyesin ẓulmüñle ey sulṭān·ı ḥüsn
	b.	Ḫōr baḳma aña kim dervīşler ocaġıdur

5.	a.	Naʿl·i zerrīn·i hilāli yolda bulmışdur felek
	b.	Kim bu ṣaḥrā ol şehüñ dāyim atı oynaġıdur

6.	a.	Ṭop olup yatur ʿiẕārında nigāruñ kāküli
	b.	Ṣu içinde gūyiyā ḳonmış benefşe baġıdur

7.	a.	Başına and içseler her dem ʿaceb mi ẖūblar
	b.	Çün Revānī bendeñ ey dilber ayaḳ ṭopraġıdur

-50-

mefʿūlü mefāʿīlün mefʿūlü mefāʿīlün

1.	a.	Meh-rūlar ile çāder gūyā felek olmışdur
	b.	Her ẖayme güzellerle dārü'l-melek olmışdur

2.	a.	Ordu·yı hümāyūnuñ bir zīneti vardur kim
	b.	Gün cāme·i dildāra altun benek olmışdur

3.	a.	Güzeller alayınuñ beglerbegisi sensin
	b.	Tīmārına ʿışḳuñuñ hep müşterek olmışdur

4.	a.	Sīmīn bedenlerle sīnem ḳızıl altundur
	b.	Ṣarrāfī durur çeşmüm göñlüm miḥak olmışdur

5.	a.	Cānā lebüñ emmekde aġzına alur cānın
	b.	Elḥaḳ bu Revānīye ẖaylī emek olmışdur

-51-

mefʿūlü fāʿilātü mefāʿīlü fāʿilün

1.	a.	Ṣarrāf·ı dīdede o püser çoḳ güher sezer
	b.	Yüzüme geldügi bu kim ol bende zer sezer

2.	a.	Meclisde sāġar almaġa laʿlüñ ẖaberlerin
	b.	Nāzüklük ile aġzumuz arar ẖaber sezer

3.	a.	Cān atdı gitdi dil leb·i şīrīnüñe yine
	b.	Ben ẖaste içün anda meger gül-şeker sezer

4.	a.	Düşmezdi rāh·ı ʿışḳa göñül görmese ruẖuñ
	b.	Gün ṭoġmayınca yolda müsāfir ẖaṭar sezer

5.	a.	Ben bülbülini görse yüzin gül gibi dürer
	b.	Beñzer Revāni sevdügüm ol ʿişveger sezer

-52-

fāʿilātün fāʿilātün fāʿilātün fāʿilün

1.	a.	Bülbülüñ çoḳ gülşen·i ḥüsnüñde ẖaddüñ gül yeter
	b.	Dōstum ʿāşıḳlaruñ ḳan aġlasun sen gül yeter *

2.	a.	Mübtelāsı olma her ẖūbuñ birin sev ey göñül
	b.	Bu mes̲el meşhūrdur kim ʿārife bir gül yeter

3.	a.	Şemselerden muṣḥaf·ı ḥüsnüñ ne ẖācet zeyn ola
	b.	ʿĀrıżuñda ḥalḳa ḥalḳa görinen kākül yeter

4.	a.	Tāze gülşendür ruẖuñ ʿaksiyle meclis sāḳıyā
	b.	Gül ḳadeḥ olsun ṣurāḥī arada bülbül yeter

5.	a.	Ruẖları mecmūʿası içre Revānī dāyimā
	b.	Zīnet içün dilberüñ müşkīn ṣaçı sünbül yeter

-53-

mefʿūlü fāʿilātü mefāʿīlü fāʿilün

1.	a.	Bir māhdur yüzüñ ki ẖaṭuñ aña hāledür
	b.	Bāġ·ı ruẖuñda sünbül·i ter bu gülāledür

2.	a.	Kirpüklerümle ḳana boyanmış iki gözüm
	b.	Miḥnet çemenlerinde iki tāze lāledür

3.	a.	Ben bilürem ki sāḳi ne ḳan yutdurur baña
	b.	Ṣanmañ ki içdügüm ṭolu ṭolu piyāledür

4.	a.	Gūşuñda ey ṣanem görinen dāne·i güher
	b.	Gūyā gül üzre aṣılu bir ḳaṭra jāledür

5.	a.	Āẖır Revāni göñlüm evin ḳaşıdur yıḳan
	b.	Bir ṭāḳ·ı ḥüsndür kim aña ol ḥavāledür

-54-

fāʿilātün fāʿilātün fāʿilātün fāʿilün

1.	a.	Zülfüñi tezyīn içün miskīn göñül bir şānedür
	b.	Her ṭarafdan ġamzeñ oḳları aña dendānedür*

2.	a.	Cānı ḳıldum pīşkeş sen ẖusrev·i ẖūbāna ben
	b.	Luṭf idüp maʿẕūr ṭut gerçi ki dervīşānedür*

3.	a.	Miḥnet·i Yaʿḳūb derdümden benüm bir şemmedür
	b.	Ḳıṣṣa·i Yūsuf cemālüñden senüñ efsānedür *

4.	a.	Ṣubḥ olınca giceler ey şemʿ·i bezm-ārā saña
	b.	Cān ile ẖıdmetler itmekde göñül pervānedür

5.	a.	Zāhidā ne‿eyler Revānī cenneti dildārsuz
	b.	ʿĀşıḳa cānānesüz firdevs miḥnetẖānedür*

-55-

feʿilātün feʿilātün feʿilātün feʿilün

1.	a.	Leb·i cānāneyi emdükce göñül ẖurrem olur
	b.	Kişi mey ṣoḥbetini eyleyicek bī-ġam olur

2.	a.	Yārdan kimse göñül ummasun insāniyyet
	b.	Ol perī yüzlü melek-çihre ḳaçan ādem olur

3.	a.	Virmezin iki cihāna mey ü ney ṣoḥbetini
	b.	Bu nice ẕevḳ u ṣafādur bu nice ʿālem olur

4.	a.	Beni öldürmege ḥınnāladı barmaḳlarını
	b.	Göz göre ḳana girerler bu güzeller dem olur

5.	a.	Şāhid·i naẓm·ı Revānīye ne ḥācet zīnet
	b.	Ki ẖaṭ·ı şiʿri aña kākül olur perçem olur

-56-

mefʿūlü mefāʿīlü mefāʿīlü feʿūlün

1.	a.	Maḥbūb·ı cihān ṭut ki göñül şiʿr ü ġazeldür
	b.	Şiʿrüm daẖi dilber gibi hercāyī güzeldür

2.	a.	Dilberlere ʿālemde bedel hīç bulınmaz
	b.	Bir tāze güzel götüri dünyāya bedeldür

3.	a.	Yāruñ gelicek baña göñül zülfin ögersin
	b.	Sevdāya düşürme beni kim ṭūl·i emeldür

4.	a.	Ḫaṭdur dime gül çevresini ṭutdı benefşe
	b.	Sen anı tırāş it ki hemān adı saḳaldur

5.	a.	Añmaz beni çün yār maḥallinde Revānī
	b.	Göñlüme güzeller ne iderlerse maḥaldür

-57-

fāʿilātün fāʿilātün fāʿilātün fāʿilün

1.	a.	Ḳanlu yaşum bezm·i hecrüñde mey·i gül-fām olur
	b.	Aña bu göñlüm ṣurāḥī çeşm·i pür-ẖūn cām olur

2.	a.	Göñlüme ġam ẖalvetinde gözlerüñ fikri yeter
	b.	Kim ġıdā eks̲er riyāżāt ehline bādām olur

3.	a.	ʿĀşıḳuñ rüsvāyī olduġın ḳayırma ṣōfiyā
	b.	Rind·i şāhidbāz olan oġlan sever bed-nām olur

4.	a.	Yoḳ dimezdi yārdan ḳılsam temennā būsesin
	b.	Ḳorḳaram nāzük durur dilber aña ibrām olur

5.	a.	Dilberüñ aylar geçer kim irişilmez vaṣlına
	b.	ʿĀdet oldur kim Revānī yılda bir bayram olur

-58-

mefʿūlü mefāʿīlü mefāʿīlü feʿūlün

1.	a.	Ḳanlu yaşumuñ laʿlini cānāna disünler
	b.	ʿĀlemde ṣataşduḳ yine bir kāna disünler

2.	a.	Baḳmaġa gözüm āyinedür ḥüsnine çünkim
	b.	Kirpüklerüme zülfüñ içün şāne disünler

3.	a.	Çün her ṣanemüñ ṣūreti naḳşıyle ṭoludur
	b.	Şimden girü bu göñlüme bütẖāne disünler*

4.	a.	Kūyuñda budur göz yaşın aḳıtduġum ey dōst
	b.	Zencīre çekilmiş yine dīvāne disünler *

5.	a.	Her kişiye gül gibi güler yüzle baḳarmış
	b.	Açılmasun ol ġonca·i ẖandāna disünler*

6.	a.	Ṣunlar ki bu gün ḳaş ile göz vaṣfın iderler
	b.	Her şiʿri Revānī gibi rindāne disünler *

7.	a.	Cān virdügüm oldur görüp ol ġonca-dehānı
	b.	Cānlar virür ol gördügi oġlana disünler*

-59-

fāʿilātün fāʿilātün fāʿilātün fāʿilün

1.	a.	Nāmuñ ey gül yüzlü bildüm kim vefā bostānıdur
	b.	Noḳṭalar anda benefşe ẖaṭ anuñ reyḥānıdur

2.	a.	Nāme bir sīmīn-beden gül yüzlü dilberdür ki‿anuñ
	b.	Beñleri olmış noḳaṭ ẖaṭ zülf·i müşk-efşānıdur

3.	a.	Ol kemān-ebrūdan iren baña ṣanmañ nāmedür
	b.	Tīr·i fürḳatdür ki‿içinde her elif peykānıdur

4.	a.	Nāmenüñ görüp beyāżın rūz·ı vuṣlatdur didüm
	b.	Ḫaṭṭına ḳıldum naẓar bildüm şeb·i hicrānīdür

5.	a.	Ben nice yazam duʿā-nāme Revānī dilbere
	b.	Nāmesi ʿaḳlumı aldı cān u dil ḥayrānıdur

-60-

fāʿilātün fāʿilātün fāʿilatün fāʿilün

1.	a.	Ḳaldı işden māh·ı rūze ireli peymāneler
	b.	Ṣuyı ṣoġılmış degirmen gibidür meyẖāne ler

2.	a.	Cām·ı mey rūşen ḳılur ʿāşıḳlaruñ göñlin ne‿idem
	b.	Şuʿle·i ẖurşīd ile rūşen olur vīrāneler

3.	a.	Bir güneşle germ olup gögsüñi germe ey felek
	b.	Ṭoludur gün yüzlülerle bunda mektebẖāneler

4.	a.	Germ olup meclisde sen meh-rūya öykündügiçün
	b.	Üşdiler şemʿüñ nigārā başına pervāneler

5.	a.	Nāfe·i zülfin Revānī ṭaġıdup her dilberüñ
	b.	ʿĀşıḳa barmaḳ ḥisābın gösterürler şāneler*

-61-

fāʿilātün fāʿilātün fāʿilātün fāʿilün

1.	a.	Rūz·ı ʿīd oldı yine güm güm öter meyẖāne ler
	b.	Göklere irdi ṣadā·yı naʿra·i mestāneler

2.	a.	Gūyiyā şerbet şarāb u mey-fürūş olmış ḥakīm
	b.	Ḫastelar maẖmūrlar dārü'ş-şifā ẖumẖāne ler

3.	a.	Gül budaġında ḳızıl güller açıldı ṣanuram
	b.	Sāḳi·i meh-rūlar alduḳca ele peymāneler

4.	a.	Kes̲ret·i ʿuşşāḳdan incinme ḥüsnüñ çaġıdur
	b.	Nevbahār olduḳca artar ey perī dīvāneler*

5.	a.	Gözlerine mesken olmazdı Revānī cān u dil
	b.	Ger ḥarāmīler yataġı olmasa vīrāneler

-62-

fāʿilātün fāʿilātün fāʿilātün fāʿilün

1.	a.	Cāna göz açdurmayan şol nergis·i şehlāsıdur
	b.	Baña gün göstermeyen ol zülf·i müşk-āsāsıdur

2.	a.	Pādişehsin sancaġ·ı āha ʿalemdür māh·ı nev
	b.	Kim şafaḳ anuñ nigārā ḳırmızı vālāsıdur

3.	a.	Ġayrı dilberler gibi cānā vefāsuz olma kim
	b.	ʿĀşıḳa luṭf eyleyen dilberlerüñ raʿnāsıdur

4.	a.	Yıḳmaġa göñlüm evin ẖaṭṭı getürmişdür berāt
	b.	Kim beyāżıdur cebīni ḳaşları ṭuġrāsıdur

5.	a.	Şiʿr·i şīrīnüñ Revānī oldı şekkerden leẕīẕ
	b.	Kim anuñ her ġonca-leb ṭūṭī·i şekker-ẖāsıdur

-63-

mefʿūlü fāʿilātü mefāʿīlü fāʿilün

1.	a.	Būy·ı ṣaçuñla şāne şehā müşk·i nāb olur
	b.	Āyīne ʿaks·i rūyuñ ile āfitāb olur

2.	a.	Ḫaṭṭ·ı lebüñden irdi benüm cānuma ġubār
	b.	Her ḳanda ise fitneye bāʿis̲ şarāb olur

3.	a.	Mest olduġumca saña disem ḥālümi ne‿ola
	b.	Merdüm ki mest ola ṣanemā bī-ḥicāb olur

4.	a.	Yıḳduñ bu göñlümi yine cevr ü cefā ile
	b.	Şāhuñ ki ẓulmi çoġ ola şehri ẖarāb olur

5.	a.	Diler Revāni kūyuña irişse vaṣluñı
	b.	Bilür ki Kaʿbe içre duʿā müstecāb olur

-64-

feʿilātün feʿilātün feʿilātün feʿilün

1.	a.	Dil alan ġamzesidür vāy ne dilāvercük olur
	b.	Ḳılıc ile dirilür hey nice servercük olur

2.	a.	Ḥüsn ilin leşker·i nāz ile güzeller ṭutdı
	b.	Ey göñül Rūmilinüñ dilberi hep gerçek olur

3.	a.	Sebz ẖaṭṭuñla görenler didi meygūn lebüñi
	b.	Lāciverd ile münaḳḳaşca ne sāġarcük olur

4.	a.	Egilüp gūşına söyler gibi‿olur ẖaddin öper
	b.	Zülfi yāruñ niçe çoḳ başluca kāfercük olur

5.	a.	Aġzı dadıyle Revānī ne‿ola ʿayş eyler ise
	b.	Sāḳi·i bezm çün ol lebleri şekkercük olur

-65-

mefʿūlü fāʿilātü mefāʿīlü fāʿilün

1.	a.	Terk itdi kūyuñı yine aġyār idüp sefer
	b.	Her kim işitdi didi ki fi'n-nāri fi's-saḳar

2.	a.	Dilberler içre gün gibi çün bī-naẓīrsin
	b.	Göster cemālüñi görelüm biz de bir naẓar

3.	a.	Gül nisbet itdügi özini ẖaddüñe bu kim
	b.	Nāzüklük ile ẖalḳa ṭurup kendüyi ṣatar *

4.	a.	Bezmüñde şevḳden ezilür dāyimā saña
	b.	Ben bilmezem mi ne boġazı iplüdür şeker

5.	a.	Tīġ·i ʿitāb ile depelersin Revāniyi
	b.	Ölsün mi ne‿eylesün seni ey bī-vefā sever

-66-

feʿilātün feʿilātün feʿilātün feʿilün

1.	a.	Zülfi dāyim ẖaṭı yanında dile kīn eyler
	b.	Ṭolaşur ol aña āẖır beni miskīn eyler

2.	a.	Ḳanḳı ṣafḥa ki tamām ola ẖaṭuñ vaṣfı ile
	b.	Anı bu ḳanlu yaşum sürẖ ile tezyīn eyler

3.	a.	Ḫaṭṭuñuñ fikri düşer göñlüme tenhā olıcaḳ
	b.	Yalıñuzluk güzelüm kişiyi ġamgīn eyler

4.	a.	Ḫaṭ durur her güzelüñ nāme·i ḥüsnini bozan*
	b.	Bu ne yüz ḳarasıdur ki‿ol ẖaṭ·ı miskīn eyler

5.	a.	Ḫaṭ·ı dildāra Revānī nice taḥsīn dimeyem
	b.	Ḫaṭ·ı dilkeş göricek her kişi taḥsīn eyler *

-67-

mefʿūlü mefāʿīlü mefāʿīlü feʿūlün

1.	a.	Ḳaçsa ne ʿaceb benden eger yār perīvār
	b.	Çün zülf ü ẖaṭı gibi anuñ bāl ü peri var

2.	a.	Aġzuñı öper döne döne meclis içinde
	b.	Sāġar gibi kimüñ ki begüm sīm ü zeri var*

3.	a.	İncinme göñül çeşmine ẖışm eylese her dem
	b.	Şād ol ki bilürsin saña anuñ naẓarı var

4.	a.	El üzre ṭutar ise ne‿ola nāmeñi ʿuşşāḳ
	b.	Kim ġonca·i zanbaḳ gibi baş üzre yeri var*

5.	a.	Her ẖūb ki‿oḳur şiʿr·i Revānīyi gören dir
	b.	Bir ṭūṭīdür aġzında ṣanasın şekeri var *

-68-

mefāʿīlün mefāʿīlün feʿūlün

1.	a.	Güzel sevmek göñül çün saña ẖūdur
	b.	Cefāsın çek anuñ kim sāde-rūdur

2.	a.	Ḫaṭı irişmeden seyr eyle ḥüsnin
	b.	Tekāsül eyleme gün gicelidür

3.	a.	Göñül virmiş durur zülfüñe zāhid
	b.	Ḳara çullarda ḳoyan anı budur*

4.	a.	Maḥabbet meclisinde ay ile gün
	b.	Nigāruñ ʿışḳına iki ṭoludur*

5.	a.	Revānī būseye ʿahd itdügince
	b.	Ṭurup aġzında yārı öpmelüdür

-69-

fāʿilātün fāʿilātün fāʿilātün fāʿilün

1.	a.	Yāra ʿarż itdi yaşum sīmini çeşm·i eşk-bār*
	b.	Baña göz yaşı gerekmez didi luṭfından nigār

2.	a.	Seyr iderler gözümüñ yaşın ṭurup gün yüzlüler
	b.	Gūyiyā bir çeşmedür ki‿olmış kenārı lālezār

3.	a.	Ben nice yāruñ diyārın terk idem aġyār içün
	b.	Eylemez degme belā ile kişi terk·i diyār

4.	a.	Yādigārı ʿālemüñ ʿāşıḳlara maḥbūbdur
	b.	Ey göñül merġūb olan elbette olur yādigār

5.	a.	Baḥr·i ġamdan ʿāşıḳı keştī·i ġam eyler ẖalāṣ
	b.	Āhı terk eyle Revānī böyle ḳalmaz rūzgār*

-70-

feʿilātün feʿilātün feʿilātün feʿilün

1.	a.	Lebi her meclise nāzüklük ile mül götürür
	b.	Ḫaṭı reyḥāncı durur deste·i sünbül götürür

2.	a.	Od yanar lāle-ruẖuñ şevḳı ile başında
	b.	Ṣanma her dilberi sen zīnet içün gül götürür

3.	a.	Leblerinde görinen ẖāl degüldür mey içüp
	b.	Defʿ·i būy itmege aġzında ḳaranfül götürür

4.	a.	Ḫāme gibi nice ḳan aġlamayam ġayrılara
	b.	Nāmeler yazmaġa ḳoynında teressül götürür

5.	a.	Seni sevdügi içün eyle Revānīye cefā
	b.	Her ne cevri ki gül eyler anı bülbül götürür

-71-

mefʿūlü fāʿilātü mefāʿīlü fāʿilün

1.	a.	Gerçi ʿarūs·ı ḥüsnüñe zülfüñ niḳāb olur
	b.	Ḳorḳum budur ki arada dāyim ḥicāb olur

2.	a.	Ḫaṭṭ·ı lebüñle irdi yine cānuma ġubār
	b.	Her ḳanda ise fitneye bāʿis̲ şarāb olur

3.	a.	Meh-pāreler durur ne‿ola ṭıfl ise ẖūblar
	b.	Her birisi kemāle irer āfitāb olur

4.	a.	ʿUşşāḳ ẕerre gibi ẖaḳīr olduġı bu kim
	b.	Maḥbūblar güneş gibi ʿālī-cenāb olur

5.	a.	Dirler Revāni kūyuña irişse vaṣluñı
	b.	Dirler ki Kaʿbe içre duʿā müstecāb olur *

-72-

feʿilātün feʿilātün feʿilātün feʿilün

1.	a.	Bu cihān gülşeninüñ gülleri ṭurmaz açılur
	b.	Ne ʿacebdür bu göñül ġoncası kim az açılur

2.	a.	Lebin emdürmede artursa ne‿ola şīvesini
	b.	Būselikden ṣora varsañ yine şehnāz açılur *

3.	a.	İster iseñ ki‿olasın ẖūb-nefes leblerin em
	b.	Ey göñül ḳand·i nebāt ile çün āvāz açılur*

4.	a.	Sırr·ı ʿışḳı ne‿ola keşf eyler ise ḳanlu yaşum
	b.	Mey·i nāb ile göñül niçe niçe rāz açılur

5.	a.	Bāġ·ı cennet mi durur ṭabʿ·ı Revānī ʿacebā
	b.	Beñzemez bir güle hīç gülleri ṭurmaz açılur

6.	a.	Tāze eşʿār ile çün reng bulur dilberler
	b.	Ey göñül her çiçegi görme misin yaz açılur*

-73-

fāʿilātün fāʿilātün fāʿilātün fāʿilün

1.	a.	Leyli taṣvīrin ne‿idersin ʿāşıḳ·ı maḥzūnı gör
	b.	Bu cihān mecmūʿasında ṣūret·i Mecnūnı gör

2.	a.	Ey göñül gün yüzlü sāḳīler elinden iç şarāb
	b.	Cünbiş·i ẖurşīdi gözle gerdiş·i gerdūnı gör

3.	a.	Devlet·i ḥüsninde ay u gün aña sergeştedür
	b.	Ol hümāyūn baẖt ile bu ṭāliʿ·i meymūnı gör*

4.	a.	ʿĀḳil iseñ yiter it ey ẖᾱce dünyā fikrini
	b.	Māl cemʿinde nice olmış durur Ḳārūnı gör

5.	a.	Gülbün·i şiʿri Revānīnüñ ne‿ola olsa bülend
	b.	Şol ruẖ·ı zībā ile ol ḳāmet·i mevzūnı gör

-74-

mefāʿīlün mefāʿīlün feʿūlün

1.	a.	Nigāruñ gördi dil şekker lebi var
	b.	Anuñçün ḳanda meyl eyler ṣabīvār

2.	a.	Ṭonatsa cāmiʿ·i ḥüsnin ʿaceb mi
	b.	Gümiş ḳandīle beñzer ġabġabı var

3.	a.	Naʿalçeñdür meh·i nev başmaġuñda
	b.	Kevākib gibi zīrā kebkebi var

4.	a.	Elifden başlasa dil ʿışḳa ṭañ mı
	b.	Bu yañada güzeller mektebi var

5.	a.	Şarābı meşrebeyle nūş idermiş
	b.	Revānīnüñ ne ʿālī meşrebi var

-75-

fāʿilatün fāʿilātün fāʿilātün fāʿilün

1.	a.	Dōstum öpülmeyen laʿl·i şeker-ẖādan ne‿olur
	b.	Boynuma ṣalınmayan zülf·i semen-sādan ne‿olur

2.	a.	Ben seni gördükce ḳucmaġ istesem incinme kim
	b.	Hāy efendüm hāy begüm kuru temāşādan ne‿olur

3.	a.	Luṭfı olmayan güzelden hīç ummañ fāyide
	b.	Ḳoḳulanmayan çemende verd·i raʿnādan ne‿olur

4.	a.	Ḫayr gelmez ʿāşıḳın terk eyleyen dildārdan
	b.	Ġayrlarla ṣalınan serv·i dilārādan ne‿olur

5.	a.	Gerçi kim naẓmuñ Revānī oldı dürr·i şāhvār
	b.	Gūş·ı şāhā irmeyen naẓm·ı güher-zādan ne‿olur

-76-

fāʿilātün fāʿilātün fāʿilün

1.	a.	ʿĀşıḳuñ çünkim güzel maḳbūlidür
	b.	Ölmez ol kim ġamzesi maḳṭūlidür

2.	a.	Dāġ ṣanmañ sīnem üzre görinen
	b.	Kim bu ʿışḳ abdālınuñ meftūlidür

3.	a.	Ġāfil olma ḥüsnüñ eyyāmı geçer
	b.	Dōstum bu sözlerüñ maʿḳūlidür

4.	a.	Dil mülāzımdur yine bir dilbere
	b.	Ṣanasın beglerbegi maʿzūlidür

5.	a.	Pādişāhum bendeñ olalı senüñ
	b.	Dir Revānīyi gören beg ḳulıdur

-77-

mefʿūlü fāʿilātü mefāʿīlü fāʿilün

1.	a.	Mirˀāt·ı ḥüsne çünki virürmiş cilā naẓar
	b.	ʿĀşıḳlar eylesün aña dāyim ṣafā naẓar *

2.	a.	Görürler idi ẖāki zer·i ẖāliṣ olduġın
	b.	Baḳmaz yüzüme ne‿eyleyem ol kīmyā-naẓar

3.	a.	Ḥüsni kitābı içre dehānında şübhe var
	b.	Gūyā ki ẖaṭṭı ḥāşiye durur aña naẓar

4.	a.	Baḳmazsa dīde çihre·i aġyāra ne‿ola kim
	b.	Ḳılmaz çü degme kimseye ehl·i ḥayā naẓar

5.	a.	Dāyim duʿāsın almalusın sen Revāninüñ
	b.	Zīrā ki pādişālara eyler gedā naẓar

-78-

feʿilātün feʿilātün feʿilātün feʿilün

1.	a.	Her ḳıyāmet görinen dime ẖaṭ u ẖālümdür
	b.	Ben günehkāruñam ol nāme·i aʿmālümdür

2.	a.	Sīnede tīr·i maḥabbetle görinen yaram
	b.	Devḥa·i devlet ü serçeşme·i aḥvālümdür

3.	a.	Ṣanma naḳḳāşı ki taṣvīr ider Mecnūnı
	b.	Benüm ey Leyli-ṣıfat ṣūret·i aḥvālümdür

4.	a.	Ruẖın öpmege lebin emmege dildār ḳomaz
	b.	Ne‿idelüm ne‿eyleyelüm özge gülüm balumdur

5.	a.	Bilürin zülfi elif-ḳāmetümi dāl eyler
	b.	Ḳurʿa·i ʿışḳ Revānī çü benüm fālümdür

-79-

fāʿilātün fāʿilātün fāʿilātün fāʿilün

1.	a.	Şād ol ey dil kim bu gün irte yine bayram olur
	b.	Sāḳi·i gül-çihre yanuñda elüñde cām olur

2.	a.	Rāżīyüz gerçi oruçdan içmişüz çoḳ şerbeti
	b.	Ḳanı ṣōfī ʿīd kim anda mey·i gül-fām olur

3.	a.	Nice ṭutmasun el üstinde şarābı ehl·i ʿayş
	b.	ʿĀşıḳ·ı serkeş olan dilber anuñla rām olur*

4.	a.	Her ḳaçan ḳan aġlasam çeşm ü lebüñ yād eylerem
	b.	Sāḳıyā mey ṣoḥbetinde çün şeker bādām olur

5.	a.	Ol cemālüñ çün dehānı mīmdür ḳaddi elif *
	b.	İki zülfinüñ birisi cīm ü biri lām olur *

6.	a.	Eyü adın söyler oldı ẖalḳ şimdi ṣōfinüñ
	b.	Ḳorḳarın Revāni gibi ol bed-nām olur*

-80-

feʿilātün feʿilātün feʿilātün feʿilün

1.	a.	Bāġa varduḳca kim ol serv·i gül-endām açılur
	b.	Nereye ḳılsa naẓar hep gül ü bādām açılur

2.	a.	Gül degüldür görinen ʿibret ile eyle naẓar
	b.	Yılda bir kerre göñül defter·i eyyām açılur *

3.	a.	Zülf ü ḳaddüñle dehānuñı nice sevmeyeyin
	b.	Her ḳaçan Muṣḥafa el ursam Elif-lām açılur

4.	a.	Naḳd·i cānı ne‿ola yoluña nis̲ār itse göñül
	b.	Ḫᾱce sermest olıcaḳ kīse·i inʿām açılur

5.	a.	Bülbül·i gülşen·i ḳuds olsa göñül murġı ne var
	b.	Bāġ·ı ṭabʿumda Revānī gül·i ilhām açılur

-81-

fāʿilātün fāʿilātün fāʿilātün fāʿilün

1.	a.	Şol ẖaṭ·ı ʿanber-feşān kim ḥüsn·i cānān arturur
	b.	Ṣanasın reyḥāncıdur gelmiş gülistān arturur*

2.	a.	Meclise zīnet virür altun piyāle sāḳıyā
	b.	ʿĀlemüñ güzelligin ẖurşīd·i raẖşān arturur

3.	a.	ʿIşḳ bāzārında ṣōfī cān virür her dilbere
	b.	Ṣaḳalı aġarmış ammā daẖi oġlan arturur

4.	a.	Bezm içinde çihre·i aġyārdan ḳanum ḳurur
	b.	Ḳanı sāġar sāḳıyā dirler ki mey ḳan arturur *

5.	a.	Cān virür görse Revānī şol leb·i rengīnüñe*
	b.	Ḫusrevā ṣarrāf olan laʿl·i Bedaẖşān arturur*

6.	a.	Ṣatmaġa Yūsuf gibi ḥüsni metāʿın ʿāleme
	b.	Gelmiş ol meh-pāre şehr içinde dükkān arturur *

-82-

fāʿilātün fāʿilātün fāʿilātün fāʿilün

1.	a.	Dökseler ẖāke meyi ol dem gül·i ḥamrā olur
	b.	Bir ḳadeḥ içen kimesne bülbül·i gūyā olur

2.	a.	Mıṣr·ı ḥüsn içinde ẓāhir olsa bir Yūsuf-cemāl *
	b.	Dil ʿaceb dīvānedür bundan aña şeydā olur*

3.	a.	Cānum acıtdı lebüñ ṣabr ide ide būseñe
	b.	Ṣabr ile dirler egerçi kim ḳoruḳ ḥalvā olur

4.	a.	ʿAḳlın aldursa ne var göñlin virüp saña raḳīb
	b.	Şehr·i kāfir kim güc ile alına yaġma olur

5.	a.	Ne umar göñlüm Revānī genc·i ḥüsn·i yārdan
	b.	Zülfi gördükce anı biñ başlu ejderhā olur

-83-

mefāʿīlün mefāʿīlün mefāʿīlün mefāʿīlün

1.	a.	Bahār oldı ne‿ola seyrān idüp şād olsa cānānlar
	b.	Be-ġāyet şād olur seyrān deminde lā cerem cānlar

2.	a.	Benek altunlular geymiş çemen bezminde dilberler
	b.	Ḳızıl güllerle gūyā kim ṭonanmışdur gülistānlar

3.	a.	Degül bu ġoncalar şevḳuñ eliyle ey gül·i raʿnā
	b.	Senüñçün yine çāk olmış gülistānda girībānlar

4.	a.	Çemende bir büt·i sīmīn-beden sāḳīlik eylerken
	b.	Şarāba tevbe olur mı müselmānlar müselmānlar

5.	a.	Yüzü ṣuyı durur şiʿrüñ Revānī ehl·i bezmüñ kim
	b.	Bu naẓm·ı ābdāruñdan bozuldı niçe dīvānlar

-84-

mefʿūlü fāʿilātü mefāʿīlü fāʿilün

1.	a.	Āteş kenārı şimdi gülistān kenārıdur
	b.	Ẓāhir budur ki ḳış güninüñ lālezārıdur

2.	a.	ʿAyş eyle bendeẖānede gel iç şarāb·ı nāb
	b.	Ey dōst oda ṣoḥbetinüñ rūzgārıdur

3.	a.	Leşker çeküp gelürse ne var şehsüvār·ı ġam*
	b.	Bezm ehlinüñ ṣurāḥī çü muḥkem ḥiṣārıdur

4.	a.	El üzre nice ṭutmayayın cāmı zāhidā
	b.	Ol bir ʿazīzüñ ehl·i dile yādigārıdur

5.	a.	Ol kebk·i ẖoş-ẖırām igen yüksek uçmasun
	b.	Ṣayyāddur Revāni ol anuñ şikārıdur

-85-

fāʿilatün fāʿilātün fāʿilātün fāʿilün

1.	a.	Nāme·i pīçīdedür ṣan sāʿid·i sīmīn·i yār
	b.	Kim aña mühr urdı tāze dāġdan ol gül-ʿiẕār

2.	a.	Dāġ ṣanmañ sāʿidinde görinen cānānenüñ
	b.	Şāẖ·ı gülde bir ḳızıl güldür kim olmış āşikār

3.	a.	Yā maḥabbet cāmıdur ṭolu şarāb·ı nāb ile
	b.	Kim anı ʿāşıḳlara eyler tekellüf ol nigār

4.	a.	Yā meger şol çeşm·i ʿāşıḳdur ki ṭolmış ḳan ile
	b.	Aġlamaḳdan ḥasret·i cānān ile leyl ü nehār

5.	a.	İñle bülbül-veş Revānī ki‿ol gül·i raʿnā yine
	b.	Lāle gibi āteş·i ʿışḳ ile olmış dāġdār*

-86-

feʿilātün feʿilātün feʿilātün feʿilün

1.	a.	Gerçi her lāle-ruẖuñ ṣaçları sünbüller olur
	b.	Bizüm il dilberinüñ beñleri fülfüller olur

2.	a.	Ġam degül kūyını terk itmese ʿuşşāḳ göñül
	b.	Çünki bir gülşen içinde niçe bülbüller olur

3.	a.	Giceler ṣubḥa degin ʿayş·ı bahār eyle müdām
	b.	Ki felek gülşen olup encüm aña güller olur

4.	a.	Ḳo beni sīnemüñ üstinde elifler çekeyin
	b.	ʿIşḳ sermenziline irmek içün yollar olur

5.	a.	Ḳanlu yaşumla Revānī çemen·i kūyında
	b.	Tāze güller açılup ẖūb ḳaranfüller olur *

-87-

feʿilātün feʿilātün feʿilātün feʿilün

1.	a.	Gözlerüm tīre olur ẖaṭṭuña ḳılduḳca naẓar
	b.	Ḫaṭ ġubār olsa bu rūşendür ider göze żarar

2.	a.	Ġam durur ʿışḳ yolında baña mūnis eks̲er
	b.	Şādī hercāyī durur gāh gelür gāh gider*

3.	a.	Gördiler sāġarı kim göñli açuḳ kīsesi pür
	b.	Rindler üşe gelüp her biri ṭolana çeker

4.	a.	Ḳorḳaram ḳāmetüñüñ ẖalḳa belāsın dimege
	b.	Şimdi söylenmez olupdur güzelüm ṭoġru ẖaber*

5.	a.	Lebi aġzumda iken gitmege istedi didüm
	b.	A begüm ne‿olduñ iversin ṣuya mı düşdi şeker

6.	a.	Ḫūblar ṣūreti naḳşıyle Revānī bu göñül
	b.	Döndi şol āyineye kim ola naḳş anda ṣuver

-88-

mefʿūlü fāʿilātü mefāʿīlü fāʿilün

1.	a.	Dilberler içre niteki cānān göñüllüdür
	b.	Güller içinde ġonca·i ẖandān göñüllüdür

2.	a.	Serkeşlenürse leşker·i ḥüsn içre vechi var
	b.	Dil almada çü zülf·i perīşān göñüllüdür

3.	a.	Cennetde Ṭūbīye daẖi baş egmeye gibi
	b.	Ḳaddüñ bu gün ki serv·i ẖırāmān göñüllüdür *

4.	a.	Mescidde ehl·i ṣoḥbeti vāʿiẓ ṭonatmasun
	b.	Bilmez anı ki ẖaylīce yārān göñüllüdür

5.	a.	Pīr oldı gerçi daẖi güzel sevmesin ḳomaz
	b.	Miskīn Revāni ne‿eylesün oġlan göñüllüdür

-89-

fāʿilatün fāʿilātün fāʿilātün fāʿilün

1.	a.	Ḳanḳı ʿāşıḳ kim senüñ zülfüñe göñlin baġlar
	b.	Ḳaralar geymiş bulutlar anuñ içün aġlar

2.	a.	Ey şeker-leb dir gören aġyārlar içre seni
	b.	Hem-dem olmış ṭūṭīye ḥayfā ki şimdi zāġlar

3.	a.	Gūyiyā bezm·i belāda def durur sīnem benüm
	b.	Kim aña her yañadan pullar olupdur dāġlar

4.	a.	Dāyimā giryān ṣurāḥī dāyimā ẖandān ḳadeḥ
	b.	Bu cihāndur kimisi güler kimisi aġlar

5.	a.	Ṭaġlar gibi cefāsın çekdügümçün aġlaram
	b.	Hey benüm çekdügümi çekmez Revānī ṭaġlar

-90-

feʿilātün feʿilātün feʿilātün feʿilün

1.	a.	Gün gibi sāġarı ne‿içün ḳosun elden şāʿir
	b.	Kim anuñ altun adı vara ola mı baḳır

2.	a.	Yine dil şīşesini seng·i cefā ile ṣıduñ
	b.	Nice‿olurdı ara yerde gözedilse ẖāṭır

3.	a.	Çünki ʿuşşāḳa cehennem gibidür fürḳat·i yār
	b.	Bu müselmānlaruñ od itme yerin hey kāfir

4.	a.	Ne‿eyledüñ ġamze·i dil-dūzuña ey şūẖ·ı cihān
	b.	Ki beni şişlere ṣancar ṭuruban ikide bir

5.	a.	Nice rām olmaya naẓmuña perī-peykerler
	b.	Sözlerüñ siḥr Revānī ḳalemüñ bir sāḥir

-91-

feʿilātün mefāʿilün feʿilün

1.	a.	Dilrübālar içün ġazel didiler
	b.	Senüñ içün igen güzel didiler

2.	a.	İtlerüñle görüp maḥalleñde
	b.	Beni her devlete maḥal didiler

3.	a.	Mey ü maḥbūb ile geçen ʿömre
	b.	Zāhidā ʿömr·i bī-bedel didiler

4.	a.	Dil cidāl eylemez dehānuñ içün
	b.	Yoḳ yere olmasun cedel didiler

5.	a.	Ṣōfilerle Revāni eglenmez
	b.	Ḫūblar ṣoḥbetine gel didiler

-92-

mefāʿīlün mefāʿīlün feʿūlün

1.	a.	Yüzüñe āfitābuñ nisbeti var
	b.	Saña yerden göge dek minneti var

2.	a.	Nigāruñ gitmeden öp zülfin ey dil
	b.	Ki ʿömr·i nāzenīnüñ sürʿati var*

3.	a.	Ḳaşuñ miḥrābın añmış yine ṣōfī
	b.	Namāza durduġından niyyeti var

4.	a.	Müneccimdür ruẖuñ devrinde gerdūn
	b.	Ki‿öñinde ay u günden sāʿati var

5.	a.	Güneş yüzlülere içdi ṭoluyı
	b.	Revānīnüñ yine germiyyeti var

-93-

fāʿilātün fāʿilātün fāʿilātün fāʿilün

1.	a.	Nāzenīnüñ nāzı çoḳ ammā vefāsı az olur
	b.	A benüm çoḳ sevdügüm bu ne tükenmez nāz olur*

2.	a.	Bu hevāyī göñlümi bir dilber içün ṣaḳlaram
	b.	Rind·i şāhidbāz olan eks̲er kebūterbāz olur*

3.	a.	Uçsa bir Ṭūbā-ẖırāmuñ dil hevāsında ne‿ola
	b.	Gördügüñ ṭāvūs·ı ḳudsīdür hümā-pervāz olur

4.	a.	Bildiler mest idügüm ʿışḳuñ şarābından beni
	b.	Sāḳıyā şol mey diyen kāfir ʿaceb ġammāz olur *

5.	a.	Devr·i ḥüsnüñde Revānī leblerüñ terk idemez
	b.	Rūmdur bunda şarāb içmez kimesne az olur*

-94-

mefʿūlü fāʿilātü mefāʿīlü fāʿilün

1.	a.	Her bendenüñ başında saʿādet külāhı var
	b.	Devlet anuñ ki sencileyin pādişāhı var

2.	a.	Sulṭān·ı ʿışḳdur ne‿ola ʿāşıḳ gedā ise
	b.	Ki‿üstinde dūd·ı āh ile çetr·i siyāhı var

3.	a.	Geçse zamāne şeyẖi ne‿ola pīr·i mey-fürūş *
	b.	Meyẖāne gibi çünki anuñ ẖāneḳāhı var

4.	a.	Germ olma hāy u hūyuña igende ṣōfiyā
	b.	ʿĀşıḳlaruñ da derd ile çoḳ āh u vāhı var

5.	a.	Ne‿eyler Revāni Mekkede ey Kaʿbe·i niyāz
	b.	Mihrāb ḳaşlaruñ gibi çün secdegāhı var*

-95-

mefāʿīlün mefāʿīlün feʿūlün

1.	a.	Baña pīr·i muġānuñ ʿizzeti var
	b.	O ṣāḥib-devletüñ ẖoş himmeti var

2.	a.	Lebüñ añıldı raḳṣ urdı ḳadeḥler
	b.	Şebüñ sāḳī ʿaceb germiyyeti var

3.	a.	Müneccimdir felek ḳapuñda şāhum
	b.	Ki‿öñinde ay u günden sāʿati var

4.	a.	Begüm sen şāha bende‿olmış Revānī
	b.	Saʿādetlü ḳul ancaḳ devleti var

-96-

fāʿilātün fāʿilātün fāʿilātün fāʿilün

1.	a.	Ḳanḳı ʿāşıḳ kim müdām ol dilrübā yanındadur
	b.	Bir gedā·yı ẖoşdur kim pādişā yanındadur

2.	a.	Cānına derd ü belā ol kim ḳapuñdan ola dūr
	b.	Başına devlet anuñ kim sen hümā yanındadur

3.	a.	Dil lebüñ devrinde çünkim zülfüñ idindi maḳām
	b.	Her marażdan derdi yoḳ dārü'ş-şifā yanındadur

4.	a.	Ceng içün tātār dirler çeşmüñ ammā Ḥaḳ bilür
	b.	Türk·i tīr-endāzdur kim oḳ u yā yanındadur

5.	a.	Bir dem ayrılmaz Revānī yārdan bed-ẖū raḳīb
	b.	Bu imiş didükleri devlet ḳażā yanındadur

-97-

mefāʿīlün mefāʿīlün mefāʿīlün mefāʿīlün

1.	a.	Ṣaçuñ ʿāşıḳlara ʿālemde ʿömr·i cāvidānīdür*
	b.	Lebüñ ʿayş itmege her dem şarāb·ı erġavānīdür

2.	a.	Şarāb içsem güzellerle beni ʿayb itme ey zāhid
	b.	Bahār eyyāmı gül vaḳti yigitlik ʿunfuvānıdur*

3.	a.	Ne dirlik baña hey ʿömrüm ki hecrüñde ġıdādur ġam
	b.	Cihānda ölmeyecekce hemān bir zindegānīdür*

4.	a.	Geyüp bir āsumānī cāme ẖalḳı öldürür ol meh
	b.	Ne çāre hey müselmānlar belā·yı āsumānīdür

5.	a.	Maḥalleñde güzeller çoḳ Revānī ġam yime hergiz
	b.	Şikār eksük degül zīrā ki şāhīn āşiyānıdur

-98-

feʿilātün mefāʿilün feʿilün

1.	a.	Gözyaşın dil o laʿl·i nāba virür
	b.	Rind olan aḳçasın şarāba virür

2.	a.	Serv·i nāzum gözüm yaşı āẖır
	b.	Ḳorḳarın ʿālemi ẖarāba virür

3.	a.	Cebhesi şermsār ider māhı
	b.	Ruẖları nūrı āfitāba virür*

4.	a.	Aġzına sög varaḳ varaḳ ẖᾱce
	b.	Şol ki bir cāmı biñ kitāba virür

5.	a.	Her ne girse Revāninüñ eline
	b.	Ya şarāba yaẖod kebāba virür

-99-

fāʿilātün fāʿilātün fāʿilātün fāʿilün

1.	a.	Būse nuḳliyle lebüñüñ çün şarāb·ı nābı var
	b.	Ṣoḥbetüñ çaḳ vaḳtidür gel cümle ʿayş esbābı var*

2.	a.	Bir hilāl-ebrūyı gördüm ẖaṭṭı gelmiş tāzece
	b.	Mescidi yıḳılmış ammā bir güzel mihrābı var

3.	a.	Nice secde ḳılmasun ʿāşıḳ cemālüñ göricek
	b.	Kaʿbedür yüzüñ ki beñlerden anuñ iʿrābı var

4.	a.	Gice ol Yūsuf-cemāli ẖᾱbda gördüm dimiş
	b.	Var ise çeşminde ṣōfīnüñ ẖayāl·i ẖᾱbı var*

5.	a.	Olımazsın ʿışḳ yolında Revānī gibi sen
	b.	Bu ṭarīḳuñ dürlü dürlü ṣōfiyā ādābı var

-100-

fāʿilātün fāʿilātün fāʿilātün fāʿilün

1.	a.	Dāyimā meylüm benüm ol ḳāmet·i bālāyadur
	b.	Ḳadrüm alçaḳdur egerçi himmetüm aʿlāyadur

2.	a.	Ey ṣanem zülfüñ nice meyl itmesün laʿlüñe kim
	b.	Nisbeti ehl·i ṣalībüñ Ḥażret·i ʿĪsāyadur

3.	a.	Gerdiş·i gerdūn ile başından eksilmez zevāl
	b.	Her kimüñ kim meyli dāyim gün gibi dünyāyadur

4.	a.	Ayaġuña yüzini süren saʿādet ehlidür
	b.	Āsitānuñ ʿizz ü devlet manṣıbına pāyedür

5.	a.	Çeşm ü ebrūsı durur alan Revānī göñlini
	b.	Ḳaş u göz ḥüsn ehline ġāyet eyü sermāyedür*

-101-

mefāʿīlün mefāʿīlün feʿūlün

1.	a.	Nice oruç tutar gül yüzlü dilber
	b.	Ki dāyim vardur aġzı içre şekker*

2.	a.	Oruç bir aydur raḥmet göginde
	b.	Sebeb budur ṭutulduġına eks̲er

3.	a.	Oruç irişeli görinmez oldı
	b.	Meger kim ʿīde ḳarşu gitdi sāġar

4.	a.	Cemāl·i ʿīde ʿālem ẖalḳı müştāḳ
	b.	Ṣafā·yı ṣavm ile dilber münevver*

5.	a.	Ḳıyāmetdür güzeller ʿīd cennet
	b.	Şarāb olmış Revānī anda Kevs̲er

-102-

mefāʿīlün mefāʿīlün mefāʿīlün mefāʿīlün

1.	a.	Hilāl ebrūları ṣanmañ ki yāruñ şīveye başlar
	b.	Biri birisine ḳarşu çeker yayın kemānkeşler*

2.	a.	Gice sehv ile meclisde ḳamer yüzüñe öykünmiş
	b.	Anuñçün şemʿün ey dilber yaġar aġzından āteşler*

3.	a.	Peleng·i çarẖ ṣayduñdur şarāb iç cürʿa ṣaç bezme
	b.	Bu gün ẖumẖāne ṣadrında döşe naṭʿ·ı münaḳḳaşlar

4.	a.	Cemālüñ mescidi içre ne ṭururlar bu kāfirler*
	b.	Ḳaşuñ miḥrābı altında nedür ol iki serẖoşlar*

5.	a.	Cemāl·i yārı ʿuşşāḳa ḳomaz seyr itmege bir dem
	b.	Cihānda ḳutlu gün görmez Revānī uñmaduḳ başlar*

-103-

mefʿūlü fāʿilātü mefāʿīlü fāʿilün

1.	a.	Ṣanmañ ki sāḳi ṭutduġı cām·ı şarābdur
	b.	Bir yerde beş hilāl ile bir āfitābdur

2.	a.	Ḳadd ü dehānı ṣıfr u elifdür ki ḥüsninüñ
	b.	Birini on eyledi ol da ḥisābdur

3.	a.	ʿAyş·ı müdām eyleyelüm gel ki bezmümüz
	b.	Çeng ü çeġāne ile şarāb u kebābdur

4.	a.	Ol şūẖ·ı bī-vefānuñ işi güci ʿāşıḳa
	b.	Geh nāz u gāh şīve durur geh ʿitābdur

5.	a.	Yazınsa ḥikmet ehli ʿaceb mi kelāmuñı
	b.	Her bir sözüñ Revāni senüñ bir kitābdur

-104-

mefāʿīlün mefāʿīlün feʿūlün

1.	a.	Yüzüñe ne‿ola ger dirlerse güldür
	b.	Saña kim dir ki gül gibi yüzüñ dür

2.	a.	Ḳaçan nāz eyleyüp dişler lebin yār
	b.	Dizilür rişte·i al üstine dür

3.	a.	Tehī ṣanmañ görüp ʿuşşāḳ bezmin
	b.	Göñüller ṭolu ʿışḳ ile ḳadeḥ pür

4.	a.	Didüm dil ẖasteñ olmış gözin açmaz
	b.	Gülüp dilber didi ol daẖi uyur*

5.	a.	Semend·i ṭabʿuña ayaḳdaş olmaz
	b.	Revānī çünki meydān yügrügüñdür

6.	a.	ʿAceb bekrī degül mi cām·ı bāde
	b.	Ṣafāsından şarāb ile yüzin yur

7.	a.	Senüñ biñ biñ cefāña ṣabr ider dil
	b.	Anuñ bir kerre bārī ẖāṭırın ṣor

-105-

mefʿūlü fāʿilātü mefāʿīlü fāʿilün

1.	a.	Şol şehsüvār·ı nāz ki raʿnā sipāhīdür
	b.	Bilsek anı ne memleketüñ pādişāhıdur

