MUSAMMAṬLAR

-1-

DER NAʿT·İ SEYYİDÜ'L-MÜRSELĪN

mefāʿilün feʿilātün mefāʿilün feʿilün

I

1.	a.	Dilā cihāna naẓar it ki Ḥażret·i Ṣāniʿ
	b.	Cemīʿ·i ṣunʿına dünyāyı eyledi cāmiʿ

2.	a.	Kemāl·i ḳudreti ās̲ārıdur iki ʿālem
	b.	ʿAceb mi ẖalḳ·ı cihān olsa emrine ṭābiʿ

3.	a.	Nedür bu ḳaṣr·ı muḳarnes nedür bu şemse·i nūr
	b.	Nedür bu ṭāḳ·ı zer-endūd u ḥöcre·i vāsiʿ

4.	a.	Nedür bu kürsī·i zerrīn nedür bu ṭāḳ u revāḳ
	b.	Nedür bu ṣīt ü ṣadā ki‿oldı ʿāleme şāyiʿ

5.	a.	Nedür bu ṭop·ı muʿallaḳ nedür bu saḳf·ı refīʿ
	b.	Ne ẖūb vażʿlar iḥdās̲ idüp durur vāżıʿ

6.	a.	Ḳanı ya ḥūr u ḳuṣūr u ya Cennet·i Aʿlā
	b.	Ki ʿayş u ʿişret içün anda yoḳ durur māniʿ

7.	a.	İki cihānı anuñçün müzeyyen itdi Ḫudā
	b.	Kim ola şaʿşaʿa·i nūr·ı Muṣṭafā lāmiʿ

8.	a.	Bahār·ı gülşen·i ẖılḳat gül·i riyāż·ı vücūd
	b.	Nigīn·i mühr·i risālet nişān·ı nāme·i cūd

II

1.	a.	Ne ẕātdur kim anı medḥ ider Ḫudā·yı Aḥad
	b.	Şerīf nāmına dirler Muḥammed ü Aḥmed

2.	a.	Bahār gülleri yüz ṣuyın eyledi taḥṣīl*
	b.	Ḳaçan ki ġarḳ·ı ʿaraḳ oldı ol ʿiẕār u o ẖad

3.	a.	Vücūdı iki cihān ẖalḳınuñ ümīdi durur
	b.	Saʿādet ehline olmışdur işigi mesned*

4.	a.	Ne ẖᾱcedür ki gedālar ġanī olur anda
	b.	Şefāʿati ḳapusında kimesneye yoḳ red

5.	a.	İdindi luṭfını sermāye vaḳt·i ẖācetde
	b.	Ḥabāb gibi ḳalanlar cihānda ṣıfrü'l-yed

6.	a.	Kemāl·i luṭfına ḥad yoḳ ki ḳıldı ümmetine
	b.	Egerçi şerʿ·i metīni içinde vardur ḥad

7.	a.	Şefāʿatine cihān ẖalḳı muntaẓır elḥaḳ
	b.	Vücūdı ʿālem·i ʿuḳbāya devlet·i sermed

8.	a.	Celīs·i ẖāne·i vaḥdet enīs·i ḥöcre·i cān
	b.	Muʿīn·i bay u gedā pādişāh·ı kevn ü mekān

III

1.	a.	Şerīf ẕātını ẖalḳ itdi nūrdan Ḫālıḳ
	b.	Keremler itdi ne var ise luṭfına lāyıḳ

2.	a.	Cihānda başına gün ṭoġmaz idi ṣubḥuñ eger
	b.	Cemāli nūrına olmasa ʿāşıḳ·ı ṣādıḳ

3.	a.	Ne ẖulḳ olur bu ki ẖalḳı idindi kendüye ḳul
	b.	Ne ḥüsn olur bu ki Allāhdur aña ʿāşıḳ*

4.	a.	Görildi niçe niçe muʿcizātı ʿālemde
	b.	ʿAceb mi cümle nebīlerden olsa ol fāyıḳ*

5.	a.	Elinde eyledi tesbīḥ ẖurde·i aḥcār
	b.	Öñinde berre·i biryān olup durur nāṭıḳ

6.	a.	Cemāli çihre·i islāma virdi zīnet ü zīb
	b.	Niteki eyledi rūşen cihān yüzin şārıḳ

7.	a.	Cihān vücūdınuñ ol cānıdur ḥaḳīḳatde
	b.	Ki ẖılḳati anuñ olmışdı cümleden sābıḳ

8.	a.	Ṭırāz·ı ẖılʿat·i dünyā vü eşref·i ādem
	b.	Emīr·i tāc·ı nübüvvet ser-āmed·i ʿālem *