2.	a.	Nār·ı ruẖında ẓāhir olan ẖaṭ degül durur
	b.	Kim bile ḳanḳı ʿāşıḳınuñ dūd·ı āhıdur

3.	a.	Ṣōfīye zühd içün ne‿ola virilse ṣavmaʿa
	b.	Meyẖāne rind·i bādekeşüñ ẖāneḳāhıdur

4.	a.	Dünyā evine ʿārif olan püşt·i pā urur
	b.	Kim sāḳ·ı ʿarş dāyim anuñ tekyegāhıdur

5.	a.	Ol şāha boynı baġlu ḳul iden Revāniyi
	b.	Şol gerden·i beyāżıle zülf·i siyāhıdur

-106-

mefʿūlü fāʿilātü mefāʿīlü fāʿilün

1.	a.	Şol bī-nevā ki bir güzelüñ mübtelāsıdur
	b.	ʿAyb itme zāhidā anı göñül belāsıdur

2.	a.	Yüksek ṭutarsa yār gibi kendüyi güneş
	b.	Ṭaʿn itmeñüz aña ki güzellik hevāsıdur

3.	a.	Fikr itme sīnesin ki yürek oynamasıdur
	b.	Ḫaṭṭ·ı lebini añma ṣaḳın cān taṣasıdur

4.	a.	Ol kebk·i ẖoş-ẖırāmı ne var ṣayd itmege
	b.	Göñlüm ḳuşıyle sīne ki şāhīn yuvasıdur

5.	a.	Cānā Revāni ölse lebüñçün ʿaceb degül
	b.	Zīrā sipāhīnüñ yidügi ḳan bahāsıdur

-107-

mefāʿīlün mefāʿīlün feʿūlün

1.	a.	Dil ü cānuñ ḳapuñda ġulġulı var
	b.	Bu gülzāruñ bir iki bülbüli var

2.	a.	Yaşum cūş itse ol ider ẖurūşı
	b.	Meger deryānuñ anuñla dili var

3.	a.	Gedā·yı ẖᾱn·ı ḥüsnüñdür felek kim
	b.	Yanında māh·ı nevden keçküli var

4.	a.	Ruẖ·ı Gülgūna ḳoş Şebdīz·i zülfi
	b.	Çü göñlüm gibi anuñ ögdüli var

5.	a.	Ne ẖoş reyḥāncıdur zülfi Revānī
	b.	Ki anuñ deste deste sünbüli var

-108-

mefʿūlü fāʿilātü mefāʿīlü fāʿilün

1.	a.	Çevgān·ı zülfi yāra göñül mübtelālanur
	b.	Bir ṭop gibi öñine düşmiş yuvalanur

2.	a.	Ṣanmañ bizi ki şimdi bilişdük nigār ile
	b.	Dil çaḳ ezelden anuñ ile āşinālanur

3.	a.	Ol pādişāh·ı ḥüsne varup ḳul olalı dil
	b.	Ben bendesine gelmiş efendim aġalanur

4.	a.	Ol ḳaşı yayı görse göñül unıdur beni
	b.	Ol uñmayası varduġı yerde oyalanur

5.	a.	Yāruñ Revāni dāmenine el uralı ẖār
	b.	Gülşende ġonca gibi yüregüm paralanur

-109-

mefʿūlü fāʿilātü mefāʿīlü fāʿilün

1.	a.	Şol mübtelā ki çeşmi siyāhından ayrudur
	b.	Nergis gibi ṣararsa ʿaceb mi ki ṣayrudur

2.	a.	İki ḥarāmidür güzelüm yol baṣar gözüñ
	b.	Diller metāʿın almada ġamzeñ bir uġrudur

3.	a.	Bu yazılu cerīde·i ḥüsn içre ẖaṭ degül
	b.	ʿĀşıḳlaruñ başında hemān ḳara yazudur

4.	a.	Āzādeler içinde irer ḳadr·i ʿālīye
	b.	Serv·i sehī gibi şu ki yolında ṭoġrudur

5.	a.	Çoḳ teşne-dillere meded ider bu şiʿr·i ter
	b.	Bu naẓm·ı ābdār hemān bir içim ṣudur

6.	a.	Pīr oldı gerçi daẖi güzel sevmesin ḳomaz
	b.	Miskīn Revāni ne‿eylesün oġlan göñüllüdür

-110-

mefāʿilün feʿilātün mefāʿīlün feʿilün

1.	a.	Çemen ki şimdi gül ü bülbülüñ yataġıdur
	b.	Tamām ʿişretüñ eyyāmı ʿayş çaġıdur

2.	a.	ʿAceb mi ben gice gündüz duʿāsın eylersem
	b.	Saʿādetüm güneşi devletüm çerāġıdur

3.	a.	Nigār ẖaṭṭını ṣaḳlar müdām zülfi ile
	b.	Kimesne anı göremez ılan ayaġıdur

4.	a.	Göñül vilāyetini ḳorḳaram ẖarāb eyler*
	b.	Bizümle ol gözi kāfir bu gün ki yaġıdur*

5.	a.	Revāni buldı yine bir kemān-ebrūyı
	b.	Sipāhīnüñ işi dāyim sefer yaraġıdur

-111-

fāʿilātün fāʿilātün fāʿilātün fāʿilün

1.	a.	Ḥüsn bāġın her nefes ġonca-dehenler tāzeler
	b.	Gülşen·i cennet gibi anda bulınur tāzeler*

2.	a.	Şerbetin añma ṭabībüñ baña mey ṣun sāḳıyā
	b.	Kim anuñ bir ḳaṭrası niçe cigerler tāzeler*

3.	a.	Didüm ey dilber giderme ʿārıżuñdan zülfüñi
	b.	Didi gül mecmūʿasında yoḳ durur şīrāzeler

4.	a.	Ṣīt·i naẓmum sen mehüñ vaṣfıyle çıḳdı göklere
	b.	Günbed·i eflāki ṭoldurdı bu gün āvāzeler

5.	a.	Şöyle vaṣf itdüm Revānī aġzı ile ḳaşını
	b.	Umaram kim her yüzük ḳaşına anı ḳazalar*

-112-

fāʿilātün fāʿilātün fāʿilātün fāʿilün

1.	a.	Ḫūb-rūlar içre ey dil māh kim şehrī geçer
	b.	Ṣora varsañ ol güneş yüzlüyle hemşehrī geçer*

2.	a.	Baḥr urup mevc ursa ʿāşıḳ gözyaşından aġlamaz
	b.	ʿIşḳ deryāsı içinde gördügüñ baḥrī geçer

3.	a.	Yār·ı sengīn-dil raḳībüñ ḳaçsa ṭaʿnından ne‿ola
	b.	Bir ʿaceb efʿīdür ol ṭaşa daẖi zehri geçer

4.	a.	Kirpügi ucına aṣmaz ḳaṭra deñlü gözlerüm
	b.	Bursanuñ ey dil Pıñarbaşı ki bir nehrī geçer*

5.	a.	Ṣaḳın incinme Revānī gerdiş·i gerdūna kim
	b.	Ṣabr ẖoşdur bu cihānuñ luṭfı vü ḳahrı geçer*

-113-

feʿilātün mefāʿilün feʿilün

1.	a.	Lebüñ içün baña neler dirler
	b.	Bal ṭutan barmaġın yalar dirler

2.	a.	Yüzüñ aḳ alnuñ açuḳ olduġıçün
	b.	Ehl·i diller saña ḳamer dirler

3.	a.	Ḫaṭṭuña ben benefşedür diyeli
	b.	Yeñile çıḳdı bu ẖaber dirler

4.	a.	Derd·i ʿışḳ ile ẖūb imiş ölmek
	b.	Yār ile ẖoş olur sefer dirler*

5.	a.	Nāme·i şiʿrine Revānīnüñ
	b.	Lebi vaṣfıyle ney-şeker dirler

-114-

mefʿūlü mefāʿīlü mefāʿīlü feʿūlün_

1.	a.	Oldı işigüñ ḳadr ile eflāke berāber
	b.	Dutduġı içün kendüzini ẖāke berāber

2.	a.	Şol ḥoḳḳa·i laʿlüñde ʿaceb ne‿eyler ola zülf
	b.	Kim gördi ki mārı ola tiryāke berāber

3.	a.	Zülfüñ gibi bir zülf güzellerde olur mı
	b.	Ḥāşā ki benefşe ola ẖāşāke berāber

4.	a.	Bir māh-liḳānuñ yine sergeştesi olmış
	b.	Gördüm felegi bu dil·i ġamnāke berāber

5.	a.	Aḥsent güzel bilmede ṭabʿuña Revānī
	b.	Bir nesne olur mı ʿaceb idrāke berāber

-115-

mefʿūlü fāʿilātü mefāʿīlü fāʿilün

1.	a.	Cibrīl·i cān ki Sidre boyın müntehā bilür
	b.	Cennet gibi işigin anuñ pür-ṣafā bilür

2.	a.	Ḳaşı nişāncı olalı dīvān·ı ḥüsnde
	b.	Mülk·i cemāle kendüyi ol pādişā bilür*

3.	a.	Zencīre çekse zülf·i dü-tāsı ʿaceb degül
	b.	Dīvāne oldı göz göre dil kim duta bilür

4.	a.	Aġzı ile belin göremez çeşm·i ẖurde-bīn
	b.	ʿĀşıḳ nice öper anı nice ḳuca bilür

5.	a.	Sen sīm-ten nigār ile olalı āşinā
	b.	Dirler Revāni miskīn içün kīmyā bilür

-116-

feʿilātün feʿilātün feʿilātün feʿilün

1.	a.	Ehl·i fażl olana ey çarẖ cefālar niçe bir
	b.	Cāhile ʿizzet ile mihr ü vefālar niçe bir

2.	a.	Odamuz öñine bir gün bizüm uġramayalar
	b.	Şehr için seyr ideler māh-liḳālar niçe bir

3.	a.	Altun üsküflü gümiş tügmelü dilberler ile
	b.	Bize gerçekleneler begler aġalar niçe bir

4.	a.	Ey ḳadeḥ öpüşesin ikide bir sāḳi ile
	b.	Ḳarşumuzda süresin ẕevḳ u ṣafālar niçe bir

5.	a.	Serv-ḳadler anıcaḳ āh idersin her dem
	b.	Saña ʿālemde Revānī bu hevālar niçe bir

-117-

mefʿūlü mefāʿīlü mefāʿīlü feʿūlün

1.	a.	Destüñde kimüñ kim güzelüm sīm ü zeri var
	b.	Tīġüñ gibi egriyse de yanuñda yeri var

2.	a.	Maḥbūb yalıñ yüzlü güzeldür ḳılıcuñ kim
	b.	Bilinde yine ẖıdmet içün zer kemeri var

3.	a.	Geymiş benek altunlu siyeh cāmeyi tīġüñ
	b.	Öldürmek içün ẖalḳı ʿaceb şīveleri var

4.	a.	Tīġüñ ne‿ola keskinlük ile ad çıḳarsa
	b.	Meydān·ı ṣalābetde anuñ çoḳ hüneri var

5.	a.	Kimdür ḳılıcuñ ura Revānī gibi şāhum
	b.	Āsān mı ṣanursın anı meydānuñ eri var

-118-

mefāʿīlün mefāʿīlün mefāʿīlün mefāʿīlün

1.	a.	Yüzi cennet lebi Kevs̲er nigārum serv-ḳāmetdür
	b.	Güzeller arasında ol ḳıyāmetdür ḳıyāmetdür

2.	a.	Kitāb·ı ʿışḳı ey ẖᾱce çıḳarmaḳ ẖaylī müşkildür
	b.	Hidāye oḳumaġ ile bilinmez bu hidāyetdür

3.	a.	Mey ü maḥbūbdan dāyim beni menʿ itme bi'llāhi
	b.	Şarāb içmek güzel sevmek behey ṣōfī ẓarāfetdür*

4.	a.	Yıḳıldı ẓulm ile göñlüm baña ṣun cām·ı ʿadli kim
	b.	Ġaraż beglikden ey sāḳī cihān içre ʿadāletdür

5.	a.	Ne‿ola nāzüklenüp dilber lebinden būse virmezse
	b.	Revānī nāzük olanuñ işi dāyim nezāketdür*

-119-

feʿilātün feʿilātün feʿilātün feʿilün

1.	a.	Her ne maḳṣūd göñül var ise hep ḥāṣıl olur
	b.	Gel e meyẖāne yi gör kim nice ẖoş menzil olur

2.	a.	Göñlümi ṣanma mey·i nāb iledür dāyim mest
	b.	Sāḳıyā laʿlüñi yād itmek ile ḳanzil olur

3.	a.	Yüri ʿāşıḳ ḳoma sen pīr·i muġān işigini
	b.	Kişi kim ehl·i kemāle irişe kāmil olur

4.	a.	Ben ṭururken sögesin şol leb ile aġyāra
	b.	Ey benüm rūḥ·ı revānum buña kim ḳāyil olur

5.	a.	Gördügi gibi Revānī ne‿ola ḳul olsa saña
	b.	Şāʿirüñ göñli efendi güzele māyil olur

-120-

mefāʿīlün mefāʿīlün mefāʿīlün mefāʿīlün

1.	a.	Göñül şād ol ki ʿīd irdi ṣafā vü ẕevḳ çaġıdur
	b.	Ele cām aldı māh·ı nev yine ṣoḥbet yaraġıdur

2.	a.	Ne ʿālī-menzilet ẖurşīd-rütbet şāh olur bu ʿīd
	b.	Ki gerdūn sāyebānıdur hilāl anuñ otaġıdur

3.	a.	Hilāl ile S̲üreyyā kim felek bāġını zeyn itmiş
	b.	Egilmiş aḳ güllerle ṣanasın gül budaġıdur

4.	a.	Gice gündüz güzellerle nice ʿayş itmeye gerdūn
	b.	Meh·i nev sāġar·ı sīmīn güneş altun ḳabaġıdur*

5.	a.	Revānī ẖoş sipāhīdür bu gün meydān·ı ʿişretde
	b.	Ki dāyim içdügi aşḳar gözi yā at ḳulaġıdur

-121-

feʿilātün feʿilātün feʿilātün feʿilün

1.	a.	Niçe bir ṣaḳlayalum ġayret ü ʿārı niçe bir*
	b.	Niçe bir bekleyelüm ḳurı vaḳārı niçe bir

2.	a.	Varalum ḥalḳa·i ẕikre ele tesbīḥ alalum
	b.	Niçe bir oẖşayalum kākül·i yārı niçe bir

3.	a.	Ġonca-veş tāc urınup gül gibi ẖırḳa geyelüm
	b.	Niçe bir ẕikr idelüm lāle-ʿiẕārı niçe bir*

4.	a.	Leb·i cānānı ḳoyup añmayalum ince belin
	b.	Niçe bir fikr idelüm būs u kinārı niçe bir

5.	a.	Hüner oldur ki Revānī bulavuz naḳḳāşı
	b.	Niçe bir medḥ idelüm naḳş·ı nigārı niçe bir*

-122-

fāʿilātün fāʿilātün fāʿilātün fāʿilün

1.	a.	Būsenüñ adını anmaḳ dilbere ibrāmdur
	b.	Ġabġaba el ṣunma evvel ẖaylīce iḳdāmdur*

2.	a.	Gel ki ʿişret mevsimidür irdi çün tāze bahār
	b.	Ṣoḥbetüñ çaḳ vaḳtidür ġāyet güzel eyyāmdur

3.	a.	Nāzük ol ey dil şükūfe gibi sāġar al ele
	b.	Bezme çün çeşm·i çerez ol gözleri bādāmdur

4.	a.	Vuṣlatuñda şevḳ dāġın sīneden menʿ eyleme
	b.	Dōstum ehl·i ṣafāya ol dügün bayramdur*

5.	a.	Ṣoḥbet·i ẖāṣa Revānī maḥrem olmaz mı didüm
	b.	Didi andan ḳaçmazuz ammā igen bed-nāmdur

-123-

fāʿilātün fāʿilātün fāʿilātün fāʿilün

1.	a.	Gitmege ʿazm itse meclisde ṭurup cānāneler
	b.	Aġlaşurlar her ṭarafdan ʿāşıḳ·ı dīvāneler

2.	a.	Bāġ·ı ʿālemde açıldı ṣanuram nesrīnler
	b.	Geyse līmōnī ḳabālar her ḳaçan cānāneler

3.	a.	Gice encümler görenler māh·ı çarẖ üzre didi
	b.	Şemʿüñ eṭrāfına cemʿ olmış yine pervāneler

4.	a.	Gül budaġında ḳızıl güller açıldı ṣanuram
	b.	Sāḳi·i meh-rūlar alduḳca ele peymāneler

5.	a.	Gözlerüñ ḳılsun Revānīnüñ dil ü cānın maḳām
	b.	Kim ḥarāmīler yataġıdur dil·i vīrāneler

-124-

mefāʿīlün mefāʿīlün mefāʿīlün mefāʿīlün

1.	a.	Alupdur altına ayı gözi siḥr ile sāḥirdür
	b.	Ayaġın muṣḥaf üstine uzatmış zülfi kāfirdür

2.	a.	Ḫaṭ·ı sebzüñ ẖayālidür göñülde gözde ey dilber
	b.	Ḫıżırdur gūyiyā ol kim ḳuruda yaşda ḥāżırdur

3.	a.	Gözüñe nergis·i şehlā ne var sehv ile öykünse
	b.	Çemen şehrinde ey dilber gözi baġlu müsāfirdür*

4.	a.	Benefşe būy·ı zülfüñle cihānı müşk-bār itdi
	b.	Meger kim Çīn ü Māçīnden gelür bir hindī tācirdür

5.	a.	Nice meyl itmesün ʿāşıḳ güzeller tāze eşʿāra
	b.	Revānī māh-rūlar vaṣfını itmekde māhirdür

-125-

fāʿilātün fāʿilātün fāʿilātün fāʿilün

1.	a.	Cennet·i aʿlāyı göñlüm rūy·ı dildārın ṣanur
	b.	Nāme·i aʿmālümi zülf·i siyehkārın ṣanur

2.	a.	Kūy·ı yārı dūd·ı āhumla siyeh-pūş eyledüm
	b.	Tañrı ḥaḳḳıyçün görenler Kaʿbe dīvārın ṣanur

3.	a.	Vaʿde·i ferdā·yı yār ile göñül ẖurrem durur
	b.	Vaʿde·i ferdā ḳıyāmetdür anı yarın ṣanur

4.	a.	Şol sipāhī dilberi ki‿ekmedügi yerden biçer
	b.	Bu maḥabbet sebzezārın kendü tīmārın ṣanur

5.	a.	Ġoncanuñ mecmūʿasın açmaz idi bād·ı ṣabā
	b.	Bu Revānīnüñ yazılmış anda eşʿārın ṣanur

-126-

fāʿilātün fāʿilātün fāʿilātün fāʿilün

1.	a.	Nevbahār·ı ḥüsnüñüñ cānā ʿaceb seyrānı var
	b.	Her ṭarafdan tāze açılmış gül·i ẖandānı var

2.	a.	Ḥasretinden niçeler cān virdiler bir būsenüñ
	b.	Būse adın añmaġa bi'llāhi kimüñ cānı var

3.	a.	Nice feryād itmeyem ḥadden aşurduñ cevrüñi
	b.	Ā benüm çoḳ sevdügüm her nesnenüñ oranı var

4.	a.	Her melek ṣūretlünüñ yanında vardur bir raḳīb
	b.	Ey göñül her ādemüñ dirler ki bir şeyṭānı var

5.	a.	Pādişāhum devletüñde mülk·i naẓmuñ şāhıdur
	b.	Bu Revānī bendeñüñ gördüm bu gün dīvānı var

-127-

fāʿilātün fāʿilātün fāʿilātün fāʿilün

1.	a.	Ṣubḥ-dem ey dil güzeller kūy·ı cānāndan çıḳar
	b.	ʿĀdet oldur her seḥer güller gülistāndan çıḳar*

2.	a.	Āfet·i ḥüsn ey ṣanem zülfüñ yeterken ʿāşıḳa
	b.	Bilmezüz ẖaṭṭ·ı leb·i cān-perverüñ ḳandan çıḳar*

3.	a.	Ṣoyunup pīrāheninden çıḳsa ol yār·ı ʿazīz
	b.	Yūsuf·ı Mıṣrī durur gūyā ki zındāndan çıḳar

4.	a.	Yārı aġyāruñ söziyle nice terk eyleyeyin*
	b.	Kişi kim şeyṭāna uysa dīnden īmāndan çıḳar

5.	a.	Her ḳaçan çıḳsa Revānī yār devletẖāneden
	b.	Pādişāh·ı heft kişver ṣanki eyvāndan çıḳar

-128-

mefāʿīlün mefāʿīlün mefāʿīlün mefāʿīlün

1.	a.	Göñül sen kūy·ı dilberde bunı ṣanma gedālıḳdur
	b.	Ḥaḳīḳat salṭanat budur bu özge pādişālıḳdur*

2.	a.	ʿAceb mi ḥüsn ü ẖulḳ ile göñüller alsa cānāne
	b.	Bu rūşendür ki ʿālemde güzellik dilrübālıḳdur

3.	a.	Güneş yüzlüleri sevmek hemān odlara yanmaḳdur
	b.	Güzel kim ola hercāyī işi hep bī- vefālıḳdur

4.	a.	Benüm bu uñmaduḳ āvāre göñlüm hīç uṣlanmaz
	b.	Şarāb içmek güzel sevmekdür işi bī- nevālıḳdur

5.	a.	Ne‿idersin manṣıb u cāhı nöker olduñ çün ol şāha
	b.	Revānī ġāfil olma kim bu bir başḳa aġalıḳdur

-129-

feʿilātün feʿilātün feʿilātün feʿilün

1.	a.	Ḳāmeti dikmesidür naẖl·i dilārā·yı Mıṣır
	b.	Lebi perverdesidür şimdi mürebbā·yı Mıṣır

2.	a.	Devr·i ḥüsnüñde göñül kūyuña ʿazm itdi yine
	b.	Döndi şol ẖᾱceye kim eyleye sevdā·yı Mıṣır

3.	a.	Ne‿ola kūyıñda gözüm yaşını seyr eyler iseñ
	b.	Nīl ile ẖūb olur çünki temāşā·yı Mıṣır

4.	a.	Dil bilür bir lebi şekker güzelüñ ʿāşıḳıyuz
	b.	Egleyimez dili ṭūṭī·i şeker-ẖā·yı Mıṣır*

5.	a.	Varsa bu şiʿr·i Revānī ne‿ola Rūm illerine
	b.	Armaġān olur imiş her yere ẖurmā·yı Mıṣır*

-130-

fāʿilātün fāʿilātün fāʿilātün fāʿilün

1.	a.	Kūyuñ içre gözlerüm yaşı ne ẖoş yeksān aḳar*
	b.	Bu ne gülşendür kim anda iki şādırvān aḳar

2.	a.	İşi altundur ḳadeḥ gibi ḳamu bezm ehlinüñ
	b.	Çün ṣurāḥī çeşmesinden laʿl ile mercān aḳar

3.	a.	Ehl·i diller cān atar pīr·i muġān işigine
	b.	Bir er ocaġı durur kim her yaña ḳurbān aḳar

4.	a.	Nice göñül virmesün her kişi sen cānāneye
	b.	Zülfüñe diller çekilür leblerüñe cān aḳar

5.	a.	Cān baġışlar ẕikr·i laʿlüñle Revānī sözleri
	b.	Ḫāmesinüñ lūlesinden Çeşme·i Ḥayvān aḳar

-131-

fāʿilātün fāʿilātün fāʿilātün fāʿilün

1.	a.	Ol gözi āhū güzel kim müşkī kemẖālar geyer
	b.	Sāde-rūlar içre bir begdür ki ḳaralar geyer

2.	a.	Yaḳası açılmaduḳ sözler igen çoḳ söylenür
	b.	Gül gibi dilber ḳaçan gülgūnī kemẖālar geyer

3.	a.	Ḳorḳarın āteş-perest ola ḳamu ẖalḳ·ı cihān*
	b.	Her ne gün begzādemüz altunlu çatmalar geyer*

4.	a.	Bülbülüñ dervīş-veş egninde bir eski nemed
	b.	Ḫᾱce·i gül gülsitān içinde dībālar geyer

5.	a.	Geydi çün ʿışḳuñ pelāsın bu Revānī ne‿eylesün
	b.	Şol libās·ı fāẖıri kim begler aġalar geyer

-132-

feʿilātün feʿilātün feʿilātün feʿilün

1.	a.	Dil ü cānı ġam·ı cānāne gelüp şād eyler
	b.	Ḫᾱce münʿim olıcaḳ ḳulların āzād eyler

2.	a.	Kūy·ı ʿışḳı nice medḥ eylemesün ʿāşıḳlar
	b.	Kendü şehrini göñül her kişi Baġdād eyler

3.	a.	Ne ṣuç eylerse göñül yār bilürmiş benden
	b.	Ne günāh olsa arada baña isnād eyler

4.	a.	Tīşe·i māh·ı nevi destüme her gāh ṣunup
	b.	Bīsütūn·ı felege ġam beni Ferhād eyler

5.	a.	Bilmezem yine Revānī ne muʿammā söyler
	b.	Dāl·i zülfüñle elif ḳāmetüñi ad eyler

-133-

mefʿūlü mefāʿīlü mefāʿīlü feʿūlün

1.	a.	Yanınca kimüñ sencileyin bir ṣanemi var*
	b.	Kāfirdür eger ẕerrece göñlinde ġamı var

2.	a.	Ayaġı tozı gözleredür küḥl·i cevāhir
	b.	Ol serv·i revānuñ ne mübārek ḳademi var

3.	a.	Aldanma ḳad ü zülf ü dehānına nigāruñ
	b.	Zīrā ki güzel sevmegüñ ey dil elemi var

4.	a.	Ol dilbere dirlerse ne‿ola ẖusrev·i ẖūbān
	b.	Çün ḳāmet ü zülfi gibi tūġ u ʿalemi var*

5.	a.	Bir tāze güzel sevdi cihān içre Revānī
	b.	Kim servi boyı lāle ruẖı ġonca femi var

-134-

fāʿilātün fāʿilātün fāʿilātün fāʿilün

1.	a.	Cümle siḥri ʿālemüñ sen gözleri sāḥirdedür
	b.	Fitne vü āşūb·ı dīn ol ġamze·i kāfirdedür

2.	a.	Ḳalmamış mihr ü vefādan hīç göñlinde es̲er
	b.	Ġālibā cevr ü cefālar ẖāṭır·ı ʿāṭırdadur

3.	a.	Kimseler vāḳıf degül cānā dehānuñ sırrına
	b.	Ḳorḳarın ṣormaġa ḥikmet var ise ol sırdadur

4.	a.	Ehl·i fażl olmaḳ dilerseñ sözlerüm gūş eyle kim
	b.	Hep belāġat hep feṣāḥat dōstum şāʿirdedür

5.	a.	Yazamaz ġamdan Revānī defter ü dīvānına
	b.	Şol ġazeller kim begüm mecmūʿa·i ẖāṭırdadur

-135-

mefʿūlü fāʿilātü mefāʿīlü fāʿilün

1.	a.	Meyli bu göñlümüñ çün o ḳaşı kemānadur
	b.	Bildüm ki miḥnet oḳına dāyim nişānedür*

2.	a.	Ebrūları ẖayāli ile dil güzellerüñ
	b.	Gūyā kemān ile ṭolu taʿlīmẖānedür

3.	a.	Dişler lebümi būse alurken diyü ḥabīb
	b.	Virmez ṭudaġın aġzuma şīrīn bahānedür

4.	a.	Gerçi zamāne ẖūbları bendedür saña
	b.	İgen ṭayanma ḥüsnüñe şāhum zamānedür

5.	a.	Dāyim Revāni laʿline māyil durur göñül
	b.	Rindüñ hemīşe meyli mey·i erġavānadur

-136-

feʿilātün feʿilātün feʿilātün feʿilün

1.	a.	Ḫūblar būselerin gerçi revān eylediler
	b.	Yine bir būseye biñ minnet·i cān eylediler

2.	a.	Dil metāʿın degerin degmeze biz ẖod ṣatduḳ
	b.	Aldılar anı güzeller ne ziyān eylediler

3.	a.	Şöyle ʿahd itmiş idük daẖi güzel sevmeyevüz
	b.	Nāzenīnler ne içün bizi yalan eylediler

4.	a.	Sīne ṣandūḳasına atmaġ içün dilberler
	b.	Ḳaddümi cevr oḳına yine kemān eylediler

5.	a.	Senüñ aduña Revānī ne ġazel kim yazdı
	b.	İsm·i aʿẓam gibi hep vird·i zebān eylediler

-137-

mefʿūlü fāʿilātü mefāʿīlü fāʿilün

1.	a.	Devr·i ruẖında māha görüñ siz ne bend olur
	b.	Çün āfitāb burcına zülfi kemend olur

2.	a.	Pīşe idindi ʿışḳı göñül ṭıfl iken daẖi
	b.	Ol uñmayası göresiz āẖır levend olur

3.	a.	Ḳucaġa ṭolu dilbere māyil durur göñül
	b.	Dervīş olan kimesne begüm zelle-bend olur

4.	a.	Zāhid ki bine nefs atına menzil alımaz
	b.	Boynındaġı ridāsı aña pāy-bend olur*

5.	a.	Cān naḳdini Revānī virür naḳd·i ʿışḳa dil
	b.	Varını yoḳ dimez nice ẖoş derdmend olur

-138-

mefʿūlü mefāʿīlü mefāʿīlü feʿūlün

1.	a.	ʿArż itdi yine ṭalʿat·i zībāyı güzeller
	b.	Ḫoş vech ile zeyn eyledi dünyāyı güzeller

2.	a.	Ḫūrşīd·i cihāntāb gibi ʿālemi yaḳdı
	b.	Nārencī ḳabā ile bu hercāyī güzeller

3.	a.	Dimez ẖaṭ u ẖāl eyledügi işleri gizler
	b.	Aṣılmalu‿ider zülf·i semen-sāyı güzeller*

4.	a.	Şāhid getürüñ dimeye ḥükm eyleye ḳāḍī
	b.	ʿĀşıḳlar ile ger ide daʿvāyı güzeller*

5.	a.	Rā ḳaşlarınuñ ʿāşıḳıyın dime Revānī
	b.	Senden daẖi yegce bilür orayı güzeller

-139-

fāʿilātün fāʿilātün fāʿilātün fāʿilün

1.	a.	Ẓāhirā tebẖāle şimdi laʿl·i cānānumdadur
	b.	Bir girihdür ol benüm bu rişte·i cānumdadur

2.	a.	Üstine yapraḳ gibi her laḥẓa ditrersem ne‿ola
	b.	Lerze çünkim ol boyı serv·i ẖırāmānumdadur

3.	a.	Āteş·i tebden ṣararmışdur gül·i nesrīn gibi
	b.	Ey ṣabā şol al güller ki‿ol gülistānumdadur

4.	a.	Al kāġıd üzre gūyā mühre·i sīmīndür
	b.	Şol ʿaraḳ kim ol ruẖı gül-berg·i ẖandānumdadur

5.	a.	Ben ne cān ile Revānī eyleyem bir dem ḥużūr
	b.	Şol ḥarāret kim benüm ol cism·i cānānumdadur

-140*

mefāʿīlün mefāʿīlün feʿūlün

1.	a.	Bahār·ı ḥüsnüñ ile tāze Gülzār
	b.	Cemālüñ şevḳı ile bāġ u gül zār*

2.	a.	Ḫayāli çeşmüñüñ gitmez gözümden
	b.	Ṣanasın merdüm·i çeşmümdür ey yār

3.	a.	Uyarma ġamzeñi nāz uyẖusından
	b.	Ki‿olur ṣıḥḥat nişānı ẖᾱb·ı bīmār

4.	a.	Meger zülf·i ruẖuñ islāma geldi
	b.	Kim ol kāfir bıraḳdı nāra zünnār*

5.	a.	Dilim dilim dilüm dilerse ġamzeñ
	b.	Dilümden gelmeye bir acı güftār

6.	a.	Baña ṭoḳınmadan ṣaḳlar elin dōst
	b.	Beni urmaz gül ile daẖi ol yār*

7.	a.	İki yüzlü raḳībe rāz virme
	b.	Münāfıḳdan Revānī ṣaḳla esrār*

-141-

mefāʿīlün mefāʿīlün feʿūlün

1.	a.	Yüzüñdür var ise Beytü'l-Muṭahhar
	b.	Ki Kaʿbe örtüsi zülf·i muʿanber

2.	a.	Güzeller ẖālī olmazlar ḳapuñdan
	b.	Ṭavāf·ı Kaʿbe eylermiş melekler

3.	a.	Yüzüñden berḳ urur nūr·ı İlāhī
	b.	Ṣafāsından ḳamu diller münevver

4.	a.	İşigüñde ḳo yüz sürsün meh·i nev
	b.	Yaraşur Kaʿbede çün ḥalḳa·i zer

5.	a.	Ziyāret eyle ḥüsn Kaʿbesini
	b.	Revānī çün bu yıldur ḥacc·ı ekber

-142-

fāʿilātün fāʿilātün fāʿilātün fāʿilün

1.	a.	Cennete ey dil varursa nāz ile cānāneler
	b.	teş·i şevḳ ile cennet ehli cümle yanalar

2.	a.	Gül budaġından ḳızıl güller açıldı ṣanuram
	b.	Sāḳi·i meh-rūlar alduḳca ele peymāneler

3.	a.	Cām·ı mey rūşen ḳılur ʿāşıḳlaruñ ḳalbin müdām
	b.	Şuʿle·i ẖurşīd ile pür-nūr olur vīrāneler*

4.	a.	Bir güneşle germ olup gögsüñi germe ey felek
	b.	Ṭoludur gün yüzlülerle bunda mektebẖāneler

5.	a.	Gözlerine mesken olmazdı Revānī cān u dil
	b.	Ger ḥarāmīler yataġı olmasa vīrāneler

-143-

mefʿūlü mefāʿīlü mefāʿīlü feʿūlün

1.	a.	Şemʿ·i ruẖuña göñlümi pervāne disünler
	b.	Yandurdı per ü bālini pes yana disünler

2.	a.	Zencīr·i ṣaçuñ daḳmaz isem boynuma ey dōst
	b.	ʿĀḳil dimesünler baña dīvāne disünler

3.	a.	Āşüfte gören dōstlara göñlümi ayduñ
	b.	Yiter delülük eyledüñ uṣlan a disünler

4.	a.	Öldükde benüm ḥālümi bi'llāhi görenler
	b.	Cān virdügümi ʿışḳıle cānāna disünler

5.	a.	Gözden düşüp eytām·ı yaşum ḳaldı ayaḳda
	b.	Üftādelerüñ ḥālini sulṭāna disünler

6.	a.	Sen ẖusrev·i ẖūbānı öger çünki Revānī
	b.	İrişdi bu gün naẓm ile Selmāna disünler

7.	a.	Naẓm ehline ayduñ ki ḳurı lāfı ḳosunlar
	b.	Şiʿri diyücek şöylece rindāne disünler

-144-

feʿilātün feʿilātün feʿilātün feʿilün

1.	a.	Bu güzeller ki bize cevr ü cefā eylediler
	b.	Ḥamdü li'llāh ki hele ʿahde vefā eylediler

2.	a.	Bu duʿā-gūyuñı sen ẖayr ile yād eyleyeli
	b.	Ey gözüm nūrı saña ẖayr duʿā eylediler

3.	a.	Cānların yoluña terk itdi bu gün ʿāşıḳlar
	b.	Āẖıret borcını dünyāda edā eylediler

4.	a.	Ḫalḳa miḥrāb·ı ḳaşuñ şeklini gösterdügiçün
	b.	Ḫūblar āyineyi ḳıble-nümā eylediler

5.	a.	Göñlümüz yapdı Revānī yine sengīn-diller
	b.	Bir yıḳuḳ tekye iken yeñi binā eylediler

ZĀ

-145-

fāʿilātün fāʿilātün fāʿilātün fāʿilün

1.	a.	Ẕerrece mihr ü vefāyı baña dildār eylemez
	b.	Hey baña yār itdügin çarẖ·ı sitemkār eylemez

2.	a.	Şol ḳadar ẓulm eyledi ʿuşşāḳa ẖaṭṭuñ dōstum
	b.	Ehl·i islāma anı va'llāhi küffār eylemez

3.	a.	Ḫāk·i pāy·ı yārdan dil dūr olmaz nāṣıḥā
	b.	ʿAḳlı başında olan maḥbūba inkār eylemez

4.	a.	Dilberüñ bir būsesine ḳāniʿ olmazsın göñül
	b.	Bu senüñ itdügüñ işe hīç bir ṭamaʿkār eylemez*

5.	a.	Āsitān·ı kūy·ı yāra irişüp yüz süremez
	b.	Kirpügin her ḳanḳı ʿāşıḳ ki‿anda mismār eylemez

6.	a.	Gözlerine tāze güller dāġ·ı ḥasret görinür
	b.	Yārsuz göñlüm anuñçün seyr·i Gülzār eylemez

7.	a.	Söylesün dirseñ Revānīyi ḳadeḥ ṣun sāḳıyā
	b.	Ṭūṭī çün āyīnesüz ʿālemde güftār eylemez

-146-

feʿilātün feʿilātün feʿilātün feʿilün

1.	a.	İki ʿālemde hemān ẖaṭṭıdur ancaḳ ġamumuz
	b.	Devlet·i ʿışḳ ile vardur hele bir ʿālemümüz

2.	a.	Ḫᾱr baḳmañ bize siz ne‿ola gedā isek eger
	b.	ʿIşḳ sulṭānlarına maḥrem olur eñ kemümüz

3.	a.	ʿIşḳ yolında bu gün pāk ü mücerred geçerüz
	b.	Ne‿ola ḳudsīler eger olsa bizüm maḥremümüz

4.	a.	Dem bu demdür içerüz cām·ı meyi ne‿olsa gerek
	b.	Ṣoḥbet·i nāy ile çün ṭurmadan artar demümüz

5.	a.	Ol perī hīç Revānī bize ādem dimedi
	b.	Niçe kim vardı ayaġı tozına ādemümüz

-147-

feʿilātün feʿilātün feʿilātün feʿilün

1.	a.	Bilüñüñ fikri ile ḥāṣılı şaşdı bilimüz
	b.	Lebüñüñ būselerin añmaġa varmaz dilümüz

2.	a.	Naḳd·i cān ḳaldı hemān ṣoḥbet·i cānāne içün
	b.	Uymadı ne‿eyleyelüm ẖarcımuza ḥāṣılumuz

3.	a.	Fürḳatüñde giceler māh çerāġın ne‿iderüz
	b.	Āhumuz şemʿi ile rūşen olur maḥfilümüz*

4.	a.	Eylesem ʿazm·i sefer dönmege başlar başum
	b.	Gird·i kūyı olur imiş yine sermenzilümüz*

5.	a.	Ne bilür mesˀele·i ʿışḳı Revānī ḳāḍī
	b.	Müftīler daẖi bizüm ḥall idemez müşkilümüz

-148-

mefʿūlü fāʿilātü mefāʿīlü fāʿilün

1.	a.	Yā Rab ne derd olur ki işidmez niyāzumuz
	b.	Ġayrılar ile ṣalınur ol serv·i nāzumuz

2.	a.	Baş ḳoyup ayaġ içdügümi ʿayb eyleme
	b.	Zāhid ezelde böyle imiş başda yazumuz

3.	a.	Uyup imāma sen daẖi ṭaʿn eyleme igen
	b.	Ṣōfī bizüm de var ola vird ü namāzumuz

4.	a.	Bir būseñ ile aġzumı ṭut dōstum benüm
	b.	Söyletme tā ki açıla dildeki rāzumuz

5.	a.	Nāz itme göñlüm almada ey cevri çoḳ didüm
	b.	Güldi didi Revānī geçer saña nāzumuz

-149-

mefʿūlü fāʿilātü mefāʿīlü fāʿilün

1.	a.	Dāyim raḳībe ʿizzet ider ol nigārumuz
	b.	Bir itce yoḳ yanında bizüm iʿtibārumuz

2.	a.	Gül-ruẖlarında ẖāl·i siyāhın görüp didüm
	b.	Bir dānedür güzeller içinde nigārumuz

3.	a.	Bülbül gibi kim aġlar idi āh u zār ile
	b.	Gül gibi yüze gülmese ol gül-ʿiẕārumuz

4.	a.	Dil şīşesin ṣımazduñ urup seng·i cevr ile
	b.	Ḫoş gelmeseydi saña bizüm inkisārumuz

5.	a.	Her dem Revānī āh idelüm derde çāre yoḳ
	b.	Çün böyle gösterür bize bu rūzgārumuz

-150-

fāʿilātün fāʿilātün fāʿilātün fāʿilün

1.	a.	Olımaz her dem göñül şol laʿl·i āteştābsuz
	b.	Etsüz etmeksüz olur olmaz şarāb·ı nābsuz

2.	a.	Tāb·ı ruẖsāruñla dil zülfüñde seyr itse ne‿ola
	b.	Gicenüñ seyrānı olmaz dōstum mehtābsuz

3.	a.	Meclis·i ʿuşşāḳa cām·ı mey durur zīnet viren
	b.	Būstānuñ revnaḳı olmaz igen dōlābsuz

4.	a.	Gözine ʿālem ḳarañudur güzelsüz ʿāşıḳuñ
	b.	Kişi dünyāyı ne‿ider ẖurşīd·i ʿālemtābsuz

5.	a.	Gözlerin yummaz kevākib nālişimden giceler
	b.	Ḳorḳarın ol meh-liḳā ḳaldı Revānī ẖᾱbsuz*

-151-

feʿilātün feʿilātün feʿilātün feʿilün

1.	a.	Ders·i ʿışḳ oldı göñül çünki bu gün meşġalemüz
	b.	Müftī·i şehr bizüm ḥall idemez mesˀelemüz

2.	a.	Baş açuḳ yalıñ ayaḳ bir bölük üftādelerüz
	b.	Yolumuz faḳr u fenā vādī·i ġam merḥalemüz

3.	a.	Nāfe gibi ne‿ola miskīnligi elden ḳomasa
	b.	Çünki ol zülf·i siyeh-pūşa çıḳar silsilemüz

4.	a.	Şehr·i ġam ẖᾱcesiyüz ʿışḳ metāʿı yükümüz
	b.	İremez kūy·ı fenā menziline ḳāfilemüz

5.	a.	Beglerüz devlet·i ʿışḳ ile Revānī zīrā
	b.	Giceler ṣubḥa degin māh yaḳar meşʿalemüz

-152-

feʿilātün feʿilātün feʿilātün feʿilün

1.	a.	Götürüp ayaġı ṣōfī biz azıtduḳ özümüz
	b.	Reh·i meyẖāne ye düşdük göremezler tozumuz*

2.	a.	Seni sāġar gibi her kişi ṭutup öpdügiçün
	b.	Sāḳıyā cürʿa gibi yerlere düşdi yüzümüz

3.	a.	Gül ü nergis gibi biz ṣoḥbeti terk idemezüz
	b.	Mey ü maḥbūb ile açıldı yüzümüz gözümüz

4.	a.	Sürevüz mi yüzümüz başmaġınuñ kebkebine
	b.	Kevkeb·i burc·ı saʿādet ola mı yılduzumuz*

5.	a.	Bezm·i ʿışḳuñda güneş sāḳi durur ay ḳadeh*
	b.	ʿAyş u ʿişretle geçüpdür gicemüz gündüzümüz*

6.	a.	Pend·i nāṣıḥla Revānī nice terk olına yār
	b.	Yardan mı atalum göz göre biz kendüzümüz

-153-

feʿilātün feʿilātün feʿilātün feʿilün

1.	a.	Āh kim göreli ol sāde-ʿiẕārı gözümüz
	b.	Levḥ·i dilden yuyamaz naḳş·ı nigārı gözümüz*

2.	a.	Yeridür yüzümüñ üstine baṣarsa ḳademin
	b.	Çünki gösterdi baña sevgülü yārı gözümüz

3.	a.	Görelüm nāme·i ḥüsnüñ berü gel yanumuza
	b.	Ki ıraḳdan göremez ẖaṭṭ·ı ġubārı gözümüz

4.	a.	Ḳış güninde bizi ẖalvetde gören ṣōfī ṣanur
	b.	Sāḳıyā görmeye mi tāze bahārı gözümüz

5.	a.	Ḳaldı yollarda Revānī atınuñ izi gibi*
	b.	Görmege bir daẖi ol şāhsüvārı gözümüz*

-154-

mefāʿīlün mefāʿīlün feʿūlün

1.	a.	Cemālin zeyn iden hep dilber olmaz
	b.	Her āyīne düzen İskender olmaz

2.	a.	Ruẖuñ devrinde ne‿eyler ẖaṭṭ·ı miskīn
	b.	Çü mülk·i Rūm içinde ʿanber olmaz

3.	a.	Ḳo ʿuşşāḳ içre olsun āh u nāle
	b.	Begüm ṭabl u ʿalemsüz leşker olmaz

4.	a.	ʿAceb ṣūret virür bezme mey·i nāb
	b.	Cihānda ancılayın cevher olmaz

5.	a.	Güzeller içre sen beglerbegisin
	b.	Mülāzım çaḳ ḳapuñda defter olmaz*

6.	a.	Revānīnüñ yazın dīvānını kim
	b.	Gül evrāḳı gibi ol ebter olmaz

-155-

feʿilātün feʿilātün feʿilātün feʿilün

1.	a.	Serv·i nāzum dil·i āşüfteme ḳılma daẖi nāz
	b.	Çün getürdi ayaġuñ ṭopraġına rūy·ı niyāz

2.	a.	Kaʿbe·i kūyı ṭavāfına ẖaṭı māniʿ olur
	b.	Ṣanki aʿrāb ile baġlandı yine rāh·ı Ḥicāz*

3.	a.	Çeşm ü ebrū ile ẖāl ü ẖaṭ u zülfüñ baña bes
	b.	Nitekim müˀmin olan kişiye beş vaḳt namāz*

4.	a.	Ruẖlaruñda güzelüm zülfüñi kesme uzasun
	b.	Cennet ehline naṣīb olur imiş ʿömr·i dırāz*

5.	a.	Ben seni sevdügümi kimseye hergiz dimedüm
	b.	Nedür illerde ʿaceb ḳıṣṣa·i Maḥmūd u Ayāz

6.	a.	Bu Revānī didügi tāze ġazeller saña mı
	b.	Sen misin şimdi güzeller arasında mümtāz

-156-

feʿilātün feʿilātün feʿilātün feʿilün

1.	a.	Ey göñül būse adın anmaġa döymez yüzümüz
	b.	Yār yanında iki olmaz iken bir sözümüz

2.	a.	Pīr olduġum içün ṣanma ki gözlük ṭutarın
	b.	Seni görmege begüm dört olupdur gözümüz

3.	a.	Nice baḳsun yüzüme ol ḳulaġı mengūşlu
	b.	Māh-rūlar arasında yoġ imiş yılduzumuz

4.	a.	Dāyimā dilkülenüp yāra uyuzlanma raḳīb
	b.	Çıḳarur ḳurdeşeni her ki baṣarsa izümüz

5.	a.	Yüzi gün alnı ḳamer yārı Revānī seveli
	b.	Āh u vāh ile geçüpdür gicemüz gündüzümüz

-157-

feʿilātün feʿilātün feʿilātün feʿilün

1.	a.	Āh kim dil gibi āvāre vü bīkār olmaz
	b.	ʿIşḳ yolında anuñ gibi cigerdār olmaz

2.	a.	Ur cefā ṭaşların sīneme yap göñlüm evin
	b.	Çü bilürsin yalıñuz ṭaş ile dīvār olmaz

3.	a.	Şeş-der·i ġamda ḳalup bulmayalar hīç güşād
	b.	Dōstlar nerd·i maḥabbetde şu kim zār olmaz

4.	a.	Beni menʿ eyleme ṣōfī ḳo güzel sevmekden
	b.	Bu ḳadar nesne ile kişi günehkār olmaz

5.	a.	Fāyide idemedüm saña göñül virmekden
	b.	Gerçi dirler güzelüm dōst ziyānkār olmaz

6.	a.	Nāme·i şiʿr·i Revānī yetişür şīrīnlik*
	b.	Hīç nāz ehline anuñ gibi ṭūmār olmaz

-158-

mefʿūlü fāʿilātü mefāʿīlü fāʿilün

1.	a.	Şōfī ṣanur ki meykedede biz gedālaruz
	b.	Mey devletinde beglik ider pādişālaruz

2.	a.	Bir barmaġ ile oynaduruz çarẖ kāsesin
	b.	Ḫumẖāne gūşesinde yatur bī-nevālaruz

3.	a.	İki cihānı bir güzele ṣatmışuz bu gün
	b.	Zāhid ṣanur ki kendü gibi pārsālaruz

4.	a.	Çeşmi belā vü zülfi belā ḳāmeti belā
	b.	Bunuñ gibi belālara biz mübtelālaruz*

5.	a.	Didüm ki şimdi cān ile kimdür seni seven
	b.	Didi Revānīyi bilürüz āşinālaruz