IV

1.	a.	Eyā güzīn·i beşer saña yoḳ durur hemtā
	b.	Senüñ ḳudūmüñ ile buldı zīneti dünyā

2.	a.	Ḳamer ki ẖāme·i engüştüñ ile şaḳḳ oldı
	b.	Berāt·ı muʿcizeye urdı zer-nişān ṭuġrā*

3.	a.	Nübüvvetüñ eli Mūsāyı aldı pençesine
	b.	Egerçi ʿāleme gösterdi ol Yed·i Beyżā

4.	a.	İçürse himmeti Ḫıżra ʿaceb mi Āb·ı Ḥayāt
	b.	Anuñ dirisi durur daẖi Ḥażret·i ʿĪsā

5.	a.	Yem·i nübüvvete Yūnus olup durur ġavvāṣ
	b.	Dür·i saʿādete ẕāt·ı şerīfidür deryā

6.	a.	Kelāmı ile güher ṭoldı dürc·i lā-uḥṣā
	b.	Cemāli nūrına ġarḳ oldı burc·i ev-ednā

7.	a.	Ḳaçan ki medḥüñ içün ẖāmeyi ele aldum
	b.	Göñül ṣaḥīfesine eyledüm bunı inşā

8.	a.	Muḳīm·i dār·ı nübüvvet müsāfir·i eflāk
	b.	Ḫulāṣa·i dü cihān u netīce·i eflāk

V

1.	a.	Şu dem ki ẕerrece nūra cihān idi muḥtāc
	b.	Görinmez olmış idi zer-nigār taẖta·i ʿāc

2.	a.	Müneccim idi felek kim nücūm aḥkāmın
	b.	Yazardı ṣafḥa·i gerdūna idüp istiẖrāc

3.	a.	İrişdi peyk·i saʿādet ki yaʿni Cebrāyīl
	b.	Getürdi berḳ gibi bir Burāḳ u ẖılʿat ü tāc

4.	a.	Felek ki ʿāleme ḳurmışdı ẖayme·i nīlī
	b.	Sütūnı miḥver ü māh olmış idi aña kömāc

5.	a.	Geyindi ẖılʿat ü tācı Burāḳa oldı süvār
	b.	Yetişdi ḥażrete buldı metāʿ·ı ḳurb ü revāc

6.	a.	Ne şāhid idi nübüvvet ki ʿārıżında anuñ
	b.	Siyāh perçem·i pür-çīn idi şeb·i Miʿrāc

7.	a.	Gelüp Resūli ṣaḥābe ziyāret eylediler
	b.	Niteki ṣıdḳ u ṣafā ile Kaʿbeyi ḥuccāc

8.	a.	Żıyā·yı mihr·i şerīʿat şuʿāʿ·ı nūr·ı yaḳīn
	b.	Çerāġ·ı dīde·i islām u şemʿ·i ẖāne·i dīn

VI

1.	a.	Ṣafā·yı vaṣf·ı cemīlüñle ey güzīn·i beşer
	b.	Diler ki ẖāme yaza midḥatüñde bir defter

2.	a.	Kim anı zīnet ide Çār Yār evṣāfı
	b.	Çihār gūşesi tā beytümüñ bula zīver

3.	a.	Biri ki Ḥażret·i Ṣıddīḳdür ṣafāsından
	b.	Maḥabbetüñ deñizinde ol idi pāk güher*

4.	a.	Biri de Ḥażret·i Fārūḳdur ki dünyāda
	b.	ʿİbādet eylemek idi işi güci yekser*

5.	a.	Biri de ṣāḥib·i nūreyn Ḥażret·i ʿOs̲mān
	b.	Kim aña ḥilm ü ḥayā oldı bende vü çāker

6.	a.	Birisi Ḥażret·i Ḥaydar ki Ẕü'l-feḳārı ile
	b.	Müdām rāh·ı ġazāda ol idi ser-leşker*

7.	a.	İlāhī irişe bir demde biñ selām ü dürūd
	b.	Müdām bendeden evlād ü āle tā maḥşer

8.	a.	Mekīn·i taẖt·ı saʿādet sezā·yı tāc ü külāh
	b.	Kerīm ü müşfiḳ·ı ʿālem ḳasīm·i luṭf·ı İlāh*

VII

1.	a.	Ḳaçan olur seni medḥ ide bile ehl·i kemāl
	b.	İder çü vaṣf·ı cemīlüñ Ḫudā·yı celle celāl

2.	a.	Bahār·ı muʿcizüñ ās̲ārı ey Nebiyyu'llāh
	b.	Yemiş bitürdi şu dem kim dikildi ẖuşk nihāl

3.	a.	Cihān içinde olan muʿcizātuña ḥad yoḳ
	b.	Bu ḳudreti saña virmişdür Īzid·i Müteʿāl

4.	a.	Diler saʿādet·i pā-būsuñ ile ola ʿazīz
	b.	Ḳamer ki eyledi naʿleynüñe hilāli düvāl

5.	a.	Şefāʿatüñden umar cümle mücrim ü ʿāṣī
	b.	Şu gün ki ṣorıla dünyāda işlenen efʿāl

6.	a.	ʿAceb Revāni ḳuluñuñ nice ola ḥāli
	b.	Ki ẖıdmetinde anuñ var durur niçe ihmāl

7.	a.	Ne var żaʿīf ise umar ḳapuñda ʿizz ü şeref
	b.	Ki ẖoş görürler anı gökde olmaġ ile ẖilāl

8.	a.	Ṣafā·yı behcet·i imrūz u ḥālet·i ferdā
	b.	Ümīd·i yevm·i ḳıyāmet şefīʿ·i rūz·ı cezā*

-2-

MERS̲İYE·İ SULṬĀN MAḤMŪD

feʿilātün feʿilātün feʿilātün feʿilün

I

1.	a.	Olma dünyāya sen ey ẖᾱce igende māyil
	b.	Gözüñ aç ʿibret ile eyle naẓar ey āḳil

2.	a.	Naḳdüñi virme bu çarẖuñ yeşil altunlusına
	b.	Köhnemişdür boyanursın ṣaḳın olma ġāfil

3.	a.	Sen ceres gibi fiġān eylemegi terk itme
	b.	Çün fenā menziline baġlanur āẖır maḥmil

4.	a.	Yollar üstinde güneş gibi yüzüñ ẖāk eyle
	b.	Āsumān tā ki ḳura ẖaymeñi menzil menzil

5.	a.	Giceler yan yaḳıl yumma gözüñ bīdār ol
	b.	Şemʿ-veş olmaġa isterseñ eger rūşen-dil *

6.	a.	Baġruña ṭaş baṣup ayaġa düş kūh-mis̲āl
	b.	Tā ki ser-çeşme·i maḳṣūda olasın vāṣıl

7.	a.	Çünki dās·ı meh·i nevle biçilür ʿömr ekini
	b.	Mezraʿ·ı sebz·i felekden kişiye ne ḥāṣıl

8.	a.	Yoḳ durur çünki cihān içre dilā hīç ḥużūr
	b.	Devlete ʿāḳil olan olmaya hergiz maġrūr

II

1.	a.	Dūd·ı āh ile cihān yüzi olup yine siyāh
	b.	Görinür ẖāme devāt ile baña ṣūret·i āh

2.	a.	Ferz gibi felek·i kec-revüñ oyunları çoḳ
	b.	Her kimi taẖta geçürdi didi āẖır aña şāh

3.	a.	Kemerinden yapışup sāye gibi yire çalar
	b.	Gün gibi başına urmışken anuñ tāc u külāh

4.	a.	Cām·ı faġfūrīyi çarẖ almasun artuḳ eline
	b.	Şemʿ·i kāfūrīyi hergiz daẖi yaḳmasun māh

5.	a.	Baş açuḳ yalıñ ayaḳ ṭaġa düşer nergis-vār
	b.	Dīde·i ʿibret ile ʿāleme kim ḳılsa nigāh

6.	a.	Gül kimüñ yañaġıdur lāle kimüñ çihresidür
	b.	Diye bir bir ṣorana ḥāl dili ile giyāh

7.	a.	Pehlevānken niçenüñ yire getürdi püştin
	b.	Küştgīr·i felek olmaz kişiye püşt ü penāh*

8.	a.	Yansun odlara güneş göklere boyansun dūd
	b.	Ḳanı ol şāh·ı felek-mertebe Sulṭān Maḥmūd

III

1.	a.	Tāc u taẖtı ḳoyuban ideli ʿuḳbāya sefer
	b.	Tīġ ḳara geyüben iki büküldi ẖançer

2.	a.	ʿĀlemüñ gözi aġarmış durur aġlamaḳdan
	b.	Merḳadi üstine ṣanmañ ki ḳurıldı çāder

3.	a.	Yüregin pāreledi ḥasretine döyemeyüp
	b.	Böyle āhen-dil iken şāh ġamından şeşper

4.	a.	Ḳanı ol şeh ki simāṭında felek çīnī idi
	b.	Cūy·ı ḳadrinde güneş olmış idi nīlūfer