-159-

mefāʿīlün mefāʿīlün feʿūlün

1.	a.	Güzeller olımazlarmış ġazelsüz
	b.	Ya şāʿir olıbilür mi güzelsüz

2.	a.	Dögünüp aġlamaḳdan nergis ü gül
	b.	Ḳapuñda kimi gözsüz kimi elsüz

3.	a.	Maḥalleñde ne var ḥālümi ṣorsañ
	b.	Yaraşmaz söz ki söylene maḥalsüz

4.	a.	Ölem dirdüm ẖaṭ·ı yārı görince
	b.	Kimesne ölmez imiş hīç ecelsüz

5.	a.	Felek çīnīsine altun ezer gün
	b.	Ki yazılmaz Revānī şiʿr ḥalsüz

-160-

fāʿilātün fāʿilātün fāʿilātün fāʿilün

1.	a.	ʿArż·ı ḥüsn itdükce dilber ḳılma ey zāhid niyāz
	b.	Gün ṭoġarken çün bilürsin bāṭıl olduġın namāz*

2.	a.	Çārdeh-sāle güzel sev mey içüp biñler yaşa
	b.	Ey göñül Āb·ı Ḥayāt içen bulur ʿömr·i dırāz*

3.	a.	Aldanursız baḳmañuz bāzīçesine ʿālemüñ
	b.	Mühreler olmışdur ay u gün felek bir ḥoḳḳabāz

4.	a.	Oḳumış yazmış kitāb·ı nāzı şimdi dilberüñ
	b.	Ṣanʿatı şīve durur işi güci ʿuşşāḳa nāz

5.	a.	Oḳuyup ḥaẓẓ eylesünler ʿāşıḳ·ı şūrīdeler
	b.	Ḫūblar vaṣfın Revānī defter ü dīvāna yaz

-161-

feʿilātün feʿilātün feʿilātün feʿilün

1.	a.	Dāyimā olsa muṣāḥib ne‿ola dildāra ḳopuz
	b.	Her ne ḳıldan çalar ise uyar ol yāra ḳopuz

2.	a.	Ey ṭabīb·i dil ü cān nabżını ṭut ḥālini ṣor
	b.	İñiler ẖaste olup derd ile bī-çāre ḳopuz

3.	a.	ʿĀşıḳuñ gibi döger dāyireden gögsini def
	b.	Her ne dem cevrüñ elinden ki gele zāra ḳopuz

4.	a.	Düşürüp kendü hevāsına igen yeltemesün
	b.	Ḳıldı ol yār·ı ḳamer-çihreyi āvāre ḳopuz*

5.	a.	Yalvarup gāh elin gāh dizin öpmez idi
	b.	ʿĀşıḳ olmasa Revānī o cefākāra ḳopuz

-162-

feʿilātün feʿilātün feʿilātün feʿilün

1.	a.	Sāḳıyā leblerüñe olduġıçün nisbetümüz
	b.	Geçdi cām·ı mey ile döne döne ṣoḥbetümüz

2.	a.	Ad içün cām·ı meyi ḳomazuz elden sāḳī
	b.	Yoḳ mıdur Cemce cihān içre bizüm ġayretümüz*

3.	a.	Bir güler yüzlü yüzi ṣulu güzeldür sāġar
	b.	Aña baş ḳoşmaġ ile artuḳ olur ḥörmetümüz*

4.	a.	Gerçi bir Yūsufa ḳul oldı göñül sulṭāndur
	b.	Ṣatun almadı ne bilsün o bizüm ḳıymetümüz*

5.	a.	Mey gibi ḳalduḳ ayaḳlarda Revānī ḥayfā
	b.	Sāḳi·i ġonca-dehen bilmedi keyfiyyetümüz

-163-

mefʿūlü mefāʿīlü mefāʿīlü feʿūlün

1.	a.	Ḳand·i lebüñüñ vaṣfına çün başlaruz biz
	b.	Ṭūṭī gibi gūyā ki şeker-pāşlaruz biz

2.	a.	Ḥüsnüñ gülinüñ tāze bahārına çün irdük
	b.	Bülbül gibi medḥ oḳımaġa başlaruz biz

3.	a.	Taṣvīr iderüz her ṣanemüñ ḥüsnini dilde
	b.	Āyīneye naḳş idici naḳḳāşlaruz biz*

4.	a.	ʿIşḳuñda bizi ṣanma ki cān ṣaḳınur ey dōst
	b.	Bu yolda baş oynar niçe yoldaşlaruz biz*

5.	a.	Leylā·yı cemālüñ bizi dīvāne idelden
	b.	Mecnūn·ı ġam-endūz ile adaşlaruz biz*

6.	a.	Yanuñdan acı söz ile aġyārı ḳaçurduḳ
	b.	Şeyṭānı melekle göricek ṭaşlaruz biz*

7.	a.	Yār oldı Revānī bize bu derd ü ġam·ı ʿışḳ*
	b.	Ṣanki bile ṭoġmış iki ḳardaşlaruz biz*

-164-

feʿilātün feʿilātün feʿilātün feʿilün

1.	a.	Çoḳ günāh itdi göñül ẖıdmete cānā varamaz
	b.	ʿAfv it anuñ ṣuçını kim utanur yalvaramaz

2.	a.	Bāġ·ı ʿışḳuña şu kim bir gül içün baṣdı ḳadem
	b.	Hergiz ol ẖār·ı belādan etegin ḳurtaramaz

3.	a.	Vaṣl ile eyle devā derdüme çāreñ var ise
	b.	Ḫaste·i hecr olana ġayrı müdāvā yaramaz

4.	a.	Beñzedem diyü felek gün yüzüñe ayı her ay
	b.	Niçe kim bozar u düzer yine ṣūret viremez

5.	a.	Var mı bir gün ki‿ayaġuñ öpmege ẖurşīd·i felek
	b.	Gökden irüp yere sen māh-liḳāyı aramaz

6.	a.	Ḥüsn daʿvāsın idüp gerçi gelür ḳarşuña māh
	b.	Gün yüzüñi göricek yine berāber ṭuramaz

7.	a.	İʿtiẕār eyle Revānī der·i yāra yüri var
	b.	Her kim eksüklügini bilmez aña yol varamaz

SĪN

-165-

mefʿūlü fāʿilātün mefʿūlü fāʿilātün

1.	a.	Bulmaz iken şarāba fetvāyı ehl·i meclis
	b.	Ḥikmet nedür ki içer müftī ile müderris

2.	a.	Cām·ı şarābı zāhid ẕemm eylese ʿaceb mi
	b.	Baʿżī kimesne söyler ne bulsa raṭb ü yābis

3.	a.	Meyẖāne ye düşürdi niçeyi şevḳ·ı laʿlüñ
	b.	Çoḳ ẖᾱceyi cihānda ḳıldı şarāb müflis

4.	a.	Ḫalvet-sarāy·ı cānı cām ile ḳıldı rūşen
	b.	Her kim esās·ı ʿayşa oldı ise mühendis

5.	a.	Yāruñ ẖayāli gitmez gözden Revāni hergiz
	b.	Baʿżī perī ʿaceb mi insāna olsa mūnis

-166-

mefāʿilün feʿilātün mefāʿilün feʿilün

1.	a.	ʿAceb mi pīr·i muġāndan görürse ʿizzeti nās
	b.	Bilür maḳādir·i nāsı ḥarīf·i ḳadr-şinās

2.	a.	Firāḳ u hecrüñe düşdümse ey lebi tiryāḳ
	b.	İçürdi yine felek baña zehrini ṭās ṭās*

3.	a.	Ḳabā·yı medḥ biç ey dil sen ol gül-endāma
	b.	Güzellere yaraşur geyse tāze tāze libās

4.	a.	Libās·ı fāẖıri ne‿eyler ʿabā·yı faḳr geyen
	b.	Ḥarīr üstine lāyıḳ degül kim ola pelās

5.	a.	Revāni bendeñe yoḳ dime būseñi luṭf it
	b.	Şeh·i zamāne yaraşmaz ki ʿarż ide iflās

ŞĪN

-167-

fāʿilātün fāʿilātün fāʿilātün fāʿilün

1.	a.	Gözlerüñe ādem öldürmek ezelden ẖū imiş
	b.	Ṣormadan bildüm behey ẓālim lebüñ ḳanlu imiş

2.	a.	Dāyim ögerdüñ baña bir ḳaşı gözi ḳarayı
	b.	Bildüm ey dil ol siyeh-çeşm ü hilāl-ebrū imiş

3.	a.	Ay olur kim ẖāṭırum ṣormaġa da gelmez göñül
	b.	Şimdi bildüm kim muṣāḥib aña bir meh-rū imiş

4.	a.	Leblerüñe ḳarşu bezmüñde ezilür dōstum
	b.	Şekkerüñ vaṣfın işidürdük igen ṭatlu imiş

5.	a.	Gördügi her serve māyildür Revānī göñlümüz
	b.	Bu göñül diyen ḥaḳīḳatde bir aḳar ṣu imiş

-168-

fāʿilātün fāʿilātün fāʿilātün fāʿilün

1.	a.	Şol ki bir meh-rū işiginde yüzin pāk eylemiş
	b.	Gün gibi rifʿatde olsun yirin eflāk eylemiş*

2.	a.	Zehr·i ġam defʿine sāḳī gibi olmaya ṭabīb
	b.	Kim şarābı ḥoḳḳa·i sāġarda tiryāk eylemiş

3.	a.	Serv-ḳadler yolına her kim sürindi ṣu gibi
	b.	Yüzi aġ olsun anuñ kim yolını pāk eylemiş

4.	a.	Müddeʿīler içre ḳalmış gülşen·i kūyıñda dil
	b.	Āşiyānın ṣanma bülbül ẖār u ẖāşāk eylemiş

5.	a.	Sīnesi dāġın Revānī lāle-veş ʿarż itmege
	b.	Germ olup gül meclisinde yaḳasın çāk eylemiş

-169-

feʿilātün feʿilātün feʿilātün feʿilün

1.	a.	Şol ḥarāmī gözüñ ile idemez kimse ṣavaş
	b.	ʿIşḳ yolında begüm bir pula olur biñ baş

2.	a.	Bir ayaḳ ṣunsa baña meclis içinde sāḳī
	b.	Çıḳışurdum ġam·ı devrān ile ben de başa baş

3.	a.	Yine bir Yūsuf·ı gül-çihreye ḳul oldı göñül
	b.	ʿIşḳ ʿālemde ʿaceb nesne olurmış ḳardaş

4.	a.	Ṭālib olsam ne‿ola cān ile miyānuña senüñ
	b.	Çünki bāzār·ı cihānda ṣatılur ince ḳumāş

5.	a.	Ṭaġıdursa ne‿ola ger zühd metāʿın ṣōfī
	b.	Ḥüsn sermāyesi çün oldı Revānī göz ü ḳaş

-170-

mefāʿīlün mefāʿīlün mefāʿīlün mefāʿīlün

1.	a.	Ezel ṣubḥında ki‿āhumdan yaḳupdur āsumān āteş
	b.	Ebed şāmına dek her dem yaḳar andan cihān āteş

2.	a.	Göñülde şöyle germ oldı bu ʿışḳuñ odı kim her dem
	b.	Şirār·ı nār·ı āhumdan yaḳar bu āsumān āteş

3.	a.	Ne‿ola ger şemʿ·i ẖaddüñde belürse ẖaṭṭ·ı şīrīnüñ
	b.	Ki rūşendür bu kim olmaz cihānda bī-duẖān āteş

4.	a.	Göñülde nār·ı ʿışḳuñı bu āhumdan ḳıl istidlāl
	b.	Ki her yerde duẖān olsa olur hem bī-gümān āteş

5.	a.	Ḫayāli şevḳı geldükce göñülde sūzum artarsa
	b.	Ne‿ola çün menzile irse yaḳar her kārbān āteş

6.	a.	Zülāl·i vaṣl ile defʿ it bu sūz·ı āhumı yoẖsa
	b.	Yaḳup şehri vü kūyuña irişür nāgehān āteş

7.	a.	Didüm çün āteş·i sīnem yaḳarsın bārī cān alma
	b.	Didi külẖānda yaḳılmaz Revānī rāygān āteş

-171-

mefāʿīlün mefāʿīlün mefāʿīlün mefāʿīlün

1.	a.	Düşürdüñ cāna ʿışḳuñdan çün ey nāmihrbān āteş
	b.	Ṣaḳın bu odlu āhumdan ṭutar mülk·i cihān āteş

2.	a.	Benüm āh itdügüm görüp o dilber egdi ebrūsın
	b.	Olurdı rāst gerçi kim ḳaçan görse kemān āteş

3.	a.	Ḳaçan āh eylesem mihrüñ göñülde artar ey meh-rū
	b.	Belī bād ile olurmış ziyāde her zamān āteş

4.	a.	Meger bir şemʿ·i kāfūrī durur engüşti dildāruñ
	b.	Ki‿ucında naḳş·ı ḥınnādan olur geh geh ʿayān āteş

5.	a.	Revānī ẖaṭṭ·ı şiʿrümle görinür sözümüñ sūzı
	b.	Ḫilāf·ı ʿādedür zīrā ki olmaz bī-duẖān āteş

-172-

mefʿūlü fāʿilātü mefāʿīlü fāʿilün

1.	a.	Sāḳī ṣun ayaġı olalum biz de bāde-nūş
	b.	Ġamgīn olanlaruñ çü şarāb ile başı ẖoş

2.	a.	Bülbülden añlayımaya ʿışḳuñ rumūzını
	b.	Gül gibi başdan ayaġa her kim degülse gūş

3.	a.	Ṣōfī cihānda ẖaylī ululuḳ degül mi kim*
	b.	Ayaġın öpdürür gelene pīr·i mey- fürūş

4.	a.	Artar maḥabbetüm lebüñ emdükce sevdügüm
	b.	Zīrā şarāb·ı nāb ile olur ziyāde cūş

5.	a.	Ḳanlu mı oldı bir ṭolu içdi ise saña
	b.	Sāḳī Revāni bendeñ ile gel öpüş ḳucuş

-173-

feʿilātün feʿilātün feʿilātün feʿilün

1.	a.	Gör gör ol serv·i ḳabā-pūşı ne raʿnā olmış
	b.	Tāze ġoncaydı açılmış gül·i raʿnā olmış

2.	a.	Daẖi şeftālūları gelmemiş iken aġıza
	b.	Bāġ·ı ḥüsninde yetişmiş lebi ḥalvā olmış

3.	a.	Gün yüzinde görinen bu nice ẖaṭdur nice ẖāl*
	b.	Fitne·i devr·i ḳamer āfet·i dünyā olmış

4.	a.	Şehr içinde nice barmaġ ile göstermeyeler
	b.	Ġurre·i māh gibi ḳaşları ġarrā olmış

5.	a.	Yine bir lāle-ruẖı sevdi Revānī yeñile
	b.	Yine bir tāze güle bülbül·i gūyā olmış

ṢĀD

-174-

mefāʿilün feʿilātün mefāʿilün feʿilün

1.	a.	Esīr·i bend·i ġam oldum ʿaceb bulam mı ẖalāṣ
	b.	Çün oldı yār yanında raḳīb ẖāṣü'l-ẖāṣ

2.	a.	Kitāb·ı ʿışḳuñ içün cenge düşdi cān ile dil
	b.	Mes̲el durur bu ki el-ḳāṣu lā-yuḥibbu'l-ḳāṣ

3.	a.	Görinen ay ile gün mi ya bezm·i ḥüsnüñde
	b.	İki def almış eline felek olup raḳḳāṣ

4.	a.	Ḳalurdı tīr gibi aġzın açuban ḥayrān
	b.	Göreydi bir kez elinde ḳaşı yayın vaḳḳāṣ

5.	a.	Revānī derd ü belāsını dilberüñ ẖoş gör
	b.	İki ġarīb yetīmi alup da baġruña baṣ

ṬĀ

-175-

mefʿūlü fāʿilātü mefāʿīlü fāʿilün

1.	a.	Devr·i ruẖuñda olalıdan āşikār ẖaṭ
	b.	Dercinde göñlümüñ yazulupdur ġubār ẖaṭ

2.	a.	Reyḥāncıdur ki deste·i sünbül götürmeden
	b.	Bezm·i ruẖuñda derlemiş ey gül-ʿiẕār ẖaṭ

3.	a.	Ṭoz ḳonduġını üstine dil istemezdi āh
	b.	Şimdi ruẖuñda ḳıldı ne‿idem kim ḳarār ẖaṭ

4.	a.	Ḫaṭṭuñı beñlerüñ ne ʿaceb rūşen eylese
	b.	Çün noḳṭalarla rūşen olur ey nigār ẖaṭ

5.	a.	Yāruñ Revānī meşk·i ẖaṭın ṣaḳla cānda kim
	b.	Ehl·i ḳalem içinde olur yādigār ẖaṭ

-176-

fāʿilātün fāʿilātün fāʿilātün fāʿilün

1.	a.	Ol dehān u ẖāl·i müşkīnüñden ey dil ġalaṭ
	b.	Ḥarf·i mīm üstinde zīrā nuḳṭa ḳomaz ehl·i ẖaṭ

2.	a.	Levḥ·i ruẖsāruñda ḳaşuñ ẖaṭṭı māh üstinde med
	b.	Beñlerüñ şekli yüzüñde āfitāb üzre noḳaṭ

3.	a.	Ḫayr umarsañ gel miyān·ı cān u dilde ḳıl vaṭan
	b.	Kim buyurmışdur Nebī lā-ẖayre illā fi'l-vasaṭ

4.	a.	Ṣafḥa·i ḥüsnüñde şekli zülfüñ ey yāḳūt-leb
	b.	Ḳayd·ı ṣaḥḥ·ı nüsẖa mı geh gāh dil eyler ġalaṭ

5.	a.	Ḥasret·i Baġdād·ı ḥüsnüñden eyā serv·i revān
	b.	Dicle·i eşki Revānīnüñ revāndur hemçü Şaṭ

ʿAYN

-177-

feʿilātün feʿilātün feʿilātün feʿilün

1.	a.	Ḳıldı ḥayrān göñül ol laʿl·i şeker-ẖāya ṭamaʿ
	b.	Döndi şol bengīye kim eyleye ḥalvāya ṭamaʿ

2.	a.	Bay u yoẖsul ḳamusı ḥüsnüñe ḥayrān olmış
	b.	Virdi vaṣluñ güzelüm götüri dünyāya ṭamaʿ

3.	a.	Puẖteler ẖām didiler yine ṣoḥbetde meye
	b.	Rindler eylediler cām·ı muṣaffāya ṭamaʿ

4.	a.	Od ḳomazdı bu göñül ẖānesine şevḳ·ı nigār
	b.	Göz göre eylemese gözleri yaġmaya ṭamaʿ

5.	a.	Cān virür laʿl·i lebin görse Revānī göñlüm
	b.	Ḫᾱcedür ṣankim ider ʿanber·i sārāya ṭamaʿ

ĠAYN

-178-

fāʿilātün fāʿilātün fāʿilātün fāʿilün

1.	a.	Nevbahār oldı bezendi lālelerle ṣaḥn·ı bāġ*
	b.	Döndi şol abdāla kim gögsinde yer yer ola dāġ

2.	a.	Nice oda yanmasun ʿāşıḳ gibi pervāne kim
	b.	Māh-ṭalʿat serv-ḳāmet ẖūba dönmişdür çerāġ

3.	a.	Görinür gülşen cehennem odlu egsi şāẖ·ı gül
	b.	Ey yüzi cennet ḳaçan sensüz ki‿idem gül-geşt·i bāġ

4.	a.	Diyemez bir kimse saña gün gibi hercāyīsin
	b.	Ḥamdü li'llāh māh gibi alnuñ açuḳ yüzüñ aġ

5.	a.	Nice yād itsün Revānī sāde pehlūyı saña
	b.	Bende·i muḳbil efendisiyle ḳılmaz çünki lāġ

-179-

fāʿilātün fāʿilātün fāʿilātün fāʿilün

1.	a.	Olımaz kūy·ı muġāndan hīç fenā ehli ıraġ
	b.	Mest olana gūşe·i meyẖāne olurmış yataġ

2.	a.	Pādişāhum maḥrem olsa bezm·i ʿālīye ne var
	b.	Ḫıdmetüñde gözi odlu ṭoġrı bendeñdür çerāġ*

3.	a.	Yanuña alduġına göñüllenüpdür sāḳıyā
	b.	Nice büyüklenmesün olmış ṣurāḥī pür-dimāġ

4.	a.	Vara mı mestüñ yolın hīç ṣōfi·i miskīn-ʿabā*
	b.	Kebk reftārın ḳaçan olur ki ide bile zāġ

5.	a.	Sīne·i pür-dāġa çekseydüm Revānī dilberi
	b.	Ol gül-endām ile olurdı baña dāġ üsti bāġ

FĀ

-180-

mefʿūlü fāʿilātü mefāʿīlü fāʿilün

1.	a.	Düşmiş ayaġuña deyer ey dilsitān zülf
	b.	Baş egmez idi kimseneye bir zamān zülf

2.	a.	Ḫaṭṭuñ berātı üzre yine ḥalḳa ḥalḳadur
	b.	Ṭāvūs ḳuyruġı aña urdı nişān·ı zülf*

3.	a.	Ṣōfīlıġ idemez ruẖuñ āşüftesi iken
	b.	İgen uzatmasun güzelüm ṭaylasān zülf

4.	a.	Bir gice yoḳ ki açmayalar dil dükānını
	b.	Bāzār·ı ḥüsne olalıdan pāsbān zülf

5.	a.	Boynuñ ḳulaġuñ öp beni yalvarur saña
	b.	Raḥm eyleyüp Revānīye ey dil-sitan zülf

-181-

fāʿilātün fāʿilātün fāʿilātün fāʿilün

1.	a.	ʿĀşıḳ olmışdur meger kim saña ey dildār def*
	b.	Dest·i cevrüñden ḳılur meclisde her dem zār def*

2.	a.	Bezm·i ġamda nālişin gūş itmek içün ʿāşıḳuñ
	b.	Başdan ayaġa ḳulaḳ olmışdur ey dildār def*

3.	a.	Yiridür muṭrib elinden yise dāyim silleler
	b.	Sırr·ı ʿışḳı eylemişdür ẖalḳa çün iẓhār def*

4.	a.	Sīm ile sen dilberi rām itmek içün kendüye
	b.	Dōstum yüz berkidüp olmış yine cerrār def*

5.	a.	Zühre germ olup felek üzre Revānī raḳṣ urur
	b.	Ṭutsa gün gibi ḳaçan kim ol ḳamer-ruẖsār def*

ḲĀF

-182-

feʿilātün feʿilātün feʿilātün feʿilün

1.	a.	Lāle-veş alma ele sāġarı yār olmayıcaḳ
	b.	Ḳılma ṣoḥbet hevesin tāze bahār olmayıcaḳ

2.	a.	Didi bir pīr baña içme güzellerle şarāb
	b.	Her dolu başına bir būse kinār olmayıcaḳ*

3.	a.	Zāhidā tevbeler olsun daẖi mey içmeyeyin
	b.	Sāḳi bir ġonca-dehen lāle ʿiẕār olmayıcaḳ

4.	a.	Ḳanını içmelüdür mey yerine şol kişinüñ
	b.	Heves·i ṣoḥbet ider sāḳi nigār olmayıcaḳ*

5.	a.	Yār göñlümde Revānī ḳomadı ṣabr u ḳarār
	b.	ʿĀşıḳ olan nice‿ider ṣabr u ḳarār olmayıcaḳ*

-183-

fāʿilātün fāʿilātün fāʿilātün fāʿilün

1.	a.	Her kimüñ dāyim elinde cām·ı cān-efzāsı yoḳ
	b.	Ḥükmi geçmez nāmeye beñzer ki‿anuñ ṭuġrāsı yoḳ

2.	a.	Şol ki cān virmez görüp laʿl·i leb·i şīrīnüñi
	b.	Gūyiyā ol bir ölüdür kim anuñ ḥalvāsı yoḳ

3.	a.	Olmaz imiş ey göñül gül defteri şīrāzesi
	b.	Ruẖlarında anuñ içün zülf·i misk-āsāsı yoḳ

4.	a.	Burc·ı ḥüsnüñ ey felek çün āfitābıdur ḥabīb
	b.	Yer yüzinüñ ṣanma kim mihr·i cihān-ārāsı yoḳ

5.	a.	Sen benüm cānum Revānīnüñ oḳı eşʿārını
	b.	Dimesünler kim anuñ ṭūṭī·i şekker-ẖāsı yoḳ

-184-

mefʿūlü fāʿilātün mefʿūlü fāʿilātün

1.	a.	Devr·i ruẖuñda lāle ḳaldurmasaydı sancaḳ
	b.	Ṭaḳmazdı aña hergiz yapraġı al bayraḳ

2.	a.	İnce bilüñle zülfüñ görmiş meger ki naḳḳāş*
	b.	Bir iplik üzre yazmış Rūmī ẖaṭāyī yapraḳ

3.	a.	Sözüm işit ṭolaşma ey şāne zülf·i yāra
	b.	Daẖi cihānda kimse baṣmadı aña barmaḳ

4.	a.	Her kişi bendesiyken taḥsīn zülfine kim
	b.	Miskīnligin ḳomadı ġāyetde göñli alçaḳ

5.	a.	Ġam baḥrine Revānī ġarḳ olur idük ammā
	b.	Sāḳī Ḫıżır yetişdi üstüme sürdi zevraḳ

-185-

mefʿūlü mefāʿīlü mefāʿīlü feʿūlün

1.	a.	Sen şāha yaraşur ḳul olursa dil·i ʿāşıḳ
	b.	Gerçi ki degüldür güzelüm ẖıdmete lāyıḳ

2.	a.	ʿĀşıḳlar içinde saña yer yoḳ yüri ṣōfī
	b.	Serẖoşlar arasında yaraşmaz ki‿ola ayıḳ

3.	a.	Biñ yara ile yāra göñül yarayımaduḳ
	b.	Dünyāda ele girmez imiş yār·ı muvāfıḳ

4.	a.	Dünyāyı ne‿ider ʿāşıḳ olan dilberi ister
	b.	Sālik gerek evvel kim ide terk·i ʿalāyıḳ*

5.	a.	Mey gibi Revānī ḳanı bir kāşif·i esrār
	b.	Sāġar gibi yā ḳanda olur bir gözi açıḳ*

-186-

mefāʿīlün mefāʿīlün mefāʿīlün mefāʿīlün

1.	a.	İşi ʿāşıḳlaruñ her laḥẓada ey dil niyāz ancaḳ
	b.	Velī nāz ehli içinde maḥabbet şimdi az ancaḳ

2.	a.	Bisāṭ·ı ḥüsn içinde cān u diller mühresin ḳapdı
	b.	Ne şīrīnkār olur aġzı nigāruñ ḥoḳḳabāz ancaḳ*

3.	a.	Benüm bir nāz ile göñlüm alup inkār ider şimdi
	b.	Cihān dilberleri içre bu da bir dil-nüvāz ancaḳ*

4.	a.	Şikāyet eyleme yāruñ görüp cevr ü cefāsını
	b.	Göñül nāzına ḳatlan kim o dilber ehl·i nāz ancaḳ*

5.	a.	Ne deñlü yüksek uçarsa göñül murġını ṣayd eyler
	b.	Hümāyūn zülfi dildāruñ Revānī şāhbāz ancaḳ

-187-

mefʿūlü fāʿilātü mefāʿīlü fāʿīlün

1.	a.	Bir bī-vefāyı sevdi göñül kim cefāsı çoḳ
	b.	Baḳmaz yüzine ʿāşıḳınuñ mübtelāsı çoḳ

2.	a.	Yād itmez oldı yār ḳadīmī bilişlerin
	b.	Hercāyī dilberüñ ne‿idelüm āşināsı çoḳ*

3.	a.	Almaz güzeller aylaġa da şimdi göñlümi
	b.	Āvāredür diyü gören aydur bahāsı çoḳ

4.	a.	Devr·i ruẖında ẖāl ü ẖaṭı seyrin idelüm
	b.	Rūmili gibi yer mi olur dilrübāsı çoḳ*

5.	a.	Aġlar Revānī gördügi maḥbūba ḥālini
	b.	Şol serv-ḳad güzeller ile mācerāsı çoḳ

-188-

mefāʿīlün mefāʿīlün mefāʿīlün mefāʿīlün

1.	a.	Benüm sāġar gibi sīmīn-beden gül yüzlü yārum yoḳ
	b.	Ṣurāḥī gibi bir ṣāfī göñüllü rāzdārum yoḳ

2.	a.	Elifle dāġ u naʿlümdür baña her gice hempehlū
	b.	Dimeñ bir serv-ḳad meh-rū hilāl-ebrū nigārum yoḳ

3.	a.	Ḳarār u ṣabrum ol dilber aluban şehrden gitdi*
	b.	Baña bir çāre eyleñ siz benüm ṣabr u ḳarārum yoḳ*

4.	a.	Beni ʿayb itme ey ṣōfī melāmet iẖtiyār itsem
	b.	İnan va'llāhi bi'llāhi elümde iẖtiyārum yoḳ

5.	a.	Şārab·ı şevḳle pürdür Revānī dil ṣurāḥīvār
	b.	Ṣınursa şīşe·i nāmūs hergiz inkisārum yoḳ

-189-

fāʿilātün fāʿilātün fāʿilātün fāʿilün

1.	a.	Burc·ı ḥüsnüñ ey felek mihr·i cihān-ārāsı çoḳ
	b.	Māhı şermende ḳılur maḥbūb·ı müstes̲nāsı çoḳ

2.	a.	Devlet·i ʿışḳuñda genc·i eşküme mālik durur
	b.	Mıṣr·ı ḥüsnüñde beñüñ bir ẖᾱcedür dünyāsı çoḳ

3.	a.	Götüri dünyāyı virdük biz şarāb u şāhide
	b.	Zāhidā bu ʿālemüñ gördük ḳuru ġavġāsı çoḳ

4.	a.	Gözlerümüz alacalansa temāşādan ne‿ola*
	b.	Bu cihān dilberlerinüñ gözleri alası çoḳ*

5.	a.	Leblerinüñ bir ṣulu şeftālusını görmedük
	b.	Hey Revānī ʿışḳ bāġınuñ hemān ayvāsı çoḳ*

-190-

mefʿūlü mefāʿīlü mefāʿīlü feʿūlün

1.	a.	Ḫᾱn·ı ġam ile eyledi dildār ḳonuḳluḳ
	b.	ʿĀşıḳlarını öldürüyor āh bu ṭoḳluḳ

2.	a.	Ṣōfīler ile ṣoḥbetümüz hīç alışmaz
	b.	Sāḳī bize elbette gerek başḳa ḳonuḳluḳ

3.	a.	Büyüklenemez ẕerreye ey ġonca dehānuñ
	b.	Gördüñ mi neler eyler imiş kişiye yoḳluḳ

4.	a.	Germiyyet·i meyde bize pend eyleme nāṣıḥ
	b.	Tā olmaya bezm ehli arasında ṣovuḳluḳ*

5.	a.	Ṭabʿuñ çü cilāsı mey·i nāb oldı Revānī
	b.	Ġamdan ne içün āyineñe ire ṭonuḳluḳ

-191-

mefʿūlü mefāʿīlü mefāʿīlü feʿūlün

1.	a.	Ey dil yaraşur şemʿ gibi sende yanıḳlıḳ
	b.	Zīrā ki yanıḳlıḳda olurmış uyanıḳlıḳ

2.	a.	Meygūn lebüñüñ şevḳı ile bezm·i ġamuñda
	b.	Dil gāh ṣurāḥīlıḳ ider gāh yatıḳlıḳ

3.	a.	Öykündügiçün ġonca leb·i dilbere bülbül
	b.	Hengāme·i gülşende virür ṣavt ile ṣıḳlıḳ

4.	a.	ʿĀşıḳ yüri var ḳayd·ı taʿalluḳdan elüñ çek
	b.	Beglik didügüñ var ise dünyāda ışıḳlıḳ

5.	a.	Dil serẖoş ola bengī ola saña ne ṣōfī
	b.	Aḳar ṣuda elbette bulınur bulanıḳlıḳ

6.	a.	ʿUşşāḳı ḳamu eyledi meyẖāne esīri
	b.	Dünyāyı yeder bir ḳıl ile vāy bu ıḳlıḳ

7.	a.	Biz cāna ḳıyar ʿāşıḳuz ol ġamze·i sermest
	b.	Göstermesün igende Revānīye ḳıyıḳlıḳ

-192-

fāʿilātün fāʿilātün fāʿilātün fāʿilün

1.	a.	Her kimüñ bir lāle-ruẖ ġonca-dehen dildārı yoḳ
	b.	Bir belālu bülbül·i şūrīdedür Gülzārı yoḳ

2.	a.	Ey göñül şol kimsenüñ yoḳ yerde gökde yılduzı*
	b.	Kim yanında bir güneş-ṭalʿat ḳamer-ruẖsārı yoḳ

3.	a.	Ḫᾱce·i Çīnüñ metāʿın almazam bir ḥabbeye
	b.	Kim anuñ ẖālüñ gibi bir nāfe·i tātārı yoḳ*

4.	a.	Göñli açılmaz yüzi gülmez perīşāndur şu kim
	b.	Bir lebi ġonca yüzi gül zülfi sünbül yārı yoḳ

5.	a.	Bāġ u bostān seyrini ḳılmaz Revānī ārzū
	b.	Her kimüñ bir lāle-ruẖ ġonca-dehen dildārı yoḳ

-193-

mefʿūlü mefāʿīlü mefāʿīlü feʿūlün

1.	a.	Sevdüm seni ey şūẖ·ı cihān hīç ẖaberüñ yoḳ
	b.	Ḳodum yanuña cān u cihān hīç ẖaberüñ yoḳ

2.	a.	Şīrīn lebüñüñ būsesin uyḳuda iken sen
	b.	Aldum hele ey ġonca-dehān hīç ẖaberüñ yoḳ

3.	a.	ʿAynumdan iki çeşme revān oldı ḳapuñda
	b.	Ayaġuña ey serv·i revān hīç ẖaberüñ yoḳ

4.	a.	Sen dilber·i şīrīn-dehene ʿāşıḳ olaldan
	b.	Bir birine düşdi dil ü cān hīç ẖaberüñ yoḳ

5.	a.	Yoluñda revān itdi Revānī dil ü cānı
	b.	Alındı saña şūẖ·ı cihān hīç ẖaberüñ yoḳ

KĀF

-194-

fāʿilātün fāʿilātün fāʿilātün fāʿilün

1.	a.	Sen kitāb·ı ʿışḳa göñlüm ḳurʿa·i fāl eyledüñ
	b.	İki bükdüñ ḳaddümi ol ḳurʿaya dāl eyledüñ

2.	a.	Bir kebūterdür hevāyī bu dil·i sergeşte kim
	b.	Gögsümüñ naʿlinden ayaġına ẖalẖāl eyledüñ*

3.	a.	Ḫᾱce·i Mıṣr·ı melāḥatsin sen ey Yūsuf-cemāl
	b.	Göñlümi bāzār·ı ʿışḳ içinde dellāl eyledüñ

4.	a.	Ṭolularla sāḳıyā mest eyledüñ ʿāşıḳları
	b.	Meclise güller ṣaçup bezm ehline āl eyledüñ

5.	a.	Naḳd·i eşʿāruñ Revānī sīm-veş ẖāliṣ durur
	b.	Pūte·i naẓmuñ içinde sen anı ḳāl eyledüñ*

6.	a.	Misk ü ʿanberle pür itdüñ ey ḳalem Rūm illerin
	b.	Nāmeler içinde çün vaṣf·ı ẖaṭ u ẖāl eyledüñ*

-195*

feʿilātün mefāʿilün feʿilün

1.	a.	Bize bir nāzenīn nigār gerek
	b.	Lebleri ġonca gül-ʿiẕār gerek

2.	a.	Tīrüñi cāndan isterem zīrā
	b.	Bize ey dōst ṭoġru yār gerek

3.	a.	Cān dimāġın muʿaṭṭar eylemege
	b.	Bize bir zülf·i müşk-bār gerek

4.	a.	Didüm āhum aña mı ol servi
	b.	Didiler aña rūzgār gerek

5.	a.	Bāġı ne‿eyler Revānī dilbersüz
	b.	Būstān seyrine bahār gerek

-196*

fāʿilātün fāʿilātün fāʿilātün fāʿilün

1.	a.	Būse ʿahdinde dil olsa ne‿ola ḥayrānuñ senüñ
	b.	Aġzına bal çaldı laʿl·i şekker-efşānuñ senüñ*

2.	a.	Sāḳıyā ṣunmaz mısın daẖi vefā peymānesin
	b.	Ḳanı ā ẓālim bizümle ʿahd ü peymānuñ senüñ

3.	a.	Ne‿ola ḳılsañ bendeñe yine cefā vü cevrüñi
	b.	Şimdi mi gördük efendi luṭfuñ iḥsānuñ senüñ

4.	a.	Ḥulle·i firdevsdür nāzük tenüñde pīrehen
	b.	Revzen·i cennetdür ey ḥūrī girībānuñ senüñ

5.	a.	Tīrüñ ucından enāre döndi göñlüm dōstum
	b.	Dānelerdür anda gūyā ḳanlu peykānuñ senüñ*

6.	a.	Sūz·ı eşʿāruñ Revānī yaḳdı ʿālem ẖalḳını
	b.	Oda yansun defter ü ṭūmār·ı dīvānuñ senüñ*

-197-

fāʿilātün fāʿilatün fāʿilātün fāʿilün

1.	a.	ʿĀşıḳı odlara yaḳar dilrübāsı Bursanuñ
	b.	Bilmeyenler ıssıdur dirler havāsı Bursanuñ*

2.	a.	Kendüzin yüksek ṭutar ẖurşīd·i ʿālemtābdan*
	b.	Yire inmez ne‿eyleyem her meh-liḳāsı Bursanuñ* *

3.	a.	Yaraya‿ibrīşim götürmez zülf·i dildārın görüp
	b.	Ḫᾱce·i ʿālem geçer her bir gedāsı Bursanuñ*

4.	a.	Göz ucıyle her hilāl-ebrūsı eyler merḥabā
	b.	Dōstlar ẖoşça gelür baña burası Bursanuñ*

5.	a.	Isıcaḳ yüz gösterüp öper ḳucar dilberleri
	b.	Rind·i ʿālemdür Revānī Ḳablucası Bursanuñ

-198-

mefʿūlü fāʿilatü mefāʿīlü fāʿilün

1.	a.	Ṭutdı cihānı yine cemāli benefşenüñ
	b.	Arturdı ḥüsnini ẖaṭ u ẖāli benefşenüñ*

2.	a.	Başına şeb-külāh urınur dilrübā gibi
	b.	Zīnet bulursa ne‿ola cemāli benefşenüñ*

3.	a.	Ṣaç yolmasını eyledi ṣaḥrāda ẖūblar
	b.	Ḳaldı ayaḳda nice‿ola ḥāli benefşenüñ

4.	a.	Gūyā ki lāciverde batılmış ḳalem durur
	b.	Gülzār ṣafḥasında mis̲āli benefşenüñ*

5.	a.	Şemʿ·i cemāl·i gülşene pervānedür meger
	b.	Kim yanmış odlara per ü bāli benefşenüñ*

6.	a.	Bir ayaġ üzre ẖıdmet ider ehl·i dillere
	b.	Budur kemāli dünye ṭuralı benefşenüñ*

7.	a.	Añma Revānī ẖaṭṭını seyr eyle ruẖların
	b.	Güller açıldı bitdi saḳalı benefşenüñ*

-199-

fāʿilātün fāʿilātün fāʿilātün fāʿilün

1.	a.	Var durur iller içinde adu ṣanı ẖātemüñ
	b.	Görinür alnında çün beglik nişānı ẖātemüñ*

2.	a.	Laʿlüñe yāḳūtuñ öykündügini işitmegin
	b.	Dōstum gülmekden egildi dehānı ẖātemüñ*

3.	a.	Ṣanma kim zeyn eylemiş durur anı yāḳūt·ı nāb
	b.	Ḫusrevā laʿlüñ görüp ḳurudı ḳanı ẖātemüñ*

4.	a.	Pūte·i ʿışḳ içre böyle cān eritmezdi eger
	b.	Olmasa ʿāşıḳ gibi derd·i nihānı ẖātemüñ

5.	a.	Elini öper gibi oldı ıṣırdı barmaġın
	b.	Var durur yār ile bir ḥāli Revānī ẖātemüñ*

-200-

feʿilātün mefāʿilün feʿilün

1.	a.	Şol güzelcük ne āfet olsa gerek
	b.	İrte bir gün ḳıyāmet olsa gerek

2.	a.	Sevdi ol bī-vefācuġı göñlüm
	b.	Ḫalḳ içinde melāmet olsa gerek

3.	a.	Tāzece ġoncadur açılmadı çaḳ
	b.	Yüzi gül serv-ḳāmet olsa gerek

4.	a.	Oġlan oyuncaġı olup göñlüm
	b.	İşi güci nedāmet olsa gerek

5.	a.	Ne‿ola ḳonuḳluḳ itse dilberler
	b.	Be Revānī żıyāfet olsa gerek

-201-

feʿilātün feʿilātün feʿilātün feʿilün

1.	a.	Didüm ey meh beni hecrüñde çoġ aġlatdı felek
	b.	Didi nāz ile geçen yaġmura ṭutma kepenek

2.	a.	Seni sevdügi günāh ise ṣuçın baġışla
	b.	Ḳıyma miskīn göñüle hāy dilek hāy dilek

3.	a.	Görmeyen tāze nihāli gül·i nesrīnler ile
	b.	Görsün ol şūẖı ḳaçan kim geyer altunlu benek

4.	a.	Ḳanuma ġamzelerüñ göz göre etmek ṭoġrar
	b.	Yoḳdur arada meger anuñ ile ḥaḳḳ·ı nemek

5.	a.	Gel begüm cān virelüm būseñe didügüm içün
	b.	Baña ol ġonca-dehen gitdi Revānī sögerek

-202-

feʿilātün feʿilātün feʿilātün feʿilün

1.	a.	Ḳāmetüñ ʿarʿarıdur zīneti ṣaḥn·ı çemenüñ
	b.	Ḫaṭ·ı sebzüñ durur ārāyişi berg·i semenüñ

2.	a.	Fāyide idemedi ḳılca ṭolaşup ṣaçuña
	b.	Kendüye ḳaldı yüze ḳarası misk·i Ḫotenüñ

3.	a.	Leb·i laʿlüñe nice öyküne kim bir būseñ
	b.	Ḳan bahāsı durur ey dōst ʿaḳīḳ·ı Yemenüñ

4.	a.	Ne ḳadar geldise ẖaṭ ʿārıżuña öykünmez
	b.	Gerçi kim āb·ı revān yüzi ṣuyıdur çemenüñ

5.	a.	Ḫoş ṣafā ile Revānī seni ḳucardı eger
	b.	Ey semen-ber aradan çıḳsa idi pīrehenüñ*

-203-

mefāʿīlün mefāʿīlün feʿūlün

1.	a.	Ḳaçan kim ey göñül sen yārı gördüñ
	b.	O gün ṣabrum metāʿın oda urduñ*

2.	a.	Benüm ʿarż itmedüñ ḥālümi yāra
	b.	Ne‿içün ey nāme sen kāġıda bürdüñ

3.	a.	Temāşā eyle ʿışḳuñ şāhbāzın
	b.	Göñül murġını çün aña uçurduñ

4.	a.	Degüldür tāb·ı mülden reng·i rūyuñ
	b.	Benüm ḳanum alup yüzüñe sürdüñ

5.	a.	Revānī şeyẖe nükteñ ṭuydı vāʿiẓ
	b.	Yine bir ṭaş ile iki ḳuş urduñ

-204-

mefʿūlü fāʿilātü mefāʿīlü fāʿilün

1.	a.	El ṣunmaz idi şol ruẖ·ı zībāya perçemüñ
	b.	Urmasa pençe ey yüzi gün aya perçemüñ

2.	a.	Muḥkem ṭarardı şāne ṣaçuñda bulup dili
	b.	Girmese luṭf idüp eger araya perçemüñ

3.	a.	Ṣalınduġınca serv gibi ditrer üstine*
	b.	ʿĀşıḳ olupdur ol ḳad·i raʿnāya perçemüñ*

4.	a.	Dīvāneñ olmış ol da ipin süriyüp yürür
	b.	Dönmiş cihānda ʿāşıḳ·ı şeydāya perçemüñ*

5.	a.	Yazuḳ degül midür ki Revānīye ṭolaşur
	b.	Her dem uyup o zülf·i semen-sāya perçemüñ*

-205-

fāʿilātün fāʿilātün fāʿilātün fāʿilün

1.	a.	Devr ider ẖurşīde beñzer gerdişi peymānenüñ
	b.	Ṣanasın ṣaḥn·ı felekdür gūşesi kāşānenüñ

2.	a.	Cengümüz var idi sāḳiyle öpüşdürdi hele
	b.	Yaşı çoġ olsun ki gördük eylügin peymānenüñ*

3.	a.	Virme pīş-ẖᾱn taẖtasın ey dil Süleymān taẖtına
	b.	Ḫātem·i cām ile çün sulṭānısın meyhānenüñ

4.	a.	Gerçi kim ṭāḳ·ı felekde şemselerdür ay u gün
	b.	Ṣaḳın aldanma göñül naḳşına bu vīrānenüñ

5.	a.	Ḳanı dökülsün Revānī öpdi laʿlin çünki cām
	b.	El uzatdı zülfüñe eli ḳurusun şānenüñ*

-206-

fāʿilātün fāʿilātün fāʿilātün fāʿilün

1.	a.	Olmasaydı Ṭāḳ·ı Kisrādan ferāġı lālenüñ
	b.	Gūşe·i ṣaḥrālar olmazdı yataġı lālenüñ*

2.	a.	Şimdi ṣaḥrā tekyedür ṣoḥbetcidür abdāllar
	b.	Sāḳıyā söyünmesün yanar çerāġı lālenüñ*

3.	a.	Ṣanasın Mecnūndur başında vardur āşiyān
	b.	Kim bu dem kühsār olmışdur ṭuraġı lālenüñ*

4.	a.	Ṣubḥ-dem mest avlayup ṣaḥrāda şebnem dişlemiş
	b.	Kim ḳızıl ḳanlara boyanmış ṭudaġı lālenüñ*

5.	a.	Ġonca-leblerle Revānī ḳomaz elden ayaġı
	b.	Düz baṣarsa ṣaḥn·ı gülşende ayaġı lālenüñ

-207-

mefʿūlü fāʿilātü mefāʿīlü fāʿilün

1.	a.	Ey dil yolında ölmege ġāyet güzel gerek
	b.	ʿÖmr·i ʿazīz gibi o bir bī-bedel gerek*

2.	a.	Çeşm ü dehān u zülfini terk idemez göñül
	b.	Zīrā bilür ki kişiye āẖır ʿamel gerek

3.	a.	İncinme būse añsa varup dil maḥalleñe
	b.	Dirler ki sözi añmaġa evvel maḥal gerek

4.	a.	Her kim ki irmek istese ḳaddüñle zülfüñe
	b.	ʿÖmr·i ṭavīl ile aña ṭūl·i emel gerek

5.	a.	Her gördügüñ ġazāleyi vaṣf it Revānī kim
	b.	ʿĀşıḳlara yaranmaġa ġarrā ġazel gerek*

-208-

feʿilātün feʿilātün feʿilātün feʿilün

1.	a.	Nāzı gerçi çoġ olur dilber·i ṭannāzlaruñ
	b.	Yaḳdı yandurdı beni āh senüñ nāzlaruñ

2.	a.	Māhiye aṣṣa ne‿ola göñlümi yüzüñde ṣaçuñ
	b.	Böyle rengīn mi olur tügmesi ḳazzāzlaruñ

3.	a.	Ṭurup otursa ne‿ola ʿāşıḳ ile dilberler
	b.	Ḫākden ḳaçması yoḳ serv·i serefrāzlaruñ

4.	a.	Ne‿ola her sīm-teni baġrına baṣṣa ʿāşıḳ
	b.	Var gögsinde gümiş ḥalḳası şehbāzlaruñ

5.	a.	Müşk ü ʿanber ẖaṭınuñ açdı Revānī sırrın
	b.	Gitmedi yüzi ḳaralıḳları ġammāzlaruñ

-209-

fāʿilātün fāʿilātün fāʿilātün fāʿilün

1.	a.	Yār hecrinden göñül ġamnāk ü cānum derdnāk
	b.	Sāḳıyā mey ṣun ki ben ġamdan helāk oldum helāk

2.	a.	Ṣanma vādīler durur ṣaḥrā yüzinde görinen
	b.	Yaḳasın ẓulmüñ elinden ḳıldı devrān çāk çāk

3.	a.	ʿIşḳdan dem urmasun dildāra ʿāşıḳ geçmesün
	b.	Her kimüñ kim ṣu gibi āyīnesi olmasa pāk

4.	a.	ʿIşḳ tīġinden yine ṭoġrandı baġrı ʿālemüñ
	b.	Gūşe·i ṣaḥrāda ṣanmañ lāleler bitürdi ẖāk

5.	a.	Uyẖudan uyanmayan şol ḳara baẖtumdur benüm
	b.	Görinür çünkim Revānī çeşm·i dilber ẖᾱbnāk

-210-

fāʿilātün fāʿilātün fāʿilātün fāʿilün

1.	a.	Ey göñül ġāyet ʿaẓīmü'ş-şāndur mīrüñ senüñ
	b.	Ḫıdmetinde olmasun bi'llāhi taḳṣīrüñ senüñ*

2.	a.	Cānuma cānlar baġışlar ṣarduġumca sīneme
	b.	Laʿl-leb gül-ruẖ ṣanemdür zaẖm·ı şemşīrüñ senüñ*

3.	a.	Nev-cuvān dilberlerüñ derdinden uṣanmaḳ neden
	b.	Böyle mi irşād idüpdür ey göñül pīrüñ senüñ*

4.	a.	Cāmiʿ·i ḥüsnüñde zeyn içün aṣılmış gūyiyā
	b.	Bir müşebbek ṭopdur zülf·i girihgīrüñ senüñ*

5.	a.	Ey kemān-ebrū ne‿ola cān virse ʿāşıḳ yolına
	b.	Bir müzellef serv-ḳad maḥbūbdur tīrüñ senüñ*

6.	a.	Maẖlaṣ·ı şiʿrüm gibi dillerde adum söylenür
	b.	Yazılur mecmūʿalarda şimdi taṣvīrüñ senüñ*

7.	a.	Ḥüsn ili dilberlerin ṣayd itmedür fikrüñ müdām
	b.	Ḫūbdur elḥaḳ Revānī ḥüsn·i tedbīrüñ senüñ*

-211-

feʿilātün feʿilātün feʿilātün feʿilün

1.	a.	Defʿ·i ġam itmege her laḥẓada peymāne gerek
	b.	Ṣōfiyā mescidi saña bize meyẖāne gerek*

2.	a.	Şemʿ·i ruẖsāruña ḳarşu yanalum yaḳılalum
	b.	Ḫıdmetinde güzelüm her kişi pervāne gerek*

3.	a.	Ḳullaruñ devlet·i ḥüsnüñde umar būselerüñ
	b.	Pādişāh olduñ efendi bize şükrāne gerek*

4.	a.	Murġ·ı dil degme güzel dāmına düşmez şimdi
	b.	Mis̲li olmaya cihānda aña bir dāne gerek

5.	a.	Ṣōfī ḥöcreñde şarāb olmayıcaḳ ne‿eyleyelüm
	b.	Pür-sebūlarla bize gūşe·i kāşāne gerek*

6.	a.	Sen perī-çihreye ḳul olsa Revānī yaraşur
	b.	Ḫıdmetüñ itmege anuñ gibi dīvāne gerek

-212-

mefāʿīlün mefāʿīlün mefāʿīlün mefāʿīlün

1.	a.	Göñülden gitmedi şevḳı nigāruñ ẕevḳı ṣahbānuñ
	b.	Mey ü maḥbūb olmasa nesi var idi dünyānuñ

2.	a.	Teferrücgāh idinsünler cemālüñi ḳo ʿāşıḳlar
	b.	Benüm çoḳ sevdügüm yoḳdur ziyānı çün temāşānuñ

3.	a.	Ala gözlüler alurlar benüm göñlümi virmezler*
	b.	ʿAcāyib memleket ancaḳ olupdur alan alanuñ

4.	a.	Şarāb·ı nāzdan mest·i ġurūr olsa ʿaceb mi yār
	b.	Cihān ḥayrānı olmışdur o ḥüsn·i ʿālem-ārānuñ*

5.	a.	Revānī gözleri yāruñ göñül mülkin ider tārāc
	b.	Ḥarāmīler bilür ḳadrin cihān içinde yaġmanuñ

-213-

fāʿilātün fāʿilātün fāʿilātün fāʿilün

1.	a.	ʿĀşıḳa seyr itmege bir ḳāmet·i bālā gerek
	b.	Ṣōfiyā dervīş olanuñ himmeti aʿlā gerek

2.	a.	Gördügüñ her bir ḳamer-ruẖsāra meyl itme göñül
	b.	Gün gibi dilber güzeller içre müstes̲nā gerek

3.	a.	ʿAḳla uyma sen göñül kim ʿışḳ yolında kişi
	b.	Vālih ü āşüfte vü şūrīde vü şeydā gerek

4.	a.	Cānum aġzuma gelür bir būseñ alınca didüm
	b.	Güldi dilber didi kim ḥāżır saña ḥalvā gerek

5.	a.	Sīm ü zer ister Revānī şimdiki maḥbūblar*
	b.	Ḫāṭır·ı ʿāşıḳ gerekmez anlara dünyā gerek

-214-

mefʿūlü fāʿilātü mefāʿīlü fāʿilün

1.	a.	Ḳıldı bahār bezmümüzi cām·ı lāle-reng
	b.	Sāḳī olalı ol yüzi gül serv-ḳad fireng

2.	a.	Baḳışlarıyle avladı dilberleri gözüñ
	b.	Āhūları şikār ider nitekim peleng

3.	a.	Aġlamaġ ile gitmedi dilden nuḳūş·ı ẖaṭ
	b.	Hīç refʿ olur mı āyineden yunmaġ ile jeng*

4.	a.	Meclisde utanup ḳızarur mıydı gül gibi
	b.	Sāḳī şarāb·ı nābdan almasa idi reng

5.	a.	İçer Revānī vāḳıf·ı ḥāl oluban müdām
	b.	Esrār·ı ʿışḳı ṭutamayup ṣōfi yir beng

-215-

feʿilātün feʿilātün feʿilātün feʿilün

1.	a.	Cām·ı mey göñlin açar ʿīdde üftādelerüñ*
	b.	Yine gün ṭoġdı bu gün başına dildādelerüñ*

2.	a.	Bezm·i meyden nice ẖālī olalum biz ṣōfī
	b.	Ḫoş ṭutar ehl·i dili ḥörmeti çün bādelerüñ*

3.	a.	Nice ḳul olmazuz ol serv·i ḳabā-pūşumuza
	b.	İşleri ʿışḳa esīr olmadur āzādelerün

4.	a.	Yār kāküllerini çeksün e ebrūlarına
	b.	Ḳıbleden yaña gerek yüzleri seccādelerüñ*

5.	a.	Ṣāh·ı ʿışḳam bu göñül şehri durur pāye·i taẖt
	b.	Ḳulı olalı Revānī yine begzādelerüñ

-216-

feʿilātün feʿilātün feʿilātün feʿilün

1.	a.	Ne ʿaceb gerdiş·i devrān ne ʿaceb devr·i felek
	b.	İki üç günde yele vardı otuz yıllıḳ emek*

2.	a.	Beni bir ehremene şimdi felek ḳıldı esīr
	b.	Ḳanı ol gün ki benüm ẖıdmetüm eylerdi melek

3.	a.	Niçe at niçe ḳatır yolda piyāde ḳaldum
	b.	Binecek olsa idi sāyesi yiterdi yedek*

4.	a.	Pāymāl itme piyāde ḳuluñ ey şāhsüvār
	b.	At başın çekerek hāy dilek hāy dilek

5.	a.	Aġlamaz hīç Revānī nemede girdügine
	b.	Yaġmuruñ defʿi içün vażʿ olınupdur kepenek*

-217-

fāʿilātün fāʿilātün fāʿilātün fāʿilün

1.	a.	Sīne naʿlin dāġlar ṭopına çevgān eyledüñ
	b.	Şehsüvārum gün gibi çün ʿazm·i meydān eyledüñ

2.	a.	Añladuñ sāḳī şarāb·ı ġam bizi itdi helāk
	b.	Hāy ẓālim hāy kāfir ne‿eyledüñ ḳan eyledüñ*

3.	a.	Yıḳdı göñlüm mülkini cevr·i firāvānuñ senüñ
	b.	Pādişāhum ẓulm ile bir şehri vīrān eyledüñ

4.	a.	Söylesün esrār·ı ʿışḳı ṣor göñül abdālına
	b.	Cürʿadān·ı şevḳden çün anı ḥayrān eyledüñ

5.	a.	Götüri dünyāya ḥükm itdüñ Revānī naẓm ile
	b.	Ḫātem·i şiʿri bu gün möhr·i Süleymān eyledüñ

-218-

feʿilātün feʿilātün feʿilātün feʿilün

1.	a.	Aḳdı ṣu gibi göñül ayaġına ol püserüñ
	b.	Cān u dilden ḳulıyuz ḥāṣılı ṣāḥib-naẓaruñ*

2.	a.	Bize şerbet olıcaḳ olsa mey·i nāb gibi
	b.	Yüri ey ẖᾱce yüri ṣuyını iç sen şekerüñ*

3.	a.	Ġāfil olmalu degül bende iken dişlerüñe
	b.	Boġazı iplü durur ẖurdesi çoḳdur güherün*

4.	a.	Kimseden sīm ü zerin hīç dirīġ itmez iken
	b.	İncelür diḳḳati bilüñe gelince kemerüñ*

5.	a.	Öykünüp yāra Revānī yalıñuz seyr eyler
	b.	Anuñ içün yüzi aġ alnı açuḳdur ḳamerüñ*

-219-

fāʿilātün fāʿilātün fāʿilātün fāʿilün

1.	a.	Ḥüsnüñ eyyāmında artar her günāhı göñlümüñ
	b.	Şol güzellik itdi aña yoḳ günāhı göñlümüñ*

2.	a.	Ḳāmet ü zülfüñ hevāsın eylemezdi murġ·ı cān
	b.	Şāẖ·ı Sidre olmasa pervāzgāhı göñlümüñ

3.	a.	Bu zeberced ṭāḳa ʿālemde binā urılmadın*
	b.	Āsitān·ı dōst olmışdı penāhı göñlümüñ*

4.	a.	Dūr olaldan āsitānından başı yaṣduḳdadur
	b.	Kimseye derdini virme yā İlāhī göñlümüñ

5.	a.	Ġayrı dilberler temāşāsın Revānī eylemez
	b.	Yāra olmışdur ezelde çün nigāhı göñlümüñ

-220-

fāʿilātün fāʿilātün fāʿilātün fāʿilün

1.	a.	Şevḳ·ı gülden oda yandı ẖānumānı bülbülüñ
	b.	Göklere irişdi bu gice fiġānı bülbülüñ

2.	a.	Bir avuc ẖākister olmış āteş·i gülden yanup
	b.	Ḳalayısar ʿāḳıbet nām u nişānı bülbülüñ

3.	a.	Beyża·i bülbül gibidür gülşen içre jāleler
	b.	Ġonca olmışdur meger kim āşiyānı bülbülüñ

4.	a.	Ḫārdan ẖançer çeküp ḳaṣd eylemiş gül bülbüle
	b.	Ḳalmamış ol ḳorḳudan beñzinde ḳanı bülbülüñ

5.	a.	Çıḳma gülşenden güzellerle Revānī dāyimā
	b.	Çün bahār irse gülistāndur mekānı bülbülüñ*

-221-

fāʿilātün fāʿilātün fāʿilātün fāʿilün

1.	a.	Mihr ü mehden ey perī zībā cemālüñ var senüñ
	b.	Gül yüzüñ üstinde çün iki hilālüñ var senüñ

2.	a.	İşigin terk eylemezsin her gün ey şems·i felek
	b.	Ol ḳamer yüzliyle beñzer bir zevālüñ var senüñ

3.	a.	Tāb·ı mülden gül gibi al olmış ey dilber yüzüñ
	b.	Kim bilür ʿāşıḳlara yine ne ālüñ var senüñ

4.	a.	Ḫurremem her dem dehān u ḳadd ü zülfüñ yād idüp
	b.	Ṭañ mıdur bu müflise dirlerse mālüñ var senüñ

5.	a.	Bezm·i ġamda her dem iñlersin Revānī ney gibi
	b.	Kimse bilmez meclis ehlinden ne ḥālüñ var senüñ

-222-

fāʿilātün fāʿilātün fāʿilātün fāʿilün

1.	a.	Göñlümi yıḳduñ yine cevr·i firāvān eyledüñ
	b.	Pādişāhum ẓulm ile bir şehri vīrān eyledüñ

2.	a.	Āh kim unutmışam añdurduñ ey ġam sen benüm
	b.	Fürḳatüñ yād eyleyüp ʿaḳlum perīşān eyledüñ

3.	a.	Ehl·i bezmüñ üstine açıldı cennet revzeni
	b.	Mest olup ey ḥūrī çün çāk·i girībān eyledüñ

4.	a.	Virdi būseñ ey ṭabīb·i cān dile tāze ḥayāt
	b.	Bir ölümlü ẖastenuñ derdine dermān eyledüñ

5.	a.	Bir cefāñ içün saña yüz biñ duʿā eyler göñül
	b.	Ol faḳīre dōstum luṭf itdüñ iḥsān eyledüñ

6.	a.	Çün yöñeldüñ kūy·ı dildāra Revānī seyr içün
	b.	Bülbül·i şūrīdesin ʿazm·i gülistān eyledüñ

-223-

feʿilātün feʿilātün feʿilātün feʿilün

1.	a.	Tīz idüp ẖançerini ẖışm ile çeşm·i siyehüñ
	b.	Āh kim dökse gerek ḳanını ben bī- günehüñ

2.	a.	Baña sen mehden eger mihr ü vefā olmaz ise
	b.	Yaḳaram āhum ile ẖırmenini ṣubḥgehüñ

3.	a.	Çünki mīm üstine hīç noḳṭa yazılmaz ṣanemā
	b.	Dehenüñ üzre nedür noḳṭa·i ẖāl·i siyehüñ

4.	a.	Beñzedürdüm ṣanemā ḥüsn ü cemālüñe eger
	b.	Olsa sīmīn ẕeḳan u ġonca lebi mihr ü mehüñ*

5.	a.	Aġlamaḳdan gözümüñ ḳalmaz idi nūr u feri
	b.	Geh geh irgürmese luṭf ile ṣabā gerd·i rehüñ*

6.	a.	Kendüzüñ cemʿ idüp ey dil ḳo bu āvāralıġı
	b.	Zülfin elden ḳoma kim ol durur ārāmgehüñ

7.	a.	Ben umardum ki ḳabūl eyleyesin ḳulluġa līk
	b.	Devletüm yoḳ kim olam bendesi sen pādişehüñ

8.	a.	Bunca yıldur ki Revānī işigüñde sürinür
	b.	Ne ʿacebdür kim aña olmadı hergiz nigehüñ

-224-

fāʿilātün fāʿilātün fāʿilātün fāʿilün

1.	a.	Gül yüzüñ ʿaksiyle sāḳī mey yüzi al eyledüñ
	b.	ʿAḳlumuz almaġ içün beñzer ki bir āl eyledüñ

2.	a.	Düşürüp mest ü ẖarāb itdüñ ḳamu bezm ehlini
	b.	Bādeye bi'llāh ne ḳatduñ böyle ḳattāl eyledüñ

3.	a.	Cām·ı gülgūnı elüñde sāḳıyā gören ṣanur
	b.	Āl ṭūṭīdür kim aña sīmden bāl eyledüñ

4.	a.	Mihr·i ruẖsāruñda ey meh ẓāhir olan noḳṭalar
	b.	Kevkeb·i seyyārelerdür kim adın ẖāl eyledüñ

5.	a.	Leblerüñ ẖaṭṭın berāt·ı ḥüsne ʿunvān ideli
	b.	Ḳaşlaruñ ṭuġrāsını menşūr·ı iḳbāl eyledüñ

6.	a.	Çeşm·i ẖūnrīzüñ siyāset itmege cellād-veş
	b.	Her müjeñ ẖançer idüp zülfüñi çengāl eyledüñ

7.	a.	Her gedāya baẖş idüp vaṣluñ niṣābın āh kim
	b.	Bu Revānī müteḥaḳḳa ne‿içün ihmāl eyledüñ

LĀM

-225-

feʿilātün feʿilātün feʿilātün feʿilün

1.	a.	Seni ẖalḳ içre ʿazīz itdi cemāl ile Cemīl
	b.	Beni ʿālemde ġam u derdüñ ile ḳıldı ẕelīl

2.	a.	Ben anuñ zülf·i dil-āvīzine dil virmez idüm
	b.	Yār ẖalḳ içre alup boynına olmasa kefīl

3.	a.	Ḫastedur çünki gözüñ nāzını artursa ne‿ola
	b.	Ṭıfluñ artar ṣanemā nāzı ḳaçan olsa ʿalīl*

4.	a.	Şemʿ·i serkeş dir isem ne‿ola o nāzük-bedene
	b.	Yüzidür şuʿle·i şemʿ ü ṣaçıdur aña fetīl

5.	a.	Reh·i kūyıñda Revānī aḳıdur gözyaşını
	b.	Kaʿbe yolındaġı saḳḳā gibidür ṣuyı sebīl*

-226-

feʿilātün feʿilātün feʿilātün feʿilün

1.	a.	Didiler kim şeker olur leb·i cānāna bedel
	b.	Hīç olur mı ki ola bir ḳurı ten cāna bedel*

2.	a.	Ben ṭururken diledüñ öldüresin aġyārı
	b.	Bir iş ancaḳ bu benüm begcegüzüm ḳana bedel

3.	a.	Gözi içdi bir avuc ḳanumı raḥm itdi nigār
	b.	Ṣundı bezm içre baña bir ṭolu peymāne bedel

4.	a.	Şol ḳadar urdı cefā tīrini ol ḳaşı kemān
	b.	Bāġ·ı sīnem pür olup oldı neyistāna bedel

5.	a.	Gülşen içinde Revānī nice gögsini gerer
	b.	Serv çün kim olımaz ḳāmet·i cānāna bedel

-227-

mefʿūlü fāʿilātü mefāʿīlü fāʿilün

1.	a.	Mercān lebüñle çünkim ider iftiẖār laʿl
	b.	Altuna ġarḳ olursa ne‿ola ey nigār laʿl

2.	a.	Ḳan aġlar idi leblerüñ içün benüm gibi
	b.	Ger ṭaş baġırlu olmasa ey gül-ʿiẕār laʿl

3.	a.	Tek sen bahā·yı leblerüñi laʿlden buyur
	b.	Ḳanlu yaşumla oldı benüm her diyār laʿl

4.	a.	Nāz eyledükce leblerüñi dişleseñ ne‿ola
	b.	Dürler içinde yaraşur ey şīvekār laʿl

5.	a.	Gördi Revānī lebleri vaṣfın nigārumuñ
	b.	Baş ḳodı pāy·ı naẓmuma bī-iẖtiyār laʿl*

6.	a.	Her beyti şiʿrümüñ lebi vaṣfında dilberüñ
	b.	Şol nāzenīne döndi ki gūşında var laʿl*

7.	a.	Vaṣf·ı lebüñde ben şu gedāyam ki ẖusrevā
	b.	Rengīn sözümden oldı benüm şermsār laʿl

-228-

fāʿilātün fāʿilātün fāʿilātün fāʿilün

1.	a.	Görinen gülşende şemʿ·i āteşīndür gül degül
	b.	Geşt iden eṭrāfını pervānedür bülbül degül

2.	a.	Her ne dem gitse baña āh itdürür ol serv·i nāz
	b.	Dūd·ı āhumdur ḳafāsında anuñ kākül degül

3.	a.	Kişver·i ḥüsn içre çoḳdur gerçi kim ṣāḥib-cemāl
	b.	Ol gül-endāmum gibi birisi de şengül degül

4.	a.	Ẓāhir olan āteş·i dilden ḥarāretdür müdām
	b.	Bezm·i ġamda sāḳıyā beñzüm ḳızardan mül degül

5.	a.	Şiʿrüñ içre sünbül ekmişsen Revānī dir gören
	b.	Kim bilür kim ḳanḳı ẖūbuñ zülfidür sünbül degül

-229-

feʿilātün feʿilātün feʿilātün feʿilün

1.	a.	Bezmümüz içre güzeller yine ḥavrā mı degül
	b.	Odamuz şimdi göñül Cennet·i Meˀvā mı degül

2.	a.	Zāhidā sāḳiye ḥavrā meye Kevs̲er dirler
	b.	Cennet esbābı bu dünyāda müheyyā mı degül*

3.	a.	Sāḳi başuma ḳıyāmet ḳoparursa ne ʿaceb
	b.	Ḳad·i bālāsı anuñ ġayret·i Ṭūbā mı degül

4.	a.	Ḳış güninde ne‿ola ger ʿayş·ı bahār eyler isek
	b.	Ġonca sāḳī gül·i ter cām·ı muṣaffā mı degül

5.	a.	Felege virme Revānī bu güzeller bezmin
	b.	Gözüñ aç meclisi gör evc·i S̲üreyyā mı degül

-230-

mefʿūlü fāʿilātü mefāʿīlü fāʿilün

1.	a.	Ḳaş ile göz esīri durur her zamān göñül
	b.	Miskīn göñül belālu göñül nātüvān göñül

2.	a.	Her gül yañaḳlu lāle-ruẖa mübtelā olup
	b.	ʿIşḳ āteşiyle odlara her dem yanan göñül

3.	a.	Sīne-be-sīne olmaġa saʿy eyle yār ile
	b.	Dünyāda ḳatmaġ ister iseñ cāna cān göñül

4.	a.	Aṣṣıya ḳaldı cān lebinüñ būsesine vir
	b.	Bāzār·ı ʿışḳ içinde görinmez ziyān göñül

5.	a.	Söyleşdürürse ol şeh·i ẖūbān ile seni
	b.	Neñ var Revānīye arada tercemān göñül

-231-

feʿilātün feʿilātün feʿilātün feʿilün

1.	a.	Giceler kūyuñı geşt itmegin ey mihr·i cemāl
	b.	Ayda bir ḳulb ṭaḳar māh·ı cihāntāba hilāl

2.	a.	Beni gūyā dehen ü ḳāmet ü zülfüñdür iden
	b.	Söyledür ḳanda olursa güzelüm kişiyi māl*

3.	a.	Göz olupdur seni seyr itmege şol ḥalḳa·i zülf
	b.	Kim aña merdümek olmış ruẖuñ üstindeki ẖāl*

4.	a.	Ḫūb-ṣūretler ile göñlümi tezyīn idüp
	b.	Çārsū·yı ġama aṣdum yine fānūs·ı ẖayāl*

5.	a.	Zülf·i dilber beni bir derde giriftār itdi
	b.	Ki benüm ḳāmetümi ḳıldı Revānī aña dāl*

-232-

* fāʿilātün fāʿilātün fāʿilātün fāʿilün

1.	a.	Gördi teşbīh olduġın ol ṭalʿat·i zībāya gül
	b.	Ḫoş ṣafālar sürdi şimdi geldi ṣan dünyāya gül

2.	a.	Sīnesinde dāġ·ı meh-rūlar ḳızıl güller yeter
	b.	Ṣunmañuz ḥācet degüldür ʿāşıḳ·ı şeydāya gül*

3.	a.	Ḥüsninüñ āşüftesidür her gedā vü her ġanī
	b.	Pādişāhum bir degül mi yoẖsul ile baya gül*

4.	a.	Mıṣr·ı ʿayşuñ ẖᾱcesi olsaḳ yaraşur sāḳıyā
	b.	Çün bize dükkān olupdur gülsitān sermāye gül*

5.	a.	Ehl·i maʿnādur Revānī kim ḳomaz mey ṣoḥbetin
	b.	Ṣūretā hem beñzemiş cām·ı feraḥ-efzāya gül*

-233-

fāʿilātün fāʿilātün fāʿilātün fāʿilün

1.	a.	Mübtelādur var ise bir ruẖları zībāya gül
	b.	Beñzemiş cāme-derīde ʿāşıḳ·ı şeydāya gül

2.	a.	Gülsitānda nice beñzer ey gül·i nāzük-beden
	b.	Cāme·i gülgūnuñ üzre görinen tamġaya gül*

3.	a.	Gökde istedügümüz yerde ele girdi bu gün
	b.	Çün kevākib şebnem olmış beñzemişdür aya gül

4.	a.	Ḥüsnüñüñ bāzārınuñ bir ṭablagerdānı iken
	b.	ʿAyş dükkānına virmişdür yine sermāye gül

5.	a.	Ḳāmetüñ vaṣfında ẕikr itdi Revānī ẖaddüñi
	b.	Virdi zīnet dōstum bu naẖl·i bezm-ārāya gül

-234-

mefʿūlü fāʿilātün mefʿūlü fāʿilātün

1.	a.	ʿİşret çemenlerinde olsam ʿaceb mi bülbül
	b.	Bir elde sāġar·ı mül bir elde deste·i gül

2.	a.	Rengīn ruẖuñdur iden ārāyişini çarẖuñ
	b.	Zīnet virür sifāle eks̲er ḳızıl ḳaranfül

3.	a.	Meygūn lebüñ ẖayāli geldi gözüme çünkim
	b.	ʿArż itmesün igende germiyyetin bize mül*

4.	a.	Bezm·i cemāl içinde şemʿ üzre dūda beñzer
	b.	Şol āteşīn ruẖuñda bu ʿanberīn kākül

5.	a.	İç gül gibi şarābı mest ol oḳı ġazeller
	b.	Gören disün Revānī olmış ḥarīf bülbül

-235-

fāʿilātün fāʿilātün fāʿilātün fāʿilün

1.	a.	Şāẖ·ı gülden yine almışdur eline ẖāme gül
	b.	Ġoncalardan yāra göndermek dilermiş nāme gül

2.	a.	Yārdan beñzer ẖaber almaġa gitmişdür ṣabā
	b.	Muntaẓır olup ḳulaḳ ṭutmışdur ol peyġāma gül

3.	a.	Ḳıṣṣa-ẖᾱn olmış şükūfe meclisinde ʿandelīb
	b.	Her ṭarafdan üstine ṭutmış anuñ hengāme gül

4.	a.	Ṣanki devletẖānesidür şimdi gülşen bülbülüñ
	b.	Kim anuñ içinde yer yer ḳondı beñzer cāma gül

5.	a.	Her kişi ʿizzet idüp el üstine ṭutsa ne‿ola
	b.	Ögrenüpdür ey Revānī dāyimā ikrāma gül

MĪM

-236-

feʿilātün feʿilātün feʿilātün feʿilün

1.	a.	Māh-rūlarda seni medḥ iderüm çün güzelüm
	b.	Ne‿ola bir ayda tamām olur ise bir ġazelüm

2.	a.	Ḫᾱba varsam ẖaṭ·ı müşkīn görürem ẖaddüñde
	b.	Ḳorḳaram ol ḳara düşden ki yaḳındur ecelüm

3.	a.	Gerçi yoḳ saña bedel ʿişve vü nāz eylemede
	b.	Derd ü ġam çekmede olmaya benüm de bedelüm

4.	a.	Baḥr·i eşkümde ne‿idem pençe·i mercān oldı
	b.	Gözümüñ ḳanlu yaşın silmeden ey dōst elüm

5.	a.	Yoḳ durur çünki ṣarılmaġa Revānī çāre
	b.	Eñegin oẖşayalum bārī ṭudaġın emelüm

-237-

feʿilātün feʿilātün feʿilātün feʿilün

1.	a.	Yine meyẖāne de bir ẖūb temāşā gördüm
	b.	Ṣabr yaġmacısı bir dilber·i tersā gördüm

2.	a.	Bir ḳadeḥ meyle beni ölmiş iken dirgürdi
	b.	Yine ol muġbeçede muʿciz·i ʿĪsā gördüm

3.	a.	ʿIşḳ deyrinde göñül ʿāşıḳ olup bir ṣaneme
	b.	Zülfi sevdāsını boynında çelīpā gördüm

4.	a.	Ṣundı bir cām·ı ṣafā-baẖş·ı sürūr-encāmı
	b.	Ki‿anda her ḳaṭrayı ben bir ulu deryā gördüm

5.	a.	Ḳanı ṣōfīlenüben içmedügüñ bādeyi sen
	b.	Ḥamdü li'llāh ki Revānī seni şeydā gördüm

-238-

fāʿilātün fāʿilātün fāʿilātün fāʿilün

1.	a.	Ey ṣabā gül-geşt idüp ʿazm·i gülistān eyledüm
	b.	Bülbüli gülşenler içinde ġazel-ẖᾱn eyledüm*

2.	a.	Nāme·i şevḳum kebūter yāruma ilte diyü
	b.	Yüzüm ayaġına sürmeden ḳızıl ḳan eyledüm*

3.	a.	Münkir·i ʿışḳ olmış iken geldi iḳrāra raḳīb
	b.	Güc ile ol kāfiri bu gün müselmān eyledüm*

4.	a.	Kaʿbe kūyıñdan ıraḳ aġyārı kim öldürdiler
	b.	Ben işitdügüm gibi fi'l-ḥāl ḳurbān eyledüm

5.	a.	Ol güzel beñzer Revānī yā perīdür yā melek
	b.	Görmedüm mis̲lini anuñ bunca seyrān eyledüm

-239-

mefʿūlü mefāʿīlü mefāʿīlü feʿūlün

1.	a.	Mihrüñle ola ẖāk eger sīne·i çāküm
	b.	Biñ yıl güneşe şuʿle vire ẕerre·i ẖāküm*

2.	a.	Biz ṭurur iken ġamzeler öldürdi raḳībi
	b.	İster benüm ol şūẖ·ı cefā-pīşe helāküm

3.	a.	Gül yüzlülerüñ şevḳı ile ẖāk olur isem
	b.	Ḥammāma varanlar sürinürler gil·i pāküm

4.	a.	Iṣmarladuġum leblerüñe cānumı bu kim
	b.	Aġzuñ gibi ortada o da olmaya tā güm

5.	a.	Çün ṣu gibi dil pāk durur ʿışḳ yolında
	b.	Kimden ola ʿālemde Revānī daẖi bāküm

-240-

feʿilātün feʿilātün feʿilātün feʿilün

1.	a.	Nice mektūb·ı maḥabbet nice irsāl·i peyām
	b.	Dōstluḳ ḥaḳḳın unutmış ne selām u ne kelām

2.	a.	Bir selām ile benüm göñlümi şād eylemedi
	b.	Gerçi ol ḥūr-liḳā işigidür Dār·ı Selām

3.	a.	Sög benüm sīneme tek kesme selāmı benden*
	b.	Her ne dirlerse disünler güzelüm ḥāṣ ile ʿām

4.	a.	ʿĀr ider ʿāşıḳına Tañrı selāmın virmez
	b.	Müˀmin olanda ṣaḳın böyle gerekmez islām

5.	a.	Nāme ile nice ʿarż ide Revānī ḥālin
	b.	Yār ile mihr ü vefā işi tamām oldı tamām

-241-

fāʿilātün fāʿilātün fāʿilātün fāʿilün

1.	a.	Tāzece bir ġoncadur ol dilber·i raʿnācuġum
	b.	Yā nihāl·i servdür ol ḳāmet·i bālācuġum

2.	a.	Ġuṣṣadan nergis gibi beñzüm ṣararsa ġam degül
	b.	Bir naẓar ḳılmaz baña ol gözleri şehlācuġum

3.	a.	Ṭatlu ṭatlu öpdi ḳarşumda lebüñi cām·ı mey
	b.	Bilmezem sāḳī ben andan nice alam acuġum

4.	a.	Yeg sever ʿāşıḳlaruñ atañdan anañdan seni
	b.	Ḳaçma anlardan ziyān gelmez benüm bebecuġum

5.	a.	Hey ne‿içün raḥm eylemezsin bu Revānī bendeñe
	b.	Ā begüm ā pādişāhum ā benüm mirzācuġum

-242-

feʿilātün feʿilātün feʿilātün feʿilün

1.	a.	Günümüz ṭoġdı mey ile idelüm ʿayş·ı müdām
	b.	Dehen·i sāḳi durur maġrib ü maşrıḳdur cām

2.	a.	Ḥasretüñden ne‿ola ḳan aġlar isem yıllar ile*
	b.	Gün yüzüñ görmeyeli oldı çü bir ay tamām*

3.	a.	Ḳaş u gözdür ulu sermāyesi ḥüsnüñ ammā
	b.	Güzel oldur kim ola sīm-beden ẖūb-endām*

4.	a.	Ey göñül būse içün söyleme dildāra ṣaḳın
	b.	Yār kim nāzük ola aña ne ḥācet ibrām

5.	a.	Kimse dimezdi aña ẖusrev·i iḳlīm·i suẖen
	b.	Bu Revānī ḳuluñ olmasa eger mīr·i kelām

-243-

mefāʿīlün mefāʿīlün feʿūlün

1.	a.	Güneş öykünemez yüzüñe māhum
	b.	Günüñ günden yeg olsun pādişāhum

2.	a.	Senüñ gün gibi ṭopuñ göge aġmış
	b.	Benüm yā yerde ḳalsun mı bu āhum

3.	a.	Beni öldürdügüñe ġam yimezdüm
	b.	Benüm çoḳ sevdügüm bilsem günāhum*

4.	a.	Namāzum iltseler ʿarşa ʿaceb mi
	b.	Ḳapuñ miḥrābıdur çün secdegāhum*

5.	a.	Revānī cām·ı meydür baña tesbīḥ
	b.	Benüm meyẖāne durur ẖāneḳāhum

-244-

feʿilātün feʿilātün feʿilātün feʿilün

1.	a.	Sāḳıyā gel senüñ ile mey·i gül-fām idelüm*
	b.	Ayaġı götürelüm fikr·i serencām idelüm

2.	a.	Niçe bir zühd ile taḳvā niçe bir ṣavm u ṣalāt
	b.	Bursa dilberleri ile gel e bayram idelüm

3.	a.	İçelüm ẖūblaruñ gözine gelsün mey·i nāb
	b.	Meclisi zīnet idüp hep gül ü bādām idelüm

4.	a.	Ṣabr u ārāmumuzı aldı perī-peykerler
	b.	Nice ṣabr eyleyelüm yā nice ārām idelüm

5.	a.	Gel Revānī seni sāḳī ile barışduralum
	b.	Elin ayaġın öpüp yalvarup iḳdām idelüm

-245-

fāʿilātün fāʿilātün fāʿilātün fāʿilün

1.	a.	ʿIşḳ derdinden durur ʿālemde destān olduġum
	b.	Çeşm·i mestüñden durur her laḥẓa ḥayrān olduġum

2.	a.	Ḫāṭırum cemʿiyyet ister sāḳıyā ṣun sāġarı
	b.	Ġam diyen ẓālim elindendür perīşān olduġum

3.	a.	Gün gibi hercāyī bir meh-rūyı sevmişdür göñül
	b.	Ol hevādandur bulutlar gibi giryān olduġum

4.	a.	Dāne·i ẖālüñ yele virdi bu ʿömrüm ḥāṣılın
	b.	Ḳanı yoluñda senüñ ẖāk ile yeksān olduġum

5.	a.	Kaʿbe·i kūyuñ Revānī ḳo ṭavāf itsün ṭavāf
	b.	Hāy Kaʿbem hāy ḳıblem hāy ḳurbān olduġum*

-246-

feʿilātün feʿilātün feʿilātün feʿilün

1.	a.	Rūy·ı pür-eşküme baḳmaz benüm ol yār·ı ḳadīm
	b.	Āsitānında ne‿idem ẖāke berāber zer ü sīm

2.	a.	Ne ʿacebdür bu ki kim görse seni terk idemez*
	b.	Kūyuña gelse müsāfir olur elbette muḳīm*

3.	a.	Serv boylulara ṣōfī ṣu gibi māyil olur
	b.	Kimde kim ẕihn·i laṭīf ile ola ṭabʿ·ı selīm*

4.	a.	Çıñraġılar ṭaḳınur yine felek encümden
	b.	Pādişāhum giceler olmaġa bezmüñde nedīm*

5.	a.	Mey·i ṣāfī gibi şerbet mi olur ṭabʿa laṭīf
	b.	ʿIşḳ derdini Revānī ne bilür ẖᾱce ḥakīm

-247-

fāʿilātün fāʿilātün fāʿilātün fāʿilün

1.	a.	Sāḳıyā laʿlüñ şarāb·ı erġavānumdur benüm
	b.	Gūşesi meyẖāne nüñ eski mekānumdur benüm*

2.	a.	Ḳaṣr·ı ġamdur ẖāne·i dil nerdübān şimdi aña
	b.	Üstüẖᾱnlarla bu cism·i nātüvānumdur benüm

3.	a.	Dāġ·ı ḥasret kim şehā sīnemde ẖūn-ālūdedür
	b.	Ḳanlar aġlar ṣan bu çeşm·i ẖūn-feşānumdur benüm

4.	a.	Şevḳden çekdüm elifle naʿl şeklin sīneme
	b.	Rāh·ı ʿışḳ içinde çün tīr ü kemānumdur benüm

5.	a.	Çenge ʿālemde Revānī dāyimā baş egdüren
	b.	Bezm·i fürḳatde olan ṣavt u terānumdur benüm

-248-

fāʿilātün fāʿilātün fāʿilātün fāʿilün

1.	a.	Görinen üstümde ṣanmañ dūd·ı āhumdur benüm
	b.	Pādişāh·ı ʿışḳam ol çetr·i siyāhumdur benüm

2.	a.	Nuḳl·ı mey tesbīḥüm oldı olalı ʿışḳa mürīd
	b.	Gūşe·i meyẖāne ṣōfī ẖāneḳāhumdur benüm

3.	a.	Ḳadr ile başum göge irişdi bendeñ olalı
	b.	Māh·ı nev kim görinür ṭarf·ı külāhumdur benüm

4.	a.	İtlerüñüñ ẖıdmetinde çoḳ durur taḳṣīrümüz
	b.	İşigüñde āh u nālem ʿöẕr-ẖᾱhumdur benüm

5.	a.	Didiler baña Revānī yār neñdür ben didüm
	b.	Gözlerüm nūrı efendim pādişāhumdur benüm

-249-

fāʿilātün fāʿilātün fāʿilātün fāʿilün

1.	a.	Serve serkeşlik iden serv·i bülendümdür benüm
	b.	Ben anuñ kemter ḳulıyam ol efendimdür benüm

2.	a.	Sen perī-peyker ḳamer-ruẖsārı tesẖīr itmege
	b.	Micmerüm ṭās·ı felek encüm sipendümdür benüm

3.	a.	Gör ne ʿālī-himmetem kim dūd·ı pīç-ā-pīç·i āh
	b.	Bu zeberced ḳalʿaya müşkīn kemendümdür benüm*

4.	a.	Yazılan mecmūʿalarda naḳş·ı taṣvīrüñ durur
	b.	Söylenen dillerde şiʿr·i dil-pesendümdür benüm*

5.	a.	Ey ṭabīb·i cān u dil ben ẖāstañı yād itmedüñ
	b.	Dimedüñ bir gün Revānī derdmendümdür benüm

-250-

mefāʿilün feʿilātün mefāʿilün feʿilün

1.	a.	Firāḳ·ı yār ile ben ẖaste derdnāk oldum
	b.	Baña meded idüñüz yoẖsa ben helāk oldum

2.	a.	Kemān gibi seni baġruma baṣmadum ḥayfā
	b.	Ḫadeng·i ġamzeñ ucından ki sehmnāk oldum

3.	a.	Ayaġın öpmege bir çāre bulmadum hergiz
	b.	Yolında gerçi anuñ niçe niçe ẖāk oldum

4.	a.	Elüm irişmedi gördüm ki ʿanberīn ṣaçına
	b.	Cihānda şāne gibi ben de sīne-çāk oldum

5.	a.	Revānī baña ne çāre viṣālden ġayrı
	b.	Firāḳ·ı yār ile ben ẖaste derdnāk oldum

-251-

fāʿilātün fāʿilātün fāʿilün

1.	a.	Sāḳıyā luṭf it baña ṣun ṭolu cām
	b.	İnneme'l-iḥsānu illā bi't-tamām

2.	a.	Ġam elinden dāyimā miḥnetdeyüz
	b.	Eyyühe's-sāḳī edir keˀsen müdām

3.	a.	Nāz ider Tañrı selāmın virmege
	b.	Ol cefākāra selām olsun selām

4.	a.	Kehrübāya döndi ġamdan beñzümüz
	b.	İçelüm sāḳī şarāb·ı laʿl-fām

5.	a.	Būse ʿahd itdüñ Revānī bendeñe
	b.	Pādişāhum müstedām ol müstedām

-252-

mefʿūlü mefāʿīlü mefāʿīlü feʿūlün

1.	a.	Ṣōfī ne gözüm yaşına ne āha ṣıġındum
	b.	Ben yiri gögi yaradan Allāha ṣıġındum

2.	a.	Çün ḳullarınuñ cürmi durur luṭfına bāʿis̲
	b.	Yüz ḳaralıġıyle kerem·i şāha ṣıġındum

3.	a.	Fürḳat elemin devlet·i vaṣluñla unutdum
	b.	Baḥtum güneşi ṣıdḳ ile sen māha ṣıġındum

4.	a.	Virdüm yele ʿışḳuñla bu dem ẖırmen·i ṣabrı
	b.	Kendüm ṭaġıdup āh·ı seḥergāha ṣıġındum

5.	a.	Pīr oldı baña ʿışḳ cihān içre Revānī
	b.	Ṣanma beni kim mürşid·i güm-rāha ṣıġındum

-253-

fāʿilātün fāʿilātün fāʿilātün fāʿilün

1.	a.	Bir benek altunlu geymiş yine cānānum benüm
	b.	Seyr ider yılduzlar ile māh·ı tābānum benüm

2.	a.	Āteş·i ʿışḳuñ Ḫalīliyem ki dāġ·ı şevḳden
	b.	Od iken tāze gülistān oldı her yanum benüm

3.	a.	Lāle gibi sīnemüñ dāġın nice fāş itmeyem
	b.	İndi çaḳ dāmānuma çāk·i girībānum benüm

4.	a.	Ġaybdan aġzı ẖaber virmezdi her dem ġoncaya
	b.	Ḫıżra yoldaş olmasa serv·i ẖırāmānum benüm

5.	a.	Gülsitānı seyr iden gelsün Revānī yanuma
	b.	Gül gibi açılmasun her yerde dīvānum benüm

-254-

fāʿilātün fāʿilātün fāʿilātün fāʿilün

1.	a.	Umaram maḥşerde ẖūb ola serencāmum benüm
	b.	Geçdi gün yüzlü güzellerle çün eyyāmum benüm*

2.	a.	Çün şarāb·ı ʿışḳdur dāyim benüm nūş itdügüm
	b.	ʿArş ḳandīlinden olsun sāḳıyā cāmum benüm

3.	a.	Cānum aġzuma gelüpdür būse·i dildār içün
	b.	Yār·ı nāzük-ṭabʿa yoḳdur hergiz ibrāmum benüm

4.	a.	Bir benek altunlu geymiş ṣalınur biñ nāz ile
	b.	Her ne geyse yaraşur serv·i gül-endāmum benüm*

5.	a.	Fürḳate düşdüm Revānī göñlüm ārām eylemez
	b.	Ol dilārām ile gitdi ṣabr u ārāmum benüm*

-255-

fāʿilātün fāʿilātün fāʿilātün fāʿilün

1.	a.	Merḥamet ide umaram baña ol şāh·ı kerīm
	b.	Yüz sür ayaġı tozına benden ey peyk·i nesīm

2.	a.	Yine dilberdür bilen ben derdmendüñ ḥālini
	b.	Añmañuz baña ṭabībi o gelür ise ḥakīm*

3.	a.	Cāmiʿ·i ḥüsninde zeyn içün aṣılmış gūyiyā*
	b.	Bir müşebbek ṭopdur bu kākül·i ʿanber- şemīm

4.	a.	Meclisüñde ẖālī olmazsa ne‿ola āvāreler*
	b.	Dōstum merġūb olur begler ḥużūrında nedīm*

5.	a.	Ṭutdı dünyāyı Revānī şiʿrinüñ āvāzesi
	b.	Nitekim ṣīt u ṣadā·yı Ḥażret·i Sulṭān Selīm

-256-

feʿilātün fāʿilātün fāʿilātün feʿilün

1.	a.	Nevbahār oldı gelüñ ʿayş·ı bahār eyleyelüm*
	b.	Ṣu gibi bāġa varup seyr·i kenār eyleyelüm

2.	a.	Cehd idüp Rūmili dilberlerini ṣayd idelüm
	b.	Biz de begler gibi ʿālemde şikār eyleyelüm

3.	a.	Ṣafḥa·i cāna yazup bir güzelüñ taṣvīrin
	b.	ʿAḳllar çāk olacaḳ naḳş·ı nigār eyleyelüm

4.	a.	Yād idüp ʿārıż u güftārını ol ġonca-lebüñ*
	b.	Güli söyletmeyelüm bülbüli zār eyleyelüm

5.	a.	Lāle-veş ḳalḳup ayaḳ ṭolularını içelüm
	b.	Gül gibi ʿayş idelüm bezm·i bahār eyleyelüm*

6.	a.	Aldı ġam çünki Sitanbulda göñül ḳalʿasını
	b.	Varalum biz de Ḳalatayı ḥiṣār eyleyelüm*

7.	a.	Çünki bu yerde Revānī bize yoḳdur raġbet
	b.	Gel ḳalender olalum terk·i diyār eyleyelüm*

NŪN

-257-

mefāʿilün feʿilātün mefāʿilün feʿilün

1.	a.	Cihānda Cem gibi ʿayşuñ şehā müdām olsun
	b.	Eger ki bensüz içerseñ meyi ẖarām olsun

2.	a.	Müdām gün gibi ʿizzetde ol ki bezmüñ içün
	b.	Sitāre nuḳl ü şafaḳ mey hilāl cām olsun

3.	a.	Ġurūr·ı ḥüsn ile añmaz ṣanurdum ol dilber
	b.	Cefā vü cevr ile yād itdi müstedām olsun

4.	a.	Ḳul itdi yine bizi bir selām ile ey dil
	b.	Güzeller içre o gül yüzlüye selām olsun*

5.	a.	Revānī cān ile bendeñ durur naẓar eyle
	b.	Ḳapuñda ḳullaruñ içinde tā be-nām olsun

-258-

fāʿilātün fāʿilātün fāʿilātün fāʿilün

1.	a.	Çoḳ cefālar irişüpdür baña sen bī-dāddan
	b.	Her biri ẖāṭırdadur kim gitmez eylük yāddan

2.	a.	Gicelerde çarẖ üzre görinen şekl·i hilāl
	b.	Şemʿ·i bezmüñ şuʿlesidür kim egilmiş bāddan

3.	a.	Mıṣr·ı ḥüsnüñde ḳoma pür-fitnedür bu ẖaṭṭ u ẖāl
	b.	Dōstum gelmedi yā toẖmı anuñ Baġdāddan*

4.	a.	Kūh ṣanmañ görinen yer yer ki uyẖudan zemīn
	b.	Uyanup baş ḳaldurupdur nāliş·i Ferhāddan

5.	a.	Şīve vü nāzı güzeller senden ögrense ne‿ola*
	b.	Ṣanʿatı lāyıḳ budur kim göreler üstāddan

6.	a.	ʿĀşıḳ olup bāġ ḳaddüñ yādına ey lāle-ruẖ
	b.	Gögsine çekmiş elifler sāye·i şimşāddan*

7.	a.	Yār ile hergiz Revānī olımaduñ āşinā
	b.	Ben ḥaḳīri ʿışḳ ise kesdi bilişden yaddan*

-259-

mefāʿīlün mefāʿīlün feʿūlün

1.	a.	Ḫaṭuñ küfr ü ruẖuñdur dīn ü īmān
	b.	Saña ʿāşıḳ durur kāfir müselmān

2.	a.	İgen germ olma bezm içinde ey şemʿ
	b.	Ṭutuşalum berü gel işde meydān*

3.	a.	Yolında cān·ı şīrīn virme ṣōfī
	b.	Sevilmez ölü ḥalvāsıyle oġlan*

4.	a.	Beni meygūn lebüñ mest itdi sāḳī
	b.	Beni esrār·ı ʿışḳuñ ḳıldı ḥayrān

5.	a.	Leb·i dilberde ẓāhir olalı ẖaṭ
	b.	Ḳara yaṣlu Revānī Āb·ı Ḥayvān*

-260-

fāʿilātün fāʿilātün fāʿilātün fāʿilün

1.	a.	Gül gül olmış ruẖlaruñ cām·ı şarāb·ı nābdan*
	b.	Ṣan ḳızıl güller durur kim reng alur mehtābdan

2.	a.	Başumuñ üstinde gūyā berḳ urur bir nūrdur
	b.	Şuʿle kim ẓāhir ola ol tīġ·i āteştābdan

3.	a.	Cām·ı meyde ʿaks·i ebrūñı gören dir sāḳıyā
	b.	Keştīdür deryāda ṣan ḳurtulamaz girdābdan *

4.	a.	Ol siyeh çeşmi görüp uyẖuda göñlüm didi kim*
	b.	Ḳara baẖtumdur benüm gūyā ki‿uyanmaz ẖᾱbdan*

5.	a.	Ḳıldı yaġma cān u dil raẖtın Revānī çeşm·i yār
	b.	Mülk·i tende nesne ḳalmamış durur esbābdan*

-261-

fāʿilātün fāʿilātün fāʿilātün fāʿilün

1.	a.	ʿĪd·i vaṣluña irişsem ġam yimezdüm cān içün
	b.	Bu mes̲el meşhūrdur erkek ḳuzu ḳurbān içün*

2.	a.	Leblerüñ Nūşīrevān zülfüñ durur zencīr·i ʿadl
	b.	Kimse dimez ẓulme māyil sen şeh·i ẖūbān içün*

3.	a.	Ad içün ölmişleri iḥyā ider ʿĪsā-lebüñ
	b.	Her kişi cānlar virür ʿālemde ad u ṣan içün*

4.	a.	Sen ḳamer-ruẖsār içün hercāyī dirlerse ne‿ola
	b.	Anca sözler söylenür ẖurşīd·i nūr-efşān içün

5.	a.	Dōstlar görsün Revānīnüñ bu ġarrā naẓmını
	b.	Bir yeñi üslūb peydā eylemiş yārān içün*

-262-

feʿilātün mefāʿilün feʿilün

1.	a.	Ey göñül ehl·i ẕillet olmışsın
	b.	Hem-dem·i derd ü miḥnet olmışsın*

2.	a.	Dāyimā sendedür müsāfir·i ġam
	b.	Beñzer ey dil ʿimāret olmışsın*

3.	a.	Ḫalḳı ġamzeyle hep helāk itdüñ
	b.	Allāh Allāh ne āfet olmışsın*

4.	a.	Leblerüñ Kevs̲er ü yüzüñ cennet*
	b.	Behey āfet ḳıyāmet olmışsın*

5.	a.	Ḳodı el arḳasını yerde çınār
	b.	Gördi çün serv-ḳāmet olmışsın*

6.	a.	Yārı ḳucdum didüñ Revānī hele*
	b.	Gerçek iseñ ne rāḥat olmışsın*

-263-

fāʿilātün fāʿilātün fāʿilātün fāʿilün

1.	a.	Geyse altunlu ḳabāsını ḳaçan ol nāzenīn
	b.	Şemse·i zerrīnidür cānumda dāġ·ı āteşīn