5.	a.	Ṭīb·i aẖlāḳı içün ʿanber·i ter geydi siyāh
	b.	Bezm·i ġarrāsı içün odlara yandı micmer

6.	a.	Var ise her sözi bir dürr idi ṭabʿı ʿummān
	b.	Ki ḳaṭār ile yanınca çekilürdi cevher

7.	a.	Urdı çün ʿömri berātına ecel ṭuġrāsın
	b.	Yüzi aġlar ḳalemüñ hīç açılmaz defter

8.	a.	Çeşm·i şehzādeye çün irdi bu dem ẖᾱb·ı ecel
	b.	Erisün şemʿ·i şeb-efrūz ḳo yansun meşʿal

IV

l.	a.	Devlet atından inüp ol şeh·i Cemşīd-nişān
	b.	Ḳıldı tābūtı bu dem kendüzine taẖt·ı revān

2.	a.	Gülşen·i salṭanatuñ serv·i gül-endāmı idi
	b.	Serv-veş anuñ içün eyledi ẖāk içre mekān

3.	a.	Ṣıdı ol dürr·i girān-māyeyi çün seng·i ecel
	b.	Acıyup yüzine urdı kef·i bī-ʿad ʿummān*

4.	a.	Görmeyelden o şehüñ meclis·i rūḥ-efzāsın
	b.	Ḳana boyandı ḳadeḥ şemʿler oldı giryān

5.	a.	Göge boyasa ne‿ola cāmesini māh·ı münīr
	b.	Güneşüñ ṭutsa ne‿ola rūyını ġamdan yeraḳān*

6.	a.	Gūşe·i çarẖda ṣanmañ ki şafaḳdur görinen
	b.	Aġlamaḳdan felegüñ gözine oturmış ḳan

7.	a.	Hecrine döyemeyüp çekdi elif gögsine tīr
	b.	Ḥasret ü derdi ile ḳaddini nūn itdi kemān

8.	a.	Aġlamaġ ile ḳızıl ḳana boyandı sancaḳ
	b.	Kendüyi pāreledi ḳatlanımadı bayraḳ

V

1.	a.	Yā İlāhī dilegüm bu ki‿ola cennetde muḳīm
	b.	Luṭf u iḥsānuñ ile aña ire nāz u naʿīm

2.	a.	Raḥm idüp merḥamet it ol şehe kim bendeñdür
	b.	Çünki yoḳ sencileyin bir daẖi Raḥmān u Raḥīm

3.	a.	Nūn-veş gūşe·i ʿadnüñde ne‿ola ṭutsa vaṭan
	b.	Raḥmetüñ içre ḳarār itse ne var niteki mīm*

4.	a.	Raḥmetüñ nūrına gün gibi olup müstaġraḳ
	b.	Türbesinde ṭura ḳandīl-ṣıfat ʿarş·ı ʿaẓīm

5.	a.	Āẖıretde keremi ẖᾱnı Revānī çoḳdur
	b.	Dār·ı dünyāda anuñçün dinür Allāh Kerīm

6.	a.	Cennet ehli arasında anı mümtāz eyle
	b.	Virmiş idüñ çün aña luṭf u kerem ṭabʿ·ı selīm*

7.	a.	Çün sefer itdi baḳā mülkine ol dünyādan
	b.	Şāh devletle ola taẖt·ı ḥayāt üzre muḳīm

8.	a.	Şeh·i ẖurşīd-nişān ẖusrev·i gerdūn-ʿaẓamet
	b.	Ṭura başında anuñ gün gibi tāc·ı devlet

-3-

MERS̲İYE·İ SULṬĀN ʿALEMŞĀH

mefʿūlü fāʿilātü mefāʿīlü fāʿilün

I

1.	a.	Tīr·i belā vü miḥnete ādem nişān imiş
	b.	Dest·i zamānede bu felek bir kemān imiş

2.	a.	Çarẖuñ zamāne ehline ḥükmi revān geçer
	b.	Zīrā berātına güneş altun nişān imiş

3.	a.	Şekl·i hilāl kim görinür burc·ı çarẖdan
	b.	Aḥvāl·i ʿālemi dimege bir zebān imiş

4.	a.	Bu çarẖ·ı pür-sitāre ki gevher-fürūşdur
	b.	Bāzārı ḳoñ anuñla ki sūdı ziyān imiş

5.	a.	Bir tābẖānedür felek·i lāciverd-naḳş
	b.	Bir iki üç gün anda kişi mīhmān imiş

6.	a.	Ol gülsitān·ı luṭf u ṣaʿādet ḳanı görüñ
	b.	Kim göz yaşı anuñ içün āb·ı revān imiş