2.	a.	Zaʿferānı çihremüñ altunlu güller eyledi*
	b.	Cāmeñe şol deñlü kim yüz sürmişem ey nāzenīn

3.	a.	Ġabġabuñ altında cāmeñ üzre ey sīmīn-beden*
	b.	Tügmeler Pervīne beñzer olalar māha ḳarīn*

4.	a.	Ḫılʿat·i zerrīn içinde ol büt·i sīmīn-beden
	b.	Bitdi ṣan güller arasında nihāl·i yāsemīn

5.	a.	Cāme·i zerrīn ile seyr itseler cānāneler
	b.	Āfitāb ile Revānī pür olur rūy·ı zemīn*

-264-

mefʿūlü mefāʿīlü mefāʿīlü feʿūlün

1.	a.	Ṣaḥrāda ḳaçan at ile seyrān ide cānān
	b.	Gūyā kim olur bād ile bir serv ẖırāmān

2.	a.	Ṣaḥrāda semendi izi ṣanmañ göz açupdur
	b.	Geldükce temāşā ide tā kim anı meydān

3.	a.	Atuñ izidür başuma çün tāc·ı saʿādet
	b.	Yoluñda ḳo kim ẖāk olayın ey şeh·i ẖūbān

4.	a.	ʿUşşāḳ ṭaġılsa ne ʿaceb atuñ öñinden
	b.	Kim bād·ı ṣabā ile olur ẖāk perīşān

5.	a.	Cānāneyi at üzre görüp didi Revānī
	b.	Bildüm ki yel üstinde imiş taẖt·ı Süleymān

-265-

fāʿilātün fāʿilātün fāʿilātün fāʿilün

1.	a.	ʿAks·i laʿlüñle zenaẖdānuñ senüñ ey nāzenīn
	b.	Sīmden ẖātemdür olmış laʿlden aña nigīn

2.	a.	Hindūlardur Kaʿbeye gelmiş ṭavāfa gūyiyā
	b.	Ruẖlaruñ devrinde ey dilber bu ẖaṭṭ·ı ʿanberīn

3.	a.	Ḳanlar aġladup gülünc itdüñ beni düşmanlara
	b.	Pādişāhum dōstlar böyle mi olur āferīn

4.	a.	Görmeyince sīnemüñ dāġını sögmez baña yār
	b.	Söylemez āyīnesüz ṭūṭī kelām·ı şekkerīn

5.	a.	Her ḳaçan şiʿrüm yazam ẖāmem Revānī siḥr ider
	b.	Şāhid·i naẓmum ola tā kim yavuz gözden emīn

-266-

mefʿūlü mefāʿīlü mefāʿīlü feʿūlün

1.	a.	Ṭolanmaz idi kūyuñı her gice ıraḳdan
	b.	Māh olmasa ʿāşıḳ güzelüm saña ḳulaḳdan

2.	a.	Sāḳī berü gel kim seni arayı arayı
	b.	Ḳan derleyüben çıḳdı mey·i nāb ayaḳdan

3.	a.	Dil ṭıflı içün ṣanki gümiş tozlu kemāndur
	b.	Ḳaşuñ ki müzeyyen ola ey dōst ʿaraḳdan

4.	a.	İgen uyup ulaşdı göñül ġamzelerüñe*
	b.	Āẖir ölümi anuñ ola gibi bıçaḳdan

5.	a.	Rengīn ruẖı evṣāfını yazmaġa Revānī
	b.	Mecmūʿasını eyledi gül al varaḳdan

-267-

fāʿilātün fāʿilātün fāʿilātün fāʿilün

1.	a.	Sāḳī·i gül-çihre alduḳca ele peymānesin
	b.	Ġonca·i zanbaḳlar içre lāle bitmiş ṣanasın

2.	a.	Ol perī-rūdan göñül nice ṣaḳınmayam seni
	b.	Bu mes̲el meşhūrdur kim atmaz il dīvānesin*

3.	a.	Meh gümişden bir kilindirdür güneş altun yatuḳ
	b.	Añlaruñla bu felek zeyn eylemiş ẖumẖāne sin

4.	a.	Yaraya ey dil sen ibrīşim götürmezdüñ ezel
	b.	Şimdi āvāre neden bu zülf·i müşk-efşānasın*

5.	a.	Yıḳma göñlüm ẖānesin ey gözlerümüñ nūrı kim
	b.	Kaʿbe yapmaḳ gibidür yapmaḳ göñül vīrānesin*

6.	a.	Ḫaṭṭ·ı şiʿrüñ kebk·i maʿnā ṣaydına çün dāmdur
	b.	Söz feżāsında Revānī sen bu gün yek dānesin*

7.	a.	Dil ele cām almayaldan düşdi ġam deryāsına
	b.	Şöyle maḥzūndur gemisi ġarḳ olupdur ṣanasın*

-268-

mefʿūlü fāʿilātü mefāʿīlü fāʿilün

1.	a.	Ḳoñ şemʿ gibi aġlayayın hecr·i yārdan
	b.	Yandum yaḳıldum ol ṣanem·i gül-ʿiẕārdan*

2.	a.	Gözlük idindi dāġların sīnemüñ göñül
	b.	Var ise incinüpdür o ẖaṭṭ·ı ġubārdan*

3.	a.	Āşüfte olma her güzelüñ ẖaṭṭ u ẖāline
	b.	Geçmez misin göñül daẖi naḳş u nigārdan

4.	a.	İçsün şarābı sāḳīnüñ emsün şeker-lebin
	b.	Dad almaġ isteyen kişiler rūzgārdan

5.	a.	Ol lāle-çihre gördi beni şiʿrüm isteyüp
	b.	Neñ var didi Revānī bize yādigārdan*

-269-

mefʿūlü mefāʿīlü mefāʿīlü feʿūlün

1.	a.	Şol serv gibi ḳāmet·i dil-cūya ne dirsin
	b.	Şol güller ile sünbül·i ẖoş-būya ne dirsin

2.	a.	Hīç añmayalum ẖāl ü ẖaṭ u zülfini nāṣıḥ
	b.	Şol şīve ile ḥālet·i ebrūya ne dirsin

3.	a.	Bir ḥūyuñ ile ṣōfī cihāna ṣıġamazsın
	b.	Üftādelerüñ itdügi yāhūya ne dirsin

4.	a.	Cānānelerüñ vaʿdesi çoḳ ʿāşıḳa cānā
	b.	Ġayrıyı ḳoyalum hele pehlūya ne dirsin

5.	a.	Zāhid dir imiş tevbelüyem cām·ı şarāba
	b.	Bi'llāhi Revānī ya şu bed-ẖūya ne dirsin

-270-

fāʿilātün fāʿilātün fāʿilātün fāʿilün

1.	a.	Ey felek ol māh-rūyı ġarḳ·ı āb itmek neden
	b.	Seyl·i ġamdan göñlümüz mülkin ẖarāb itmek neden*

2.	a.	Mıṣr·ı ḥüsnine ẖaṭı firʿavnı itmeden hücūm
	b.	Nīle ġarḳ idüp anı böyle ʿaẕāb itmek neden*

3.	a.	Aġırı altun degerken ol gümiş sāʿidleri
	b.	Genc-veş medfūn idüp zīr·i türāb itmek neden

4.	a.	Misk ü ʿanberden serā-perde çekerken kāküli
	b.	Nev-ʿarūs·ı ḥüsnine ẖāki niḳāb itmek neden*

5.	a.	Ḳaralar geymiş Revānī ebr-veş aġlar müdām
	b.	Ey felek ol māh-rūyı ġarḳ·ı āb itmek neden

-271-

fāʿilātün fāʿilātün fāʿilātün fāʿilün

1.	a.	Dōstum gel ḳaçma luṭf it ʿāşıḳ·ı ġamnākden
	b.	Āfitābı gör ki hergiz yüz çevürmez ẖākden

2.	a.	ʿIşḳ bāzārında tīr-endāz·ı āhumdur bu gün
	b.	Ṣanʿat ile oḳ geçüren şīşe·i eflākden

3.	a.	Ejdehā gibi aġız açdı yine meclisde çeng
	b.	Hey meded sāḳī bize şol mey diyen tiryākden

4.	a.	Sevdürür her pāk-dāmen serv-ḳaddi baña ʿışḳ
	b.	Ayrılımazın anuñçün ben bu ʿışḳ·ı pākden*

5.	a.	Ṣoḥbet·i maḥbūb u meyden ẖalḳı menʿ itmezdi hīç
	b.	Nāṣıḥuñ ʿaḳlı Revānī ḳalmasa idrākden

-272-

feʿilātün feʿilātün feʿilātün feʿilün

1.	a.	Zāhid oruçda yüri zühd saña rām olsun
	b.	Göreler ṣōfīlıġuñ da hele bayram olsun*

2.	a.	Süreyin ayaġı ṭopraġına çirkīn yüzümi
	b.	Sāḳī bezm içre tek ol serv·i gül-endām olsun

3.	a.	İçelüm çeng ü çeġāneyle çemen bezminde
	b.	Raḳṣ uran ṣoḥbetümüz içre bizüm cām olsun

4.	a.	Mey içer diyü bizi illere bed-nām itdi
	b.	Göreyin ṣōfī·i bed-baẖtı ki bed-nām olsun

5.	a.	Gördi nāzüklük ile būsesin alduġumı yār
	b.	Gülerek didi Revānī saña inʿām olsun

-273-

feʿilātün mefāʿilün feʿilün

1.	a.	Gözümüñ ḳaçmaduñ çü yaşından
	b.	Avladuñ sen bıñarı başından

2.	a.	Cān·ı ʿāşıḳda çün ġubār ḳomaz
	b.	Ḳaçmañuz dilberüñ tırāşından

3.	a.	Ḫışm·ı ebrūña ḳatlanur göñlüm
	b.	Yüz çevürmez ḳılıç ṣavaşından

4.	a.	Boynuma yine göñlüm abdālı
	b.	Ṭaḳdı meftūl ḳuyı ṭaşından*

5.	a.	Pend ṭutmaz Revānī çün göñlüm*
	b.	Söyle ẖūbuñ göziyle ḳaşından

-274-

fāʿilātün fāʿilātün fāʿilātün fāʿilün

1.	a.	Gerçi sen bu lebler ile ẖalḳ·ı ʿālem cānısın*
	b.	Ṣorduġum ʿayb eyleme bi'llāh kimüñ cānānısın

2.	a.	Kākülüñdür tūġ·ı müşkīn ḳāmetüñ sīmīn ʿalem*
	b.	Beglenürseñ yaraşur kim ḥüsn ili sulṭānısın

3.	a.	Ey güneş kendüñi ʿuşşāḳ içre yüksek ṭutma kim
	b.	Ol mehüñ anlar gibi sen daẖi sergerdānısın*

4.	a.	Şerbet·i şīrīn sözüñdür leblerüñ dārü'ş-şifā
	b.	Ey ṭabīb·i cān bu ben dil-ẖastenüñ dermānısın*

5.	a.	Gerçi nāzükdür Revānī ẖūblar ṣayd itmede
	b.	Diller almaḳda velī sen de cihān fettānısın

-275-

mefʿūlü mefāʿīlü mefāʿīlü feʿūlün

1.	a.	Sevdā·yı ser·i zülfüñ idüp misk Ḫıṭādan
	b.	Terk itdi diyārın ṣanemā ol bu belādan*

2.	a.	Meyl itse ne‿ola atına bindükce baña yār *
	b.	Şāẖ·ı gül·i terdür ki‿egilür bād·ı ṣabādan*

3.	a.	Ben varamadum mescide meyẖāne ye gitdüm
	b.	Bi'llāhi bizi ṣōfī unutma‿anda duʿādan

4.	a.	Tesbīḥ ü ridāyı baña ʿarż eyleme zāhid
	b.	Göñlüm çü kesilmez benüm ol zülf·i dü-tādan*

5.	a.	Geh gāh Revānī ḳuluñı būseñ ile añ
	b.	Dervīş-nüvāz ol a begüm ḳaçma gedādan*

-276-

mefʿūlü mefāʿīlü mefāʿīlü feʿūlün

1.	a.	Öykündügiçün leblerüñe sehv ile mercān
	b.	Bir pāre od oldı ḳaḳıyup laʿl·i Bedaẖşān*

2.	a.	Ḥükminde durur ḥüsn ili sulṭānları yāruñ
	b.	Ṭuġrā ḳaşı virdi aña bu vech ile ʿunvān

3.	a.	Kūyuña varup ʿīd·i viṣāl istese ʿāşıḳ*
	b.	Dirler güzelüm geldi yine tekyeye ḳurbān*

4.	a.	Didüm ki o kāfirbeçeyi sevme sen ey dil
	b.	Didi beni ḳo gel kerem it hāy müselmān*

5.	a.	Sen Yūsuf·ı Mıṣra ne‿ola ḳul olsa Revānī
	b.	Her kişi benüm begcegüzüm başına sulṭān*

-277-

mefʿūlü mefāʿīlü mefāʿīlü feʿūlün

1.	a.	Abdāluñ olupdur felek ey ẖusrev·i ẖūbān
	b.	Kim boynına meftūl ṭaḳupdur meh·i tābān

2.	a.	Āhum dütüninden yaşarupdur gözi çarẖuñ
	b.	Gökden yere ṣanmañ ki iner ḳaṭra·i bārān*

3.	a.	Gözümde ẖayālüñ senüñ ey kān·ı melāḥat*
	b.	Gūyā ki terāzūda ṭurur Yūsuf·ı Kenʿān*

4.	a.	Sergeştesidür bencileyin ḥüsnüñüñ ey dōst
	b.	Zülfüñ bu durur olduġı her laḥẓa perīşān*

5.	a.	Ol Ḫıżr-ẖaṭuñ vaṣf·ı lebin yazdı Revānī
	b.	Oldı ḳalemi lūle·i ser-Çeşme·i Ḥayvān*

-278-

mefʿūlü fāʿilātü mefāʿīlü fāʿilün

1.	a.	Şād olsalar güzeller ʿaceb mi şarābdan *
	b.	Dāyim çü ġoncalar açılur āfitābdan

2.	a.	Mey ṣoḥbetin ṣurāḥī gibi terk eylemez
	b.	Her kim naṣīḥat aldısa çeng ü rebābdan

3.	a.	Yoluñda ẖāk olan kişinüñ baġrı başıdur
	b.	Her yıl ki lāle ġoncası bitse türābdan

4.	a.	Ḫāl·i ʿiẕārı āba ne nāzüklük itdi kim*
	b.	Var ẖāṭırında niçe girihler ḥabābdan*

5.	a.	Nāṣıḥ Revānī tevbe-şiken olduġı müdām
	b.	Maḥbūbdan mıdur ʿacebā yā şarābdan*

-279-

mefʿūlü fāʿilātü mefāʿīlü fāʿilün

1.	a.	Ol ġonca-leb ki nāz ile içer şarābdan
	b.	Bir al rişteyi geçürür laʿl·i nābdan

2.	a.	Devr·i ruẖında beñlerinüñ ẖoş-ṣafāsı var
	b.	Zīrā ki ḥaẓẓ ider ḳaralar āfitābdan

3.	a.	Bu fenn·i ʿışḳ içinde mühendis geçer göñül
	b.	Gerçi ki ders·i ʿışḳ oḳınmaz kitābdan*

4.	a.	ʿAyş eyle ṣōfī perde·i nāmūsı çāk ḳıl
	b.	Ẕevḳ idemez şu kimse ki geçmez ḥicābdan*

5.	a.	Bir kerre būse añdum idi ẖışm ider daẖi*
	b.	Öldük Revānī biz hele nāz u ʿitābdan

-280-

fāʿilātün fāʿilātün fāʿilātün fāʿilün

1.	a.	Çoḳ keremler görmişem sāḳī mey·i gül-fāmdan
	b.	Dāyimā yüzüm ḳızar cām·ı sürūr-encāmdan

2.	a.	Dilberüm ʿār eyleyüp gül gibi adın ṣaḳınur
	b.	Ḳaçduġına sır budur ġālib bu ben bed-nāmdan

3.	a.	Mıṣr·ı ḥüsnüñde yine sevdā·yı zülfüñle göñül
	b.	Ḫᾱcedür gūyā getürmişdür metāʿı Şāmdan

4.	a.	Gözleri şeydālıġından ġāfil olma ey göñül
	b.	Çün riyāżet ehlisin geçme ṣaḳın bādāmdan

5.	a.	Sāġar·ı pür-mey Revānī açdı ġamgīn göñlümi
	b.	Rūşenālıḳ ẖāneye dāyim irişür cāmdan

-281-

feʿilātün feʿilātün feʿilātün feʿilün

1.	a.	Ne ẖaber aldı ʿaceb ḳadd·i serefrāzından
	b.	Ki ṭurup serv·i sehī yüriyimez nāzından

2.	a.	Kim ola gözlerinüñ olmaya ṣayyādına ṣayd
	b.	Kim ola ḳurtara dil kebkini şehbāzından*

3.	a.	Nicedür yine meyi rāyiḥasından ṭuymaḳ
	b.	Nicedür muṭribi bilmek hele āvāzından

4.	a.	Ḳanı āşüfte göñül kim ide biñ āh u fiġān
	b.	Ḳanı kūyında ki ḥaẓẓ ola serāġāzından*

5.	a.	Penbe·i ebri Revānī ḳodı g-şında felek
	b.	Yine incindi gibi ṣoḥbetümüz sāzından

-282-

mefāʿīlün mefāʿīlün mefāʿīlün mefāʿīlün

1.	a.	Ḳaçan sāḳī mey·i gülgūn görinse cām·ı ʿişretden
	b.	Ṣanasın şems·i bezm-ārā ṭoġar burc·ı saʿādetden

2.	a.	Sevilmek sevme ʿādetdür igende ḳaçma ʿāşıḳdan
	b.	Benüm çoḳ sevdügüm kimse ziyān itmez maḥabbetden

3.	a.	İtüñe hemdem olmışdur sürinmek ile aġyāruñ
	b.	Bu ẓāhirdür ki‿ululuġa yetişür kişi ẖıdmetden

4.	a.	Benüm ḥālüm itüñ ḥāli ḳapuñdan d-r olalıdan
	b.	İlāhī kimse düşmesün cihān içinde ʿizzetden

5.	a.	Göñül cān virdügi budur Revānī bezm·i dildāra
	b.	Bilür kim ḥaẓẓ olur ġāyet ḥarīfān ile ṣoḥbetden

-283-

fāʿilātün fāʿilātün fāʿilātün fāʿilün

1.	a.	Dōstum ḥikmet kelāmına hele māyil misin
	b.	Noḳṭa·i mevh-m dirler aġzuña ḳāyil misin

2.	a.	ʿIşḳ ucından göñlüm aḳıncısı ey kāfirbeçe*
	b.	Bilmezüz kim bizüm ile yaġı mısın il misin*

3.	a.	Ẕerrece yoḳdur dehānuñ ḳılca görinmez miyān
	b.	Öpülüp ḳuculmaġa andan begüm ḳābil misin *

4.	a.	Devletüñde ẖalḳ uyur arḳadadur ġam ẓulmi yoḳ
	b.	Fitneyi refʿ itdüñ ey sāḳī şeh·i ʿādil misin*

5.	a.	Ḫırmen·i ṣabrı ṭaġıtdı dāne dāne beñleri
	b.	Ey göñül sen de Revānī gibi bī-ḥāṣıl mısın*

-284-

mefāʿīlün mefāʿīlün feʿūlün

1.	a.	Begüm sen mülk·i ḥüsne pādişāsın
	b.	Güneş-ruẖsārsın zerrīn-ḳabāsın

2.	a.	Firengī al aṭlasdur mey·i nāb
	b.	Ne ḳıymet aña hīç ṣormañ şirāsın

3.	a.	Ḳadeḥler gibi ḳanlar yutmayınca
	b.	Bu devrānuñ kişi sürmez ṣafāsın

4.	a.	Raḳībā aġlamaḳdan fāyideñ ne
	b.	Yedi deryā yumaz yüzüñ ḳarasın*

5.	a.	Eger dirseñ ki ber-ẖordār olayın
	b.	Revānīnüñ duʿāsın al duʿāsın*

-285-

fāʿilātün fāʿilātün fāʿilātün fāʿilün

1.	a.	Sebze ṣaḥnında ki düşmişdür yatur berg·i ẖazān
	b.	Kāġıd·ı al üzre gūyā kim olupdur zer-feşān

2.	a.	Rengīn evrāḳıyle gūyā bāġ bir mecmūʿadur*
	b.	Cedvel·i sīmīndür eṭrāfındaki āb·ı revān

3.	a.	Ṣaru yapraḳlarla ṣaḥn·ı būstānda cūybār
	b.	Beñzer ol tīġa ki‿ola başdan ayaġa zer-nişān

4.	a.	Bir yeşil aṭlas durur zer-beft gūyā kim çemen
	b.	Yer yer altun güller olmışdur aña berg·i ẖazān

5.	a.	Ḳo ẖazān fikrin Revānī ṣayd idüp bir gül-ruẖı
	b.	Nuḳl idüp şekker lebin nūş it şarāb·ı erġavān*

-286-

fāʿilātün fāʿilātün fāʿilātün fāʿilün

1.	a.	Naḳd·i cān virmek gerek ʿālemde cānān isteyen
	b.	Derd ile ölmek gerek derdine dermān isteyen*

2.	a.	Cān virenlerdür alan āẖır metāʿ·ı vuṣlatı
	b.	Ey göñül alur ḳumāşı evvel erzān isteyen

3.	a.	Sīne dükkānında aṣdum āteş·i ʿışḳa ciger
	b.	Ḳandadur yanuma gelsün tābe biryān isteyen*

4.	a.	Bir ṣaçı sünbül yüzi gül ġonca-leb dildār ile
	b.	Ṣoḥbet·i ẖāṣ eylesün bezm·i gülistān isteyen

5.	a.	Ḫaṭṭ·ı şiʿrümle bu naẓm·ı ābdārı görsün e
	b.	Ḳarañuluḳda Revānī Āb·ı Ḥayvān isteyen*

-287-

fāʿilātün fāʿilātün fāʿilātün fāʿilün

1.	a.	Baḳmazam gül-ruẖlara serv·i bülendüm var iken
	b.	Kime yalvaram senüñ gibi efendüm var iken*

2.	a.	Nice at ṣalmayayın ġam leşkerine sāḳıyā
	b.	Devletüñde mey gibi gülgūn semendüm var iken

3.	a.	Hep gözi āhūları ey dil şikār itsem gerek
	b.	Dūd·ı pīç-ā-pīç·i āhumdan kemendüm var iken

4.	a.	Sāḳıyā şol ḳan olacaġı getür nūş idelüm
	b.	Çeşmüñ ü laʿlüñ gibi bādām u ḳandüm var iken

5.	a.	Yanuma alsam Revānī ne‿ola her sīmīn-beri
	b.	Uñmaduḳ āvāre dil gibi levendüm var iken *

-288-

fāʿilātün fāʿilātün fāʿilātün fāʿilün

1.	a.	Zāhidā el çekmişem zühd·i nifāḳ-āmīzden
	b.	Pür-ṣafādur ẖāṭırum cām·ı neşāṭ-engīzden

2.	a.	ʿIşḳ meydānı içinde geçdi Gülgūn·ı yaşum
	b.	Ögdül aldı ẖusrevā āhum benüm Şebdīzden*

3.	a.	Ṣōfiyā şol kim şarāb ile kebāba ögrene
	b.	Ol ḳaçan olur ki ḥaẓẓ ide ḳuru perhīzden

4.	a.	Çeşmüñ ü ġamzeñ durur ʿuşşāḳı maġbūn eyleyen
	b.	Āh şol ẖūnẖᾱr elinden vāy şol ẖūnrīzden*

5.	a.	Ad çıḳarurdı Revānī şiʿri gibi leblerüñ
	b.	Ṣanʿat ögrenseñ gelüp üstād·ı şekkerrīzden

-289-

feʿilātün feʿilātün feʿilātün feʿilün

1.	a.	Ṣāh·ı ʿışḳ olalı ey dil ne içün ḥayrānsın
	b.	ʿAḳluñı cemʿ idemezsin ne ʿaceb sulṭānsın

2.	a.	Ġam degül göñlümi zencīre çekerse zülfi
	b.	Ḳatı dīvāne durur ḳoñ ki biraz uṣlansun

3.	a.	İçelüm ṣubḥa degin uñmaz isek uñmayalum
	b.	Ḳarşumuzda hele balmumları par par yansun

4.	a.	Ben ṣurāḥī gibi meclisde nice aġlamayam
	b.	Ḥālüme sen de benüm cām gibi ḥayrānsın*

5.	a.	Ṣabr ḳıl āh u fiġān itme Revānī bir dem*
	b.	Ol gözi mest nigār uyur imiş uyansun *

-290-

müstefʿilün müstefʿilün müstefʿilün müstefʿilün

1.	a.	Ṭoġrandı baġrı şānenüñ bu zülf·i ʿanber-reng içün
	b.	Aṣıldılar āyīneler ol yār·ı şūẖ u şeng içün*

2.	a.	Defʿ·i ġam içün sāḳıyā yāḳūt·ı rūḥ-efzāyı ṣun
	b.	Hey niçe bir ḳan yudalum şol laʿl·i āteş-reng içün*

3.	a.	Aġyāra hemdem olmaġıl yoẖsa hilāl itdüñ beni
	b.	ʿĀr ehli ġayretden ölür ʿālemde nām u neng içün

4.	a.	Sen meh-liḳāyı sevmegin gerdūn hilāl·i ʿīdden
	b.	Yalıñ ḳılıç almış ele ʿāşıḳlar ile ceng içün

5.	a.	ʿĀlemde olmaya cilā hergiz Revānī mey gibi
	b.	Dāyim göñül mirˀātına ġamdan irişen jeng içün*

-291-

fāʿilātün fāʿilātün fāʿilātün fāʿilün

1.	a.	ʿĀşıḳ olduñ bir perīye dōstum cānān iken
	b.	Bir şehe ḳul olduġuñ bilsem nedür sulṭān iken*

2.	a.	Ol perīnüñ gün gibi ṭopı göge aġsa ne‿ola
	b.	Her gice kūyın ṭolanursın meh·i tābān iken*

3.	a.	ʿIşḳdan bir māh-rūyı ey felek ḳılduñ hilāl
	b.	Gün güzellikde anuñ ḥüsnine sergerdān iken*

4.	a.	Lāle gibi āteş·i ʿışḳ ile olmış dāġdār
	b.	Bir gül·i raʿnāyı sevmiş ġonca·i ẖandān iken

5.	a.	Yaşına Yaʿḳūb gibi ġarḳ olmışdur nigār
	b.	Mıṣr·ı ḥüsn içre Revānī Yūsuf·ı Kenʿān iken*

-292-

fāʿilātün fāʿilātün fāʿilātün fāʿilün

1.	a.	Sen hilāl-ebrū içün olmış durur ḳaddüm kemān
	b.	Al toz ursa yaraşur aña çeşm·i ẖūn-feşān

2.	a.	Gördi kim birḳaç yeleksüz hemkiriş düşdi aña
	b.	Tīr başın aldı gitdi ḳatı saẖt oldı kemān*

3.	a.	Būseñ almaḳda tekellüf çekmez ancaḳ sāḳıyā
	b.	Sāġaruñ bildüm ki yine görinür gözine ḳan

4.	a.	Zülfüñ ucından perīşān oldı sünbüller yine
	b.	Ey semen-ber ruẖlaruñdan reng alupdur erġavān*

5.	a.	Mestler bezminde ne‿eyler ṣōfī ayıḳdur didüm
	b.	İşidüp sāḳī didi oyuḳsuz olmaz būstān

6.	a.	Ṣoḥbet·i Leylā içinde kāsebāz olmış durur*
	b.	Görinen başında Mecnūnuñ degüldür āşiyān

7.	a.	Göñlidür saña Revānī derdmendüñ tuḥfesi
	b.	Ḫūbdur dilberlere āyīne olmaḳ armaġān*

-293-

fāʿilātün fāʿilātün fāʿilātün fāʿilün

1.	a.	Ẕevḳ ider āvāze·i zencīrden ehl·i cünūn
	b.	Nitekim bezm ehline virür ṣafālar erġanūn

2.	a.	Yine ʿişretẖāne·i Gülzārı taʿmīr itmege
	b.	Oldı her bir ġonca·i zanbaḳ gümişden bir sütūn*

3.	a.	Ṭāḳatüm ṭāḳ oldı ṣabrum ḳalmadı raḥm eyleñüz
	b.	Bir cefākāruñ elinden ben zebūn oldum zebūn*

4.	a.	Sīnemi nāẖun nişānı ḳıldı ḳaşuñ şevḳına
	b.	Meşk gibi kim yazılmış ola anda niçe nūn*

5.	a.	Ṣīt·i eşʿārum Revānī ṭutdı dünyāyı tamām
	b.	Güm güm ötdügi budur bu günbed·i pīrūzegūn

-294-

fāʿilātün fāʿilātün fāʿilātün fāʿilün

1.	a.	Oldı ʿişretẖāne·i Leylā bu ḳaṣr·ı ābgūn
	b.	Nāle·i zencīr·i Mecnūndur ṣadā·yı erġanūn

2.	a.	ʿIşḳ üstād u muʿallimẖāne miḥnet küncidür
	b.	Ṭıfl·ı ebced-ẖᾱn durur anda geçenler ẕū-fünūn

3.	a.	Ḥüsnüñ eyyāmında şeydālıḳ idersem ne‿ola kim*
	b.	Nevbahār irdükde artar ey gül·i raʿnā cünūn*

4.	a.	Pādişāhum derd ü miḥnetden fiġān itsem ne‿ola
	b.	ʿIşḳ elinden bir niçe Rüstemler olmışdur zebūn*

5.	a.	Rūy·ı zerdüm ḳorḳaram fāş ider ʿışḳı ʿāleme
	b.	Baña ṣun sāḳī kerem eyle şarāb·ı lālegūn *

6.	a.	Māhiye idüp Revānī ʿışḳ miʿmārı yine
	b.	Bu zeberced ṭāḳa urmış āh·ı ʿāşıḳdan sütūn

-295-

feʿilātün feʿilātün feʿilātün feʿilün

1.	a.	Derdümi añladılar sīne·i sūzānumdan
	b.	Bildiler mestligüm çāk·i girībānumdan*

2.	a.	Nice çāk itmeyeyin gül gibi ṣabrum yaḳasın
	b.	Ayru düşdüm bu gün ol serv·i ẖırāmānumdan

3.	a.	Ḫaste olduḳca ṭurur başum ucında aġlar
	b.	Çoḳ keremler görürin dīde·i giryānumdan

4.	a.	Baña ne seyr ü temāşā baña ne bezm·i şarāb
	b.	Ayrılursam ölürin ṣoḥbet·i cānānumdan*

5.	a.	Mülk·i naẓm içre Revānī ide Ḫusrev taḥsīn
	b.	Her ġazel kim oḳına defter ü dīvānumdan*

-296-

fāʿilātün fāʿilātün fāʿilātün fāʿilün

1.	a.	Baña çoḳ ḥāletler irdi zāhidā peymāneden
	b.	Gitmezem bir dem sebū-veş gūşe·i meyẖāne den*

2.	a.	Pençesine giricek ḳurtulması müşkil olur
	b.	Ben aña didüm hele zülfüñ kesilsün şāneden

3.	a.	İşigi dārü'ş-şifādur ẖastelarla gūyiyā
	b.	Kūyı bir meyẖāne dür ṣan naʿra·i mestāneden

4.	a.	Bu dil·i şūrīdeye toḳınma ṣaḳın ey perī*
	b.	ʿḳil olan kimseler ḳorḳmaḳ gerek dīvāneden*

5.	a.	Çıḳdı sīneñden Revānī çünki ol sīmīn-beden
	b.	Şimdi gördüm genc çıḳduġını ben vīrāneden*

-297-

fāʿilātün fāʿilātün fāʿilātün fāʿilün

1.	a.	Geçmemiş zāhid daẖi sevdā·yı ẖaṭṭ u ẖālden
	b.	Anuñ içün ẖavfi vardur nāme·i aʿmālden

2.	a.	ʿĀşıḳuñ vecd olduġına zāhidüñ inkārı var*
	b.	Ne‿eylesün ġāfil durur bī-çāre miskīn ḥālden

3.	a.	Ṭaylasān ile ridādan vaṣla yol yoḳ zāhidā
	b.	Şemʿi irmez geçmese pervāne perr ü bālden

4.	a.	Çaġırı çaġırı söyler nāylar derd ehline*
	b.	ʿĀşıḳ olan ʿışḳ ḥālin ṣormasun ḳavvālden*

5.	a.	Ṣōfīler şīrīn kelāmuña Revānī ṭoymadı
	b.	Eyü söz dirler ki ṭatludur şekerden baldan*

-298-

fāʿilātün fāʿilātün fāʿilātün fāʿilün

1.	a.	Bezm·i fürḳatde muġannī başlasun şehnāzdan
	b.	Açılur ġamgīn göñüller çünki dāyim sāzdan

2.	a.	Yüksek uçmasun nigār·ı kebk·i ẖoş-reftārumuz
	b.	Avladur çün ʿışḳ şehbāzın göñül pervāzdan

3.	a.	Şīve fenninde nigārum bir müderrisdür hemān
	b.	Ḫāṭırında çün mesāyil var kitāb·ı nāzdan

4.	a.	Ġāfil olma bildürürler saña ey dil ne‿idügüñ
	b.	Bezm·i ġamda bir nefes dem urur iseñ rāzdan

5.	a.	Miske dime ayaġı ṭopraġına yüz sürdügüñ*
	b.	Her kişi ṣaḳlar Revānī rāzını ġammāzdan

-299-

mefāʿīlün mefāʿīlün mefāʿīlün mefāʿīlün

1.	a.	Nice ġam çekmesün ʿāşıḳ ya nice şādmān olsun
	b.	İçersin ġayrılarla sen şarābı nūş·ı cān olsun

2.	a.	ʿAceb bir kimse var mı kim cihānda bendeñ olmaya
	b.	Gerekse ey şeh·i ẖūbān fülān ibn·i fülān olsun

3.	a.	Göñül almaḳ murād itse tekellüf yoḳdur arada
	b.	Eger maḳṣūd cān ise benüm rūḥum revān olsun*

4.	a.	Göñül gerçekden ol yārı eger sevmezse va'llāhi*
	b.	Senüñ yanuñda ey nāṣıḥ benüm sözüm yalan olsun*

5.	a.	Revānī ʿışḳı cānānuñ beni ġāyet ẕelīl itdi
	b.	Ḳayırmaz ben faḳīr olsam o dilber kāmrān olsun*

-300-

feʿilātün feʿilātün feʿilātün feʿilün

1.	a.	Eşk·i çeşmüm bilinür naẓm·ı güher-bārumdan
	b.	Añlanur baẖt·ı siyāhum ẖaṭ·ı eşʿārumdan

2.	a.	Baña ne naḳş geçüpdür bu felek nerrādı
	b.	Şeş-der·i ġamda gören kimse bilür zārumdan

3.	a.	Kime yanam yaḳılam sīne·i pür-sūzumdan*
	b.	Kime derdüm dökeyin bu dil·i bīmārumdan

4.	a.	Ne ʿaceb elde tehī olmasa bir dem sāġar
	b.	İçdügüm gibi ṭolar dīde·i ẖūn-ẖᾱrumdan

5.	a.	Aġzumuñ dadını uçurdı Revānī ẕillet
	b.	Ḫalḳ şermende iken leẕẕet·i güftārumdan

-301-

fāʿilātün fāʿilātün fāʿilātün fāʿilün

1.	a.	Ārzū·yı cennet itsün rūy·ı dildārın gören
	b.	Cennete lāyıḳ olurmış Kaʿbe dīvārın gören

2.	a.	Pādişāh·ı ʿaṣr olur ḥüsn ü cemālin seyr iden
	b.	Boynu baġlu ḳul olur zülf·i siyehkārın gören

3.	a.	Ṣaġ olur mı ġamze·i mekkārına hemdem olan
	b.	Ḫastelıḳdan ḳurtulur mı çeşm·i seḥḥārın gören

4.	a.	Serv seyrinden ne olur ḳadd·i dilber var iken
	b.	Gül temāşāsın ne‿ider dildār ruẖsārın gören

5.	a.	Nice ḳıymet bulmaya şiʿr·i Revānī dür gibi
	b.	Müşterīdür cān ile naẓm·ı güher-bārın gören

-302-

mefāʿīlün mefāʿīlün mefāʿīlün mefāʿīlün

1.	a.	Göricek rūy·ı dildārı ṣaḳın ol çeşm·i sāḥirden
	b.	Ne dirseñ ey göñül bil kim gelür ol iki kāfirden

2.	a.	Göñül kūyuña varduḳca saña cān tuḥfesin ilter
	b.	Muḳīme armaġān ʿādet durur zīrā müsāfirden

3.	a.	Cihān dilberlerin şimdi ḳucan hep ehl·i dünyādur
	b.	Eṣāġir nice ḥaẓẓ itsün güzel artmaz ekābirden*

4.	a.	Ḫayālüñ aldı göñlümden ḳarārum ṣabrum ārāmum
	b.	Getürdüm öñine ḥāżır ne bulındıyse ḥāżırdan*

5.	a.	Muʿammā ile söylerler güzeller adı çün şimdi
	b.	Revānī ṣanʿatı anlar meger ögrendi şāʿirden*

-303-

fāʿilātün fāʿilātün fāʿilātün fāʿilün

1.	a.	Vaḳtidür ey dil keremler umsañ ol dildārdan
	b.	Ḥamdü li'llāh kim zamāne ẖālīdür aġyārdan

2.	a.	Terbiyetler eyleyüp ben ẖᾱrı ṭopraḳdan götür
	b.	Ehlüñ iḥsānı ile güller bitermiş ẖārdan

3.	a.	Rāygān cümle cihān bezmin muʿaṭṭar eyledüñ
	b.	Ḫoş degül mi būy·ı ẖulḳuñ nāfe·i Tātārdan

4.	a.	Yaz u ḳış güller biter medḥüñ bahāristānıdur
	b.	Yeg degül mi āṣafā ṭabʿum benüm Gülzārdan

5.	a.	Niçe bir ẓulm ide devrān bu Revānī bendeñe
	b.	ʿAdlüñ eyyāmında gerdūn çıḳmasun pergārdan

6.	a.	Maʿrifet ṭopına çevgān ẖāmem olmışdur bu gün
	b.	İşde meydān gelsün uş baḥs̲ eyleyen eşʿārdan

-304-

fāʿilātün fāʿilātün fāʿilātün fāʿilün

1.	a.	Ġāfil olmañ çün şitā irdi şarāb·ı nābdan
	b.	Bir ḳadeḥ mey yeg durur semmūrdan sincābdan

2.	a.	Cām·ı meyden ehl·i diller ẕevḳ iderlerse ne‿ola*
	b.	Ḳış güninde ḥaẓẓ olur ẖurşīd·i ʿālemtābdan

3.	a.	Döşe ʿişret naṭʿını ocaḳ kenārında yüri
	b.	ʿĀrif ol ṣōfī getür seccādeyi miḥrābdan*

4.	a.	Gün gibi elden düşürmezdüñ ṣafā cāmın eger
	b.	Ey müneccim nesne bilseydüñ bu usṭurlābdan*

5.	a.	Gāh mescid ḳapusında geh der·i meyẖāne de
	b.	Ṣōfī anuñçün Revānī dem urur her bābdan*

-305-

feʿilātün feʿilātün feʿilātün feʿilün

1.	a.	Yıllar oldı ki henūz olmadum ol yāra yaḳın
	b.	Āh kim her dem anı görürem aġyāra yaḳın

2.	a.	Dil görüp bendeñ olup ülfete varmaġa velī
	b.	Ölümi geldi meger kim ola ol māra yaḳın

3.	a.	Göñül irdükde işigüñe yüzin sürdügi bu
	b.	Yüz sürer Kaʿbeye lābüd kişi kim vara yaḳın

4.	a.	Yüzi tābında siyeh olduġı zülfi bu kim
	b.	Dāyim olur siyeh ol nesne ki‿ola nāra yaḳın

5.	a.	Zülfi sevdāsını hergiz göñül elden ḳoma kim
	b.	Ger anı aṣmaġa iltürler ise dāra yaḳın

6.	a.	Geçdi bülbül gibi zār ile Revānī ʿömrüñ
	b.	Āh ger olmaz iseñ ol yüzi gül-nāra yaḳın

-306-

mefāʿīlün mefāʿīlün mefāʿīlün mefāʿīlün

1.	a.	Geçürdüñ ẕikri ey ṣōfī bu gün çün çarẖ·ı aʿlādan
	b.	Yaraşur olsa tesbīḥüñ senüñ ʿıḳd·i S̲üreyyādan

2.	a.	Felek farḳına baṣmışdur göñül himmet ayaġını
	b.	Ṣafā·yı ḳalb ile şol kimse kim el çekdi dünyādan*

3.	a.	Göñül miḥrāba geç ebrū temāşāsın yeter eyle
	b.	Niçe bir ḳaş u göz fikri ferāġat ḳıl bu sevdādan

4.	a.	Ḫaṭ u ẖāl ile zeyn olmış cemāli muṣḥafı seyr it
	b.	Güzel ṣūret ẖayālin ḳo ẖaberdār ol bu maʿnādan*

5.	a.	Ferāġat gūşesin hergiz ṣaḳın dünyālara virme
	b.	Bi-ḥamdi'llāh ẖalāṣ olduñ Revānī ḳuru ġavġādan

-307-

fāʿilātün fāʿilātün fāʿilātün fāʿilün

1.	a.	Hīç ḳılmazsın ḥaẕer ḳapuñda olan āhdan
	b.	Ā benüm çoḳ sevdügüm ḳorḳmaz mısın Allāhdan

2.	a.	Menzil·i maḳṣūda irmez pend·i nāṣıḥ gūş iden
	b.	Yol eri ṣormaz ṭarīḳı zāhid·i güm-rāhdan

3.	a.	Altun üsküfle yürür ẖurşīd·i ʿālemtābı gör
	b.	Ögrenelden şīve·i raʿnālıġı sen māhdan

4.	a.	ʿIşḳ ile ben sīnem üzre dāġlar ursam ne‿ola
	b.	Ġāzīler ordusı pürdür ẖayme vü ẖargāhdan

5.	a.	Nice terk itsün Revānī kūyuñuñ seyrānını
	b.	Rind olanlar ẖālī olmazlar temāşāgāhdan

-308-

fāʿilātün fāʿilātün fāʿilātün fāʿilün

1.	a.	Tāb·ı mül güllerle zeyn itmiş cemālüñ gülşenin
	b.	Dōstum odlara urduñ göz göre gül ẖırmenin

2.	a.	Tīr·i āhumdan üşenmiş ey kemān-ebrū felek
	b.	Kim şeb·i fürḳatde geymişdür muṭallā cevşenin

3.	a.	Seng·i miḥnetden gögermiş pāre pāre sīnemi
	b.	Seyr ḳılsun bāġ·ı ʿışḳuñ görmeyenler sūsenin

4.	a.	Ehl·i bezmüñ üstine açıldı cennet revzeni
	b.	Ol melek-rū mest olup çāk itdi çün pīrāhenin

5.	a.	Cāmesi gibi nigārı ḳucmaġ isterseñ eger
	b.	Düş ayaġına Revānī ḳoma elden dāmenin

-309-

mefāʿīlün mefāʿīlün feʿūlün

1.	a.	Cemālüñ pertevin ṣal bize ey gün
	b.	Ola kim başuma gün ṭoġa bir gün

2.	a.	Belürmez zülfüñüñ devrinde ẖaṭṭuñ
	b.	Görinmez gicede zīrā ki dütün

3.	a.	Ġamuñdan dirhem·i eşk eylerem ṣarf
	b.	Kim aḳ aḳça olur ḳara gün içün

4.	a.	Ayaġuñ ṭopraġı ẖoş kīmyādur
	b.	Ki yüzüm sürdügümce eyler altun

5.	a.	Şeb·i fürḳatde yār işitmez āhum
	b.	Varur gerçi ıraġa gicede ün

6.	a.	Gelüp şehrüñde lāle gül-ruẖına
	b.	Ne‿ola öykünse rüstāyī olur bön

7.	a.	Revānīye ḳoluñ sen ḳıl ḥamāyil
	b.	Günāhı var ise boynuma olsun

VĀV

-310-

fāʿilātün fāʿilātün fāʿilātün fāʿilün

1.	a.	Geldi ẖaṭṭuñ ḳılma ʿuşşāḳa cefā şimden girü
	b.	Saña luṭf itmek düşer ey bī-vefā şimden girü

2.	a.	Oḳın atdı yayını yaṣdı ḳaşuñla kirpügüñ
	b.	Kişver·i dilde ne ḥācet yayḳara şimden girü

3.	a.	Ol ḥarāmī dōstum virmez bilişlik çün bize
	b.	Olmayam bir dilber ile āşinā şimden girü*

4.	a.	Çün baña Tañrı selāmın virmedi ol nāzenīn
	b.	Ben de ayruḳ baḳmayam andan yaña şimden girü*

5.	a.	Çār-ebrū bir güzel sevdi Revānī çün göñül
	b.	Çār mıṣraʿ çaġıram ben bī-nevā şimden girü

-311-

mefāʿīlün mefāʿīlün feʿūlün

1.	a.	Saña öykündügiyçün serv·i dil-cū
	b.	Ḳılıç çekdi gülistānda aña ṣu

2.	a.	Dükān açdı göñül bāzār·ı ġamda
	b.	Ki sīnem dāġıdur keff·i terāzū

3.	a.	Lebüñ emdükce ḳalmaz dilde ẖavfüm
	b.	Ḳomaz mey kişinüñ göñlinde ḳorḳu*

4.	a.	Ne‿ola kār itse cāna vaṣf·ı ḳaddüñ
	b.	Gelür oḳdan ḳatı söz olsa ṭoġru

5.	a.	Revānīye teraḥḥum ḳılmaġ içün*
	b.	Görüp bī-raḥm idügüñ ey cefā-ẖū

6.	a.	Çınār el ḳaldırup ider duʿāyı
	b.	Ḳara ṭopraḳlara yüzin sürer ṣu*

-312-

feʿilātün feʿilātün feʿilātün feʿilün

1.	a.	Ne‿ola dirlerse baña ʿāşıḳ·ı şeydādur bu*
	b.	Hele dirler saña da dilber·i raʿnādur bu*

2.	a.	Her denīnüñ sözine uyma beni itme helāk
	b.	Olma maġrūr begüm ḥüsnüñe dünyādur bu*

3.	a.	Kimi aġlar kimi iñler kimi feryād eyler
	b.	Bilmezem kūy·ı ḥabībümde ne ġavgādur bu

4.	a.	Baḳamaz kimse güneş yüzine gözler ḳamaşur
	b.	Kişinüñ ʿaḳlı gider özge temāşādur bu

5.	a.	Vaṣf·ı ẖaddüñle gören şiʿr·i Revānīyi didi
	b.	Bāġ·ı cennetde açılmış gül·i raʿnādur bu

-313-

mefāʿīlün mefāʿīlün mefāʿīlün mefāʿīlün

1.	a.	Uṣanmaz ʿışḳdan göñlüm ṣanasın nev-hevesdür bu
	b.	Sever gördügi dildārı dimez birine besdür bu

2.	a.	Ṭarīḳ·ı Kaʿbe·i kūyında göñlüm dāyimā nālān
	b.	Meger kim maḥmil·i cānāne içün bir ceresdür bu

3.	a.	Leb·i şīrīni üstinde görinen ẖaṭ mıdur yā Rab
	b.	Ya ḳalmış engübīn üzre meger pāy·ı megesdür bu

4.	a.	Ne ṭūṭīdür ʿaceb cān kim aña ʿarş āşiyān olmış
	b.	Bu çarẖ·ı ābenūsī kim görinür bir ḳafesdür bu*

5.	a.	Revānī bezm·i dilberde el üzre ṭutuñuz nāyı
	b.	Ki cānlar ḥaẓẓ ider andan be-ġāyet ẖoş-nefesdür bu

-314-

fāʿilātün fāʿilātün fāʿilātün fāʿilün

1.	a.	Ṭaġlara düşmiş yürür Mecnūn-veş āvāre ṣu
	b.	Bir ṣaçı Leylī gözi āhū içün bī-çāre ṣu*

2.	a.	Eşk·i çeşmüm mācerāsından es̲er bulmış gibi
	b.	Yüzini sürmiş geçer kūyında her dīvāra ṣu*

3.	a.	Laʿl·i yāra cān virürken baña pendüñ nāṣıḥā
	b.	Gūyiyā şeyṭān ṣunar īmān içün bīmāra ṣu

4.	a.	Gülşen·i ḥüsni ʿaraḳ-rīz oldı ṣanmañ kim anuñ
	b.	Serv-ḳaddi ārzūsına gelür Gülzāra ṣu*

5.	a.	Ey Revānī ben nice aġlamayayın zār zār
	b.	Şol perī-rūyı görelden başlamışdur zāra ṣu*

HĀ

-315-

mefʿūlü fāʿilātü mefāʿīlü fāʿilün

1.	a.	Açılmaz idi ġonca leb·i yārum olmasa
	b.	Bülbül ne söyler idi ki güftārum olmasa

2.	a.	Altunlu şemse yazmaz idi cild·i çarẖa şems
	b.	Mecmūʿa·i zamānede eşʿārum olmasa

3.	a.	Düşmezdi göz ḳızardubanı ġālibā göñül
	b.	ʿIşḳ āteşine dīde·i ẖūn-bārum olmasa

4.	a.	Gün ṭoġmaz idi başuma devr·i zamānede
	b.	ʿĀlemde şems·i ṭalʿat·i dildārum olmasa

5.	a.	Kimse Revānī bulmaz idi aġzı dadını
	b.	Vaṣf·ı lebiyle naẓm·ı şeker-bārum olmasa

-316-

feʿilātün feʿilātün feʿilātün feʿilün

1.	a.	Ḳaldı baġlandı göñül zülf·i perīşānuñda
	b.	Cān esīr oldı düşüp çāh·ı zenaẖdānuñda

2.	a.	Devr·i ḥüsnüñde ḳomaduñ ruẖuñı seyr idevüz
	b.	Degmedük bir güle beñzer ki senüñ yanuñda

3.	a.	Ḫūb olur gerçi şeker-lebler ile ṣoḥbet·i mey
	b.	Dadın uçurdılar öpüşmeyeli anuñ da

4.	a.	Ġonca üstinde ṣanasın kim iki noḳṭa durur
	b.	Şol iki ẖāl ki düşmiş leb·i ẖandānuñda*

5.	a.	Ḫoş ṭut ey serv Revānīyi ruẖuñ gülşen iken
	b.	Ḳanı bir bülbül anuñ gibi gülistānuñda*

-317-

mefʿūlü fāʿilātü mefāʿīlü fāʿilün

1.	a.	Her dem geçer güneş yine ol pādişā ile
	b.	Ḫıdmet içün yanaşdı meger aña ay ile

2.	a.	Bir kerre sögdi aġzuma bir demde laʿl·i yār
	b.	Bir būsesini aldum idi biñ belā ile

3.	a.	Uġurlayın gelür gider ey dōst kūyuña
	b.	Āhum ne toz ḳopara göresin ṣabā ile*

4.	a.	Yoldan geçerken āhum işitdi didi nigār
	b.	Bī-çāre ʿömrini geçürür āh u vāy ile*

5.	a.	Meyl eylemez Revānī baña yār·ı meh-liḳā
	b.	Kim yılduzı barışmadı ben mübtelā ile

-318-

feʿilātün feʿilātün feʿilātün feʿilün

1.	a.	Baş ḳoşaydum diyüben zülf·i semen-sālar ile
	b.	Sāye-veş ḳaldum ayaḳda ḳurı sevdālar ile

2.	a.	Raḳṣ urur yine feraḥdan ne‿ola meclisde ḳadeḥ
	b.	Dāyimā ṣoḥbet ider dilber·i raʿnālar ile

3.	a.	Kūyuñ içre işidüp itlerüñ āvāzesini
	b.	Ṭoldı gülşen ṣanuram bülbül·i gūyālar ile

4.	a.	Didi eṭrāfını encüm yine ṭutmış ḳamerüñ
	b.	Yārı bāġ içre gören nergis·i şehlālar ile

5.	a.	Ehl·i dil sāġara ḳılmaz çü Revānī raġbet
	b.	Leb-be-leb olmasalar laʿl·i şeker-ẖālar ile

-319-

fāʿilātün fāʿilātün fāʿilātün fāʿilün

1.	a.	Bī-ḳarār eylerdi ġam her dem beni cām olmasa
	b.	Göñlüm ārām eylemezdi ger dilārām olmasa

2.	a.	Pādişāhum rūşen olmazdı sarāyı göñlümüñ
	b.	Dāġ·ı mihrüñ sīnede yer yer aña cām olmasa

3.	a.	Puẖteler meyden beni menʿ itmege gör zāhidi
	b.	İstimāʿ itmek olurdı sözini ẖām olmasa*

4.	a.	Sāḳıyā bir būseñ ile ḳul idindüñ göñlümi
	b.	Pādişehden bendeye ne‿olurdı inʿām olmasa

5.	a.	Āl ile almaz idüñ göñlin Revānī bendeñüñ
	b.	Ḳāmetüñ cānā elif zülfüñ eger lām olmasa*

-320-

mefʿūlü fāʿilātü mefāʿīlü fāʿilün

1.	a.	Ḳan aġlasam ḳapuñda ne‿ola āh u vāy ile
	b.	Ḫoşdur şarāb ṣoḥbeti ey dōst nāy ile

2.	a.	Her gün güneş ḳapuñdadur ey meh ḳuluñ gibi
	b.	Ḫıdmet içün yanaşdı saña beñzer ay ile

3.	a.	Biñ kerre sögdi aġzuma bir demde ol nigār
	b.	Bir būsesini alımadum biñ belā ile

4.	a.	Uġurlayın gelür gider ey dōst kūyuña
	b.	Bir gün ne toz ḳopar göresin sen ṣabā ile

5.	a.	Ṭaʿn eyleme Revānīye her gün içer diyü
	b.	Nāzükdür ol ki ʿömri geçürür ṣafā ile

-321-

feʿilātün feʿilātün feʿilātün feʿilün

1.	a.	Zülfi yāruñ ki sürer yüzin o ẖāk·i ḳademe
	b.	Beñzer ol kāfire düşmiş ola pāy·ı ṣaneme

2.	a.	Yazmaduġum güzelüm nāmeye ḥālüm bu ki ben*
	b.	Ḳorḳaram dimege rāzum iki dillü ḳaleme

3.	a.	Dili kūyında görüp ḳılma göñülden aña ḳaṣd
	b.	Ṭaş atılmaz güzelüm Kaʿbede murġ·ı ḥareme*

4.	a.	Sāḳıyā her kişiyi çünki beg eyler mey·i nāb
	b.	Pādişālıḳ idelüm sen de el ur Cām·ı Ceme*

5.	a.	Ġam yime hīç Revānī ḳoma elden ḳadeḥi
	b.	Çün bilürsin ki ḳadeḥ oldı siper tīr·i ġama

-322-

mefʿūlü mefāʿīlü mefāʿīlü feʿūlün

1.	a.	Her kişi hilāle ne‿ola eylerse neẓāre
	b.	Bir pāre odur beñzeyen ebrū·yı nigāra

2.	a.	Evvel baña ʿarż itdi ḳaşuñ niçe maḥabbet
	b.	Āẖir ṣanemā göñlüm alup çıḳdı kenāra

3.	a.	Göñüllenüben kendüyi yüksekde ḳomasun
	b.	Bostānda boyuñ servini ʿarż eyle çınāra*

4.	a.	Aẖşamlamadı bir gice ol māh bizümle
	b.	Ey dil ne ḳılalum ne‿idelüm vāy bu sitāre

5.	a.	Yanup yaḳılup āteş·i şevḳ ile Revānī
	b.	Ḥālin diyemez ne‿eylesün ol lāle-ʿiẕāra

-323-

mefāʿīlün mefāʿīlün mefāʿīlün mefāʿīlün

1.	a.	Sipāhī dilberi gibi geyer rengīn ḳabā lāle
	b.	Ki ṭaḳmış gögsine anuñ gümişden tügmeler jāle*

2.	a.	Ḥarāret irmese sāḳī şu laʿl·i āteşīnüñden
	b.	Ḥabāb·ı meyden olmazdı leb·i sāġarda tebẖāle

3.	a.	Cemāli ʿaksini yāruñ görenler āyine içre
	b.	İḥāṭa eylemiş ṣanur ḳamer eṭrāfını hāle

4.	a.	Felekler her gice kūyın ṭoḳuz ṭolanur ol māhuñ
	b.	Ayuñ on dördine dönmiş nigār·ı çārdeh-sāle*

5.	a.	Revānī ẖaste olmışdur leb·i dildār içün luṭf it
	b.	Devāsın ṣor Mesīḥādan göge çıḳduḳda ey nāle*

-324-

fāʿilātün fāʿilātün fāʿilātün fāʿilün

1.	a.	Ḳanda kim şevḳ·ı ruẖuñla eylesem bir odlu āh
	b.	İdinür āteşperest olanlar anı ḳıblegāh

2.	a.	Aġlamaḳdan ʿāşıḳ·ı miskīnüñ aġarmış gözi
	b.	Ḫāl·i ruẖsārı güneşde yatmadan olmış siyāh

3.	a.	Yār cevriyle yıḳıldı āh göñlüm kişveri
	b.	Memleket maʿmūr olmaz ẓālim olsa pādişāh

4.	a.	Devlet·i ḥüsnüñde ben mülk·i belā sulṭānıyam
	b.	Nāle ṭablumdur ʿalem āhum gözüm yaşı siyāh

5.	a.	Ne uñulmaz derde uġramış Revānī ey ṭabīb
	b.	Ḫaste olup ʿışḳ elinden dāyim eyler āh u vāh*

-325-

fāʿilātün fāʿilātün fāʿilātün fāʿilün

1.	a.	Ḫaṭṭını dilber tırāş itdükce olur pādişāh
	b.	Ḫūbluḳ mülkini ḍarb·ı tīġ ile eyler nigāh

2.	a.	Dün ġarībüñdür diyü kūyuñ ṭolanur tā seḥer
	b.	Dōstum ḥikmet budur şebrevlik itdügine māh

3.	a.	Ḥüsnüñüñ cānā birin on itdi ol ḳadd ü dehān
	b.	Ol sebebdendür ki eyler ʿāşıḳ·ı dil-ẖaste āh*

4.	a.	Yaşumı sīm eyleyüp yüzümi altun eyledi
	b.	Yine bir sīmīn kemerlü yine bir zerrīn-külāh*

5.	a.	Ḫaste ḳılmışdur Revānīyi dehānuñ ḥasreti
	b.	Sevdügüm yoḳ yire ölsün mi yazuḳ bir bī-günāh

6.	a.	Didiler kime ḳul olmışsın didüm bir ẖᾱceye
	b.	Didiler kimdür efendüñ ben didüm bir pādişāh

-326-

fāʿilātün fāʿilātün fāʿilātün fāʿilün

1.	a.	Tāze ẖaṭ gelmiş ne‿idem laʿl·i leb·i cānānuma
	b.	Ḳanda ise bir belā eksük degüldür cānuma

2.	a.	Dōstum sāyem durur kim görmege ben ẖasteñı
	b.	Şemʿ ile her dem gelür ġam gicesinde yanuma*

3.	a.	Bülbül·i şūrīdenüñ cānā bilürdüñ ḥālini
	b.	Gül gibi ṭutsañ ḳulaḳ bu nāle vü efġānuma*

4.	a.	Ben ḥasedden ölürin ṭolu içüp öpüşse yār
	b.	Dōstlar ol ġonca-leb göz göre girdi ḳanuma*

5.	a.	Şöyle vaṣf itdüm Revānī dişleri vaṣfını kim
	b.	Āferīn oḳur gören bu naẓm·ı dür-efşānuma*

-327-

fāʿilātün fāʿilātün fāʿilātün fāʿilün

1.	a.	Yār olmaz ṭāliʿüm bulışmasam cānānuma
	b.	Başuma gün ṭoġmasa sāyem de gelmez yanuma

2.	a.	Zülfüñüñ meftūli boynında ne ẖoş abdāl olur
	b.	Tekye·i miḥnetde ʿışḳ olsun dil·i ḥayrānuma*

3.	a.	Her ne deñlü göñlüme cevr ü cefālar eyleseñ*
	b.	İncinür ṣanma beni minnet görürin cānuma

4.	a.	Niçe niçe ḥayf idüpdür ben ḳuluña rūzgār
	b.	Dād içün feryād içün geldüm bu gün sulṭānuma*

5.	a.	Rūy·ı zerdümden Revānī bu nişān yetmez mi kim
	b.	Şemse·i zer naḳş olınmış levḥa·i dīvānuma*

-328-

feʿilātün feʿilātün feʿilātün feʿilün

1.	a.	Dişlemişler ne ḳılalum leb·i cānānı yine
	b.	Ellemişler bu gice ol gül·i ẖandānı yine

2.	a.	Ṣu gibi ʿömri ṣafā ile geçer ʿālemde
	b.	Kim kinār itdise şol serv·i ẖırāmānı yine*

3.	a.	Baña cānum ḳayısıdur saña şeftālū göñül
	b.	Kim ıṣırdı ʿaceb ol sīb·i zenaẖdānı yine

4.	a.	Ḳanḳı bezm ehline yā Rab lebi sāḳīlıġ ider
	b.	Ḳanda reyḥāncı iki zülf·i perīşānı yine

5.	a.	Bilmezin kimler ile seyr ider ol māh-liḳā
	b.	Niçe gündür ki Revānī göremez anı yine

-329-

fāʿilātün fāʿilātün fāʿilātün fāʿilün

1.	a.	Görmedüm ẖaṭṭuñ gibi bir verd·i aḥmer tāzece
	b.	Olmaya ḳaddüñ gibi serv ü ṣanevber tāzece*

2.	a.	Zīnet·i gülşen çemendür ḳoma göñlüñde ġubār*
	b.	Geldügince ẖaddüñe ẖaṭṭ·ı muʿanber tāzece*

3.	a.	Tāb·ı mülden devr·i ḥüsnüñde ḳızarmış ruẖlaruñ
	b.	Ṣoñbahār eyyāmıdur açıldı güller tāzece

4.	a.	Ḳıldı ẖoş būy ile cān bezmin muʿaṭṭar ẖaṭṭ·ı yār
	b.	Būyı olurmış ziyāde olsa ʿanber tāzece

5.	a.	Tāzedür diyü göñül virme Revānī aldanup
	b.	ʿĀşıḳuñ ḳadrini bilmez olsa dilber tāzece

-330-

mefʿūlü fāʿilātü mefāʿīlü fāʿilün

1.	a.	Yüz virmiş idi ʿāşıḳa devrān geçen gice
	b.	Kim bezmümüzde şemʿ idi cānān geçen gice

2.	a.	Sūsen ṣurāḥī cām gül ü ġonca nuḳl idi
	b.	Bezm olmış idi tāze gülistān geçen gice

3.	a.	Taẖt·ı revāna binmiş idi beg olup şarāb
	b.	Sancaḳ çekerdi şemʿ·i şebistān geçen gice

4.	a.	Sāḳī ṣurāḥī ḳalʿasınuñ mehteri olup
	b.	Nevbet çalardı naʿra·i mestān geçen gice*

5.	a.	Gün ṭoġmayınca ḳomaduḳ elden piyāleyi
	b.	Cām·ı şarāb idi meh·i tābān geçen gice

6.	a.	Bilsek nedür ḥarāmī midür bu Revānī kim
	b.	Ṣoyup nigārı eyledi ʿuryān geçen gice

-331-

feʿilātün feʿilātün feʿilātün feʿilün

1.	a.	Def ṭutar ay ile gün dem-be-dem āhengümüze
	b.	Zühre raḳḳāṣ olursa yaraşur çengümüze

2.	a.	Nice ṣāfī-dil olur ṣoḥbeti terk itmez mey
	b.	Ki ḥarīf olmasa girmezdi bizüm rengümüze

3.	a.	Ġonca gibi yaḳalar çāk iderüz ṣoḥbetde
	b.	Sāḳī ne ḳatdı ola bāde·i gül-rengümüze

4.	a.	Tekye·i ʿışḳ içinde yatur abdāllaruz
	b.	Kimse daẖl eylemesün mestümüze bengümüze

5.	a.	Ṣatılur Mıṣr·ı belāġatde Revānī sözümüz
	b.	Her kişi müşterīdür şiʿr·i şeker-tengümüze

-332-

feʿilātün feʿilātün feʿilātün feʿilün

1.	a.	Subḥ-dem zīnet idüp ẖaddini gīsūlar ile
	b.	Bāġ·ı ḥüsnini ṭonatmış yine şebbūlar ile*

2.	a.	Germ olup çün dem urur mey leb·i gülgūnuñdan
	b.	Sāḳıyā içmelüdür anı yiyer ṣular ile*

3.	a.	Zühd ü taḳvāyı bozan lāle vü gül ṣoḥbetidür
	b.	Yoldaş olmalu degülmiş delüḳanlular ile

4.	a.	Ṭapu ḳılur saña ʿīd ayı gibi meh-rūlar
	b.	Merḥabā eyleyicek gūşe·i ebrūlar ile

5.	a.	Kāġıda yazsa Revānī ruẖ u zülfüñ vaṣfın
	b.	Gülşen·i Rūmı yazar sünbül·i hindūlar ile

-333-

mefʿūlü mefāʿīlü mefāʿīlü feʿūlün

1.	a.	Ol dilberi ey dil ḳoma aġyār arasında
	b.	Bir gül ne revādur ki ḳala ẖār arasında*

2.	a.	Görmek dilemez dil seni aġyār arasında
	b.	Gerçi kim olur şemʿ şeb·i tār arasında *

3.	a.	Cevr ile cihānda güzelüm ad çıḳarduñ
	b.	Sensin añılan şimdi cefākār arasında*

4.	a.	Beñzerdi saña ḥüsn ile ẖurşīd·i cihāntāb
	b.	Hercāyī olup gezmese bāzār arasında

5.	a.	Yāruñ ki geçer gözleri āşüftesi ṣōfī
	b.	Bir eblehe beñzer iki ʿayyār arasında*

6.	a.	Ortaya alupdur leb·i ẖandānını zülfi
	b.	Ḍaḥḥāk gibi ḳalmış iki mār arasında*

7.	a.	Dil almaġa miḥnet mi çeker yār Revānī
	b.	Olur mı tekellüf hīç iki yār arasında

-334-

fāʿilātün fāʿilātün fāʿilātün fāʿilün

1.	a.	Ṭañ degüldür olmasa meclisde cānān her gice*
	b.	Ey göñül aẖşamlamaz çün māh·ı tābān her gice

2.	a.	Nice gün ṭoġmaya çarẖuñ başına her ṣubḥ kim
	b.	Meh gibi dilber yatur ḳoynında ʿuryān her gice

3.	a.	Ḥasret·i zülf ü zenaẖdānuñla ey Yūsuf-cemāl
	b.	Çaġrışup feryād iderler ehl·i zındān her gice

4.	a.	Meclisüñde ṣubḥ olınca yanuban yaḳılmaġa
	b.	Mūmdur ey māh-rū şemʿ·i şebistān her gice

5.	a.	Ḥöcreñ olmışdur Revānī dilrübālar meskeni
	b.	Eksük olmaz tekyedür elbette mihmān her gice*

-335-

mefʿūlü fāʿilātü mefāʿīlü fāʿilün

1.	a.	Dil seyr ider güzeller ile bir kenārda
	b.	Şol ṣu gibi ki ṭurmaz aḳar lālezārda

2.	a.	Ḫandān olursa yārı görüp ne‿ola ẖūblar
	b.	Güller ʿaceb degül açılursa bahārda

3.	a.	Bu şehr içinde saña ne‿ola raġbet itseler
	b.	Merġūb olur güzel ṣanemā her diyārda

4.	a.	Öykünmez idi laʿlüñe bezmüñde sāḳıyā
	b.	Keyfiyyet olmasaydı mey·i ẖoş-güvārda

5.	a.	Görüp Revānī yārı raḳīb ile didi kim
	b.	Bir şādī yoḳ ki ġamsuz ola rūzgārda

-336-

mefʿūlü fāʿilātü mefāʿīlü fāʿilün

1.	a.	Māh öykünürse ey yüzi gül ḥüsnüñ ayına
	b.	Olsun siper ḳażāya vü varmasun ayına

2.	a.	Keklik gibi hemān ṭaġıdur ḳara gözlü yār
	b.	Şāhīn gibi ki gire güzeller alayına*

3.	a.	ʿIşḳuñda dil kemānkeş olup dūd·ı āhdan
	b.	Ṭaḳsa ʿaceb degül kirişi çarẖ yayına

4.	a.	Ḳoma ʿarūs·ı ḥüsnüñe maḥrem geçe anı
	b.	Bir boġazından aṣılacak durur āyine

5.	a.	Ṣanma Revānī gögsine şevḳuñla urdı dāġ
	b.	Bir şemse yazdı yine maḥabbet sarāyına

-337-

mefʿūlü fāʿilātü mefāʿīlü fāʿilün

1.	a.	ʿĀşıḳlarını ḳomaġ içün ıżṭırābda
	b.	Nüsẖa yazar ẖaṭı şeref·i āfitābda

2.	a.	Her laḥẓa meclis ehline ayaḳ ṭolar yürür
	b.	Çoḳdur ḥarāmzādelik ey dil şarābda

3.	a.	Dilberler ile ṣoḥbet idüp mey içün diyü
	b.	Söyler zebān·ı ḥāl ile çeng ü rebāb da

4.	a.	Bir ẕerre deñlü luṭfını biñ kez ḥisāb ider
	b.	Ammā cefāsı hīç ṣayılmaz ḥisābda*

5.	a.	Öpüşme ile ṣınmaz imiş dōstum oruç
	b.	Görmiş Revānī bendeñ anı bir kitābda

-338-

feʿilātün feʿilātün feʿilātün feʿilün

1.	a.	Yine cevşen geyürüp tīrüñ ucından tenüme
	b.	Cebeyi göstereyin ölmez isem düşmenüme

2.	a.	Ölicek bārī ṣurāḥī ḳıluñuz ẖākümden
	b.	Ḳoya tā sāḳī·i gül-ruẖ ḳolını gerdenüme

3.	a.	Bilmezem kūyuñ itine ne günāh eyledügüm
	b.	Ki benüm çekdi çevürdi yapışup dāmenüme

4.	a.	Ḫāṣılum bād·ı hevā āh·ı seḥer-ẖīzümden
	b.	Yaşumuñ ḳaṭraları dāne durur ẖırmenüme

5.	a.	Lāle ayaġa düşüp güller öperdi elini
	b.	Yār seyrān iderek gelse eger gülşenüme

6.	a.	Bir ḳalender güzelin sevdi Revānī yine dil
	b.	Ṭaḳdı zencīr·i cefāsını ne‿idem gerdenüme

-339-

fāʿilātün fāʿilātün fāʿilātün fāʿilün

1.	a.	Vardı bu göñlüm yine ġamzeñ bıçaġın almaġa
	b.	Sanki bir bīkārdur gitdi yaraġın almaġa

2.	a.	Ne‿eylemişdür bilmezem sāḳī bu bezm ehline kim
	b.	Her biri ḳaṣd eylemiş durur ayaġın almaġa*

3.	a.	Bezm·i ḥüsnüñde gözüñ beñzer şarāb içmek diler
	b.	Kim ẖayālüñ geldi bu göñlüm ḳabaġın almaġa*

4.	a.	Cāna rāḥat mı gelür ṣaḳlar çü dilber būsesin
	b.	Rāżī olmaz aġzuma bir dem ṭudaġın almaġa

5.	a.	Dilde dāġ·ı mihrini ister Revānī ġamzesi*
	b.	Uġrıdur kim tekyenüñ gelmiş çerāġın almaġa

-340-

mefʿūlü fāʿilātü mefāʿīlü fāʿilün

1.	a.	Ḫaṭṭuñ ki şerḥ yazdı güzellik kitābına
	b.	Erbāb·ı fażl rāzī degül intiḥābına

2.	a.	Sermāye çün güzelde hemān ḳaş u göz durur
	b.	Yāruñ dehānını ṭutuñuz yoḳ ḥisābına

3.	a.	Bir āsumānī cāme geyer ẖūba ʿāşıḳuz
	b.	Hergiz baş egmezüz felegüñ āfitābına

4.	a.	Yāruñ ṭavāf·ı Kaʿbe·i kūyında ḳoñ beni
	b.	Zāhid murād girmek ise ḥac s̲evābına

5.	a.	El ḳavşurup sebū gibi ẖıdmetdedür müdām*
	b.	Düşdi Revānī Edrinenüñ küp şarābına*

-341-

feʿilātün feʿilātün feʿilātün feʿilün

1.	a.	Çoḳ leṭāfet var anuñ ḳadd·i serefrāzında
	b.	Çoḳ ẓarāfet görinür şīve ile nāzında

2.	a.	Sāḳıyā ṣun berü az az içelüm cām·ı meyi
	b.	Çünki ḳonmışdur anuñ ẖāṣṣası azında*

3.	a.	Bir yaña yine ḳanat bükdi göñül şehbāzı*
	b.	Ġālibā ṣayd görüpdür yine pervāzında

4.	a.	Dil·i serkeş yedilür bir ḳıl ile ṣoḥbetde
	b.	Muṭribüñ siḥri mi vardur ʿacebā sāzında*

5.	a.	Gözine ḳaşına aldanma Revānī yāruñ
	b.	Fitnesi çoḳdur anuñ ġamze·i ġammāzında

-342-

mefāʿīlün mefāʿīlün mefāʿīlün mefāʿīlün

1.	a.	Lebi üzre ṭılısm ancaḳ görinen ẖaṭṭ·ı cānāne
	b.	Yazılmış ism·i aʿẓamdur meger mühr·i Süleymāna

2.	a.	Ne‿ola ḳurbān olurlarsa senüñ yoluñda ʿāşıḳlar
	b.	Bu üslūb üzre gelmişdür erenler hep bu meydāna

3.	a.	Görinen māh·ı nev ṣanmañ ḳamer kūyın ṭolanmaġa
	b.	O zerrīn şeb-külāhını ḳıvırmışdur levendāne

4.	a.	Benümçün geh şarāb içer gehī oġlan sever dirsin
	b.	Ne virdüñ sen alımazsın be ṣōfī bir müselmāna

5.	a.	Dil·i ʿāşıḳ ceres gibi fiġān itse ʿaceb olmaz
	b.	Güzel ṣūretler ile çün müzeyyendür bu bütẖāne*

6.	a.	Ne devletdür bu yā Rab kim gedā·yı kūy·ı ʿışḳ olan
	b.	Maḥabbet taẖtgāhına geçüpdür pādişāhāne

7.	a.	Revānī kūy·ı dilberdür temāşāgāhı ʿuşşāḳuñ
	b.	Bahār olduḳca ʿārifler varurlar bāġa seyrāna

-343-

fāʿilātün fāʿilātün fāʿilātün fāʿilün

1.	a.	Hīç el ṣunmazdı çarẖuñ māh·ı tābān ḳoynına
	b.	Şiʿrümüñ mecmūʿasın ḳoymasa devrān ḳoynına

2.	a.	Her ne cevrüñ kim ola dünyāda incinmez göñül
	b.	Girme tek dünyā gibi luṭf eyle nādān ḳoynına

3.	a.	Ben seni öpüp ḳucarsam dōstum incinme kim
	b.	Ne ziyān itdi girenler ehl·i ʿirfān ḳoynına*

4.	a.	Ḳuzuyı ḳurda yidürme gel benüm çoḳ sevdügüm
	b.	Hīç tereddüd eyleme girmege yārān ḳoynına

5.	a.	Siḥr ider dīvān·ı eşʿār·ı Revānī ġālibā*
	b.	Kim tekellüfsüz girer her laḥẓa cānān ḳoynına

6.	a.	Yār·ı mevzūn-ḳadd ü miskīn-ẖaṭ durur şiʿrüm benüm
	b.	Dāyim anuñçün ḳoyar defterle dīvān ḳoynına*

-344-

mefāʿīlün mefāʿīlün mefāʿīlün mefāʿīlün

1.	a.	Bahār oldı yine lāle ele cām aldı rindāne
	b.	Benefşe şeb-külāhını ḳıvırmışdur levendāne

2.	a.	Ḥabāb·ı mey gibi zāhid virüben bādeye tācın*
	b.	İçer rind·i cihān olmış gezer meyẖāne meyẖāne *

3.	a.	Ṭutup meclisde dildārı güc ile būsesin almış
	b.	Ḳosun bi'llāhi ey sāḳī ḥarāmīlıġı peymāne*

4.	a.	Murabbaʿlar geyüp ṣofī müs̲elles̲ nūş ider dāyim
	b.	Geçüp meyẖāne ṣadrında oturmışdur emīrāne

5.	a.	Revānī ʿārif ol elden düşürme ẖātem·i cāmı
	b.	Bilürsin bāḳī ḳalmadı cihān mülki Süleymāna*

-345-

feʿilātün feʿilātün feʿilātün feʿilün

1.	a.	Didüm ol yāra göñül ẖaste meded dārūya
	b.	Didi hīç beñzemez ancaḳ ölecek ṣayruya

2.	a.	Seng·i māh ile felek dögmez idi sīnesini
	b.	ʿĀşıḳ olmasa o gün yüzlü hilāl-ebrūya*

3.	a.	Çeke gör sīneñe ol yār·ı kemān-ebrūyı
	b.	Ey göñül ḳuvveti saʿy eyle getür bāzūya*

4.	a.	Sīnemüñ dāġı baña yār·ı ḳamer-çihremdür
	b.	Kim anı ben gice gündüz ṣararın pehlūya*

5.	a.	Kendüden gitse Revānī ne‿ola ʿışḳuñla müdām
	b.	Mestlik ḥāleti iltür kişiyi uyẖuya*

6.	a.	Ne içün baş ḳoşasın ġamze·i ẖūnrīze göñül
	b.	ʿĀḳil olan kişi uyar mı delüḳanluya*

-346-

feʿilātün feʿilātün feʿilātün feʿilün

1.	a.	Güller açıldı yine ġayret·i ruẖsārın ile
	b.	Sünbülüñ bitdi işi ṭurra·i ṭarrāruñ ile

2.	a.	Geldügince ḳapuña bir yaña elbette ṣavar*
	b.	Ḥāli yatlu güneşüñ sāye·i dīvāruñ ile*

3.	a.	Devletüñde güzelüm ṭutdı yükin nāfe·i misk
	b.	Ḳıldı bāzārı çün ol zülf·i siyehkāruñ ile*

4.	a.	Ne ḳadar teng-dil olursa bu cān ṭūṭīsi
	b.	Söyledürsin sen anı laʿl·i şeker-bāruñ ile

5.	a.	Beñzedürsin boyını serve ruẖın māha göñül
	b.	Yere göge ṣıġamazsın hele sen yāruñ ile*

6.	a.	Ḫacletinden yere geçdi güzelüm serv·i sehī
	b.	Seni gülşende görüp şīve·i reftāruñ ile*

7.	a.	Çıñ çıñ öterse Revānī ne ʿaceb ṭās·ı felek
	b.	Ṭoldı çün ʿālem içi naġme·i eşʿāruñ ile

-347-

fāʿilātün fāʿilātün fāʿilātün fāʿilün

1.	a.	Adı çıḳmazdı lebüñe ġonca adaş olmasa
	b.	Serv raʿnālanmaz idi saña boydaş olmasa*

2.	a.	Boynı urılmazdı şemʿüñ olmasa āteşperest
	b.	Sāġaruñ ḳanı içilmezdi ḳızılbaş olmasa

3.	a.	Ṭāḳ·ı ḥüsnüñ kimse ḳılmazdı temāşāsın eger
	b.	Dōstlar medd·i baṣar ol göz ile ḳaş olmasa

4.	a.	Gögsüme ṭaş urduġumca raḥm iderlerdi baña
	b.	Bī-vefā dilberlerüñ baġrı eger ṭaş olmasa

5.	a.	ʿĀlemüñ ẖalḳını ʿāşıḳ eyledi taṣvīrine
	b.	Şehr·i dilberde Revānī hīç naḳḳāş olmasa

-348-

mefāʿīlün mefāʿīlün mefāʿīlün mefāʿīlün

1.	a.	Düşüp bend·i ser·i zülfe sitemkār olmasun kimse* *
	b.	İlāhī kāfiristāna giriftār olmasun kimse*

2.	a.	Ḥabāb·ı mey gibi başdan çıḳar āvāresi āẖır*
	b.	Hey ol gül yüzlü sāḳīye hevādār olmasun kimse

3.	a.	Şarāb içer diyü ḳanlu çıḳarduñ cümle ʿuşşāḳı
	b.	Senüñ yanuñda ey ṣōfī günehkār olmasun kimse

4.	a.	Egerçi ḥüsn dükkānı yüzin zeyn itdi dilberler
	b.	Bu bāzāruñ metāʿına ẖarīdār olmasun kimse*

5.	a.	Maḥabbet cāmını sāḳī senüñ ʿışḳuña nūş itdük
	b.	Bu bezm·i ʿışḳdur bunda ḳo hüşyār olmasun kimse*

6.	a.	Murādum naḳşını hergiz getürmez ṭāsı gerdūnuñ
	b.	İlāhī şeş-der·i ġamda ḳalup zār olmasun kimse*

7.	a.	Şarāb içmek güzel sevmek Revānī ṣanʿat olmışdur
	b.	Benüm āvāre göñlüm gibi bīkār olmasun kimse*

-349-

mefʿūlü fāʿilātü mefāʿīlü fāʿilün

1.	a.	Dīdār görelüm gel e ey meh-liḳā gel e
	b.	Aẖşamlamaġa bir gice bizden yaña gel e

2.	a.	Deryā·yı ġam bizi umaruz itmeye helāk*
	b.	Sāḳī Ḫıżırlıḳ eyleye şāyed çıḳa gele

3.	a.	Göñlüm kebūterin elüme alduġum bu kim
	b.	Şāhīn baḳışlu yār umaram oḳıya gele*

4.	a.	Varı geli ḳapuña bir iş eyleyem gibi*
	b.	Ḳodum yoluñda başumı yā vara yā gele*

5.	a.	ʿĀlemde ne senüñ gibi bir bī-vefā ḳopa
	b.	Dünyāya ne benüm gibi bir mübtelā gele*

-350-

fāʿilātün fāʿilātün fāʿilātün fāʿilün

1.	a.	Dāġ·ı şevḳuñla elif bu sīne·i pür-çākde
	b.	Tāze rengīn gül budaġıdur ki bitmiş ẖākde

2.	a.	Görinen encüm degüldür gicelerde ʿayş içün
	b.	Aḳ güllerdür ki‿açılmış gülşen·i eflākde *

3.	a.	Ḫıżr-veş ḥāżır ḳuruda yaşda eşk ü āh ile*
	b.	Zāhidā çoḳ şīveler var ʿāşıḳ·ı bī-bākde

4.	a.	Ṣan leb·i deryāda bitmiş pençe·i mercān durur
	b.	Ḳanlu kirpükler ki var bu dīde·i nemnākde*

5.	a.	Nice ḳāyil olmasun naẓmuñ görüp erbāb·ı fażl
	b.	Mis̲li yoḳdur hīç Revānī ṭabʿumuñ idrākde*

-351-

mefʿūlü fāʿilātü mefāʿīlü fāʿilün

1.	a.	Yüzüñi görmedük nice beñzer ki cennete
	b.	Ḳalsun mı ā güzel ya bu ḥasret ḳıyāmete

2.	a.	Boşaldı kīsesi ḳadeḥüñ muṭribe uyup
	b.	Çaldurdı hep nesi var ise gitdi ṣoḥbete*

3.	a.	Meh-rūlar arasında ṣayılmaz idi perī*
	b.	Naḳḳāşlar getürdi anı hep bu ṣūrete*

4.	a.	Altun iden işin kişinüñ ẖāk·i pāyıdur
	b.	Yüzler sürüyelüm varalum biz de ẖıdmete*

5.	a.	Ol ḳaşı yay ġamze oḳın cāna ẖoş urur
	b.	Sen anı gör Revānī ki geçmez mi minnete*

-352-

mefāʿīlün mefāʿīlün feʿūlün

1.	a.	Ḳılıcuñdan yaralansun ḳo sīne
	b.	Daẖi neye yararın ben kemīne*

2.	a.	Yaşum sīmini görüp ḳaçma benden*
	b.	Gerekdür şāha ḳul ile ẖazīne

3.	a.	Ḥarām olsun eger sensüz içersem
	b.	Ger ola mey şafaḳ çarẖ ābgīne

4.	a.	Deñiz seyrānın it gitme gözümden
	b.	Ṭonanmışdur senüñçün bu sefīne

5.	a.	ʿArūs·ı naẓm·ı zībāya Revānī
	b.	Olupdur ẖaṭṭ·ı şiʿrüñ ʿanberīne*

-353-

fāʿilātün fāʿilātün fāʿilātün fāʿilün

1.	a.	Sen mi ögretdüñ cefāyı ġamze·i bī-dāduña
	b.	Ḫūb taʿlīm eylemişsin āferīn üstāduña

2.	a.	Ẓulmlerle ey elif-ḳāmet boyum dāl eyledüñ
	b.	Pādişāh·ı ḥüsnsin andan ṣıġar mı aduña*

3.	a.	Devr·i ḥüsnüñde şehā gün başına biñ ḳan ider
	b.	Hāy dimezseñ eger şol ġamze·i cellāduña

4.	a.	Naẖl-bendüñ mūmdan dökme egerçi servi var
	b.	Cānı yoḳ kim öyküne bu ġamze·i şimşāduña*

5.	a.	Raḥm iderdüñ sen Revānīye benüm çoḳ sevdügüm
	b.	Aña ḳılduġuñ cefālar gelse bir bir yāduña*

-354-

mefʿūlü mefāʿīlü mefāʿīlü feʿūlün

1.	a.	Dil nīmeler ol ġamze·i ḳaṣṣāb yerinde*
	b.	İşler aṣar ol sünbül·i pürtāb yerinde*

2.	a.	Ebrūsı ṭururken bozamaz ḥüsnini ẖaṭṭı
	b.	Mescid ne‿ola yıḳıldıse miḥrāb yerinde

3.	a.	Sāḳī lebüñüñ şevḳına meyẖāne ye düşdüm *
	b.	Rindānedür içilse mey·i nāb yerinde

4.	a.	Ṭutdı ẖaṭ u ẖāl ile göñül milketini yār *
	b.	Beglik ider ise ne‿ola esbāb yerinde

5.	a.	Dirler yüzine gül boyına serv Revānī
	b.	Ḫoşdur ki eger yazıla elḳāb yerinde

-355-

fāʿilātün fāʿilātün fāʿilātün fāʿilün

1.	a.	Nāẓır olmış nergisüñ gül-berg·i sīrāb üstine
	b.	Ḥākim olmış ḳaşlaruñ māh·ı cihāntāb üstine

2.	a.	ʿĪdde alnuñda ḳurbān ḳanını didi gören
	b.	Bir ḳızıl gül bergidür düşmiş yatur āb üstine

3.	a.	Ḳan işin mi eyledi yanuñda ey vāʿiẓ senüñ*
	b.	Kim niçe söz söyledüñ ẖalḳa mey·i nāb üstine

4.	a.	Gözlerüm tekrār yazsun mācerāmı ḳapuña
	b.	Kim müs̲ennā ẖaṭ yazar naḳḳāşlar bāb üstine

5.	a.	Hīç terk itmez Revānī ḳaşı sevdāsın göñül
	b.	Bir kebūterdür ki ḳonmış ṭāḳ·ı miḥrāb üstine*

-356-

fāʿilātün fāʿilātün fāʿilātün fāʿilün

1.	a.	Ḫūblar nāzı kime eylerdi ʿāşıḳ olmasa
	b.	Şīve·i ʿAẕrāyı kim görürdi Vāmıḳ olmasa

2.	a.	Ḳoynına ḳoymazdı ey dil dilberüñ taṣvīrini
	b.	Ṣu gibi āyīneler dīdāra ʿāşıḳ olmasa

3.	a.	Yār ile çoḳdur ʿalāḳam nāṣıḥā maʿẕūr ṭut
	b.	Ben daẖi ṣōfī olurdum ger ʿalāyıḳ olmasa

4.	a.	Göreyin ẖançerler altında güneş gibi anı
	b.	Ṣubḥ-veş şol kimse kim mihrüñde ṣādıḳ olmasa*

5.	a.	Mestlik gibi Revānī olmaya hergiz ḥużūr*
	b.	Kāşkī ʿālem içinde kişi ayıḳ olmasa*

6.	a.	Ṣōfīye ṭaʿn eylemezdüm olmasa müfsid eger
	b.	Zāhide incinmez idüm ger münāfıḳ olmasa*

-357-

mefʿūlü fāʿilātü mefāʿīlü fāʿilün

1.	a.	Od urdı ruẖları yine cān ẖānumānına
	b.	Yaġmācı ṣaldı gözleri dil kārbānına

2.	a.	Çoḳ cevrini çeker bu göñül ġamzeñ oḳınuñ
	b.	Nice şikāyet eylemesün geçdi cānına

3.	a.	Ġamzeñ yaraġa girdi gözüñ yol baṣar gibi*
	b.	Zülfüñ kiriş ṭaḳup yine ḳaşuñ kemānına*

4.	a.	Serkeşlik itme yay gibi ʿāşıḳa igen
	b.	Oḳ gibi kimsenüñ güzelüm girme ḳanına*

5.	a.	Ḫoş-dem durur Revānī beñüñ vaṣfın ideli
	b.	Gūyā ki ḥabb·ı misk alupdur * dehānına

-358-

fāʿilātün fāʿilātün fāʿilātün fāʿilün

1.	a.	Ey göñül çoḳdur işüm şol laʿl·i şekker-bār ile
	b.	Girse tenhāda elüme söyleşürdüm yār ile

2.	a.	Ey güneş kūyında yetmez mi bu devlet saña kim*
	b.	Ṣalınursın her yaña ol sāye·i dīvār ile

3.	a.	Lāleler ṣanmañ biten Ferhād ḳanlar aġlayup
	b.	Eşk·i ẖūnīnin silüpdür dāmen·i kühsār ile

4.	a.	Ġamzesinüñ göz göre āşüftesi geçmek neden
	b.	Ḳılıc ayırur bizi şimden girü aġyār ile*

5.	a.	Ġonca vü gül defterin dürdi Revānī bāġda
	b.	Naẓm·ı rengīnüñ çıḳaldan defter ü ṭūmār ile

6.	a.	İttifāḳ idüp cihān ẖalḳını meftūn idelüm
	b.	Dōstum sen nāz ile ben şīve·i eşʿār ile*

-359-

fāʿilātün fāʿilātün fāʿilātün fāʿilün

1.	a.	Çarẖ·ı aẖḍar kim yaşumdan ṭoldı mevc·i ẖūn ile
	b.	Lāciverdī şīşedür gūyā mey·i gülgūn ile

2.	a.	Naṭʿ·ı ḥüsn içinde sen şehsin piyāde ẖūblar
	b.	Şol iki ruẖ anları māt itdi bir oyun ile*

3.	a.	Ḳatı göñlüñden şikeste-ẖāṭır olduġum bu kim
	b.	Seng·i Leylā şīvesidür kāse·i Mecnūn ile

4.	a.	Muṭribüñ yoḳdur elinde gerçi ḥükmi ʿayş içün
	b.	Zāhidā her bir sözi söyler velī ḳānūn ile

5.	a.	Şiʿrümüz bir dilberi görse Revānī ṣayd ider*
	b.	Şimdi mi tesẖīr olup durur perī efsūn ile

6.	a.	Dilber·i hercāyī gibi şiʿrümüñ çoḳ ʿāşıḳı
	b.	Ṣalınursa ol ṣalınsun ḳāmet·i mevzūn ile*

-360-

mefʿūlü mefāʿīlü mefāʿīlü feʿūlün

1.	a.	Ḫāk eylemişem yüzümi zīr·i ḳademüñde
	b.	İşüm ḳızıl altun senüñ ey şeh ḳademüñde

2.	a.	Ḥūrīler ider ẖāk·i mezārını ziyāret*
	b.	Ḥasretle şu kim cān vire derd ü elemüñde

3.	a.	Bir būseye ʿahd itmiş idi virmedi laʿlüñ
	b.	Ey ġonca-dehen ḳaldı senüñ ol keremüñde

4.	a.	Çeksün saña her kişi ṣurāḥī gibi boyun
	b.	Sāġar gibi ben ḳan yudayın bezm·i ġamuñda

5.	a.	Vāʿiẓ sözine gey ṣaḳın aldanma Revānī
	b.	Nūş eyle şarābuñı var ol kendü demüñde

-361-

feʿilātün mefāʿilün feʿilün

1.	a.	Ey göñül şol ẖaṭ·ı nigārı gör e*
	b.	Ya şu ẖāṭırdaki ġubārı gör e*

2.	a.	Nār·ı ẖaddüñle ey ḳamer-çihre
	b.	Ṭutuşupdur bu lālezārı gör e*

3.	a.	Bezm·i sāḳīde nice içmeyelüm
	b.	Başumuzda olan ẖumārı gör e

4.	a.	Sāġaruñ yeynicekligin añma
	b.	Sen ṣurāḥīdeki vaḳārı gör e

5.	a.	Neler itdi Revānī baña neler
	b.	Şol iki yüzlü rūzgārı gör e*

-362-

fāʿilātün fāʿilātün fāʿilātün fāʿilün

1.	a.	Ġırra olmışdur nigārum ḥüsn·i bī-hemtāsına
	b.	Nitekim maġrūr olurlar ẖᾱceler dünyāsına

2.	a.	Yār elif-veş ṭoġrıdur rā ḳaşıdur egri olan
	b.	Ḳorḳarın nāgeh bahāne bulalar orasına

3.	a.	Ceng ider ẖalḳ içre ṭurmışdur güzel sevmeñ diyü
	b.	Bilmezüz ʿāşıḳlar ile vāʿiẓüñ ġavġāsı ne*

4.	a.	Raḥm iderdüñ sen ne deñlü seng-dilseñ nāṣıḥā
	b.	ʿĀşıḳuñ derdine baḳsañ yāruñ istiġnāsına*

5.	a.	Sen Revānī āsitān·ı dōstdan dūr olmaġıl
	b.	Lāyıḳ oldur ḳul hemān ẖıdmet ide mevlāsına

6.	a.	Ṣaḳlamazdı māh·ı nev naʿlini ḳoynında müdām*
	b.	Müşterī olmasa gerdūn sözlerüm ḥalvāsına*

-363-

mefʿūlü fāʿilātü mefāʿīlü fāʿilün

1.	a.	Māh idügüñ bilindi senüñ bir nigāh ile
	b.	Seyrāna çıḳma sen güzelüm şeb-külāh ile

2.	a.	Ol şeh otaġa girdügini söyledi göñül
	b.	Ġālib hilāli bir arada gördi māh ile

3.	a.	Ṭāvūsī mirvaḥa götürür şāh·ı Rūm içün
	b.	Zeyn oldı ṣanmañuz ruẖı zülf·i siyāh ile

4.	a.	Maḳbūl·i ḥażret olsa güzeller ʿaceb midür
	b.	Begler durur muṣāḥib olan pādişāh ile

5.	a.	Ol pādişāh·ı ḥüsni Revānī bulur mıdı
	b.	Dünyāyı geşt eylemese peyk·i āh ile

-364-

feʿilātün feʿilātün feʿilātün feʿilün

1.	a.	Mesken olmış der·i meyẖāne ki ḳallāşlara
	b.	Ġaybdan ḳapu açılmış yine ʿayyāşlara*

2.	a.	Bir perī-ṣūreti naḳş eylemişem dilde yine
	b.	Ḳalemüm ḥarf atarsa ne‿ola naḳḳāşlara

3.	a.	Şemʿ pervāneye dik gelse ne var meclisde
	b.	Anı çü odabaşı ḳıldılar evbāşlara

4.	a.	Gāh aġyār gehī çarẖ bize māniʿ olur
	b.	Ne‿eylesün yār daẖi devleti yoḳ başlara

5.	a.	Severin yārı Revānī iki gözüm gibi ben
	b.	Dilerem Ḥaḳdan anı irişe çoḳ yaşlara

-365-

feʿilātün feʿilātün feʿilātün feʿilün

1.	a.	Ḫūblar çünki görür ʿāşıḳı bülbül yerine
	b.	ʿĀrif ol sen de ṭaḳın bir güzeli gül yerine

2.	a.	Ḥüsn mecmūʿası zeyn olmaz idi çaḳ bu ḳadar
	b.	Arada kāküli ger düşmese sünbül yerine

3.	a.	Pādişāhum güzelüm ẖıdmete ṭurmışdur dil
	b.	Ṣatun almalu degül ḳullan anı ḳul yerine*

4.	a.	Ruẖı Gülgūnı ile ḳoşdı çü Şebdīz ṣaçı
	b.	Vireyin cān u dili ben daẖi ögdül yerine*

5.	a.	Yazalum yine Revānī niçe rengīn ġazeli
	b.	Tāze güller ṣunalum yāra ḳaranfül yerine*

-366-

mefʿūlü fāʿilātü mefāʿīlü fāʿilün

1.	a.	ʿĪsī-lebüñ es̲erlerin itsem müsevvede
	b.	Heykel idine anı nüfūs·ı mücerrede

2.	a.	Ṭolaşmasun maḥalleñi ey meh-liḳā güneş
	b.	Her gün ḳapuñda ne‿eyler imiş bir felek-zede*

3.	a.	Ġamzeñ benümle göz göre oḳ dökdi ceng ider
	b.	Sen ḳaşı yayı sevmeden oldı bu ʿarbede

4.	a.	Ġam beñzümüz ṣarartmadan uş kehrübā gibi
	b.	Ṭoldur şarābı sāḳī ḳo cām·ı zebercede*

5.	a.	Bir yüzi ḳaradur ki ipin süriyüp yürür
	b.	Ṭolaşmasun Revānī bu zülf·i mücaʿʿade*

-367-

mefʿūlü fāʿilātü mefāʿīlü fāʿilün

1.	a.	Daʿvā·yı ḥüsni şemʿ nice‿eyler fetīl ile
	b.	İs̲bāt idemez anı żaʿf·ı delīl ile

2.	a.	Ḥūrī-liḳā güzeller ile bāde-nūş olan
	b.	Hīç Ḥavż·ı Kevs̲eri aña mı Selsebīl ile

3.	a.	Ol ṭaş baġırlu yār·ı cefā-pīşeden göñül
	b.	Bir būse alımaz niçe cerr·i s̲aḳīl ile*

4.	a.	Zülfüñ şebinde ẖālüñe mihmān idi göñül
	b.	Anı żıyāfet eyledi Ḫᾱn·ı Ḫalīl ile