7.	a.	Bir ejdehā durur ne umarsın bu çarẖdan
	b.	Ḳavs·i ḳuzaḥ ki görinür aña dehān imiş

8.	a.	Bārī yıḳılsa çarẖ bozılsa bu bārgāh
	b.	Gün ṭoġmasaydı ʿāleme görinmeseydi māh

II

1.	a.	Ne‿içün yüzini yerlere urur ki āfitāb
	b.	Yā ḳara yaṣlu gibi ne‿içün yaş döker seḥāb *

2.	a.	Gök cāmesini māh ne‿içün egnine alur
	b.	Yā aḳ ridāsını niye atar yere şihāb

3.	a.	Ne‿olmış ki pāre pāre ider kendüzini ẖaṭ
	b.	Ḳana neden boyadı yüzin ṣafḥa·i kitāb

4.	a.	Bāʿis̲ ne ḥayret ile ṣalar serv başını
	b.	Mūcib nedür ki ṣuya atar tācını ḥabāb*

5.	a.	Ḥikmet nedür ki bülbül ider dāyimā fiġān
	b.	Bu nice sır durur ki geyer ḳaralar ġurāb

6.	a.	Muṭrib eliyle çeng niye ṣaçını yolar
	b.	Def gögsini gerüp ne içün iñiler rebāb

7.	a.	Dīvāne-veş bu ẖalḳ niçe döginüp yürür
	b.	Ne‿içün fiġān u zārī ḳılurlar ya şeyẖ ü şāb

8.	a.	Şeb aldı egnine yine ḳara libāsını
	b.	Şehzādenüñ meger ṭutar ol daẖi yasını

III

1.	a.	Mātem ṭutup durur aña serv·i revān daẖi
	b.	Baġrında baş olupdur anuñ āşiyān daẖi

2.	a.	Dīvāne oldı ṭaşlar ile döginüp yürür
	b.	Başı açuḳ yalıñ ayaḳ āb·ı revān daẖi

3.	a.	Çün ser-firāz olmadı ol serv·i salṭanat
	b.	Çāk eylesün yaḳasını gül gülsitān daẖi

4.	a.	Oldı çü yer yüzinde bunuñ gibi ḥādis̲e
	b.	Ḳan aġlamaġa başladı ẖalḳ·ı cihān daẖi*

5.	a.	Bārān degül durur yere gökden revān olan
	b.	Tükürdi ʿālemüñ yüzine āsumān daẖi

6.	a.	Ḳıldı ḳılıc bu mātem içün cāmesin siyāh
	b.	Boynını egdi gördi bu ḥāli kemān daẖi

7.	a.	Tīri atuñ yabana vü elden ḳılıcı ḳoñ
	b.	Ṭopraġa düşdi çünki şeh·i kāmrān daẖi

8.	a.	Şehzāde·i yegāne ʿAlemşāha ḥayf u āẖ
	b.	Ol server·i zamāneye ol şāha ḥayf u āh

IV

1.	a.	Tesbīḥ idüp ḥabābı geçürsin ḳo cūybār
	b.	Ḳılsun duʿāyı ravżada el ḳaldurup çınār

2.	a.	Ben dimezem ki öldi vü gitdi zamāneden
	b.	Bir genc idi ki gizledi ẖāk içre rūzgār

3.	a.	Ṭaġ üzre ṣanmañuz görinenler bulut durur
	b.	Bir ḳara çul alup durur egnine kūhsār

4.	a.	Şimşek degül durur görinen bang·i raʿd ile
	b.	Bir odlu āhıdur feleküñ olmış āşikār

5.	a.	Yanında ḳulları ḳaralar ṣarınup ṭurur
	b.	Gülzār·ı luṭf çevresi olmış benefşezār *

6.	a.	Ṣayyād·ı çarẖ yine niçe ḥīle itdi kim
	b.	Devlet ġażanferini bu dehr eyledi şikār*

7.	a.	Ol şehriyāra ẖayf ki daẖi cuvān idi
	b.	Devlet hümāsına ḳapusı āşiyān idi*

8.	a.	(Eksiktir. Hemistich missing.)
	b.	(Eksiktir. Hemistich missing.)

V

1.	a.	Yā Rabbi rūḥ·ı pākine cennet maḳām ola
	b.	Hem-ṣoḥbeti Resūl ʿaleyhi's-selām ola

2.	a.	Rıḍvān u ḥūr hem-dem ü yārı olup müdām
	b.	Kevs̲er şarābını içe ʿayşı müdām ola

3.	a.	Her gūşesini seyr ide gülzār·ı cennetüñ
	b.	Her yaña şāẖ·ı Ṭūbī gibi ẖoş-ẖırām ola

4.	a.	Dünyāda hükmi nāfi idi ẖalḳ·ı ʿāleme
	b.	Cennetde ḥūrīler daẖi emrine rām ola

5.	a.	Vaḳt oldı kim Revāni şehe idesin duʿā
	b.	Sözi igen uzatma ki ẖayrü'l-kelām ola*

6.	a.	Söyündi ise bād·ı fenādan o şemʿ·i luṭf
	b.	Şol āfitāb·ı burc·ı kerem müstedām ola

7.	a.	Ṭolundı ise kevkeb·i burc·ı şeref bu dem*
	b.	Devlet göginde mihr·i saẖā ber-devām ola

8.	a.	Dünyāya ey göñül ide mi ʿāḳil iʿtimād
	b.	Dārāyı añma Kisrīyi ḳo ḳanı Keyḳubād

-4-

ḲAṢĪDE·İ REVĀNĪ BERĀY·I SŪR·İ FERHĀD PAŞA

mefʿūlü fāʿilātü mefāʿīlü fāʿilün

I

1.	a.	Mesrūr ḳıldı ʿālemi bu sūr·ı pür-sürūr
	b.	Zī meclis·i şerīf ü zihī ʿālem·i ḥużūr

2.	a.	Oldur cihān ʿarūsına zīb ü bahā viren
	b.	Kem çeşm bu zamānede ḥüsninden ola dūr *

3.	a.	Oldur cihānda ġayret·i ẖuld·ı berīn olan
	b.	Kim ẖılḳatinde yoḳdur anuñ ẕerrece ḳuṣūr

4.	a.	Cennet hevāsını unudur zīnetin gören
	b.	Ölmek ẖayāli ẖāṭırına eylemez ẖuṭūr*

5.	a.	Ḳaçan buẖūr eyleseler ʿūd u ʿanberi
	b.	Micmer aṣardı her yañadan zülf ü ʿayn·ı hūr*

6.	a.	Firdevs bāġı güllerinüñ naẖlidür bu mūm
	b.	Ki‿uçmaġa ṭurur anda ẓuhūr eyleyen ṭuyūr

7.	a.	Meclis ḳıyāmet oldı ayaġ üzre geldi şemʿ
	b.	Müˀmin gibi yüzinde ne var berḳ urursa nūr

8.	a.	Ḫıdmet zamānı geldi çü ġılmāna gel diñüz
	b.	Zeyn eylemege meclisi Rı�vāna gel diñüz

II

1.	a.	Sāḳī getür şarābı ḳo ḥūrī kelāmını
	b.	Darü's-selāmuñ almadı meclis selāmını*

2.	a.	Şerbet yerine kişi şarāb·ı Ṭahūr içer
	b.	Gösterdi ẖalḳa niʿmeti cennet ṭaʿāmını

3.	a.	Beñzer ki misk nāfesini açdı her ḳadeḥ
	b.	Ṭoldurdı ẖoş ḳoẖu ile ʿālem meşāmını*

4.	a.	Her gördügine baş ḳoyuban ṭolular içer
	b.	Meclisde gör ṣurāḥīlerüñ iltiyāmını

5.	a.	Ḳan derlere batup ayaġ üstinde ẖoş ṭurur
	b.	Ḫıdmetde sāġaruñ görüñ e ihtimāmını

6.	a.	Seyrāna çıḳdı ay ile gün çarẖ ṭamına
	b.	Bu defʿa ṣoḥbetüñ göricek izdiḥāmını*

7.	a.	Dāyim ne ʿayş olur bu nice ṣoḥbet·i laṭīf
	b.	Cennetde dirler idi bu ʿişret devāmını

8.	a.	Cennet mi sūr ki‿eyledi şerbetleri sebīl
	b.	Kimi şarāb·ı Kevs̲er içer kimi Selsebīl*

III

1.	a.	Bu nice sūr olur bu ḳıyāmetdür ey felek
	b.	Bir ḥūrī ile cemʿ ola dünyāda bir melek

2.	a.	Gerdūn ile şafaḳ mı bu yāẖod ṣaçu içün
	b.	Birisi al aṭlas u biri yeşil beñek

3.	a.	Ṣanmañ şihābdur gice bezminde görinen
	b.	Güller ṣaçardı meclise gerdūn etek etek*

4.	a.	Ay ile gün getürdi iki nūrdan ṭabaḳ
	b.	Çarẖuñ simāṭına ṣıġa mı bu bişen yimek

5.	a.	Ḳanına aş yererdi her açuñ şol iştihā
	b.	Meclis içinde baġlamasaydı anı çörek