5.	a.	Şāʿir midür Revānī gedā-ṭabʿ olan ḥarīf
	b.	Ḫᾱce olur mı kişi metāʿ·ı ḳalīl ile

-368-

fāʿilātün fāʿilātün fāʿilātün fāʿilün

1.	a.	Uymadı dīvāne göñlüm hīç nāṣıḥ pendine
	b.	Ol perīnüñ ṣuçı yoḳdur itdi kendü kendine*

2.	a.	Māhumuz Pervīn ile şekl·i hilāli ʿarż ider
	b.	Aḳ ḳaranfüller ḳoyup dülbendinüñ serbendine*

3.	a.	Āsitānuñda saʿādet ḳullarına ḳıl naẓar
	b.	Pādişehler iltifāt eyler çü devletmendine*

4.	a.	Hey ne ẖoş şekker-fürūş olur senüñ şekker-lebüñ
	b.	Her yañadan cān atarlar dāyim anuñ ḳandine*

5.	a.	Rehn·i mey olmış Revānī cümlesi meyẖāne de
	b.	Ṣōfīnüñ tācına baḳ monlālaruñ dülbendine

-369-

fāʿilātün fāʿilātün fāʿilātün fāʿilün

1.	a.	Şīve ögrenmiş ḳamer ol serv·i bālādan yine
	b.	Başına bir deste gül ṣoḳmış S̲üreyyādan yine

2.	a.	Bezm·i meydür bir gelincük sāḳīdür meşşāṭası
	b.	Āyine almış ele cām·ı muṣaffādan yine

3.	a.	Utanup meclis içinde ḳıpḳızıl olmaz idi
	b.	Sāḳī·i gül-çihre reng almasa ṣahbādan yine

4.	a.	Bir nefesde muʿciz·i ʿĪsāyı gösterdi tamām
	b.	Söz açupdur lebleri var ise iḥyādan yine*

5.	a.	Bir ẖayāl ile Revānī aldı dilber göñlümüz
	b.	Ögrenüp nāzüklügi bu şiʿr·i ġarrādan yine

-370-

fāʿilātün fāʿilātün fāʿilātün fāʿilün

1.	a.	Cān metāʿın kāsid itmişdür dehānuñ bāc ile
	b.	Yıḳdı göñlüm kişverin ġamzeñ senüñ tārāc ile

2.	a.	Ruẖlaruñla ben nice vaṣf eyleyem laʿlüñi kim
	b.	İki gül bir yerdedür bir ġonca·i ġannāc ile

3.	a.	Ḫᾱn·ı vaṣluñdan beni menʿ itmek istermiş raḳīb
	b.	Eceli gelen kişi söyleşür ancaḳ ac ile

4.	a.	Naṭʿ·ı ʿışḳ içinde şeh-māt itdi ẖālüñ beydaḳı
	b.	Dōstum şaṭrenci dil oynar iken Leclāc ile

5.	a.	Nice ṣōfīdür Revānī ki‿olımaz maḥbūbsuz
	b.	Ḳomaz oġlan sevmegi bu ẖırḳa vü bu tāc ile

-371-

feʿilātün feʿilātün feʿilātün feʿilün

1.	a.	Nevbahār oldı gelüñ ʿayş idelüm güller ile
	b.	Ṣalalum ʿāleme āvāzeyi bülbüller ile*

2.	a.	Virmeden bād·ı ecel ʿömr bahārını yele
	b.	Gelüñüz ʿayş idelüm ṣaçları sünbüller ile*

3.	a.	Virelüm bezme şeref sāḳī ṭolularla yine
	b.	Meclisi zeyn idelüm tāze ḳaranfüller ile*

4.	a.	Beñlerüñ ẖālī degülse ne ʿaceb sīneñden
	b.	Ṣaḳlanur ḳanda ki kāfūr ola fülfüller ile *

5.	a.	Gülşen·i cānda Revānī niçe güller açılur
	b.	Yār dülbendini zeyn itse ḳaranfüller ile

-372-

feʿilātün feʿilātün feʿilātün feʿilün

1.	a.	Yandı gül odlara bu ẖadd·i semen-būyuñ ile
	b.	Serv ḥayretde durur ḳāmet·i dil-cūyuñ ile

2.	a.	Ḫalḳ ile yılduzı barışmadı çünkim ḳamerüñ
	b.	Vechi yoḳdur ki muḳābil ola ol rūyuñ ile

3.	a.	Çekilür ḥüsn ʿarūsına serāperde·i misk
	b.	Her ḳaçan zeyn idesin ʿārıżuñı mūyuñ ile

4.	a.	Ṣōfiyā biz de‿uralum naʿra·i mestāneleri
	b.	Çün cihān ṭoldı senüñ hāyuñ ile hūyuñ ile

5.	a.	Ṣōfī olduñ daẖi terk eylemedüñ maḥbūbı
	b.	Kim ḳabūl ide Revānī seni bu ẖūyuñ ile

-373-

fāʿilātün fāʿilātün fāʿilātün fāʿilün

1.	a.	Aġzuñuñ düşmiş bu ẖaṭṭ·ı müşk-perverd üstine
	b.	Çeşmedür gūyā yazılmışdur anuñ ferd üstine*

2.	a.	Sen ḳamer olmaġ içün olmış bu çarẖuñ encümi
	b.	Ṣan gümiş pullar düzülmiş taẖta·i nerd üstine

3.	a.	Ṭoldurup cāmı süvār ol sen semend·i bādeye
	b.	Sāḳī aylandur bu gice māh·ı şebgerd üstine*

4.	a.	Zeyn iden ʿışḳuñ kitābın gözlerüm naḳḳāşıdur
	b.	Al cedveller çeküp bu levḥa·i zerd üstine

5.	a.	Cān viren üftādenüñ kūyuñdur āẖır menzili
	b.	Kimse taḳdīm olmadı cennetde cömerd üstine

6.	a.	Ṭaʿn·ı düşman bir yaña vü dōst cevri bir yaña
	b.	Bunı kim gördi Revānī derd ola derd üstine*

7.	a.	Sīnem üzre dāġ·ı ḥasretlerle bu cān u göñül
	b.	Zārlardur ki dizilmiş taẖta·i nerd üstine

-374-

fāʿilātün fāʿilātün fāʿilātün fāʿilün

1.	a.	Dōstum ṭolaşmasun zülf·i muṭarrā kimseye*
	b.	Gey ṣaḳın göz itmesün ol çeşm·i şehlā kimseye*

2.	a.	Bütden ögren ey ṣanem maḥbūbluḳ temkīnini
	b.	Secde iderler öñinde ṭınmaz aṣlā kimseye*

3.	a.	Ṣoḥbet·i meyden ṣaḳın ayaḳ ṭolar nāgeh saña
	b.	Çün bilürsin ḥörmet itmez cām·ı ṣahbā kimseye

4.	a.	Ḥıṣṣe al şemʿ·i şeb-efrūzuñ vaḳārından yine
	b.	Dil uzadup söylemez meclisde ḳaṭʿā kimseye

5.	a.	Ṣoḥbeti cānlar degerken gör nice maḥcūbdur
	b.	Utanur görinmege firdevs·i aʿlā kimseye *

6.	a.	Ḥüsnüñe maġrūr olup ḳılma Revānīye cefā
	b.	Hey vefāsuz cevri çoḳ ḳalmaz bu dünyā kimseye*

-375-

fāʿilātün fāʿilātün fāʿilātün fāʿilün

1.	a.	Būseye yoḳ dime içseñ rind·i dürd-āşām ile
	b.	Şöhreti olur ziyāde beglerüñ inʿām ile

2.	a.	Devletüñde sāḳıyā hergiz ṣu ṣızmaz aradan
	b.	Vaḳtümüz ġāyetde ẖoş cām·ı sürūr-encām ile

3.	a.	Od düşer gül ẖırmenine ṭutışur hep lālezār
	b.	Gül gül olsa ʿārıż·ı dilber mey·i gül-fām ile

4.	a.	İkilikden geçmişüz birlige irdük sāḳıyā
	b.	ʿAyş ile ḳardaş oḳışduḳ ḳan yalaşduk cām ile

5.	a.	Nice germ olmaya sāḳī gözine geldi şarāb
	b.	Ṣoḥbeti germ eyledi yine gül ü bādām ile*

6.	a.	Bezm·i meyden ẖālī olmazsın çekerler aduñı
	b.	Hem-ḳadeḥ olma Revānī sen de bir bed-nām ile

-376-

feʿilātün feʿilātün feʿilātün feʿilün

1.	a.	Ne‿ola emdürse lebin yār hevādār olana
	b.	Çoḳ ʿināyetler ider şāh emekdār olana

2.	a.	Ẕikr·i firdevsi ḳo zāhid bize cānāne gerek
	b.	Cenneti añmayalar ʿāşıḳ·ı dīdār olana

3.	a.	Yüz sürer nāfe Ḫıṭādan ayaġuñ ṭopraġına
	b.	Menzil āsān görinür böyle sebük-bār olana

4.	a.	Yine yüz ḳızduruban aldı ḳadeḥ būselerüñ
	b.	Böyle olmaḳ yaraşur ẖāṣılı cerrār olana

5.	a.	Her gün āh itdügiçün eyle Revānīye ʿitāb
	b.	Yeridür her ne ʿaẕāb olsa günehkār olana*

-377-

mefāʿīlün mefāʿīlün feʿūlün

1.	a.	Ṭolupdur ṣanmañuz meyden piyāle
	b.	Nezāketle güneş girdi hilāle

2.	a.	Nice alınmayam nergis gibi ben
	b.	Alupdur göñlümi bir gözi ala

3.	a.	Ne iş ṭutdı göñül ṭuġrā ḳaşuñdan
	b.	Gelür her ay başında bir ḥavāle*

4.	a.	Dehānı sözde yāruñ ḳıl yarardı
	b.	Mecāl olsa eger kim ḳīl ü ḳāle

5.	a.	Sözüñe ne‿ola taḥsīn itse Ḫusrev
	b.	Revānī irdi çün şiʿrüñ kemāle

-378-

feʿilātün feʿilātün feʿilātün feʿilün

1.	a.	Ehl·i diller döyemez zühd·i nifāḳ-āmīze
	b.	Meded ey sāḳī meded cām·ı neşāṭ-engīze

2.	a.	Şehsüvārā nice cān virmeyelüm nīzeñe kim
	b.	Bir uzun boylu beli ince güzeldür nīze

3.	a.	Ḳulı ḳurbānıyuz ol Türk·i kemān-ebrūnuñ
	b.	Oḳ döküp ġamzeleri başlamasun ẖūnrīze*

4.	a.	Mey ü maḥbūbı nice terk idelüm biz ṣōfī
	b.	Müşkil olur kişi ögrenmeyicek perhīze

5.	a.	Rūmili ḥūrī-liḳālarla Revānī ṭoludur
	b.	Virmezüz heşt behişt olur ise Tebrīze

-379-

fāʿilātün fāʿilātün fāʿilātün fāʿilün

1.	a.	Ay u gün sergeşte olsa ne‿ola sen sīmīn-bere
	b.	Altun üsküflü güzeller ẖıdmet eyler beglere

2.	a.	Gün degüldür görinen ḥüsnüñ temāşā ḳılmaġa
	b.	Bir zeberced ṭāḳdan açmış melekler pencere

3.	a.	Sāḳīyi öpdügiçün dāyim ṣurāḥī incinüp
	b.	Ḳulaġın ṭoldurı ṭoldurı sögermiş sāġara

4.	a.	Baş egmez ḥüsn·i yāra ṣōfī·i miskīn-ʿabā
	b.	Āfitāba kimse inkār itmez illā şebpere

5.	a.	Şād olur göñlüm görüp cānda Revānī ʿışḳını
	b.	Ehl·i maʿden gibi kim irişmiş ola cevhere

-380-

feʿilātün feʿilātün feʿilātün feʿilün

1.	a.	İçişür yine ḳadeḥler gül·i ẖandānlar ile*
	b.	Söyleşür belbeleler murġ·ı ẖoş-elẖānlar ile

2.	a.	Gün gibi virme ṣaḳın bir ḳadeḥi dünyāya
	b.	Sāḳī götür ayaġı serv·i ẖırāmānlar ile *

3.	a.	Ṣōfīler bezmine ʿāşıḳ varayın dime ṣaḳın
	b.	ʿĀrif olan ṭurup oturmaya nādānlar ile

4.	a.	ʿIşḳ ḥāli nice taḳrīr ola kim şerḥ olmaz
	b.	Sīneler şerḥaları çāk·i girībānlar ile

5.	a.	Sīnede dāġ u elif çünki yeter ṭabl u ʿalem
	b.	Begligüñ var be Revānī yüri sulṭānlar ile

-381-

mefʿūlü fāʿīlātü mefāʿīlü fāʿilün

1.	a.	Rengīn lebüñ ki göñlümüz almışdur āl ile
	b.	Nāzüklük ideyin aña ben bir ẖayāl ile

2.	a.	Bir noḳṭa ḳoyamaz senüñ üstüñe ẖūblar
	b.	Beñdeş bulınmaya saña bu ẖaṭṭ u ẖāl ile

3.	a.	Ḳaddüñe serv beñzeye mi çünki ney-şeker*
	b.	Öykünemez saña bu ḳadar yāl ü bāl ile*

4.	a.	Mescidde rindi germ oluban ṣōfī ẕemm ider
	b.	Ol daẖi ṭaʿn ider kişiye gör bu ḥāl ile*

5.	a.	Sāḳī·i māh-pāre elindeki cām·ı mey
	b.	Bir āfitābdur ki ṭoġar beş hilāl ile*

6.	a.	İncinme sen Revānī ġam·ı rūzgārdan
	b.	Dāyim muṣāḥib ol yüri defʿ·i melāl ile

-382-

fāʿilātün fāʿilātün fāʿilātün fāʿilün

1.	a.	ʿAks·i ruẖsārum benüm ol tīġ·i āteştābda
	b.	Ṣanki nīlūfer durur bitmiş derūn·ı ābda

2.	a.	Sīnede nāẖun nişānınuñ yanında dāġ·ı ġam
	b.	Beñzer ol ḳandīle ki‿ola gūşe·i miḥrābda

3.	a.	Söyledür rāzın girüp göñline her bir ʿāşıḳuñ
	b.	Bilmezem kim bu ne ḥāletdür şarāb·ı nābda

4.	a.	Ḫırḳasıyle tācını rehn·i mey eyler dōstum
	b.	Ḳanḳı zāhid kim göre meygūn lebüñi ẖᾱbda

5.	a.	Egdi dildāruñ Revānī yalvarup ebrūsını
	b.	Ḳaldı serkeşlik hemān bu kākül·i pürtābda

-383-

mefāʿilün feʿilātün mefāʿilün feʿilün

1.	a.	Benefşe nice açar göñlüm ey cefā-pīşe
	b.	Anaẖtar ile açılmaz kilīd·i endīşe

2.	a.	Bezimde sāḳī günāhum nice baġışlamasun
	b.	Ḳadeḥ öper elini ayaġa düşer şīşe

3.	a.	Cihānda ṭutmasa Ferhād içün eger mātem
	b.	Müdām ṭaşlar ile döginür midi tīşe

4.	a.	Belāya uġradur ey dil ṣaḳın yüzi ḳaradur
	b.	Ṭolaşma sözüm işit sen bu zülf·i bed-kīşe*

5.	a.	Revānī gitmege isterse yār būsesin al
	b.	Selāmetī sefer ehli virür çü dervīşe

-384-

mefʿūlü fāʿilātü mefāʿīlü fāʿilün

1.	a.	Alduḳca nāz ile eline dilber āyine
	b.	ʿAks·i ruẖından oldı gül·i aḥmer āyine

2.	a.	Her kim ki sīnemi göre dir niçe dāġ ile
	b.	Ṣandūḳa dönmiş ol ki‿ola sertā-ser āyine

3.	a.	Ey ẖᾱce ṭūṭī ṣoḥbetin isterseñ iç şarāb
	b.	Zīrā ṣurāḥī ṭūṭī durur sāġar āyine*

4.	a.	Dervīşdür diyü kepenek geydügin görüp
	b.	Yüz virme sūret uġrusına beñzer āyine

5.	a.	Nāz eyleme Revānīnüñ al göñlini ele
	b.	Zīrā ki elde yaraşur ey dilber āyine

-385-

feʿilātün feʿilātün feʿilātün feʿilün

1.	a.	Hem-dem olalı göñül laʿl·i şeker-ẖālar ile
	b.	Ḫāṭırum eglenimez ṭūṭī·i gūyālar ile*

2.	a.	Feraḥından nice raḳṣ urmaya meclisde ḳadeḥ
	b.	Dāyimā ṣoḥbet ider dilber·i raʿnālar ile

3.	a.	Ṣōfiyā ḥalḳa·i ẕikre nice meyl ide göñül
	b.	Başı ẖoşdur çü anuñ zülf·i semen-sālar ile *

4.	a.	Oḳlaruñla yine zeyn eyledüñ ey ḳaşı kemān
	b.	Sīnemüñ bāġçesin serv·i dilārālar ile*

5.	a.	Ḳorḳaram saña Revānī geçe bir naḳş nigār
	b.	Ellerin çün yine naḳş eyledi ḥınnālar ile

-386-

fāʿilātün fāʿilātün fāʿilātün fāʿilün

1.	a.	Ey ṣanem göñlüm benüm şol laʿl·i āteştāb ile*
	b.	Şīşedür gūyā ki ṭolmışdur şarāb·ı nāb ile

2.	a.	Dōstum ʿāşıḳlaruñla bāde nūş it kim müdām*
	b.	Ḫūb olur mey ṣoḥbetin ḳılmaḳ kişi aḥbāb ile

3.	a.	Bir ḳadeḥ gibi ayaġ üstinde ẖıdmet idelüm
	b.	Sen ṣurāḥī gibi meclisde otur ādāb ile

4.	a.	Öpüşür ġayrılar ile ʿāşıḳuñ ḳanı ḳurur
	b.	Ṣoḥbet itmelü degüldür ol lebi ʿunnāb ile

5.	a.	Bezme ārāyiş Revānī dāyimā virür ḳadeḥ
	b.	Gülsitāna nitekim irür ṣular dölāb ile*

-387-

mefʿūlü fāʿilātü mefāʿīlü fāʿilün

1.	a.	ʿĀşıḳ ki şād olur o ẖaṭ·ı müşk·i nāb ile*
	b.	ʿĀrif durur ki göñlini egler kitāb ile

2.	a.	Şol luṭf·ı bī-ḥisāb ile maʿmūrdur göñül*
	b.	Güc ile Ḳayṣeriyye yapıldı ḥisāb ile*

3.	a.	Ne‿oldı cihān güzellerine ey felek ki sen
	b.	Yaḳduñ zamāne ẖalḳını bir āfitāb ile

4.	a.	Kirpükleri ki ṭoġradı nāz ile göñlümi
	b.	Kimi żıyāfet eyler iki şiş kebāb ile

5.	a.	Ṣoḥbetde göñli gözi açılmaz Revānīnüñ
	b.	Sāġar gibi ki yumaya yüzin şarāb ile

-388-

fāʿilātün fāʿilātün fāʿilātün fāʿilün

1.	a.	Çoġ iş eyler zülfüñ el altından ey meh şāneye
	b.	Toḳınur nāzüklük ile leblerüñ peymāneye*

2.	a.	Çenber·i zülfi ʿalāmet ḳıldı çeşmi laʿline *
	b.	Ḥalḳa aṣmaḳ ʿādetidür kāfirüñ meyẖāne ye

3.	a.	Rūşen olsa mihr·i rūyuñla yıḳuḳ göñlüm ne‿ola
	b.	Pertev·i ẖurşīd ey meh-rū girer meyẖāne ye

4.	a.	Şemʿa diñ germ olmasun āẖır gelür ortaya ol*
	b.	Devr·i ḥüsninde niçe dil uzadur pervāneye

5.	a.	Gördügi ẖūba Revānī yine serẖoşluḳ ṣatar
	b.	Hem-ḳadeḥ düşmiş meger sen gözleri mestāneye*

-389-

fāʿilātün fāʿilātün fāʿilātün fāʿilün

1.	a.	Diş bilersin ey göñül yāruñ leb·i ẖandānına
	b.	Kim görüpdür kim kişi ḳaṣd ide kendü cānına

2.	a.	Yārı benden ṭañ degül ayırmaġ isterse raḳīb *
	b.	Ḳaṣd ider şeyṭān belī her müˀminüñ īmānına*

3.	a.	Vaʿde·i vaṣl·ı nigāra ey göñül aldanma kim
	b.	Ḫūblar ṭurmaz bilürsin ʿahdine peymānına

4.	a.	Ṣanuram kim desti dildāruñ gümişden şānedür
	b.	Nāz ile dest urduġınca zülf·i müşk-efşānına

5.	a.	Rūy·ı dilberler ẖayāliyle Revānī bu göñül
	b.	Döndi şol mirˀātı çoḳ āyīneci dükkānına

-390-

fāʿilātün fāʿilātün fāʿilātün fāʿilün

1.	a.	Sögdügiçün ḳalma yāruñ laʿl·i şekker-bārına
	b.	Ey göñül ʿāḳil çü ḳalmaz ṭūṭīnüñ güftārına

2.	a.	Nāme·i eşʿārumı başında yāruñ dir gören
	b.	Ġonca·i zanbaḳ ḳomış dilber yine destārına

3.	a.	Bezm·i ḥüsninde lebi cāmını nūş itmek diler
	b.	Baş ḳoyup ebrūsı söyler zülf·i ʿanber-bārına*

4.	a.	Būse añsam ol ṭabīb·i cān söger ben ẖasteya*
	b.	Şerbete şekker ḳatar andan virür bīmārına

5.	a.	Dilrübālar yolına varın Revānī ẖarc ider
	b.	Bir ḳalenderdür dimez ḳalsun bugünüm yarına*

-391-

mefʿūlü fāʿilātü mefāʿīlü fāʿilün

1.	a.	Şevḳum ziyāde olmaġın anuñ ṭudaġına*
	b.	Bir ṭūṭī yazmışam yine göñlüm ḳabaġına*

2.	a.	Bezm ehline ṭolaşdı gice yār içün ḳadeḥ
	b.	Beñzer ṣurāḥī nesne ḳoyupdur ḳulaġına*

3.	a.	Cem sāḳīnüñ göreydi eger pādişālıġın
	b.	Ḳul olmaġa düşerdi eline ayaġına*

4.	a.	Yāruñ ẖayāli çıḳmasa dilden ʿaceb degül
	b.	Bir pādişāhdur ki girüpdür otaġına*

5.	a.	Dildāra dil virüp yine bu ṭabʿ·ı naẖl-bend*
	b.	Bir tāze ġonca baġladı bir gül budaġına* *

6.	a.	Āh eyleme Revānī yanup nār·ı ḥasrete
	b.	Olmaz fetīl çünki maḥabbet çerāġına*

-392-

fāʿilātün fāʿilātün fāʿilātün fāʿilün

1.	a.	Ḫūb düşmişdür ḳaşuñ bu ẖadd·i rengīn üstine
	b.	Beñzer ol nūna yazılmış ola nesrīn üstine*

2.	a.	İtüñ izi üzre naḳş·ı naʿl·i Şebdīzüñ senüñ
	b.	Gūyiyā kim māh·ı nevdür geldi Pervīn üstine*

3.	a.	Gözlerüñ zeyn eylese ne‿ola leb·i şīrīnüñi
	b.	Yaraşur bādāmlar ḥalvā·yı şīrīn üstine*

4.	a.	Gözleriçün ölenüñ nergis diküñ ẖākinde kim
	b.	Şemʿ yaḳmaḳ dōstlar ʿādet durur sin üstine*

5.	a.	Ṭaġıdan zülfeynüñüñ cemʿiyyetin ẖaṭṭuñ durur
	b.	Hindden leşker çeker Çīn ile Māçīn üstine*

6.	a.	Geçse serden ey ṣanem zülfüñ ruẖuñ üzre ne‿ola
	b.	Cennet eyler yirini başın viren dīn üstine*

7.	a.	Reng alur şiʿr·i Revānīden çemende ġoncalar
	b.	Gül yazar eşʿārını evrāḳ·ı rengīn üstine*

-393-

fāʿilātün fāʿilātün fāʿilātün fāʿilün

1.	a.	Her ḳaçan şiʿr oḳısam ol ḳadd·i mevzūn üstine
	b.	Dir gören yāruñ oḳursun yine efsūn üstine*

2.	a.	Sīnede nāẖun nişānı üzre dāġ·ı mihr·i yār
	b.	Gūyiyā bir noḳṭadur ḳonmış durur nūn üstine

3.	a.	Düşde görmiş nāḳa·i Leylāyı bir ṣāḥib-naẓar
	b.	Boynını egmiş ṭururdı ḳabr·i Mecnūn üstine

4.	a.	Ḫoş ḳuşatmışdur miyānuñ çevresin cānā kemer
	b.	Ejdehādur kim ṭolanmış genc·i Ḳārūn üstine

5.	a.	Al kāġıd üzre yazarlar Revānī ẖūblar
	b.	Her ne şiʿri kim diseñ bu ẖadd·i gülgūn üstine

-394-

mefāʿīlün mefāʿīlün feʿūlün

1.	a.	Yazup bu şiʿrümi gül defterine
	b.	Oḳıdur dāyimā bülbüllerine

2.	a.	Ḳolumı dāġlarla eyledüm ben
	b.	ʿArūs·ı ḥüsnüñ içün ʿanberīne

3.	a.	Ṣuyuñ alçaḳ yer olur çün mekānı
	b.	Ne‿ola dilde yer itsem ẖançerine

4.	a.	Bilürler gevherin gerçi bahāsın
	b.	Ne ḳıymet hey bu ṭabʿum gevherine

5.	a.	Revānī çün bahār oldı çemende
	b.	Şarāb içmek gerekdür ṣu yerine

-395-

mefʿūlü fāʿilātü mefāʿīlü fāʿilün

1.	a.	Düşmiş bu güllerüñ yine kāküller üstine
	b.	Kim gördi güllerüñ ḳona sünbüller üstine

2.	a.	Gül yüzlüler hevāsıle her gāh cān vire
	b.	Feryād u nāle eyleye bülbüller üstine

3.	a.	Meclisde ḳanlar aġlaruz ol lebleri görüp
	b.	Gūyā ki berg·i gül ṣaçılur müller üstine

4.	a.	Bir yol bulımadum ki varam āsitānuña
	b.	Döksem ʿaceb mi gözyaşını yollar üstine

5.	a.	Gördi atı izine yüzüm sürerin düşüp
	b.	Güldi didi Revānī yüzüñ güller üstine

-396-

fāʿilātün fāʿilātün fāʿilātün fāʿilün

1.	a.	Serv-ḳaddüñ ey ṣanem yol gösterür reftārda
	b.	Ġoncaya aġız mı açdurur lebüñ güftārda

2.	a.	Sīnemüñ her dāġı bir defdür elifler nāylar
	b.	İñlesem dem dem ʿaceb mi meclis·i dildārda

3.	a.	Ḫāne·i dilde ẖayāl·i ḳadd ü zülfüñ gūyiyā
	b.	Naḳş olınmış serv ile ṭāvūsdur dīvārda

4.	a.	Sādelik uġruladuġıçün ruẖından dilberüñ
	b.	Aṣdılar uġrı gibi āyīneyi bāzārda*

5.	a.	Lāle-ruẖlardan ṣorar göñlüm Revānī dilberi
	b.	Gūyiyā bir ṭıfldur kim ġonca‿arar Gülzārda*

YĀ

-397-

mefāʿīlün mefāʿīlün mefāʿīlün mefā·īlün

1.	a.	Bilürüz cennetüñ çoḳdur egerçi ẖūr u ġılmānı*
	b.	Behey ṣōfī bu ʿālemdür sever ʿārifler oġlanı

2.	a.	Gümişden ẖāmeler midür ʿaceb barmaḳları yāruñ
	b.	Yanında āstīnidür ṣanasın kim ḳalemdānı

3.	a.	Dizilür rişte·i āl üstine gūyā ki gevherler*
	b.	Görinse güldügi vaḳtin leb·i laʿliyle dendānı

4.	a.	Güzel sevmegi ʿāşıḳdan yine menʿ eylemiş nāṣıḥ*
	b.	ʿAcebdür kendü ḥālinde ḳomazlar bir müselmānı

5.	a.	Revānī leblerüñ vaṣfın yazar ḥüsnüñ zamānında
	b.	Belī şekker-fürūş olan açar ʿīd olsa dükkānı

-398-

fāʿilātün fāʿilātün fāʿilātün fāʿilün

1.	a.	Görmedüm meyẖāne nüñ hergiz ẖarābābādını
	b.	Ne mübārek günde urmışlar anuñ bünyādını

2.	a.	Sāḳī·i şīrīn-kelām ile içerdüñ sen şarāb
	b.	Bilseñ ey ṣōfī eger ʿālemde aġzuñ dadını

3.	a.	Hāy ẓālim çīn·i zülfüñden ẖaṭuñ leşker çeküp
	b.	Gözlerüñ Tātārı yıḳdı göñlümüñ Baġdādını

4.	a.	Ṣanʿat·i ʿışḳ içre dil Ferhādı hīç añdurmadı
	b.	Ḳābil·i şāgird olan unutdurur üstādını

5.	a.	Dil mey ü maḥbūbsuz hergiz Revānī olımaz
	b.	Ḫaylī müşkildür kişi terk eylemek muʿtādını

-399-

mefʿūlü fāʿilātün mefʿūlü fāʿilātün

1.	a.	Vāʿiẓ beni ḳo luṭf it göñlüme ḳıl ʿitābı
	b.	İki cihāna virmez ol bir ḳadeḥ şarābı

2.	a.	Esrār·ı ʿışḳ nāgeh bezm içre fāş eyler
	b.	Ben bildügüm budur kim söyletmeñüz rebābı

3.	a.	Meyẖᾱreler ẖumārın defʿ itmege ṣudāʿın
	b.	Sāḳī meded yetişdür şol mey diyen gül-ābı

4.	a.	Oḳuduġını ṭutmaz ẖᾱcem ẓarīf olmış
	b.	Rehn·i mey itdi gördüm meyẖāne de kitābı

5.	a.	İlet beni Revānī ol Kaʿbe·i cemāle
	b.	Tā kim müyesser ola saña da ḥac s̲evābı

-400-

fāʿilātün fāʿilātün fāʿilātün fāʿilün

1.	a.	Ol ṣanem kesmez ne‿içün ol zülf·i ʿanber-bārını*
	b.	Çün müselmāndur neye terk eylemez zünnārını

2.	a.	Bezmüñe bir çengdür ey rūḥ-efzā ḳāmetüm*
	b.	Eşk·i çeşmüm sīmden itdi anuñ evtārını*

3.	a.	ʿĀrıżında ḥalḳa ḥalḳa zülf ṣanmañ görinen
	b.	Dīdelerdür kim görüp ḥayrān ḳalur dīdārını

4.	a.	Ṣaḳınup ḥüsnin yavuz gözden yine siḥr eyledi
	b.	Aṣdı sīmīn boynına dilber ṣaçı ṭūmārını

5.	a.	Sāde pehlūdan ḳaçan ḳuculmaz ol sīmīn-beden*
	b.	Būseye bārī Revānī alıgör iḳrārını

-401-

feʿilātün feʿilātün feʿilātün feʿilün

1.	a.	ʿArż·ı ḥāl itmege çün vāsıṭadur ẖāme daẖi*
	b.	Nāz idüp kāġıdı burduġı nedür nāme daẖi

2.	a.	Ḳuvvet·i sīm ile ḳucdı çü miyānını kemer
	b.	Ne nezāketle kinār itdi ʿaceb cāme daẖi

3.	a.	Gün yüzüñ şevḳı ile zülfüñe varsa ne‿ola dil*
	b.	Kaʿbeye ʿazm iden uġrar ṣanemā Ṣāma daẖi

4.	a.	Dīde·i cām ile endāmuñı seyr eylemesün
	b.	Varma ey sīm-beden nāz ile ḥammāma daẖi

5.	a.	Bī-ḳarār olsa Revānī ne‿ola ṣu gibi göñül
	b.	Çünki ʿāşıḳ geçer ol serv·i gül-endāma daẖi

-402-

fāʿilātün mefāʿilün fāʿilün

1.	a.	Ne ʿaceb oldı naẓmuñ aḥvāli
	b.	Diñlemezler bu ṭurfa aḳvāli

2.	a.	Söz metāʿı ṣatılmadan ḳaldı
	b.	Hātif·i ġayb olursa dellāli

3.	a.	Bikr·i fikre kimesne meyl itmez
	b.	Māh·ı nevden olursa ẖalẖāli

4.	a.	Şāhid·i naẓm müşterī bulmaz
	b.	Ger ruẖında Zuẖal ola ẖālī

5.	a.	Ṭāliʿi yoḳ Revānīnüñ hergiz
	b.	Gelmedi rāst ḳurʿa·i fāli

-403-

fāʿilātün fāʿilātün fāʿilātün fāʿilün

1.	a.	Mihr·i ḥüsnüñ ẕerre-veş ḳıldı çü sergerdān beni
	b.	Barmaġına ṭolayup hā döndürür devrān beni

2.	a.	Cān u dilden mihr·i ẖaddüñle yaḳup ḳandīller
	b.	Ḳabrüm üzre her gice bekler meh·i tābān beni

3.	a.	Ḫaṭṭuñı yād itdügüm gördükce aġyārı bu kim
	b.	Yaʿnī efsūn oḳuram azdurmasun şeyṭān beni

4.	a.	Raʿd-veş zārī ḳılup yaşlar aḳıtdı pīr·i çarẖ
	b.	Sen cuvānuñ derdi ile gördi çün giryān beni

5.	a.	Kimse bilmezdi Revānī ol nigārı sevdügüm
	b.	Dāstān·ı şiʿrüm itdi ʿāleme destān beni

-404-

fāʿilātün fāʿilātün fāʿilātün fāʿilün

1.	a.	Nāle çıñıraġınuñ diñleñ yine āvāzını
	b.	Süglüne ṣalsam gerekdür göñlümüñ şehbāzını

2.	a.	Çünki yüksek uçmasun ḳomaz o kebk·i ẖoş-ẖırām
	b.	Eylesün göñlüm ḳuşı göklerde çaḳ pervāzını

3.	a.	Pend·i nāṣıḥ muṭribā girmez ḳulaġuma benüm
	b.	Diñledük çün ʿışḳ bezminde maḥabbet sāzını*

4.	a.	Cümle ʿālem ʿışḳ aḥvālini göñlümden ṣorar*
	b.	Mest olduḳca kişinüñ söyledürler rāzını

5.	a.	Ebr gibi dāyim aġlarsa Revānī aġlasun
	b.	Bu felek cevrin mi çeksün yā güzeller nāzını

6.	a.	Her ne ṣayd olsa ḳaçar āvāzeden ḥikmet nedür
	b.	Ṣayd olur maḥbūblar işitse ḳaz āvāzını

-405-

feʿilātün feʿilātün feʿilātün feʿilün

1.	a.	Leblerüñ şevḳı yine bāde-perest itdi beni
	b.	Sāḳıyā cām·ı maḥabbet ḳatı mest itdi beni

2.	a.	Şimdi mi itdi ṣanursın bizi bed-nām şarāb *
	b.	Ṣōfī rüsvā·yı cihān cām·ı Elest itdi beni

3.	a.	Ol ṭabīb·i dil ü cān baña devā itse dürüst*
	b.	Ḫastelıklar ġam u derd ile şikest itdi beni

4.	a.	Kimseler ʿışḳ elinden yaḳamı ḳurtarımaz*
	b.	Çünki şeydā bu gün ol sāʿid ü dest itdi beni

5.	a.	Ben Revānī gibi meyẖāne yi terk eylemezin
	b.	Leblerüñ şevḳı yine bāde-perest itdi beni

-406-

fāʿilātün fāʿilātün fāʿilātün fāʿilün

1.	a.	Nice gitsün dōstum bu göñlümüñ ġamgīnligi
	b.	Kişiyi dīnden çıḳarur ẖaṭṭuñuñ bī-dīnligi*

2.	a.	Ol şehüñ zülfine ẖıdmetkār iderdük nāfeyi
	b.	Ey ṣabā bilsek nedür anuñ bize miskīnligi

3.	a.	Ṣalınur ol şehsüvāruñ tīġi düşüp yanına
	b.	Āh anuñ ḳattāllıġı vāy anuñ keskinligi*

4.	a.	Yār bir yüzi gözi açılmaduḳ maḥbūb idi
	b.	Āh kim āyīne ögretdi aña ẖodbīnligi

5.	a.	Şiʿri ṭūmārı Revānīnüñ çıḳaldan ʿāleme
	b.	Dōstum ṣatılmaz oldı ẖᾱcenüñ şīrīnligi*

-407-

feʿilātün feʿilātün feʿilātün feʿilün

1.	a.	Uzadup yār yine zülf·i semen-sālarını
	b.	Aṣmaġa ipe dizer vālih ü şeydālarını

2.	a.	Gül yüzinde ṭaġıdur zülf·i semen-sālarını*
	b.	Sünbül ile ṭonadur lāle·i ḥamrālarını

3.	a.	Egle ḥūrīler ile göñlüñi vāʿiẓ hele sen
	b.	ʿĀlemüñ biz sevelüm dilber·i ġarrālarını

4.	a.	Vaṣl·ı dildārı düşinde daẖi görmez ṣōfī
	b.	Germ olup söylemesün kimseye rūyālarını

5.	a.	Ey ṣaçı Leylī bugün añmaz idüñ Mecnūnı
	b.	Göñlümüñ görse idüñ dünki temāşālarını

6.	a.	Kāfir olmadum a sevdümse eger sen ṣanemi*
	b.	ʿIşḳuñuñ nice çekem ben ḳuru ġavġālarını*

7.	a.	Virse şeftālū Revānīye daẖi bāġından
	b.	Bekci dikmezdi aña nergis·i şehlālarını

-408-

fāʿilātün fāʿilātün fāʿilātün fāʿilün

1.	a.	Göreli ḥüsn ü leṭāfetle cihānda dilberi
	b.	ʿĀşıḳ·ı şūrīdenüñ gözine görinmez perī

2.	a.	Sīnemüñ her dāġıdur āyīne·i gītī-nümā
	b.	Mülk·i ʿışḳuñ şimdi bu göñlüm durur İskenderi

3.	a.	Germ olup ṣoḥbetde büyüklenmesün ʿāşıḳlara
	b.	Sāḳıyā biz bilürüz üskürecikden sāġarı*

4.	a.	Ġarḳ olurdı baḥr·ı ḥüsn içre gemisi ḳaşuñuñ*
	b.	İki yanından eger ṣalmasa zülfüñ lengeri

5.	a.	Ṣanmañ ancaḳ tīġidür ʿuşşāḳı yanından kesen
	b.	Söylemege ḳorḳarın ḳoltuḳdan işler ẖançeri*

6.	a.	Pençe·i eşʿāruma kimdür Revānī el ṣunan
	b.	Ḳandadur ortaya gelsün var mı bir meydān eri *

-409-

feʿilātün feʿilātün feʿilātün feʿilün

1.	a.	Mülk·i ġam şāhıyuz ey dil çalalum kūsumuzı *
	b.	Yerlere çalmayalum ġayret ü nāmūsumuzı

2.	a.	Zāhidā gel berü gel niçe niçe zühd ü ṣalāḥ
	b.	Yaḳalum odlara bes ẖırḳa·i sālūsumuzı

3.	a.	Kūyuña varmaġ içün devlet·i ḥüsnüñde ḳamer
	b.	Öñümüzde götürür her gice fānūsumuzı

4.	a.	Gel gel altunlu ḳabā ile ne ẖoş cilve urur
	b.	Bāġ·ı ḥüsn içre dilā seyr ide ṭāvūsumuzı*

5.	a.	Varalı yār diyārına göñül gelmedi hīç
	b.	Dutdılar gibi Revānī yine cāsūsumuzı*

-410-

mefʿūlü fāʿilātü mefāʿīlü fāʿilün

1.	a.	Dek ṭursa ṣōfī bilse eger kendü ḥālini
	b.	Yolmazdı şāne tel tel anuñ aḳ saḳalını*

2.	a.	Geçsün yere şu kimse güzellerle ʿayş idüp
	b.	Cām·ı şarāba virmeye Ḳārūn mālini *

3.	a.	Bir şemse yazdı muṣḥaf·ı ḥüsnine zülfi kim
	b.	Naḳḳāş·ı Çīn yazamaz anuñ mis̲ālini

4.	a.	Gerçi ḥarāmī gibi ṭutar irdügin şarāb
	b.	Sāḳī uṣanma biz umaruz alduḳ ālini

5.	a.	Aḳar Revānī ṣu gibi diller ayaġına
	b.	Ol serv·i nāz yürise ṣalını ṣalını

-411-

mefʿūlü fāʿilātü mefāʿīlü fāʿilün

1.	a.	ʿUşşāḳ oldı ḥalḳa·i zülfüñle ḥayderī
	b.	Cemʿ oldı bir yere yine iḳlīm erenleri

2.	a.	Leşker çeküp gelürdi işigine ay u gün
	b.	Bir gez diyeydi ol şeh·i ẖūbān bire beri

3.	a.	ʿIşḳı cihānda kendüye iş eyledi göñül
	b.	Böyle olur kişi olıcak maṣlaḥat eri

4.	a.	Mülk·i cemāli leşker·i ẖaṭdur bozan yıḳan
	b.	Mıṣr üstine çekildi yine Hind ʿaskeri*

5.	a.	Gördüm Revānī şiʿrüñ oḳur bir güzel bugün
	b.	Başında māh·ı nev gibi tāc·ı ḳalenderī

-412-

feʿilātün feʿilātün feʿilātün feʿilün

1.	a.	Ṣōfiyā gel berü iç sen de şarāb·ı ṣāfī
	b.	Ne olursañ ol a elden ḳoma tek inṣāfı*

2.	a.	Bu güzeller arasında yine ḥaẓẓ itdi göñül
	b.	Bāġbāndur ki gül ü lāle durur eṭrāfı

3.	a.	Ṣōfī daʿvā·yı velāyet ider ise ne ʿaceb*
	b.	Kişi kim mest ola artuḳ olur anuñ lāfı

4.	a.	Cevherīdür bu göñül ẖūb bilür maḥbūbı
	b.	Görmedüm ancılayın ben de cihān ṣarrāfı

5.	a.	Cām·ı mey gibi Revānī olımaz ṣoḥbetsüz
	b.	Ne ẖūyı var ise vardur hele göñli ṣāfī

-413-

mefāʿīlün mefāʿīlün feʿūlün

1.	a.	Egerçi ẖūbdur çengüñ ṣadāsı
	b.	Mey ü maḥbūbdur ṭabʿuñ cilāsı*

2.	a.	Ne ẕevḳı var lebüñsüz çarẖuñ ey meh
	b.	Ḳadeḥ kim meysüz ola yoḳ ṣafāsı*

3.	a.	Büyüdükce güzellense ne‿ola yār*
	b.	Güneş yükseldügince‿artar żıyāsı

4.	a.	Ölümlü dünyedür içüñ şarābı*
	b.	Ki ʿāşıḳlaruñ oldur ḳan bahāsı

5.	a.	Cihān ṭurduḳca ḥüsnüñ bāḳī olsun
	b.	Revānīnüñ budur saña duʿāsı

-414-

feʿilātün feʿilātün feʿilātün feʿilün

1.	a.	ʿIşḳ derdine taḥammül idemez ʿār ehli
	b.	Bu cihāndur güzelüm her bir işüñ var ehli

2.	a.	Ruẖı devrinde ḳazıtsa ne‿ola kāfir ṣaçını
	b.	Ḳaçan olur ki gire cennete zünnār ehli

3.	a.	Yükini yuḳarı yıġmazdı eyā ẖᾱce·i ḥüsn
	b.	Seni bir kerre göreydi ṣatu bāzār ehli

4.	a.	Şevḳ ṭāsında göñül möhresin oynatmaz idi*
	b.	ʿĀşıḳuñ olmasa nerrād gibi zār ehli

5.	a.	Aġzı vaṣfında Revānī didügüm nükteleri
	b.	Görse dem-beste vü ḥayrān ḳala güftār ehli

6.	a.	Yoḳ güzellerde ayaġını çeker sāḳīnüñ
	b.	Ey göñül olma ṣaḳın sen daẖi inkār ehli

-415-

feʿilātün feʿilātün feʿilātün feʿilün

1.	a.	Ey perī ḳanda idüñ kim yine dīvāne gibi
	b.	Dil·i āşüftemüz odlara düşüp yana gibi

2.	a.	Nice ḳan aġlamayam göz göre peymāne gibi
	b.	Dil mey·i ʿışḳ ile cūş eyledi meyẖāne gibi*

3.	a.	Hele bu gice kimüñ meclisinüñ şemʿi idüñ
	b.	Ki ḥased odına yaḳduñ beni pervāne gibi

4.	a.	Rindler meclisine varma emerler lebüñi
	b.	Gerçi el üzre ṭutarlar seni peymāne gibi

5.	a.	Gitmemiş daẖi başından es̲er·i cām·ı şarāb
	b.	Uyumamış bu gice nergis·i mestāne gibi

6.	a.	Zülf·i dildāra Revānī el uzatmış aġyār
	b.	Göreyin kim eli ḳurusun anuñ şāne gibi

-416-

mefāʿīlün mefāʿīlün feʿūlün

1.	a.	Öpülmezseñ ne ġam meclisde sāḳī
	b.	Ki ṣoḥbet bāḳī dirler yār bāḳī *

2.	a.	Cihānda mest·i bī-bākem yaḳam çāk
	b.	Çü var dilde güzeller iştiyāḳı

3.	a.	Sarāy·ı ḥüsn içinde ḳaşı imiş*
	b.	Biri birine ḳarşu iki ṭāḳı

4.	a.	Bu çarẖuñ lāciverdī ḳubbesinden
	b.	Göñül meyẖāne nüñ yegdür revāḳı

5.	a.	Şeh·i iḳlīm·i naẓm olduñ Revānī
	b.	Cihānı ṭutdı sözüñ ṭumṭurāḳı

-417-

fāʿilātün fāʿilātün fāʿilātün fāʿilün

1.	a.	Bu gice odamda bir tāze şikārum var idi*
	b.	Gülşen idi meclisüm kim gül-ʿiẕārum var idi

2.	a.	Geh emerdüm leblerüñ gāh oẖşar idüm ġabġabın
	b.	Şād idi göñlüm ki cām·ı ẖoş-güvārum var idi

3.	a.	Geh ḳucardum arḳasından gāh gögsinden anı
	b.	Bir kerem kānı mürüvvet ehli yārum var idi

4.	a.	ʿĀc ayaḳlu bir gümiş taẖt üzre ḳılmışdum ḳarār*
	b.	Pādişālıḳ eyleyüp ẖoş-rūzgārum var idi

5.	a.	Sīm ü zer yoġ idi inʿām eyleyeydüm aña kim*
	b.	Uşbu maʿnādan Revānī inkisārum var idi*

-418-

mefāʿīlün mefāʿīlün mefāʿīlün mefāʿīlün

1.	a.	Ḫaṭuñ ḳan itmege her dem yazar ḥükm·i hümāyūnı
	b.	Güzeller pādişāhınuñ bu mıdur resm ü ḳānūnı

2.	a.	Ṣalınsun ḳo ruẖuñ üzre ṣaçuñ ey Ḫusrev·i ẖūbān
	b.	Bunuñ gibi ẖoṭās ile ṭonatsañ ne‿ola Gülgūnı*

3.	a.	Göñül şehbāzına çalġı yeter sīnemde tāġ·ı ġam
	b.	Ayaġında anuñ gūyā elifler oldı uzunı

4.	a.	Göñül Mecnūn-ṣıfat abdāluñ olmış ey ṣaçı Leylī
	b.	Temāşā eyleñüz vardur yine abdāluñ oyunı*

5.	a.	Göñül ṭūmārı aʿmālüm gibi çünkim siyāh olmış
	b.	Ölürsem daẖi ḳomazın ben ol zülfi hümāyūnı*

6.	a.	Revānī kīmyā gibi işi altundur anuñ kim
	b.	Güzeller yolına ẖarc itmiş ola genc·i Ḳārūnı*

-419-

mefāʿīlün mefāʿīlün feʿūlün

1.	a.	Meyüñ altuna dönmiş yine rengi
	b.	Ḳumāş oldur kim ola ol firengī *

2.	a.	İşinde mest ʿāşıḳ ṣōfī ḥayrān
	b.	Bu ẖalḳuñ kimi serẖoş kimi bengī

3.	a.	İç aṣlanum çiçekler sāyesinde
	b.	Döşenmişdür yine naṭʿ·ı pelengī *

4.	a.	Raḳīb aġlamaġ ile yüz aġartmaz
	b.	Aġarmaz yunmaġ ile hīç zengī

5.	a.	Revānī göñlüm añmaz ad u ṣanı
	b.	Ne‿ider rüsvāyī olan nām u nengi

-420-

fāʿilātün fāʿilātün fāʿilātün fāʿilün

1.	a.	Ḥüsn ile āfāḳı ṭutmışdur nigārum gün gibi
	b.	Yalıñuz yügrük geçer ol şehsüvārum gün gibi

2.	a.	Gerdiş·i gerdūndan efġān eylemezdüm incinüp
	b.	Ġayrıya yüz virmese hercāyī yārum gün gibi

3.	a.	Dirler ey sīmīn-beden altuna ṣayd olur seni
	b.	İşidelden ḳalmadı hergiz ḳarārum gün gibi

4.	a.	Sāḳıyā bir cürʿa ṣunsañ cām·ı mihrüñden baña
	b.	ʿAyş ü ʿişretle geçerdi rūzgārum gün gibi