6.	a.	Yollu yolınca ḳondı yine şekker āleti
	b.	Bekler öñinde fīller ile atlar yedek

7.	a.	Çeşm·i zamāne görmeye bu sūr gibi sūr
	b.	Biñ yıl daẖi dönerse felekler çeküp emek

8.	a.	Gün gibi çarẖa girse ne‿ola cām·ı pür-neşāṭ
	b.	Bu bezme māh sofra durur Kehkeşān simāṭ

IV

1.	a.	Görmiş felek meger şeb·i ḥınnāsına yaraḳ
	b.	Ḥınnā degül mi kāsesi içindeki şafaḳ

2.	a.	Yılduz gibi fişekler atılduġını görüp
	b.	Seyrāna geldi cümle kevākib be baḳ be baḳ

3.	a.	Bu bezm içinde māh ile gerdūn gūyiyā
	b.	Bir ẖūb çengīdür ki açılmış boyun ḳulaḳ

4.	a.	Bu āsumānī ḳubbeye baş egmedi hele
	b.	Dāne birinç ile görinen şu yeşil ṭabaḳ

5.	a.	Şeftālūsını almaludur māmūniyyenüñ
	b.	Senbūse bezm içinde hemān emmelü ṭudaḳ*

6.	a.	Yer yüzi ṭoldı ẖalḳ·ı cihān ṭoydı niʿmete
	b.	Andan felek gedāları almış çanaḳ çanaḳ

7.	a.	Hep ṣu yerine şerbet idi anda içilen
	b.	Kim gördi bunı kim ola ṣu içmege yasaḳ

8.	a.	Sāḳī ḳo şerbeti şu mey·i ẖoş-güvārı gör
	b.	Bu sūr ẖıdmetine irişen bahārı gör

V

1.	a.	Bezme piyāleler nice rindāne geldiler
	b.	Devrān güzelleri yine meydāna geldiler

2.	a.	Bu orta yerde devr iden ṭolular degül
	b.	Ay u güneş bu meclise seyrāna geldiler

3.	a.	Nergisle lāle ayaġı üstinde ṭuramaz
	b.	Gözinde anlaruñ yine mestāne geldiler

4.	a.	Güller piyāle almış ele ġoncalar yatuḳ
	b.	Anlar bu bezme şöyle levendāne geldiler

5.	a.	Yer öpdiler şükūfeyi görüp benefşeler
	b.	Ḥaḳ bu ki pīr öñine yetīmāne geldiler

6.	a.	Bu sūr medḥin itmege aġız bir itdiler
	b.	Şol tāze ġoncalar ki gülistāna geldiler

7.	a.	Çeng ü rebābı söyledi bezm içre muṭribā
	b.	Çün ʿarż·ı ḥāl·i āṣaf·ı devrāna geldiler

8.	a.	Ferhād-nām ḥażret·i paşa·yı kāmyāb
	b.	Kim ehl·i fażla işigidür merciʿ ü meˀāb

VI

1.	a.	ʿĀlemde ʿizz ü devlet ile kāmrān ola
	b.	Ṣadrı vezāretüñ aña dāyim-mekān ola

2.	a.	Meydān·ı rezm içinde yanar od durur hemān*
	b.	Anuñla ṭutuşa ya nice pehlevān ola*

3.	a.	Şol gün ʿadū öñinde ki ser-keşlik eyleye
	b.	Ḫançer hilāl aña felek bozdoġan ola

4.	a.	Şeh devletinde Şāmı ne var fetḥ eylese
	b.	Anuñ ki gün gibi ḳılıcı zer-nişān ola*

5.	a.	Nām u nişān Revāniye medḥüñ yeter hemān
	b.	Naẓmum ʿarūsına umaram kim nişān ola

6.	a.	Vaṣfuñda tāze naẓmumı Saʿdī görüp didi
	b.	Yā gülsitān ola bu yaẖod būstān ola

7.	a.	Gül deste deste ola benefşe demed demed
	b.	Şol gülşenüñ içinde ki ol bāġbān ola

8.	a.	Ḫāmem ẖayāl güllerinüñ naẖl-bendidür
	b.	Naẓmum sevād ẖaṭṭ ile şehrüñ levendidür

VII

1.	a.	ʿĀlem bu naẓm·ı tāze ile nevbahār olur
	b.	Rengīn sözümle rūy·ı zemīn lālezār olur

2.	a.	Meclisde oḳınursa eger tāze sözlerüm
	b.	Ṣoḥbet içinde her yaña güller nis̲ār olur

3.	a.	Bu nice naẓm olur ki cihān ʿāşıḳı geçer
	b.	Raʿnā güzel gibi ne ʿaceb şīvekār olur

4.	a.	Bir söz ile açıldı yine niçe ġoncalar
	b.	Gül gelmesün bu meclise kim şermsār olur

5.	a.	Rengīn sözümi kāse·i şemse yazar felek
	b.	Altun ḳadeḥde ṣanki mey·i ẖoş-güvār olur

6.	a.	Yazılsa vaṣfı ḥaşra degin olmaya tamām
	b.	Yüz biñ kitāb olursa daẖi iẖtiṣār olur

7.	a.	Evṣāf·ı sūr şöyle ḳıyāmet yazıldı kim
	b.	Maḥşer olınca ẖalḳa bu bir yādigār olur

8.	a.	Ḥaḳ devletini ṣāḥibinüñ eylesün mezīd
	b.	Her gicesini Ḳadr ide her bir günini ʿīd*

Manuscript Variants

1. BS., SE. Tevḥīd·i Ḫudā·yı ʿazze ismuhu lā yümkinu ḥadduhu veresmuhu, BU. * 1.II.2.a. gülleri: günleri, BU. * 1.II.3.b. olmışdur: olmış durur, SE. mesned: sened, SE. * 1.III.3.b. Allāhdur: Allāh durur, BU. * 1.III.4.a. Görildi: Görindi, SE. * 1.III.8.b. Emīr·i: Emīn·i, SE. * 1.IV.2.b. muʿcizeye: muʿcizüñe, SE. * 1.VI.3.b. pāk güher: yek gevher, BU. * 1.VI.4.b. yekser: eks̲er, BU. * 1.VI.6.a. Birisi: Biri de, SE. * 1.VI.8.a. taẖt·ı: baẖt u, SE. * 1.VI.8.b. Kerīm·i: Kerīm ü, BU. müşfiḳ·ı: müşfiḳ u, SE. * 1.VII. -BU. 2. BS., Mers̲iye·i Revānī Berāy·ı Sulṭān Maḥmūd, SE * 2.I.5 b. olmaġa isterseñ eger: olmaġ eger ister iseñ, SE. * 2.II.7 a. getürdi püştin: getürd'arḳasını, SE. * .IV.3 b. bī-ʿad: bī-ḥad, SE. * 2.IV.5 a. māh·ı: mihr·i, SE. * 2.V.3 a. ne‿ola: ne var, SE. * 2.V.6 a. arasında anı mümtāz: arasında‿anı müsellem, SE. 3. BS., Mers̲iye·i Revānī Berāy·ı ʿAlemşāh, SE. * 3. BS. 44b, SE. 28a .* 3.II.1 b. ne‿içün: niçe, BS. * 3.II.4 b. atar: ata, SE. * 3.III.3 b. yaḳasını gül: yaḳayı gül·i, SE. * 3.III.4 a. Oldı çü: Çün oldı, SE. * 3.III.5 a. olan: olup, SE. * 3.IV. Görüldüğü gibi bu bend eksikdir. SE. nüshasında 4.beyitle 5.beyit arasında 1 beyitlik boşluk var. * 3.IV.5.b. çevresi: ravżası, SE. * 3.IV.6.b. dehr: dem, SE. * 3.IV.7.b. ḳapusı: işigi, BS. * * 3.V.7.a. Ṭolundı: Ṭolındı, SE. * 3.V.7.b. saẖā: felek, SE. * 4. SE., et-Tercīʿ, BS., Terkīb·i Bend, BU. * 4. BS. 42b, BU. 25a, SE. 43a. * 4.I.2.b. Kem çeşm bu: Kim çeşm·i bed, BU. * 4.I.4.a. gören: görüp, BU. * 4.I.5.a. ʿanberi: ʿanberīn, BU., SE. * 4.II.1.b. almadı: eyledi, BS., SE. * 4.II.3.b. ḳoẖu: ḳoḳu, BU. * 4.II.6.b. göricek: görüben, BU. * 4.II.8.a. şerbetleri: şerbetlerin, BU. * 4.III.3.b. ṣaçardı: açardı, BU. * 4.IV.5.b. ṭudaḳ: ṭuṭaḳ, BS. * 4.VI.2.a. yanar od: bir āteş, BU. * 4.VI.2.b. Anuñla ṭutuşa ya: Anuñ ile ṭutuşa, BU., SE. * 4.VI.4.b. zer-nişān: zer-feşān, BS. * 4.VII.8.a. eylesün: eyleyüp, BU. * 4.VI.4.b. zer-nişān: zer-feşān, BS. * 4.VII.8.a. eylesün: eyleyüp, BU.