5.	a.	Yārdan görsem Revānī ẕerre deñlü merḥamet
	b.	ʿĀlem içinde olurdı iʿtibārum gün gibi

-421-

mefʿūlü mefāʿīlü mefāʿīlü feʿūlün

1.	a.	Dilber ḳızarur ḳılsa semendi cevelānı
	b.	Ṣan bād·ı ṣabā zeyn ider lālesitānı

2.	a.	Cāndan ṣaḳınur dil lebüñüñ sırrını cānā
	b.	Açmaḳ mı olur her kişiye rāz·ı nihānı

3.	a.	Nāz ile benüm göñlümi va'llāhi sen alduñ
	b.	Ben bilmezem ey dōst falānı vü fülānı

4.	a.	Hecrüñe düşüp bencileyin beñzi ṣarardı
	b.	Ey meh güneşüñ ṣanma ki vardur yeraḳānı

5.	a.	Ebrūñı Revānī ne‿ola yalvarup öperse
	b.	ʿĀdetdür öperler güzelüm çünki kemānı

-422-

fāʿilātün fāʿilātün fāʿilātün fāʿilün

1.	a.	Ṣanmañuz meyden ḳızarmışdur ruḥ·ı cānānumı
	b.	Öldürüp ben ḥastasın yüzine sürdi ḳanumı

2.	a.	ʿĀşıḳ olmış jāle sengi‿ile döger gögsini gül
	b.	Ḳanda görmiş bilmezem bu ġonca·i ḥandānumı

3.	a.	Māh·ı nev gibi güzeller bir birine dāyimā
	b.	Barmaġ ile gösterürler ol meh·i tābānumı

4.	a.	Ne ḳadar sengīn-dil iseñ raḥm iderdüñ sen aña
	b.	Ḳıṣṣayı cānā ṭuyarduñ oḳusañ destānumı

5.	a.	Nesneñüz yoḳdur Revānī çün şarāba virecek
	b.	Rehn·i mey eyleñ varup meyẖāne de dīvānumı

-423-

fāʿilātün fāʿilātün fāʿilātün fāʿilün

1.	a.	Ṣubḥ-dem ṭur sāḳıyā ṭoldur yine peymāneyi*
	b.	Rūşen eyle āfitāb·ı cām ile kāşāneyi

2.	a.	Virse maʿnādan ẖaber mescidde vāʿiẓ ṭañ mıdur
	b.	Kim ẖum·ı mey gibi ṭutmış gūşe·i meyẖāne yi

3.	a.	Nāzenīnler dāstān·ı ʿışḳumı dilden ḳomaz*
	b.	Ṭıfllar zīrā oḳurlar dāyimā efsāneyi*

4.	a.	Kūyuñuñ dārü'ş-şifāsında‿ey ṭabīb·i cān ü dil*
	b.	Ṭaḳdı zencīre gözüm yaşı bu ben dīvāneyi*

5.	a.	Dāmen·i şemʿi Revānī ḳoma elden irse şeb
	b.	Kim tekellüfsüz temāşā itdürür cānāneyi

-424-

feʿilātün feʿilātün feʿilātün feʿilün

1.	a.	Göñlümüñ gitmedi bir laḥẓa perīşānlıġı
	b.	Sāḳıyā ṣun berü şol derd olası ḳanlıġı

2.	a.	Ḫātem·i cām ile beylik ideyin ey sāḳī
	b.	ʿĀleme göstereyin ben de Süleymānlıġı

3.	a.	Ḳomaz elden bu göñül murġını hīç bir laḥẓa*
	b.	Vardur ol ġonca-dehānuñ daẖi oġlanlıġı

4.	a.	Gözi kāfirliġ ider kim ḳıra ʿāşıḳlarını
	b.	Öldürür mi göze göz bunca müselmānlıġı

5.	a.	Dilberüñ zülfi Revānīye dolaşmazdı eger*
	b.	Arada gözlerinüñ olmasa fettānlıġı

-425-

fāʿilātün fāʿilātün fāʿilātün fāʿilün

1.	a.	Ṣaḳlasa aġyārdan ʿāşıḳ ne‿ola cānānını
	b.	Her kişi ẓāhir durur ṣaḳlar belādan cānını

2.	a.	Yaza bir ḳuyruḳlu yılduz ḥükmini taḳvīmine
	b.	Görse zülfiyle müneccim ẖāl·i müşk-efşānını

3.	a.	Ey kemān-ebrū bu sīnem ġamzeñ oḳları ile
	b.	Kimseye añdurmaz oldı şimdi Oḳ Meydānını

4.	a.	Hep benüm yanumdan eyler ṣoḥbeti dil zülfüñe*
	b.	Bilmezem anuñ yılan mı çaldı yoẖsa yanını*

5.	a.	Cedvel içün lāciverd ezmiş felek altun güneş
	b.	Ḳılmaġa tezyīn Revānī bendeñüñ dīvānını

-426-

fāʿilātün fāʿilātün fāʿilātün fāʿilün

1.	a.	Ben nice teşbīh idem şemʿe o ẖadd·i meh-veşi
	b.	Şemʿ ẖod bir boġazı iplü ışıḳdur āteşī

2.	a.	Ol kemān-ebrūya dirlerse ʿaceb midür perī
	b.	Kim ḳanad olmış iki yanında anuñ terkeşi

3.	a.	Ṣaḥn·ı gülşende ṣanevber gibi göñüllenmese
	b.	Beñzedürdüm ḳāmet·i dil-cūña serv·i serkeşi

4.	a.	Çeşm·i mestüñden göñül ẖavf eyleyüp ḳaçsa ne‿ola
	b.	Ṭıfl olan cānā ḳaçar her ḳanda görse serẖoşı

5.	a.	Gözi yaşından Revānīnüñ ṣaḳın ey serv·i nāz
	b.	Kimseye ʿālemde çünkim aṣṣı ḳılmaz gözyaşı

-427-

mefāʿīlün mefāʿīlün mefāʿīlün mefāʿīlün

1.	a.	Ayırma ey felek benden o gün yüzli dilārāmı
	b.	Ki ansuz göñlümüñ hergiz ne ṣabrı var ne ārāmı*

2.	a.	Beni ḥayrān iden yāruñ lebiyle çeşmidür dāyim
	b.	Be-ġāyet ẖūb olur ḥalvā olıcak ḳarma bādāmı*

3.	a.	Ṣanevber sen gül-endāma ne var öykünse ey dilber *
	b.	Uzun boylularuñ ġāyet uzun olurmış endāmı

4.	a.	Seg·i kūyuñ baña ḳarşu gelür kūyuña varduḳca
	b.	Biri birine yārānuñ ne‿içün olmaya ikrāmı*

5.	a.	Meh·i nev sāġar·ı sīmīn şafaḳ gülgūn şarāb olmış
	b.	Hilāl-ebrū güzellerle Revānī eyle bayramı

-428-

mefʿūlü mefāʿīlü mefāʿīlü feʿūlün

1.	a.	Öldürdi bizi ġam ne‿idelüm māl ü menāli
	b.	Sāḳī getür e ortaya şol defʿ·i melāli

2.	a.	Meh-rūlara baş egmez iken devr·i felekde
	b.	Sevmiş deli göñlüm bu gün ol ḳaşı hilāli*

3.	a.	Çekdüm bir elif ḳaddüñ añup gögsüme cānā
	b.	Cān bāġına dikdüm yine bir tāze nihāli

4.	a.	Remmāle varup derdüme bir çāre bul ey dil
	b.	Bu ḳurʿa·i ʿışḳuñ baña ẖoş gelmedi fāli

5.	a.	Cān virse Revānī ne ʿaceb tāze-tırāşa
	b.	Bu yolda aġarmışdur anuñ çünki ṣaḳalı

-429-

fāʿilātün fāʿilātün fāʿilātün fāʿilün

1.	a.	Beñleridür zeyn iden ʿālemde ḥüsn·i dilberi
	b.	Kim be-ġāyet yaraşıḳdur Rūmilinüñ begleri*

2.	a.	Sevdügümden geldügince baġruma baṣsam ne‿ola
	b.	Bir yüzü ṣulu hilāl-ebrūya beñzer ẖançeri

3.	a.	Zülfüñe öykünmegin müşküñ derisin yüzdiler*
	b.	Kellelenmegin lebüñe ezdi yārān şekkeri

4.	a.	Ey ṣabā zülf·i ʿabīr-efşānı yetmez mi bize
	b.	Ṣaçını ḳoḳutma gel bi'llāhi añma ʿanberi *

5.	a.	Dāġlar urdı Revānī sīneme sulṭān·ı ʿışḳ
	b.	Ḫaymelerle nitekim ṣaḥrāya ḳonmışdur çeri

-430-

feʿilātün feʿilātün feʿilātün feʿilün

1.	a.	Āşinālıḳ senüñ ile ezelīdür ezelī
	b.	Bize nāz itme igende be güzeller güzeli

2.	a.	Mey içe içe ṣurāḥī boġazı virdi ele
	b.	Ṭuṭdılar sāġarı bulındı ḳızıl ḳanda eli

3.	a.	Ṣaḳın aldanma göñül vāʿiẓüñ uçarmasıdur
	b.	Ḳaçan olur ki melek ola nigāruñ bedeli

4.	a.	Zāhidā zühdüñ ile ṣanma ki cennet bulasın*
	b.	Kişinüñ mūcib·i cennet mi olurmış ʿameli*

5.	a.	Aġlamaḳdan nice olurdı ḥarābāt ehli
	b.	Zühdi ṣōfīnüñ eger olmasa idi ʿameli*

6.	a.	Naẓmuña ẖūblaruñ aġzı ṣuyı aḳsa ne‿ola
	b.	Çün Revānī saña bir būseye dir her ġazeli*

-431-

feʿilātün feʿilātün feʿilātün feʿilün

1.	a.	Görmege kūyuña varsam ne‿ola sen sīm-beri
	b.	Nūr görmege ider kişi Ḥicāza seferi

2.	a.	Reh·i kūyında iki çeşme durur dīdelerüm
	b.	Ki‿oldı müjgānlarum ey dōst anuñ lūleleri

3.	a.	Çıḳarur gül ṣuyını ʿārıżuñ üstinde ʿaraḳ
	b.	Leb ü ẖaddüñ bişürür günde şehā gül-şekeri

4.	a.	Dāġlarla ne ʿaceb sīnemi tezyīn itsem*
	b.	Donadurlar güzelüm āyinelerle siperi

5.	a.	Mey ü maḥbūba Revānī nice meyl eylemesün*
	b.	Zāhidā her kişinüñ çünki olur bir hüneri

-432-

mefʿūlü mefāʿīlü mefāʿīlü feʿūlün

1.	a.	Her dem güzelüm ġamzeñ ider cāna cefāyı
	b.	Zülfüñ getürür başuma her laḥẓa belāyı*

2.	a.	Āyīne ʿaceb mi yüzüñe olsa muḳābil
	b.	Çoḳ yüz gören ider ṣanemā terk ḥayāyı*

3.	a.	Meyden ḳızarup ʿarż·ı cemāl eyledi dildār
	b.	Gösterdi şafaḳdan ṣanasın şems liḳāyı

4.	a.	Göñlüm yine Mecnūn oluban ṭaġlara düşdi
	b.	Ey gözleri āhū seni arayı arayı

5.	a.	Öldürecegin ʿışḳ Revānīyi bilürdüm*
	b.	Çoḳdan oḳımışdum a begüm ben bu duʿāyı

-433-

feʿilātün feʿilātün feʿilātün feʿilün

1.	a.	Bir sipāhī güzelinüñ bugün oldum nökeri
	b.	Māh·ı nevdür ḳılıcı ḳabżası gündür siperi

2.	a.	Feraḥından atı altında ḳarār eyleyimez
	b.	Götürür berg·i güli niteki bād·ı seḥeri

3.	a.	Atı izine hilāli nice teşbīh ideyin
	b.	Ki hilāl ile anuñ ṭopṭoludur rehgüẕeri

4.	a.	Seyrine her kişinüñ māniʿ olan ẖançeridür
	b.	Yoẖsa ol yārı güzel gösterür altun kemeri

5.	a.	Mülk·i ḥüsn içre Revānī ne‿ola beglense nigār
	b.	Oldı ʿāşıḳları yanınca anuñ yeñiçeri

-434-

mefʿūlü fāʿilātün mefʿūlü fāʿilātün

1.	a.	Zülfüñ ġamı göñülden olmadı hīç ẖālī
	b.	Ḳad żāʿe fī hevāküm ʿömrī ve lā ˀübālī

2.	a.	Her gice itlerüñle kūyında ʿayş iderdüm
	b.	Yā leytenī mecālen fī ẕālike'l-ḥavālī

3.	a.	Ḳanlu yaşumdur iden rāzumı ẖalḳa peydā
	b.	Erḥam ʿalā dümūʿī yā men ʿalimte ḥālī

4.	a.	Ben nice teşne olam laʿlüñ firāḳı ile
	b.	Yā sāḳıyā aġıs̲nī min şerbeti'z-zülālī

5.	a.	Dāyim cefālarını çekmek gerek Revānī
	b.	Lā terḳabū vefāˀen ʿan ṣāḥibi'l-cemālī

-435-

feʿilātün feʿilātün feʿilātün feʿilün

1.	a.	Pend·i nāṣıḥla ḳaçan terk idem ol māh-veşi
	b.	Kimse balçıġ ile hergiz ṣıvayımaz güneşi

2.	a.	Gice ṣoḥbetde ḳomadum ki öpe yār elini
	b.	Beni oñarmaya gibi ḳadeḥüñ gözi yaşı

3.	a.	Ḳāmetüñ üzre görüp zülf·i siyāhuñ didi dil
	b.	Çıḳdı ṣan Kaʿbe menārına Bilāl·i Ḥabeşī*

4.	a.	Leb·i meygūnı ḥayālini göñül ṣaḳlayımaz
	b.	Ṣanasın ṣırça ḳadeḥdür görinür içi ṭaşı

5.	a.	Ḥüsn ilinde ḳılıç añılsa ne‿ola müjgānuñ
	b.	Devr·i çeşmüñde görüpdür niçe niçe ṣavaşı

6.	a.	Ḫaṭṭı var diyü Revānī ḳoma göñlüñde ġubār
	b.	Sen tırāş irtesi bir kerre gör ol māh-veşi*

-436-

feʿilātün feʿilātün feʿilātün feʿilün

1.	a.	Ḳılma dükkānı öñinde ṣaḳın ey dil zārī
	b.	Yoḳ durur ẖᾱcelerüñ ḳalb ile çün bāzārı*

2.	a.	Güzel oldur ki cihān ẖalḳı aña ʿāşıḳ ola
	b.	Ḫᾱce oldur kim anuñ çoġ ola ẖıdmetkārı

3.	a.	Bir yeşil ṭūṭī durur çarẖ sarāyuñda senüñ
	b.	Pādişāhum meh·i nev olmış anuñ minḳārı

4.	a.	Cān ṣatup derdini alsam baña ṭaʿn eylemeñüz
	b.	Bu cihāndur çün olur her kişinüñ bir kārı

5.	a.	Cān metāʿını aña ṣatmaġa dil dellāli*
	b.	Günde biñ kerre Revānī dolanur bāzārı*

-437-

feʿilātün feʿilātün feʿilātün feʿilün

1.	a.	Heves·i būselerüñ göñlümi cerrār itdi*
	b.	Dōstum vaʿdelerüñ anı ṭamaʿkār itdi

2.	a.	Gün gibi ʿarż·ı cemāl eyler iken pencereden*
	b.	Beni kūyıñda görüp ḳapuyı dīvār itdi

3.	a.	Fitnede ẖāl ü ẖaṭuñ eksügi yoḳdur ammā
	b.	Baña ne itdi ise çeşm·i siyehkār itdi

4.	a.	Ṭatlu dil dökmek ile almış idi göñlümüzi
	b.	Ṣormadan ẖande·i şīrīn ile iẓhār itdi

5.	a.	Sancaġ·ı āhı Revānī ne‿ola ḳaldursa göñül
	b.	Leşker·i ʿışḳa güzeller anı serdār itdi

-438-

mefʿūlü fāʿilātü mefāʿīlü fāʿilün

1.	a.	Sen ġonca-leb nigāra ne ẖoş gül didükleri
	b.	Ḫādim benefşe zülfüñe sünbül didükleri

2.	a.	Ṭoldurdı āh ü nāle ile gül ḳulaġını
	b.	Bilseñ ne ḳuş durur ya şu bülbül didükleri*

3.	a.	Sensüz baña ḥarām ola ey Ḫıżr·ı ẖaṭ nigār
	b.	Āb·ı Ḥayāt olursa eger mül didükleri

4.	a.	Mektūb·ı ḥüsne ḳaşları sernāme yazalı
	b.	Oḳınmaz oldı şimdi teressül didükleri

5.	a.	Gül mevsimi irişdi meye tevbe eyleme
	b.	Yoḳdur Revānī sende taḥammül didükleri

-439-

fāʿilātün fāʿilātün fāʿilātün fāʿilün

1.	a.	Āh kim āşüfte-dil bu zülf·i yār eyler beni
	b.	Gāh sergerdān ider geh bī-ḳarār eyler beni

2.	a.	Neyledüm nerrād·ı çarẖa ki‿ol meh·i bī-mihr içün
	b.	Şeş-der·i ġamda ḳoyup gör nice zār eyler beni

3.	a.	Ṣatdılar naḳḳāşlar Mecnūn diyü taṣvīrümi
	b.	Böyle rüsvā ʿāleme naḳş·ı nigār eyler beni

4.	a.	Göresin kim ʿışḳ meydānında ne tozlar ḳopar
	b.	Pādişāhum ġam yoluñda çün ġubār eyler beni*

5.	a.	Cismüm inceldüp Revānī iki bükdi ḳaddümi
	b.	Gūşına beñzer zamāne gūşvār eyler beni

-440-

mefʿūlü fāʿilātü mefāʿīlü fāʿilün

1.	a.	Aġzuma almadum şekerüñ daẖi adını
	b.	Mey içmeyen kişi ne bilür aġzı dadını

2.	a.	Meclisde cān-fezā lebüñe öykünüp şarāb
	b.	Dillere düşdi göz göre çekdürdi adını

3.	a.	Yoldan çıḳam diyü güzele eylemez naẓar
	b.	Bi'llāhi zāhidüñ görüñüz iʿtiḳādını

4.	a.	Görsün şarābı ṣırça ḳadeḥ içre dāyimā
	b.	Od ile görmeyen kişi ṣu ittiḥādını*

5.	a.	Göster dehān ü ebrū vü ḳadd ile zülfüñi*
	b.	Cānum Revānīnüñ çü bilürsin murādını

-441-

mefʿūlü fāʿilātü mefāʿīlü fāʿilün

1.	a.	Oldı melūl görmeyeli dil nigārını
	b.	Şol avcı gibi kim ḳaçurupdur şikārını

2.	a.	Ḥayfā Dırac ḳalʿası içinde bir ṣanem
	b.	Yaḳdı ẖarāb eyledi göñlüm ḥiṣārını

3.	a.	Ol lāle-ẖaddi bād·ı ṣabā cüst ü cū ḳılup
	b.	Arayı gitdi Arnavuduñ kūhsārını

4.	a.	Ol meh-liḳāyı bulmaġa ḳaṣd eyleyüp baña
	b.	Bu yerlerüñ güneşde arar her kenārını

5.	a.	Beg devletinde aġlama ol gül-ʿiẕār içün
	b.	Bulur Revānī himmet iderse hezārını

-442-

feʿilātün feʿilātün feʿilātün feʿilün

1.	a.	Cām·ı mey ḳomadı göñlümde ḳarār ey sāḳī
	b.	Tevbenüñ yıḳdı evin tāze bahār ey sāḳī

2.	a.	Māh aḳ gül gice sünbül gül·i nesrīn ẖurşīd
	b.	Vaḳtidür gel içelüm leyl ü nehār ey sāḳī

3.	a.	Naḳş-bend·i çemenüñ naḳşına aldanmayalum
	b.	Pāydār olmaz imiş naḳş ü nigār ey sāḳī

4.	a.	Bād gül şemsesinüñ ḳıldı zemīni çemeni*
	b.	Luṭf idüp sen daẖi ḳıl anda güẕār ey sāḳī

5.	a.	Mey aġız acılıġın virdügine incinme
	b.	Ḳoma sen āyine·i dilde ġubār ey sāḳī

6.	a.	Getür ortaya gül-āb·ı mey·i gül-fām getür
	b.	Derd·i ser virdi Revānīye ẖumār ey sāḳī

-443-

feʿilātün feʿilātün feʿilātün feʿilün

1.	a.	Gösterür cām·ı lebi ʿāşıḳa ʿayyāşlıġı
	b.	Ögredür ẖūblara gözleri ḳallāşlıġı

2.	a.	Güc ile bir kişinüñ oġlını sevdürdi baña
	b.	Ḳodı dil yirine ḥaḳ bu ki ḳarındaşlıġı

3.	a.	Dūd·ı āhumdan ele almaz idi ḳıl ḳalemin
	b.	Lāciverdī felegüñ olmasa naḳḳāşlıġı

4.	a.	Göñül at ṣalmaz idi göz göre ġam leşkerine
	b.	Mey·i gülgūnuñ eger olmasa yoldaşlıġı

5.	a.	Ḳadeḥi dolana çalmazdı bulup meclisde*
	b.	Bu Revānī ḳulunuñ olmasa evbāşlıġı

6.	a.	Ḫusrevā ṣu yerine aḳçayı ẖarc itmez idi
	b.	Devletüñde gözümüñ olmasa ṣubaşılıġı*

-444-

fāʿilātün fāʿilātün fāʿilātün fāʿilün

1.	a.	Hey nice çāk itmeye ʿāşıḳ yaḳasın gül gibi
	b.	Kim güzeller arasında bī-vefāsın gül gibi

2.	a.	Gel geç otur bezmümüzde cām·ı ʿişret al ele
	b.	Çün güzellik taẖtı üzre pādişāsın gül gibi

3.	a.	Dōstum lāyıḳ mıdur yapraḳ gibi ben ditreyem
	b.	Sen çemen bezminde yalıñuz yatasın gül gibi

4.	a.	Arta dursun devlet ü ḳadr·i şarāb eksilmesün
	b.	Sürdürür ʿāşıḳlarına çün ṣafāsın gül gibi

5.	a.	Nice bülbül-veş Revānī nāleler ḳılmaya kim
	b.	İki yüzlü bir semen-ten dilrübāsın gül gibi

-445-

fāʿilātün fāʿilātün fāʿilātün fāʿilün

1.	a.	Nevbahār irişdi yine geldi seyrān günleri*
	b.	Vuṣlat eyyāmı yetişdi geçdi hicrān günleri*

2.	a.	Pādişāhum baḳmaz olalı dil·i dīvāneme
	b.	Yüregüm oynar benüm geldükce dīvān günleri

3.	a.	Ḥalḳa ḥalḳa kākülinden seyr idersin ruẖların
	b.	Ey göñül unutma ṣaḳın bu perīşān günleri

4.	a.	Gün gibi ṭopını göge aġduran zülfüñ durur
	b.	Dōstum meydān senüñdür geldi çevgān günleri

5.	a.	Bu Revānīye nedür her gün cefā her gün ʿitāb
	b.	Ḳanda gitmişdür ʿaceb bu luṭf u iḥsān günleri

-446-

mefʿūlü fāʿilātü mefāʿīlü fāʿilün

1.	a.	Bezm·i viṣāl·i yār beni ẖurrem eyledi
	b.	Göñlümi bir ḳadeḥ mey ile ẖoş-dem eyledi

2.	a.	ʿIşḳ odına yaḳan beni göñül durur göñül
	b.	Gözden degüldür aġladuġum göz nem eyledi

3.	a.	Cān ẖastesı ṣaġalmaġa hīç çāre yoġ idi
	b.	Yāruñ lebine vardı göñül emsem eyledi

4.	a.	Ādemlik ögredür bu güzeller perīlere
	b.	Ol yār·ı bī-vefā niçesin ādem eyledi

5.	a.	Ḫaṭṭ·ı lebüñe gördi Revānīyi cān virür*
	b.	Āb·ı Ḥayāt ḳara geyüp mātem eyledi*

-447-

fāʿilātün fāʿilātün fāʿilātün fāʿilün

1.	a.	Geymiş altunlu ḳabāsını gül·i ḥamrā gibi
	b.	Oda urmış ʿālemi mihr·i cihān-ārā gibi

2.	a.	Sevdügüm ʿömrüm bugün dünyā vü yarın āẖıret
	b.	Bī-vefā olma baña cevr eyleme dünyā gibi

3.	a.	Ḫᾱn·ı zehr-ālūd·ı derd·i ʿışḳuñı ḥayrān olup
	b.	Bezm·i ġamda yidiler ʿāşıḳlaruñ ḥalvā gibi

4.	a.	Bāġ·ı ḥüsn içinde şol ayvā eñeklü dilberüm
	b.	Oynadur avcı içinde göñlümi alma gibi

5.	a.	Hīç ʿālemde Revānī olmaya bir ehl·i ḥāl
	b.	Baġrı başlu gözi yaşlu sāġar·ı ṣahbā gibi

-448-

feʿilātün feʿilātün feʿilātün feʿilün

1.	a.	Rūz·ı fürḳatde ne‿ider ʿāşıḳ olan pīreheni
	b.	Çünki maḥşerde göñül kimsenüñ olmaz kefeni*

2.	a.	Ġam·ı ẖaṭṭuñla ölürsem ṣanemā ḥaşre degin
	b.	Sebz cübbe‿örte benüm üstüme ḳabrüm çemeni*

3.	a.	Gül yüzüñ seyrine ṣanma ki ẖaṭuñ māniʿdür
	b.	Kendü kirpügüm olupdur baña gözüm dikeni*

4.	a.	Dōstum devlet·i ḥüsnüñde añarlar şimdi
	b.	Beni ʿuşşāḳ arasında güzeller de seni*

5.	a.	Māh u Pervīn mi bu yā her gice gerdūn ḳucar
	b.	Altun üsküflü gümiş dügmelü bir sīm-teni*

6.	a.	Bize endāmı güzel yār·ı vefādār olsa
	b.	Bāġbānā ne‿idelüm nārveni nestereni*

7.	a.	Mektebüñ içi Revānī güzel ile ṭoludur*
	b.	Çoġ olur ẖᾱcelerüñ ṭūṭī·i şekker-suẖeni*

-449-

fāʿilātün fāʿilātün fāʿilātün fāʿilün

1.	a.	Her kimüñ sīmīn-beden dilberler olsa hemdemi*
	b.	Ḫāṭırına gelmeye ʿömrinde hīç dünyā ġamı

2.	a.	Laʿl·i rengīnüñ görüp aġzuña öykündügiçün
	b.	Taşladı alup ele zerger nigārā ẖātemi

3.	a.	Gözlerüñdür ḥüsn meydānında iki küştgīr
	b.	Ki‿anlaruñ ey dilrübā ebrūlaruñdur perçemi*

4.	a.	Ḳaçmaz ādemden tekellüfsüz geçer ʿāşıḳlara
	b.	Ol perī-peyker nigārum ādemīdür ādemi*

5.	a.	ʿĀleme virmez Revānī gice gündüz ʿışḳını*
	b.	Bir güneş yüzlü ḳamer-çihreyle vardur ʿālemi

-450-

fāʿilātün fāʿilātün fāʿilātün fāʿilün

1.	a.	Tāze güldür gerçi dilber ẖārlardur hemdemi
	b.	Ḳıldı āvāre ṣabā gibi beni anuñ ġamı

2.	a.	Fürḳatüñde gözlerüm yaşıyle ġamgīn olmasa
	b.	Āteş·i āhumla ey dilber yaḳardum ʿālemi

3.	a.	Ḫışm ile her kimi kim görürse çeşmi öldürür
	b.	Hīç göstermez gözine ol melek-rū ādemi

4.	a.	Tāze ẖaṭṭ ile müzeyyen olduġı laʿl·i nigār
	b.	Bu ki ʿādetdür Revānī naḳş iderler ẖātemi

5.	a.	Laʿl·i dildāra Revānī dil uzatmış sehv ile
	b.	Sengsār itdi cihān ẖalḳı anuñçün ẖātemi*

-451-

fāʿilātün fāʿilātün fāʿilātün fāʿilün

1.	a.	Çün bahār irdi ḳoma cāmı elüñden gül gibi
	b.	Sāḳıyā söylet ṣurāḥīyi yine bülbül gibi

2.	a.	Ṭolu içüp öpmek istersem ruẖuñ ʿayb eyleme
	b.	Bir ḳadeḥ mey kendüyi cānā belürdür gül gibi

3.	a.	Şāne beñzer dil uzatmışdur muʿanber zülfüñe
	b.	Kim perīşān-ẖāṭır olmışdur yine sünbül gibi

4.	a.	Kimse yoḳdur dilrübālardan öñüñe gelecek
	b.	Çün ḳafādāruñ var ey dilber senüñ kākül gibi*

5.	a.	Mevsim·i güldür Revānī ḳoma elden cāmı kim
	b.	Olmaya bir meşrebi ṣāfī muṣāḥib gül gibi

-452-

feʿilātün mefāʿilün feʿilün

1.	a.	Yedi gül ʿārıżuñ ṭabancasını
	b.	Burdı zülfüñ benefşe pençesini

2.	a.	Bu güni irteye ḳomaz göñlüm
	b.	Hep şarāba virür gelencesini

3.	a.	Ḳararur mıydı sünbülüñ ḥüsni*
	b.	Çekmese zülfüñüñ şikencesini

4.	a.	Görmedük bir senüñ gibi fettān
	b.	Sevmişüz dilberüñ biz ancasını

5.	a.	Būse ile Revānī añsa ne‿ola
	b.	ʿĀşıḳuñ cānına ḳıyancasını

-453-

mefʿūlü fāʿilātü mefāʿīlü fāʿilün

1.	a.	Cām·ı şarāba eyler isek ne‿ola raġbeti*
	b.	Her kişinüñ elinde durur kendi ḥürmeti*

2.	a.	Ḥükmüñdedür bu ḳullaruñ ammā teraḥḥum it
	b.	Dirler yeñer efendi mürüvvet şerīʿati

3.	a.	ʿĀşıḳ metāʿ·ı dehre ṣaḳın virme göñlüñi
	b.	Sālik olanda olmaya dünyā maḥabbeti

4.	a.	Ferhādı kimse añmaz olupdur zamānede
	b.	Göñlüm ṭarīḳ·ı ʿışḳda arturdı ṣanʿatı

5.	a.	Tenhāda yār ile mey içermiş ḥarām ola
	b.	Şimdi Revānī başḳa görür oldı ṣoḥbeti

-454-

feʿilātün feʿilātün feʿilātün feʿilün

1.	a.	Zülfi Mūsā Yed·i Beyżā ruẖı ʿĪsā deheni
	b.	Ḳaşı Ẕü'n-nūn ḳara gözleri Veyse'l-Ḳarenī

2.	a.	Kūyınuñ ṭaşları ṭutdı yine bir reng·i ʿaḳīḳ*
	b.	Bu benüm ḳanlu yaşum Rūma getürdi Yemeni

3.	a.	Āşinālıḳ görinür ne‿ola lebüñden ṣorsam
	b.	Bu güzeller arasında gözüm ıṣırdı seni

4.	a.	Nāfe·i zülfüñ öger müşki ḳoyup bād·ı ṣabā*
	b.	Çīn ü Māçīne varup gezdi Ḫıṭā vü Ḫoteni

5.	a.	Ḫāme·i naẓm·ı Revānī nice baḥrīdür kim*
	b.	Aṣmadı kirpüginüñ ucına dürr·i ʿAdeni

-455-

mefʿūlü fāʿilātü mefāʿīlü fāʿilün

1.	a.	Yüz aḳlıġını ister iseñ yāsemen gibi
	b.	Gögsüñi açma ġonca·i gül-pīrehen gibi

2.	a.	Sen serv-ḳad yolında vücūdum ki ẖāk ola
	b.	Her yıl gelüp ayaġuñı öpem çemen gibi

3.	a.	Bu heyˀet ile ḳāmetüñe öykinür çınār
	b.	Nārin geçer ṭurup o daẖi nārven gibi

4.	a.	Erlik adıyla ʿāşıḳ añılmazdı dünyede
	b.	Ġam ḳalʿasına olmasa cismi beden gibi

5.	a.	Olmış Revānī çarẖ bugün āhenīn ḳafes
	b.	Şāʿir içinde ṭūṭī·i şekker-suẖen gibi

-456-

fāʿilātün fāʿilātün fāʿilātün fāʿilün

1.	a.	Dāyimā ṭolu ṣunarsın baña cām·ı bādeyi
	b.	Sāḳıyā nice ayaḳlarsın bu ben üftādeyi

2.	a.	Bir gedā maḥbūbını gördüm cihānda beglenür
	b.	Ḳul idinmez kendüzine degme bir begzādeyi*

3.	a.	Ben nice ol serv·i bālāya esīr olmayayın
	b.	Aña bende bulurın her gördügüm āzādeyi

4.	a.	Ṣōfī inkār idemez ḥüsnüñ kerāmātına kim
	b.	Ḫıżr bigi ṣuya ṣalmışdur ḥaṭuñ seccādeyi*

5.	a.	Būsesüz ṭolu içilmez sāḳıyā ibrāmı ḳo
	b.	Kimse tecvīz eylemez zīrā ẖilāf·ı ʿādeyi

6.	a.	Zīnet it her beytüñi naḳş·ı ẖayālāt ile kim
	b.	Kimse seyr itmez Revānī kimse beyt·i sādeyi

-457-

fāʿilātün fāʿilātün fāʿilātün fāʿilün

1.	a.	Ol ḳamer-ruẖsār bir dem baña dildār olmadı
	b.	Nice feryād itmeyem kim ṭāliʿüm yār olmadı

2.	a.	Bezm·i ġamda gözyaşından özge hemdem bulmadum
	b.	Āhdan ġayrı baña kimse hevādār olmadı

3.	a.	Gül gibi açılmadı aġlatmayınca bülbülin
	b.	Yār ḳanum içmeyince lāle-ruẖsār olmadı

4.	a.	ʿĀlem içre yapdılar luṭf u mürüvvet bābını
	b.	Bu yıḳılmış göñlüme bir kimse miʿmār olmadı

5.	a.	Menʿ iderlermiş Revānīden ṭavāf·ı kūyuñı*
	b.	Kaʿbeye vardıysa ḳıblem ol günāhkār olmadı*

-458-

mefāʿīlün mefāʿīlün feʿūlün

1.	a.	Eline lāle almış yine cāmı
	b.	Cihāndan almaġ içün intiḳāmı

2.	a.	Dutup yārı öper meclisde her dem*
	b.	Piyāle başı açuḳ bir ḥarāmī

3.	a.	Namāz içinde de bulsam nigārı*
	b.	Dönüp bizden yaña virmez selāmı*

4.	a.	Müsāfir olalı kūyında göñlüm
	b.	Gözine gösterür mi Mıṣr u Şāmı*

5.	a.	Revānī Ḫamseye baḳmazdı hergiz
	b.	Eger görse bu beş beyti Niẓāmī*

-459-

mefʿūlü mefāʿīlü mefāʿīlü feʿūlün

1.	a.	Meclisde ki bu naẓm·ı güher-bār oḳındı
	b.	Gūyā dügüne gelmege eşʿār oḳındı

2.	a.	Dīvānumı yazınsa ne‿ola şimdi güzeller
	b.	Mecmūʿalar içindeki güftār oḳındı

3.	a.	Rengīn varaḳ yazdı bugün şiʿrümi ẖāmem
	b.	Gülşende meger ol ẖaṭ·ı eşʿār oḳındı

4.	a.	Her yerde ṭurup sözlerümüñ baḥs̲in iderler
	b.	Ṣan medreselerde niçe Muẖtār oḳındı

5.	a.	Şīrīnlik içün yazdı Revānī lebi vaṣfın
	b.	Adına anuñ naẓm·ı şeker-bār oḳındı

-460-

feʿilātün feʿilātün feʿilātün feʿilün

1.	a.	Aġladur yār beni hemdem·i aġyār olalı
	b.	Dōstlar gülmemişüz ʿışḳa giriftār olalı

2.	a.	Kūyuña varmaġ içün sāyem ayaġuma düşer
	b.	Yine ʿizzetdeyüz ol serve hevādār olalı

3.	a.	Ayaġ üstinde ṣurāḥī ṭuruban ẖıdmet ider
	b.	Sāḳıyā hemḳadeḥ ol laʿl·i şeker-bār olalı

4.	a.	Biñini bir pula almaz ṣulu şeftālūlerüñ
	b.	Bu göñül būse·i dildāra ẖaridār olalı

5.	a.	Ḥükmine hīç muṭīʿ olmadılar dilberler
	b.	Bu Revānī neye irişdi divītdār olalı

-461-

fāʿilātün fāʿilātün fāʿilātün fāʿilün

1.	a.	Kimseler Mecnūndan farḳ eylemez aṣlā beni
	b.	Naḳş·ı dīvār eyledi şol ṣūret·i zībā beni

2.	a.	Bunca yıllıḳ kim ciger-gūşem durur āvāre dil
	b.	Uydı bir cānāneye āẖır ḳodı tenhā beni

3.	a.	Yār işigin beklerin ġayrı ḳapuyı bilmezin
	b.	Kendü gibi ṣanur ol mihr·i cihān-ārā beni*

4.	a.	Çeşm·i yārı sevdügümçün yolda ayaġum öper
	b.	Gözine göstermez iken nergis·i şehlā beni

5.	a.	ʿIşḳını cānda nihān itmişdüm ammā ne‿eyleyem
	b.	Āh u nālemdür iden ʿālemlere rüsvā beni*

6.	a.	Aḳçasuz pulsuz Revānī boynı baġlu ḳulıyın*
	b.	Hīç çeküp çevürmesün bu zülf·i ʿanber-sā beni

-462-

fāʿilātün fāʿilātün fāʿilātün fāʿilün

1.	a.	Her ki ʿīdüñ nūş ide cām·ı sürūr-encāmını
	b.	Bir güneş yüzlü güzelle giçürür eyyāmını

2.	a.	ʿĪd bezminde öpüşmekden ḳaçar meh-pāreler
	b.	Ben kime içsem gerek yā bu maḥabbet cāmını

3.	a.	ʿĀleme ḥükm eylesün ne‿eyler Süleymān möhrini
	b.	Ḫātem·i ʿayşa şu kim ḳazdurdı kendü nāmını

4.	a.	Dōst kāmīler içilür her ṭarafdan göñlüme
	b.	Zāhidā görmez misin dilberlerüñ ibrāmını

5.	a.	Bir güneş yüzlü hilāl-ebrūyı almış yanına
	b.	Bursa şehrinüñ Revānī eylemiş bayramını

-463-

mefāʿīlün mefāʿīlün mefāʿīlün mefāʿīlün

1.	a.	Yine ʿīd oldı ey dilber uçurdılar ṣalıncaġı
	b.	Melekler seyre gelsünler bugün görsünler uçmaġı

2.	a.	Cemāli ʿīdgāhında temāşā eyleñüz yāruñ
	b.	Bu göñlüm ṭıflına ḳurmış iki zülfi ṣalıncaġı

3.	a.	Felek dōlābına binmiş iki dilberdür ay u gün
	b.	Cihān eṭfāli ʿīd eyler hemān oġlan oyuncaġı

4.	a.	Ṣaḳalın uzadup ṣōfī yürür sīmīn ṣanemlerle
	b.	Aña bayram papasıdur diyü ẖoş itdiler lāġı

5.	a.	Revānī ʿīd erkānın bilürler çünki dilberler
	b.	Ne‿içün añmayalar bārī öpüşmegi ḳucuşmaġı

-464-

fāʿilātün fāʿilātün fāʿilātün fāʿilün

1.	a.	Cām·ı cān-efzāya ey sāḳī iderdi nisbeti*
	b.	Zāhid·i yābis-mizācuñ olsa rūḥāniyyeti

2.	a.	Ḫūblar ʿāşıḳlarından ictināb itmek neden
	b.	Beglerüñ ẖod ḳullar ile artuġ olur şevketi

3.	a.	Baña bir yüzden ṭoġup aġyāra mihrin gösterür
	b.	Gün gibi rūşen olupdur dilberüñ māhiyyeti*

4.	a.	Var ise başumda devlet öldürem aġyārı ben
	b.	Bu mes̲el meşhūrdur er öldürür er devleti

5.	a.	Vird idinse ger Revānī maṭlaʿ·ı eşʿārumı*
	b.	Ṭāliʿinüñ gün gibi artardı nūrāniyyeti

-465-

mefāʿīlün mefāʿīlün feʿūlün

1.	a.	Sözüm laʿl·i leb·i cānāna çıḳdı
	b.	Bu dür ol ḥoḳḳa·i mercāna çıḳdı

2.	a.	Şarāb u şāhidi menʿ itdi zāhid*
	b.	Yine ṣoḥbet bugün yārāna çıḳdı

3.	a.	Nice germ olmaya ʿālemde ẖurşīd
	b.	Güzellerle yine seyrāna çıḳdı

4.	a.	Lebüñüñ şekkerini ögmek içün
	b.	Sözüm ṭūṭīsi Hindustāna çıḳdı

5.	a.	Revānīnüñ elinde ṭopṭolu cām
	b.	Yine meyẖāne den rindāne çıḳdı

-466-

feʿilātün feʿilātün feʿilātün feʿilün

1.	a.	Gelüñüz ẖoş ṭutalum cām ile eyyāmumuzı
	b.	Ne olursa görevüz ṣoñra serencāmumuzı

2.	a.	Gözüñ aç ḥāleti çoḳdur mey·i nābuñ ṣōfī
	b.	Meclis içinde tehī görme ṣaḳın cāmumuzı

3.	a.	Nice teşbīh ideyin ʿarʿara bād·ı ṣabā*
	b.	Biz yabanlarda mı bulduḳ o gül- endāmumuzı

4.	a.	Yine bir būse alup cānumuza cān ḳatalum
	b.	Ger ḳabūl eyler ise yār bu ibrāmumuzı

5.	a.	Ne ḳadar ẖᾱr ü ẕelīl itse Revānī beni yār
	b.	Biz aña arturalum ʿizzet ü ikrāmumuzı

-467-

mefʿūlü fāʿilātü mefāʿīlü fāʿilün

1.	a.	Ḳoma göñülde sen güzelüm kibr ü kīneyi
	b.	Āyīne gibi baġruña baṣ ben kemīneyi

2.	a.	Gencīne·i vefāyı ṭaġıt ḳullaruña kim
	b.	Leşker çoġ olsa begler açarlar ẖazīneyi*

3.	a.	Āyīneyi siyāset içün aṣdı rūy·ı yār
	b.	Zülfi ʿaceb mi dizse ipe ʿanberīneyi

4.	a.	Sengīn göñüllü ẖūblara virme göñlüñi*
	b.	Ṭaşlara çalma ʿāḳil iseñ ābgīneyi*

5.	a.	Ġam baḥrine Revānī düşüp ġarḳ olmadı*
	b.	Sāḳī Ḫıżırlıġ eyle yetişdür sefīneyi

-468-

feʿilātün feʿilātün feʿilātün feʿilün

1.	a.	Ṭāliʿüm yār degül yār·ı cefākār gibi
	b.	Gün mi gösterdi baña çarẖ·ı sitemkār gibi

2.	a.	Doġdı şol kimselerüñ başına devlet güneşi
	b.	Ki ḳapuñ beklediler sāye·i dīvār gibi

3.	a.	Kimseler dāyireme gelmez iken devrüñde*
	b.	Çarẖ sergeşte idüpdür beni pergār gibi

4.	a.	And içerlerdi ḥamāyil gibi başuma ezel
	b.	Şimdi döndürdi yüzin her kişi ṭūmār gibi

5.	a.	Ger ṣadef gibi tehī-dest iseñ ġam yime kim
	b.	Sözlerüñ var Revānī dür·i şehvār gibi

-469-

mefāʿīlün mefāʿīlün mefāʿīlün mefāʿīlün

1.	a.	Gerekmez ʿışḳ bezminde bize sāḳī mey·i nābı
	b.	Gözüm cāmına yetmez mi ola mey eşk·i ẖūn-ābı*

2.	a.	Yaḳardı micmer·i ʿışḳa göñül çün cān buẖūrından*
	b.	Ne‿iderler müşk·i Tātārı ne‿iderler ʿanber·i nābı*

3.	a.	Gözüm bu rişte·i cisme ḳo dizsün ḳaṭra·i eşki
	b.	Kişi tesbīḥ idinse ʿaceb mi dürr·i ẖoş-ābı

4.	a.	Görinen māh·ı nev ṣanmañ ʿibādet ehlidür gerdūn
	b.	Yeşil seccādesi üzre yazılmış şekl·i miḥrābī

5.	a.	Revānī ẖıdmeti ile ne var maḳbūl·i şeyẖ olsa*
	b.	Mürīd olan ṭarīḳında bilür çün cümle ādābı

-470-

feʿilātün feʿilātün feʿilātün feʿilün

1.	a.	Ne‿ola ṣovuḳluḳ ile geçse şitā devrānı*
	b.	Hele sāḳī mey·i nābuñ ıṣıcaḳdur ḳanı*

2.	a.	Kūyuñuñ itleridür şād iden göñlümüzi
	b.	Kişi ġāyet feraḥ olur göricek yārānı

3.	a.	Ben aña nice perī nice melekdür diyeyin*
	b.	Āb·ı Ḫayvān sözidür lebleri ādem cānı

4.	a.	Ḳo beni aġlayayın ḥüsnüñüñ eyyāmında
	b.	Nevbahāruñ güzelüm ẖūb olur bārānı

5.	a.	Derdmend oldı Revānī düşeli ʿışḳa ṭabīb
	b.	Şimdi ol kendüzine de bulımaz dermānı

-471-

mefāʿīlün mefāʿīlün mefāʿīlün mefāʿīlün

1.	a.	Görüp ḥayrān u zār olsam ʿaceb midür Cihān Şāhı
	b.	Kim aña bende·i kemter olup durur cihān şāhı

2.	a.	Benüm bir altun üsküflü nigār·ı āfitābum var*
	b.	Baña ʿarż eyleme germ olma igen ey felek māhı*

3.	a.	Gözüm yılduz ṣayup aġlar giceyle şevḳ·ı rūyuñdan
	b.	Ṣanasın bir müneccimdür ki māh olmış naẓargāhı

4.	a.	ʿAceb mi āsitānuña irişe āhum ey mey-rū*
	b.	Ġarībüñ yerde ḳalmaz çün irişür göklere āhı

5.	a.	Revānī bendesi olmaḳ yeter çün devlet ü iḳbāl
	b.	Getürme göñlüñe daẖi hevā·yi manṣıb u cāhı

-472-

mefʿūlü fāʿilātü mefāʿīlü fāʿilün

1.	a.	Ḳıldı şarāb bülbül·i gūyā güzelleri
	b.	Gül gibi açdı bāde·i ḥamrā güzelleri

2.	a.	Sünbül degül mi zīnet iden naẖl·i gülleri
	b.	Açsa ʿaceb mi zülf·i muṭarrā güzelleri

3.	a.	Göñlümi yārdan ayırup alımayalar
	b.	Bir yaña olsa götüri dünyā güzelleri

4.	a.	Biñ yıllıḳ āşinālıġı terk eyledi göñül
	b.	Bir kerre görmek ile bu raʿnā güzelleri*

5.	a.	Cānānesin Revānī alurdı ḳucaġına
	b.	Bir kimse olsa eylese yaġmā güzelleri*

-473-

fāʿilātün fāʿilātün fāʿilātün fāʿilün

1.	a.	Bī-vefā dildār imişsin böyle bilmezdüm seni
	b.	Hem-dem·i aġyār imişsin böyle bilmezdüm seni

2.	a.	Gūşe·i dükkāna geçmişsin nigārā gül gibi
	b.	Şāhid·i bāzār imişsin böyle bilmezdüm seni

3.	a.	Göñlümi nāzüklük ile alup inkār eyledüñ
	b.	Hey ne nāzük yār imişsin böyle bilmezdüm seni

4.	a.	Kāküli vaṣfında güftārum görüp dilber didi
	b.	Sözde ḳıl yarar imişsin böyle bilmezdüm seni

5.	a.	Göñlini alduñ Revānīnüñ ʿaceb siḥr eyledüñ
	b.	Sen ẖo bir seḥḥār imişsin böyle bilmezdüm seni

-474-

feʿilātün feʿilātün feʿilātün feʿilün

1.	a.	Bāġ·ı ḥüsnüñde görüp dil ẖaṭuñı āh didi
	b.	Başuma bu ḳara yazu nedür eyvāh didi

2.	a.	Sünbül·i zülfüñi gülşende benefşe görüben
	b.	Bükülüp ʿömrüñ uzun yarıcuñ Allāh didi

3.	a.	Ruẖlaruñ bedrine ṭuş oldı gözüm dilde revān
	b.	Siḥr ile indi meger yeryüzine māh didi

4.	a.	Terk·i tecrīd oluban ʿışḳını pīr idineli
	b.	Her ne emr ider ise dilde e vallāh didi*

5.	a.	Ṣıdḳ ile baṣdı Revānī çü ḳadem ẖıdmetüñe
	b.	İşini Ḥaḳ başara aydalum Allāh didi

-475-

fāʿilātün fāʿilātün fāʿilātün fāʿilün

1.	a.	Çarẖ·ı dūn-perver virür erbāb·ı fażla ẕilleti
	b.	Cāhilüñ günden güne olur ziyāde rifʿati

2.	a.	Ḳanda bir cāhil görürseñ manṣıbı aʿlādadur
	b.	Maʿrifet ḥācet degül ol devletī ol devletī

3.	a.	Mest·i lā-yaʿḳıl durur devlet şarābından yine
	b.	Ḳadri ʿālī cāhilüñ maʿlūm anuñ keyfiyyeti